1. Taani ari amusi a Yehova?

YEHOVA ookhalano emusi ya atthu ammukokhorela. Emusi eyo, mwaana oopatxeriwa Yesu yoowo ori “opatxera a sopattuxiwa sothene,” ni oottharelana malaika. (Akol. 1:15; Nsal. 103:20) Ehuhu Yesu aaraawe elapo ya vathi, owo aaxuttiha weera atthu oororomeleya pooti omwiitthana Yehova okhala Tiithi. Aaleelaka atthareli awe Yesu aamuhima Yehova okhala “Atith’aka ni Atith’inyu.” (Yoh. 20:17) Vaavo nniivahereraahu wa Yehova ni nnaBatiziwa ninneerela empari ya emusi ya asinna ni asirokora annisivela.—Mar. 10:29, 30.

2. Eheeni ninkelaahu woona mwa yoosomeene yeela?

² Atthu akina onnaavila omoona Yehova ntoko Tiithi oosivela. Atthu akina pooti ohisuwela moota woowoonihera nsivelo asinna ni asirokora oororomela. Mwa yoosomeene yeela, nnoorowa oxuttera moota Yesu onnikhaviheraawe omoona Yehova okhala Tiithi onnisivela ni Tiithi yoowo nneeraahu nimwaattameleke. Nnoorowa oxuttera tho moota woomutakiha Yehova moota nneeraahu naakosopeke asinna ni asirokora oororomela.

3. Etthu heeni Yesu aahimmaawe munivekeloni enneeriha omwaattamela Yehova?

³ Yehova Tiithi a nsivelo. Yesu ontthuna weera nimooneke Yehova ntoko owo onimoonelaawe—ntoko Tiithi a nsivelo yoowo nintthuneyaahu omwaattamela. Ohiya omoona ntoko mutthu oowoopiha. Eyo yaahooneya ni nivekele Yesu aaxuttihaawe atthareli awe. Owo aapatxera ni masu aneera: “Tith’ihu.” (Math. 6:9) Yesu anwera waaxuttiha atthareli awe weera emwitthaneke Yehova “Nanwera sootheene,” “mpattuxa,” naari “mwene aatthu ootheene”—mene maitthaneliwo ootheene awo annaiwanyeya ni annaphwanyeya mBiblyani. (Eph. 49:25; Yes. 40:28; 1 Tim. 1:17) Nnaamweera vaareene hiiho, Yesu aahaaxuttiha atthareli awe  omwiitthana Yehova okhala “Tithi” etthu enneeriha omwattamela yoowo.

4. Ninsuwela hayi weera Yehova ontthuna onaattamela?

⁴ Munnoona ovila omoona Yehova okhala Tiithi a nsivelo? Atthu akina anoona hiiho, mwaha wooweera khaahuuwale ni nsivelo. Nto tivoomaaliha osuwela weera Yehova onnasuwela moonelo ahu ni ontthuna onaattamela. Tiyeeyonto masu a Muluku annoopereraaya yeeraka: “Mmwattameleke Muluku owo onowattamelani.” (Yak. 4:8) Yehova onnansivela ni Tithi ooreera nintthuneyaahu ookhalano.

5. Moovarihana ni Luka 10:22, Yesu onikhavihera hayi omwaattamela Yehova?

⁵ Yesu pooti onikhavihera omwaattamela Yehova. Khaavo amusuwenle Yehova nnene ompwaha Yesu. Yesu annawera otakiha mikhalelo sa aTithawe Tiyeeyo aahimaawe weera: “Okònne miyo, òwòna Atithi.” (Yoh. 14:9) Yesu ori ntoko munnihu oopatxera oyariwa ni onnanxuttiha moota woomuttittimiha ni omwiiwelela tiithi ni moota woomuhakalaliha ni waakhuleliwa ni yoowo. Yesu onnanikhaavihera wiiwexexa mikhalelo sootthuneya sa Yehova ntoko nsivelo nawe ni oreera wawe murima. (Mmusome Luka 10:22.) Nnoorowa woona matakihero makina anoonihera weera Yehova Tithi a nsivelo.

