1-2. Othukumela heeni mprofeti Hagayo aahimmawe weera waamweereya mahuku ahu ala?

“IMINUUTU vakhaani ilooxa, ipretiyu sakhalayi saapatxera ophotowela ntoko ikarta.” “Atthu ootheene yaathukumela .  . . Atthu antxipale yaahimme weera othukumela iwe waavinre iminutu miili paahi. Mene wa miyo waakhala ntoko etthu yoohimala”. Iya ikomentariyu saatthu yaavulunwe epheyo etokotoko oNepal eyaakha ya 2015. Waakhanle nyuwo mwaari weiwo khamwaakela ottiwala yooweereya ela.

² Mahuku ahu ala, ninkhala ehuhu yoothukumeliha, othukumeliha iwo khooneereya musidaderu naari elapo emoha mene atthu a maloko ootheene annaphwanyiwa mwa iyaakha sintxipale. Mprofeti Hagayo aahima weera othukumeliha iwo waarowa weereyaka mahuku ahu ala. Owo olempe ha: “Niwoko ti siso ùlummaiye Yahvéh anakhotto: Evinreene ehuhu vakhaani ‘miyo kinrowa othukumeliha erimu etthaya, emaka ni olumwenku.’”—Hag. 2:6.

3. Mwaha wa heeni ninhimaahu weera othukumela ohimmwale ni mprofeti Hagayo woovirikana ni ottikinyeya wa etthaya?

³ Othukumela mprofeti Hagayo aahimmawe, khohiyono wa onanariha wa etthaya naari itthu, mene onnakumihera itthu sooreera. Yehova muneene ohimme ha: “Kini kithukumelihe miloko sothene. Vavale mihakhu sa miloko sothene sini siruhiwe wenno ni miyo kini kisarihe epewe ela ovuwa”. (Hag. 2:7) Yaataphulela heeni eprofesia ela wa atthu yaale yaakhala ehuhu ya mprofeti Hagayo? Ni entaphulela heeni wa hiyo olelo va? Nnoorowa woona waakhuliwa waya ni muteko heeni onaapakiha atthu a maloko ootheene othukumela.

4. Eheeni yaamweerinhe Yehova omuruma mprofeti Hagayo?

⁴ Yehova anvaha muteko wootepa ontthuneya mprofeti Hagayo.  Moone ele yaakhumelenle ahinaaye ovahiwa yoothanleliwa eyo. Oweharu mprofeti Hagayo aari eriyari yaatthu yaale yaakhumme oBabilonia eyaaka oYerusalemu eyaakha ya 537 A.E.C. Ephiyakaru oYerusalemu arumeyi ale a Muluku yaapatxera oteka etemplu empa ya Yehova. (Ezra 3:8, 10) Evirakaru ehuhu vakhaaneene yaaheereya etthu yooripiha murima amwiittanaaya yaapatxera waakhulumula etthunaka owootxeeliha oteka etemplu. (Ezra 4:4; Hag. 1:1, 2) Eyaakha ya 520 A.E.C., Yehova aamuruma mprofeti Hagayo weera aalipihe ni aakhavihere otthikela oteka etemplo. *—Ezra 6:14, 15.

5. Mwaha wa heeni mitthenka sa mprofeti hagayo salipinhaaya atthu a Muluku?

⁵ Mitthenka mprofeti Hagayo aarummwalaawe ni Yehova waaleela aYuda saakhalano Yoolakela yoolipiha nroromelo na aYuda. Moolipa murima owo aahaaleela atthu ale yaakhulumunwe eeraaka: “Olipihe makhuva weyo muloko wootheene wa elapo ti ehako ya Yahvéh anakhotto. Nvareke muteko miyo kiri ni nyuwo ti ehako ya Yahvéh anakhotto.” (Hag. 2:4) Masu ooweera “Yahvéh anakhotto,” yaahaalipiha aYuda. Mwaha wooweera Yehova ookhalano anakhotto antxipale malaika ammwiiwelela owo. Waakhanle weera yannatthuna okhumela nnene, aYuda waannatthuneya omuroromela Yehova.

