1. Moovarihana ni Malakhiya 3:16, liivuru heeni Yehova omulepaawe ni erimo eheeni?

 MWA IYAAKHA sintxipale sa muttuli Yehova aapatxera omulepa liivuru oothanleya. Mweekhaikhai liivuru owo erimo elista ya masina, nsina na murumeyi ororomeleya opatxera a Yehova, Habeli. * (Luka 11:50, 51) Ovinyera vaavo Yehova onaatxeerera masina makina, mahukwaana liivuru owo akhala masina mantxipale. Mbiblyani liivuru owo oneeriwa “liivuru a wuupuwelela”, “liivuru a okumi” ni “eroolu ya ekumi.” Yoosoma ela ninkela omwiitthanaka liivuru owo “liivuru a okumi.”—Mmusome Malakhiya 3:16; Apok. 3:5; 17:8.

2. Masina heeni elempwale muliivuruni mwa okumi, nintthuneya opaka heeni weera nsina naahu nlempwe muliivuruni?

² Liivuru owo arimo masina mantxipale atthu yaale emmukokhorela Yehova ni murimaaya wootheene ni enttittimiha nsina naawe. Awo akhalano yooweherera yoowaakhela okumi woohimala, nave-tho hiyo, nintthuneya wilipihera weera nsina nahu nilempwe muliivuruni mwa okumi. Tivawonto nintthuneyaahu okhalano onthamwene woolipa ni Yehova ni ororomela yoowopola ya mwanaawe Yesu kristu. (Yoh. 3:16, 36) Nihipwatthaka waari weera yoowehereraahu ya wiirimu naari elapo ya vathi ootheene hiyo nintthuna weera nsina naahu nlempwe muliivuruni mwa okumi.

3-4. (a) Wakhala weera nsina nahu noolempwa muliivuruni mwa ekumi, neereke eyo entaphulela weera nnimwaakhela okumi woohimala? Muthalihe. (b) Eheeni ninkelaahu woona mwa yoosoma ela ni mwa yoosoma enttharelana?

 ³ Neereke atthu ootheene elempwale mulivuruni mwa okumi ankela waakhela okumi woohimala? Weera newere waakhula nikoho nna, nrowe niwehe ele Yehova aamulenlaawe Mose va Ottimula 32:33. “Kini kimutxipihe mbukhuni mwaka yole okithekenle,” eyo entaphulela weera masina ekhanle mulivuruni mwa okumi pooti otxipihiwa. Yehova onvarihenle muteko lapixi weera olepe masina awo. (Apok. 3:5, enoota.) Nintthuneya opaka ele ninweraahu weera nsina naahu nivirelele olempwa mulivuruni mwa ekumi ni elapisera. Napaka eyo, khaninrowa otxipihiwa.

⁴ Eyo pooti onihiya ni ohovela. Mwa ntakihero, Biblya onuuluma eheeni voohima sa atthu yaale nlepwale nsina naya muliivuruni mwa ekumi ni yaale nihilempwe nsina naya? Enkela okhala hayi yaale ekhwiiye ehimusuwenleene Yehova? Neereke atthu awo pooti olempwa nsina naya muliivuruni mwa ekumi? Nnookela woona waakhuliwa wa makoho ala mwa yoosoma ela ni yoosoma enttharelana.

MASINA HEENI ELEMPWALE MULIIVURUNI MWA EKUMI?

5-6. (a) Ntoko onooniheraawe Afilipi 4:3, taani nlempwale nsina nawe muliivuruni mwa ekumi? (b) Ninkela olempwa liini nsina naya neekaneta muliivuruni mmo?

⁵ Taani nlempwale nsina nawe muliivuruni mwa ekumi? Weera naakhule nikoho nna, ninkela wuuluma woohima sa igrupu ithanu nave ninkela woona mwa egrupu heeni elempwale muliivuruni mwa ekumi.