6. Ninsuwela hayi weera Yehova annaakhula mavekelo a Yesu?

⁶ Yehova onnawiiwa anamwanaawe. Yehova aamwiiwa mwanawe oopatxera. (Lu. 5:16) Emaara aaraawe elapo ya vathi, Yesu aavekela weera apake soothanla sootthuneya. Mwa ntakihero, emaara aathanlaawe oohuseraawe 12. (Lu. 6:12, 13) Yehova aamwiiwa Yesu vaavo aaraawe ooxupeya. Ahalaka vakhaani ovarihiwa Yesu, anvekela tiithaawe weera avahiwe nikhavihero mwaha wa weereriwa iwe aavirihaawe. Mene Yehova khañyene paahi aaroomwiiwa mwanawe mene tho owo aaruma nlaika weera nimulipihe mwaha wa maxupo ale aavirihaawe.—Lu. 22:41-44.

7. Munoonela hayi vaavo ninsuwelaahu weera Yehova onnawiriyana mavekelo ahu?

⁷ Olelo tho, Yehova onnavirelela waakhula mavekelo aarumeyi awe mwa ehuhu yoophwanelela. (Nsal. 116:1, 2) Murokora mmoha  a wIndia aahoona eyo ni maitho awe. Owo eera avirihaka maxupo a mweekumini mwawe. Menento anvekela Yehova amulelaka etthu yaamuxupa. Owo olempe ha: “Eprograma ya JW Broadcasting^® Maio ya 2019, yaahima sa moota woovilela maxupo. Mene yaari ehuhu eene yeele miyo kaatthunaaka nikhavihero. Iwo waari waakhuliwa wa mavekelo aka ni Yehova.”

8. Yehova oonihenre hayi weera annampwattha Yesu?

⁸ Yehova annamusivela vantxipale Yesu ni annampwattha vaavo aakumanaaweno maxupo ehuhu aaraawe elapo ya vathi. Ni nsivelo nene nenno, owo-tho onnanipwattha ootheene hiyo. (Yoh. 5:20) Yehova aamukosoopa Yesu mmakhalelo oomunepani ni a weerutthuni. (Math. 3: 16, 17) Eyo yaamoonihera Yesu weera, Tithiihu a wiirimu annampwattha tiyeeyo Yesu khiisoona okhala meekhaawe.—Yoh. 8:16.

9. Itthu heeni sinnoonihera weera Yehova onnanisivela?

⁹ Ntoko Yesu, hiyo nihoona ni maitho ahu weera Yehova onnanisivela. Muupuwele ha, Yehova onnanaakhulela okhala asinthamwene awe ni onnanikosoopa moorweela mwa asinna ni asirokora oororomela. (Yoh. 6:44) Yehova onnanikosoopa mmakhalelo oomunepani, anivahaka itthu weera nlipihe nroromelo nahu. Mpakana owo, onnanivaha itthu sootthuneya ntoko etthu yoowiikhuurihano. (Math. 6:31, 32) Nuupuwelaka moota onnooniheraawe nsivelo, omusivelo wahu oneereke ovirelela.

10. Moota heeni nneeraahu nimutakihe Yehova?

¹⁰ Yehova onnaathokorora asinna ni asirokora ni nsivelo. Mene hiyo, pooti okhala woonixupa owoonihera asinna nsivelo. Eyo enneereya mwaha wooweera niyariwe mapuro oovirikana ni nookhalano sookhovelela soovirikana. Ootheene hiyo, ninnapaka soottheka sinaanyoonyiha atthu akina. Nnaamweera vareene hiiho, nnoowera opaka ele ninweraahu weera nsivelo nniiraanihe ni onlipiha. Moota heeni? Nimutakihaka tithi ni niwooniheraka asinna ni asirokora nsivelo. (Aef. 5:1, 2; 1 Yoh. 4:19) Ninrowa woona moota nneeraahu nxuttere ni ntakihero na Yehova.

11. Moota heeni Yesu aatakinhaawe omoriwa ikharari wa Yehova?

¹¹ Yehova “toomoriwa ikharari.” (Lu. 1:78) Mutthu oomoriwa ikharari onnaxupeya ni onnatthuna waakhavihera ale anhawa ni onnaamaaliha. Yesu aahoonihera weera aari oomoriwa ikharari vaavo amutakihaawe Yehova, nave moota aathokororaawe atthu. (Yoh. 5:19) Vaavo Yesu onnaiye muloko mutokotoko wa atthu, aahaamorela ikharari mwaha wooweera yeera ekakheliwaka nno ni nno ntoko “iputtiputthi sihikhanle ni mukukhuli.” (Math. 9:36) Yesu khañyene arimweera waamoorela ikharari paahi mene aapaka etthu weera aakhavihere. Mwa ntakihero, owo aahaalamiha aretta ni ‘aawiitthuwiha ookhulumuwa ni ale oolemeliwa muritti aya.’—Math. 11:28-30; 14:14.