6. Othukumeliha heeni mprofeti hagayo aahimmawe ni yookhumelela yaari teevi?

⁶ Yehova aamuruma mprofeti Hagayo etthu yeeraaya weera, ethukumelihe miloko sootheene. Mitthenka sa mprofeti Hagayo sahaalipiha aYuda ale mpaka ovirelela oteka etempulu. Mitthenkaiyo waakhala nto Yehova aaleela aYuda weera aamwaathukumeliha aPersia. Moone weera, ole waari olamulela woolipa waakhaviheriwa ni maloko mantxipale. Yookhumelela yaari teevi? Yoopatxera atthu a Muluku yanwera oteka epewe ni othukumana vamoha ni atthu yahaakhanle aYuda weera emukokhorele Muluku. Mweekhaikhai mutthenka wa mprofeti Hagayo waari woolipiha otepaxa weene waatthu a Muluku!—Zak. 8:9.

7. Olelo ninkhavihera muteko heeni onthukumeliha maloko? Muthalihe?

⁷ Eprofesia ya mprofeti Hagayo entaphulela heeni mahuku ahu ala? Eprofesia ele khaiyono yakwanenle mahuku a Hagayo paahi mene ennakwanela mahuku ahu ala. Mene hiyo nooheliwa mpuwa mwene mwemmo. Muupuwele etthu yeereñye eyaakha ya 1914. Omwene wa Muluku waapatxera olamulela wiirimu Yehova anvara Yesu weera akhale mwene oomweneene yoowo. (Nsal. 2:6) Mitthenka saahimmwale saahaaxupa “anamahoolela a mulaponi—ehuhu yaathanleliwe maloko yakwanela”—mmasu makina ehuhu yaavinre Yehova ahilamulelaka yakwanela. (Luka 21:24) Mwayeeyo opatxera eyaakha ya 1919 arumeyi oororomeleya a Muluku yaapatxera “olaleya mitthenka sooweera Omwene wa Muluku” yooweherera yooreera yaatthu. Olaleiwa mitthenka iyo saahaathukumeliha atthu a maloko ootheene a ehuhu ele.—Math. 24:14.

8. Moovarihana ni Nsalmu 2:1-3, mitthenka heeni sinaathukumeliha atthu?

⁸ Atthu anoonela hayi mitthenka ninlaleyaahu? Antxipale a yaawo kheenaakhulela. (Mmusome Nsalmu 2:1-3.) Miloko sinnathukumela. Awo annamukhootta namalamulela othanliwe ni Muluku. Wa yaawo, mitthenka sa Omwene ninlaleyaahu,  khahiyono “mitthenka sooreera.” Mpakano anamalamulela annakhoottiha muteko woolaleera. Nnaamweera anamalamulela awo yaakhulelaka weera aninvarela Muluku, khantthuna ohula matata wa olamulela ekhalannaya. Ntoko anamalamulela a ehuhu ya Yesu, khenasiveliwa ni ole othanliwe ni Yehova mwaha woowiiva atthareli awe oororomeleya.—Mit. 4:25-28.

9. Eheeni Yehova ompakaawe namwi maloko ehipwatthelaka mitthenka ninlaleyaahu?

⁹ Ohipwatthela wa maloko mitthenka ninlaleyaahu Yehova onoonela hayi? Nsalmu 2:10-12 onnaakhula: “Vanonto nyuwo mamwene, makhale a miruku, muleleyeke nyuwo nyuwo, aphuki a velaponi. Mmurumele Yahvéh ni wova ni muhakalaleke n’othukumela. Mmusosone mwana a Muluku, wera ahinyonyiwe, ni nyuwo muhìthwelele mphironi, wona wi esar’awe ennavarela nananoru. Òreriwa othene yale antthawela wa yowo.” Mwaha wa nsivelo Yehova okhalannaawe owo onnaavaha ehuhu amwiittanaawe weera etxentxe ni waakhulela omwene wa Muluku. Mene ehuhu eyo ennamala olelo ninkhala “mahuku oomalihera” a elapo ela. (2 Tim. 3:1; Yes. 61:2) Vaanaano oopwaha khalayi tivowaakuveya weera atthu esuwele ekhaikhai ni ethanle etthu yooreera opaka.