⁶ Egrupu yoopatxera, eneerela eparte atthu yaale ethanliwe weera yalamuleleke ni Yesu wiirimu. Neereke nsina naya noolempwa muliivuruni mwa ekumi? Aani noolempwa.  Moovarihana ni ele murummwa Paulo aalepenlaawe “asinna” oFilipi, masina a asinna oothanliwa yaawo enkela olamulelaka ni Yesu, aalempwa muliivuruni mwa ekumi. (Mmusome Afilipi 4:3.) Mene nto awo antthuneya ovirelela okhala oororomeleya weera nsina naya nihitxipihiwe muliivuruni mmo. Asinna awo oothanliwa masina aya ankela ovirelela okhala muliivuruni mmo, yaakhela etthuvo aya yoomalihera. Mene eyo, enkela weereya ehinaaye okhwa naari ehipatxenre maxupo matokweene.—Apok. 7:3.

7. Atthu a muloko mutokotoko wa iputtiputthi ikina nsina naya ninkela olempwa mahuku ootheene liini mbuukhuni mwa okumi? (Apokalise 7:16, 17)

⁷ Egrupu ya naaveeli, muloko mutokotoko wa eputtiputthi ikina. Neereke atthu a egrupu ela, nsina naya noolempwa muliivuruni mwa ekumi? Aani. Neereke avira Harmagedoni nsina naya nnookhala mweemmo? Aani. (Apok. 7:14) Yesu aathaliha weera atthu ala anlikana ni iputtiputthi yaakela waakhela “okumi woohimala”. (Math. 25:46) Awo yaakela waakhela avinreene Harmagedoni. Ninnahima haawo mwaha wooweera nsina naya nneereke nlempwaleene muliivuruni mwa ekumi ni laapixi, ninnahima eyo, mwaha wooweera pooti otxipihiwa. Mpuwa mwa olamulela wa iyaakha miil, Yesu ‘aneereke waakukhula ni oweettiha anaattuttu a maahi makumi’. Atthu ankela wiiwelela miruku sa Yesu ni eneera ethorihiwe moororomeleya ni Yehova, nsina naya nnoolempwa mahuku ootheene mbuukhuni mwa okumi.—Mmusome Apokalise 7:16, 17.

8. Atthu a moota heeni ahinkela olempwa masina aya muliivuruni mwa ekumi, ni eheeni enkela weereya ni atthu awo?

⁸ Egrupu ya naararu empakela empari ipuri, seiyo sinkela onyaanyiwa mpuwa mwa ekhotto ya Harmagedoni. Masina aya atthu awo, khaalempwale muliivuruni mwa okumi. Yesu enre weera “ni ala eneerwe onttharuxoni wohimala”. (Math. 25:46) Uupuxeriwaka, Paulo aahimme weera “yawo eni yàkhele ottharuxiwa n’otoloxiwa wohimala”. (2 Ates. 1:9; 2 Ped. 2:9) Etthu eyo pooti waakhumelela yaale yaattheka moolakela etthekelaka munepa wa Muluku. Atthu awo khankela ovinyererihiwa mahuku ootheene. (Math. 12:32; Mar. 3:28, 29; Aheb. 6:4-6) Nnookela woona igrupu piili sinkela ovinyererihiwa weera ikhaleke elapo ela ya vathi.

TAANI ANKELA OVINYERERIHIWA

9. Moovarihana ni Miteko 24:15, Biblya onnathaliha igrupu piili saatthu ankela ovinyererihiwa weera ekhaleke mahuku ootheene vathi vaava?

⁹ Biblya onnathaliha igrupu piili saatthu ankela ovinyererihiwa weera ekhaleke mahuku ootheene vathi vaava, “atthu axariya” ni atthu “oohixariya”. (Mmusome Miteko 24:15.) Atthu “axariya” tiyaale, ehinaakuveene okhwa, yanvarela muteko moororomeleya Yehova. Atthu “oohixariya” tiyaale ekhwiiye ehimusuwenle Yehova. Mweekhaikhai, mwa atthu awo oohixariya, yaakhala epakaka itthu seiye sihimmusivela Yehova. Atthu a igrupu iya piili anookela ovinyererihiwa, neereke atthu awo nsina naya noolempwa muliivuruni mwa ekumi? Weera naakhule nikoho nna, ninkela osomaka egrupu emoha-emoha.