12. Weera moonihere weera munnamoriwa ikharari etthu heeni muntthuneyaanyu osuwela? nvahe ntakihero na omoriwa ikharari.

¹² Weera noonihere weera ninnaamorela ikharari asinna, etthu yoopatxera entthuneya osuwela maxupo anvirihaaya. Mwa ntakihero pooti weera murokora mmoha ohimmoona oomukhavihera onnaviriha maxupo a mweekumini, mene owo khanvekela nikhavihero nnaamweera atthunaka. Vanonto nyuwo pooti wiikoha ha: Neereke owo onnawera ophwanya etthu weera okosope emusi awe? Neereke owo amuhakalala wakhala weera ookhaviheriwa oreherera naari oveliwa vaate vawe? Wakhala weera munna oyelenle muteko awe nyuwo pooti omukhavihera. Onoohakalala waakhala weera moomukhavihera waasa muteko mukina. Nyuwo-tho, pooti omukhavihera munvahaka musurukhu vakhaaneene.

13-14. Ninkela okhala hayi oovaha ntoko Yehova?

 ¹³ Yehova Muluku oovaha. (Math. 5:45) Hiyo nihiweherereke asinna onivekela nikhavihero weera naakhavihere naari waamorela ikharari. Nimutakihaka Yehova hiyo pooti opatxeriha. Mahuku ootheene Yehova onnanoonihera nsuwa hiyo nihinvekenle. Mene khanwoonihera atthu ooreera murima paahi mene atthu ootheene. Oviha wa nsuwa onnakhavihera okumaahu ni mwaha woonivaha itthu ninhaawelaahu owo onnoonihera weera onnanipwattha. Ti vaavo nto hiyo, ninnamuxukurela vantxipale mwaha woonoonihera nsivelo.

¹⁴ Emutakihaka tithiihu a wiirimu, asinna ni asirokora yaapatxeriha woonihera ovaha. Mwa ntakihero, eyaakha ya 2013, Ciclone aapwexa itthu sintxipale oFilipina. Asinna antxipale yaayeleela impa saya ni itthu saya. Mene nto emusi ahu yoomunepani ya elapo yootheene, yaahiisaakuviha okhavihera itthu saathuneya. Antxipale yaakhavihera evahaka musurukhu ni akina yaahiiveleela okhavihera oteka impa saattamela 750 sa asinna ale mpuwa mwa eyaakha emoha! Mpuwa mwa eretta ya coronavírus, Anamoona a Yehova ahiilipihera weera yaakhavihere asinna ni asirokora yaaphwanela okhaviheriwa. Vaavo nniisakuvihaahu waakhavihera asinna ni asirokora oomunepani, ninnoonihera weera ninnaasivela.

15-16. Moovarihana ni Luka 6:36, moota heeni nneeraahu nimutakiheke Tiithi a wiirimu?

¹⁵ Yehova toomoriwa ikharari ni toolevelela. (Mmusome Luka 6:36.) Mahuku ahu ala ninnoona omoriwa ikharari wa Tiithiihu a wiirimu. (Nsal. 103:10-14) Yesu aahaatakiha nnene atithawe nnaamweera aasuwela weera atthareli awe yaari oohikwanela, owo annaalevelela ni annaamorela ikharari. Mpakana Yesu aaveleela okumi awe weera soottheka saya sileveleliwe. (1 Yoh. 2:1, 2) Osuwela weera Yehova ni Yesu toomoriwa ikharari ni toolevelela onnaatxeerera waasivela wahu.

¹⁶ Nsivelo nniiraaniha emusi yoomunepani ninnalipa “nalevelelanaka.” (Aef. 4:32) Vanooneya weera emaara ekina khonkhweya onlevelela mene nto onnatthuneya wiilipihera weera nreherere mukhalelo owo. Etthu yaamukhavihenre murokora mmoha waari mwaha wa Nwehereri  “Forgive One Another Freely” * (Mulevelaneke mukina ni mukhwaawe) murokora owo olempe ha: Osoma mwaha ole waakikhavihera otxentxa moonelo aka ni woona itthu mooreerela. Mwaha owo onnathaliha weera waalevelela atthu akina khontaphulela wuupuwela itthu soonanara apankaaya naari anipakenlaaya. Mene ontaphulela otxipiha itthu sootheene antthekenlaaya ni waasaasera murettele. Emaara hiyo nnaalevelelaahu asinna ni murima wootheene ninnoonihera weera ninnaasivela nimutakihaka tiithaahu Yehova.