10. Hagayo 2:7-9, othukumeliha heeni waakela okhumelela ni atthu a maloko, yaakela okhalano moonelo wooreera?

¹⁰ Atthu akina annakhalano moonelo wooreera ni othukumeliha weiwe waahimmwale ni mprofeti Hagayo. Owo onnanleela etthu yeera ekhumelele mwaha wa othukumelihiwa iwe, “mihakhu apale neere atthu orera murima a maloko othene yakela omukokhorelaka Yehova.”  * (Mmusome Hagayo 2:7-9.) Ni maprofeti makina ntoko Yesaya, Mikeya yaahulumatho itthu seera sikhumelele “mahuku omalihera.”—Yes. 2:2-4, enoota yoopatxera; Mik. 4:1, 2, enoota yoopatxera.

11. Munna Ken, oonenle hayi iiwakaru mitthenka sooreera ekwaha yoopatxera?

¹¹ Moone mwa ntakihero ni ele yeereñye ni munna Ken, yoowo olelo va onvara muteko osede Mundial. Soovira iyaakha 40 iiwaleene mutthenka ekwaha yoopatxera. Mene onnuupuwela ntoko yeereñye olelovaava ele iiwalaawe owo onnathaliha: “Kiiwakaru ekwaha yoopatxera ikhaikhai sa masu a Muluku, kaahakalala ooxuttera weera ninkhala mahiku oomalihera a elapo ela.” Owo onnavirelela othaliha eeraaka: “Waannatthuneya osepa elapo ela ni orowa moono wa Yehova. Mene kanvekela Yehova nikhavihero ni kaapaka matxentxo moowaakuveya kaakakhela ottuli elapo ela ni kaahaasaasa okosopiwa ni omwene wa Muluku. Omwene owo sika ohinkela onyaanyiwa.”

12. Nipithela na Yehova na elapo ela ya vathi ninsareya hayi ovuwa?

 ¹² Hiyo khaninhovela weera Yehova onooreeliha muloko awe. Mahuku ala oomalihera atthu antxipale annaakhulela ekhaikhai ni othanla omukokhorela yoowo. Eyaakha ya 1914, naari atthu vakhaaneene mene olelo va nri atthu antxipale. Mene yeele eri eyaakha nummeru nnimwaatxeerereya naatthu anoonela muthukumano wa wuupuwelela okhwa wa Yesu. Tivawo nipithela na empa ya Yehova ya elapo ela ya vathi naari neere ha—okokhorela woottela—wa empa ya Yehova onnasareya “mihakhu sa maloko ootheene”. Mweekhaikhai eyo ennanvuwiha Yehova. Mene etthu ekina atthu antxipale ampakaaya ori ovuwiha nsina na Yehova weera eware omutthu munyowani.—Aef. 4:22-24.