10. Mwaha wa heeni Yehova onkelaawe waavinyereriha “atthu a xariya”, ni muritti heeni eneeraaya ekhaleno akina a yaawo? (Weera moone woohima sa ovinyererihiwa valaponi, moone mwa erevista yeela “Makoho empakiwa ni ale ensoma irevista sahu”.)

¹⁰ “Atthu axariya” aneerela empari egrupu ya naaxexe. Ehinaakuveene okhwa, masinaaya eneera elempwaleene muliivuruni a ekumi. Neereke vaavo ankhwaaya, masinaaya annatxipihiwa muliivuruni mmo? Hooye, mwaha wooweera atthu awo ari mmuupuweloni mwa Yehova. Owo “khaiyene Muluku àlipa  òkhwa, mene àkumi, niwoko othene annamukhalela yowo n’okumi.” (Luka 20:38) Eyo entaphulela weera, etempu atthu a xariya eneeraaya evinyererihiweke masinaaya eneereke elempwaleene muliivuruni mwa ekumi. Mene woopatxerani eneereke elempwaleene ni “lápis”. (Luka 14:14) Moohihovela atthu akina a yaawo ankela ovinyererihiwa anookhalano muritti woovara muteko ntoko “makhulupake a velaponi vothene”.—Nsal. 45:17 [45:16, Tradução do Novo Mundo].

11. Taani ari “atthu oohixariya” yaawo ankela otthuneyaka olempwa masina aya muliivuruni mwa ekumi?

¹¹ Okhwipi waya, ninkela woona egrupu ya naathanu ya, “atthu oohixariya”. Pooti weera atthu awo khaamusuwenle Yehova ni malamulo awe, ni khayaakhala moovarihana ni malamulo awe. Mwa yeeyo masinaaya khaalempwale muliivuruni mwa ekumi. Menento Yehova onimwaavinyereriha atthu awo weera elempwe masina aya muliivuruni mwa ekumi. “Atthu oohixariya” awo, anoorowa otthunaka nikhavihero. Ehinaakuveene okhwa awo yannapaka itthu soonanara. Awo eneereke otthuneya okhala moovarihana ni atthu a xariya a Yehova. Mwa yeeyo, Omwene wa Muluku onoorowa okosoopa eprograma ya oxuttiha eneera ekhale elapo ela ya vathi.

12. (a) Vanonto taani onkela waaxuttihaka atthu awo oohixariya? (b) Eheeni eneera yeereye ni yoole anaakhootte okhala moovarihana ni malamulo a Yehova?

¹² Vanonto taani onkela waaxuttihaka atthu awo oohixariya? Ankela okhala atthu a muloko mutokotoko ni atthu a xariya ankela ovinyererihiwa. Weera atthu oohixariya nsina naya nlempwe muliivuruni mwa ekumi, oneereke ontthuneya ookhalano onthamwene woolipa ni Yehova ni wiivaherera. Yesu Kristu ni ale oothanliwa, eneereke owehexexa muteko wooxuttiha. (Apok. 20:4) Yoole anaakhootte okhala moovarihana ni malamulo a Yehova, onooyeleela okhala mahuku ootheene nnamweera oreeneno iyaakha—100. (Yes. 65:20) Yehova vamoha ni Yesu, pooti osuwela ele eri vamurimani ni khankela  waakhulela weera atthu epakeke itthu soonanara elapo enyowani.—Yes. 11:9; 60:18; 65:25; Yoh. 2:25.

OVINYERERIHIWA WA OKUMI NI WA OTHORIHIWA

13-14. (a) Khalayi naaiwexexa hayi woohima sa ovinyererihiwa uulummaawe Yesu omphwanyeya va Yohani 5:29? (b) Etthu heeni yootepa otthuneya nintthuneyaahu wuupuwela mmasuni mwa Yesu?