17. Moovarihana ni Matheyo 5:16 nnaawere hayi onvuwiha tiithiihu a wiirimu Yehova?

¹⁷ Eparakha etokweene weerela empari emusi ya elapo yootheene ya asinna oosivela. Yootthunaahu tiyooweera atthu a elapo yootheene naakanyerane vamoha nimukokhoreleke Yehova. Mwa yeeyo nintthuneya wiikosopa weera nihinanarihe mukhalelo wa Tiithhaahu a nsivelo Yehova ni wa atthu awe. Niilipihereke okhalano mukhalelo wooreera weera atthu yaakhulele mitthenka sooreera ninlaleyaahu.—Mmusome Matheyo 5:16.

18. Eheeni enkela onikhavihera ohoova ovaha onnamoona?

¹⁸ Ikwaha sintxipale ninnahasuliwa ni osondiwa mwaha woomwiiwelela tiithiihu a wiirimu. Neereke eyo ennawoopopihani mwaha woowaaleela atthu akina ele munroromelaanyu? Mene nto muroromeleke weera Yehova ni Yesu animookhaviherani. Yesu aahaaroromeliha atthareli awe weera khayaatthuneya oxupeya neetthu yeeraaya yuulume ni moota yeeraaya yuulume. Mwaha wa heeni? Yesu onnathaliha: “Niwoko ehuhu ene yele muni nvahiwe seiyo munèranyu mùlume. Khweli khahiyene nyuwo muni mùlume, hoye, mene ti munepa wa Atith’inyu oni wùlume wa mwa nyuwo.”—Math. 10:19, 20.

19. Nvahe ntakihero na mutthu aahelenle onamoona moolipa murima otribunal ya wÁfrica do Sul.

¹⁹ Moone ntakihero na Robert. Owo aavirinhe ehuhu vakhaaneene amusomaka Biblya. Ni khaasuwenle itthu sintxipale. Owo waannatthuneya orowa otribunal ya África do Sul. Moolipa murima, owo amuleela juiz weera khaneerela  empari elapo mwaha wooweera annasivela asinnawe oororomela. Owo annaxukurela mwaha wooweerela empari emusi ya Yehova. Moottharelaana juiz aamukoha: “Taani ari asinna?” Nikoho nna nanvara Robert mootutuxera tivawo uupuwenlaawe yoolepa ya nihuku ya Matheyo 12:50: “Niwoko othene ole onapanka yotthuna ya Atith’aka ari wirimu, owo ti munnaka, murokoraka ni amayaka.” Hata asuwelaka weera Robert amusomme Biblya, moovira ehuhu vakhaaneene. Yehova anvaha munepa woottela weera aakhule nikoho nna ni makoho makina ahaawehereraawe. Yehova aahakalala vantxipale ni Robert! Nave owo-tho, onnahakalala vantxipale ni hiyo vaavo ninlipaahu murima weera nihelele onamoona vaavo ninkumanaahuno maxupo.

20. Eheeni nyuwo muneeraanyu muthanleke opaka? (Yohani 17:11, 15)

²⁰ Nvireleleke ohela mwiitti iparakha muraanyuno yooweerela empari emusi yoosivela yoomunepani. Nookhalano tiithi aatthu ootheene ni asinna ni asirokora oororomeleya. Muhuupuweleke weera, weerela empari emusi ela ti ovuluwa wene. Satana ni atthareli awe ni wiitta waya, anneerera onanariha nroromelo nahu weera nihooneke weera Yehova onnansivela ni onanariha wiiraana wahu. Mene nto Yesu anvekela Tiithi awe weera, aniwehaweheke weera emusi aahu yoomunepani evireleleke okhala yoowiiraana. (Mmusome Yohani 17:11, 15.) Yehova onnaakhula nivekelo nna. Ntoko enraawe Yesu, muhihoveleke osivela wa Yehova. Muroromeleke weera owo emaara yootheene onimookhaviherani. Muthanleke owaattamela amusi awe Yehova oomunepani.