13. Waatxeerereya watthu anamukokhorela Yehova, onkwanihera eprofesia heeni? (Nwehe elataratho ya vakaapani)

¹³ Sootheene iyo, sinkwanihera iprofesia sintxipale sa mBiblyani. Ntoko ele nimphwanyaahu va ebuukhu ya Yesaya ekapiitulu 60 eversu 22 yeeyo eneera: “Mwamukhani mwa yawo onotatuxiwa akhale atthu milokó sene milokó (1.000); mwamukhani mwa yawo elapo yowerya. Miyo ká Yahvéh, siso velekulukuni vaya kini kipanke sothene ni waluwa.” Mwaha woowaatxeerereya atthu anamukokhorela Yehova, itthu sooreera sinnakhumelela. Vaavo atthu awo anrwaaya mmarehereroni mwa Yehova ari ntoko mihakhu. Mwaha wooweera annaruha “mihakhu sintxipale” niitthu anweraaya opaka. Nihihimaka sa olaleya mitthenka sooreera sa Omwene wa Muluku. Yesaya aitthana miteko iyo seiyo anweraaya  atthu a Yehova ni aahiima weera atthu anrowa wamwa mapele a miloko. (Yes. 60:5, 16) Ni nikhavihero na asinna ni asirokora awo ooratta, mitthenka sooreera sinnalaleiwa ilapo siniphiyera 240 ni sinnataphuleliwa ibuukhu ni muulumo anipwaha 1.000.

14. Yoothanla heeni atthu antthuneyaaya opaka vaanano va?

¹⁴ Mahuku ala oomalihera mwaha wa Yehova othukumeliha miloko. Atthu ennakhala enyeserereyaka opaka soothanla. Sookhala soothanla piili nintthuneyaahu othanla: yoothanla yoopatxera okhavihera omwene wa Muluku, yanaaveeli okhavihera elapo ela enlamuleliwa ni Satana. Iya soothanla sootthuneya ootheenaahu nintthuneyaahu opaka. Ekhaikhai weera, hiyo khanihiyono atthu oovirikana. Ntoko arumeyi a Yehova, ninniiwelela malamulo aanamalamula, mene khanneerela empari elapo naari khannivoliihera ni nyaha sa epoliitika ya elapo ela. (Arom. 13:1-7) Mwaha wooweera noosuwela weera Omwene wa Muluku toneera omalihe maxupo a elapo ela enlamuleliwa ni Satana. Omwene owo khooneerela empari elapo ela.—Yoh. 18:36, 37.

15. Ebuukhu ya Apokalise yooweerera heeni enhimaaya?

¹⁵ Ebuukhu ya Apokalise enahima weera mahiku oomalihera ororomeleya wa atthu a muluku waakela weereriwa. Onyesereriwa wahu onkela wunnuwa. Anamalamulela ankela onyeserera waakokhorela ni waakhavihera, nave-tho, anoomusontta yoole aneera akhootte opaka eyo. (Apok. 13:12, 15) Awo animwaanyeserara atthu oottheene akhanene asitokweene “anamihakhu ni ohaawa ni akaporo weera—ekhaleno nlepa moono woolopwana naari—vatthomela.” (Apok. 13:16) Khalayi akaporo yannakhela nlepa nno, weera yoonihere weera taani yanvarelaaya. Etthu emoharu, enimweereya ni mahukwaahu ala. Anamalamulela ankela oweherera weera atthu oottheene ekhaleno nlepa nno naari neere, yoonihere taani ammukhaviheraaya. Ti muupuwelo ni soopaka sa Atthu sinkela woonihera weera annakhavihera epoliitika.

16. Mwaha wa heeni oraaya wootthuneya wiimwaleya vaanano vaava waari weera noororomeleya wa Yehova?

¹⁶ Ankha hiyo nnamwaakhulela Okhalano nlepa nno? Nnimwaakhavihera anamalamulela? Mutthu aneera akhootte onooviriha maxupo mantxipale. Ebuukhu ya Apokalise ennathaliha weera, “khavo anera awere othuma nari othumiha ahikhanle yole ori ni enenero.” (Apok. 13:17) Mene arumeyi a Muluku aasuwela etthu eneera yaakhumelele ale eneera ekhaleno nlepa nenno nihimmwale va Apokalise 14:9, 10. Mwa yeeyo ohiya waakhela nlepa, awo anoorowa olepa mmatatani, “miyo ka a Yahvéh.” (Yes. 44:5) Vano ela ewoora ontthuneyaahu wiimwaleya weera nri oororomeleya wa Yehova. Naari neere, hiyo toororomeleya wa Yehova. Wakhala weera ti hiiho, Yehova onkela wiiteexa mwaha woowera hiyo atthu awe!

17. Opixa murima wa Yehova onnuupuxera eheeni?

¹⁷ Mahuku ala oomalihera, Yehova onnavirelela okhala oopixa murima. Owo khantthuna weera mutthu ori poothe anyaanyiwe. (2 Ped. 3:9) Owo onnavaha eparakha atthu oottheene weera ettharuwe ni epake soothanla soorera. Opixa murima wa Yehova wokhalano mpika. Ole aneera aramuse ehuhu owo onvahaawe, onniihela veerisani ntoko Farawo a mahuku a Mose. Yehova aamweerela Farawo: “Kokolenle khalayi ntatanaka womana weyo ni muloko á ni ovoreiwa wowopiha,  sano otxipihiwe mulaponi mene mwayini kohohiya mukumi wera kothonyere owera waka ni nsina naka nilaleriwe velaponi vothene.” (Ott. 9:15, 16) Atthu a maloko ootheene anoosuwela Yehova Muluku ekhaikhai. (Ez. 38:23) Eyo enkela weeraya hayi?

18. (a) Othukumela heeni mukina onhimwa va ebuukhu ya Hagayo 2:6, 20-22? (b) Ninsuwela hayi weera masu a va Hagayo ankela okwanela muhoolo?

¹⁸ Sivinreene iyaakha sintxipale mprofeti Hagayo ahinaakuveene okhwo, ahupuxeriwa olepa masu eri va ebuukhu ya Hagayo 2:6, 20-22 weera, masu ala yaarowa okwanela muhoolo. (Mmusome.) Owo olempe ha: “Mene vanano vava Muluku onnamana natiri eeraka: ‘emaara ekina kini kittikinye khaiyene elapo paahi, mene erimu tho.’ Mene masu ala woowera emaara ekima ennathonyera ovinxiwa wa seiye sinattikinyiwa ntoko itthu sivinre weera sihittikiniwe weera sikhala seiye sinrowa ohittikinyiwa.” (Aheb. 12:26, 27) Mene othukumela iwo woovirikana nuule ohimwale va Hagayo 2:7, eyo entapulela weera Atthu ankela okhala ntoko Farawo yaawo ankela okhootta olamulaliwa ni Yehova, anoorowa onyaanyiwa wa mahiku ootheene.

19. Eheeni eneera ehittikinyeye, ni hiyo ninsuwela hayi eyo?

¹⁹ Eheeni eneera ehitxipihiwe? Murummwa Paulo onnavirelela: “mwa yeyo nakhenlahu Omwene wohittikinyeya, nase mahala weera nimulapele muluku ni muteko woomusivela mwa yeeyo nttittimiho moowovani.” (Aheb. 12:28) Okhwipi wa yoothukumeliha ela etokweene, ntthupi narulalaru Omwene wa muluku konkela ottikinyiwa. Owo onookhala wa mahiku oottheene.—Nsal. 110:5, 6; Dan. 2:44.

20. Yoothanle heeni Atthu antthuneyaaya opaka, ni nnakhavihere hayi?

²⁰ Kootthuneya oyeleela ehuhu: Atthu antthuneya othanla waari weera ankela okhaviheraka mikhalelo a elapo ela, hooey-hooye okhala moovarihana ni yootthuna ya Muluku. Masu oopatxera ankeliha woonyanyiwani ni masu anaaveli annaphwanyiha ekumi yoohimala. (Aheb. 12:25) Moorwela wa muteko woolaleera, nnooweea waakhavihera Atthu opaka soothanla sootthuneya. Ninkela ovirelela okhavihera muteko ola wootthuneya wa Omwene wa muluku nuupuwelaka masu Apwiyahu Yesu Kristu yaawo aneera: “vano evangelyo ela ya Omwene enelaliwe elapo yothene ntoko onamona wa amalapo othene nomala enerwe emalihero.”—Math. 24:14.