¹³ Yesu aahaathaliha yaale eneera evinyererihiwe weera ekhaleke vathi vaava. Mwa ntakihero, owo enre: “Niwoko ehuhu enimorwa, atthu ari mmahiyeni anèraya yìwe nsu nawe ni evinye: yale yènre sorera eyaka movinyererani mwa okumi, ohera yale yènre sonanara eyaka movinyererani mwa othorihiwa.” (Yoh. 5:28, 29) Yesu aatthuna ohima heeni ni masu ala?

¹⁴ Khalayi naaiwexexa weera masu ala Yesu aahima miteko saatthu yaale yeera evinyererihiwe muhoolo, naari neere, naiwexexa weera atthu akina yeera evinyererihiwe yaahereke opaka itthu sooreera ni akina itthu soonanara. Mene Yesu khaahimme weera yaaheereke opaka itthu sooreera naari yaaheereke opaka itthu soonanara. Owo aavarenle muteko masu avinre, ohiya a muhoolo. Wa ale aahimmaawe weera “yaaheereke opaka itthu sooreera” naari “yaaheereke opaka itthu soonanara”. Naari neere, atthu awo yaapanke ehinaakuve okhwa, ohiya evinyerenre. Masu ala anniiwanyeya keera? Mwaha wooweera khavo aneera aakhuleliweke opaka itthu soonanara elapo enyowani. Mene nto, atthu oohixariya yannapaka itthu iyo soonanara ehinaakuveene okhwa. Vanonto, Yesu eheeni aatthunaawe ohima vaavo uulummaaawe woohima sa ovinyerera wa okumi ni ovinyerera wa othorihiwa?

15. Taani ankela “ovinyererihiwa” ni mwaha wa heeni?

¹⁵ Atthu a xariya yaapaka itthu sooreera ehinaaye okhwa, anookela ovinyererihiwa weera ekhaleke “mahuku ootheene”. Masinaaya aalempwa muliivuruni mwa ekumi. Eyo etaphulelaka weera ovinyererihiwa wa ale “apanke itthu sooreera”, ntoko elempwalaaya va Yohani 5:29, onoolikana ni wa “atthu a xariya”, othalihiwe va Miteko 24:15. Yoothaliha ela ennavarihana ni ele onhimaawe Aroma 6:7, vavo oneera: “Khweli ole okhwiye, òvuluxuwa mwa yottheka.” Ni masu makina, Yehova oolevelela soottheka sa atthu a xariya ekhwiiye. Mene onnuupuwela miteko saya sooreera sootheene yaapakaaya etempu yaaraaya akumi. (Aheb. 6:10) Vanooneya weera atthu a xariya, yavinyererihiwa vale, oneereke otthuneya ovirelela okhala oororomeleya yaatthunaka vale weera masinaaya evirelele olempwa muliivuruni mwa ekumi.

16. Entaphulela heeni “ovinyererihiwa noothorihiwa”?

¹⁶ Ankha ale epanke itthu soonanara ehinaakuve okhwa? Nnaamweera soottheka saya itxipihiweene ekhwaakaru, mene nto awo khenvarenle muteko moororomeleya Yehova etempu yaaraaya akumi. Masina aya khaalempwe muliivuruni mwa okumi. Ovinyererihiwa wa ale “apanke itthu soonanara”, onoolikana ni wa “atthu ohixariya” onhimwa va Miteko 24:15. Awo anookhalano “ovinyererihiwa ni othorihiwa.” * Eyo etaphulelaka weera awo eneereke owehexexiwa ni Yesu. (Luka 22:30) Moovira etempu vakhaani, Yesu onoosuwela yaaphwanelaka atthu awo olempwa muliivuruni mwa ekumi. Weera eyo yeereye, oneereke otthuneya ohiya moomalela ekumi yaaraayano ehinaakuve omusuwela Yehova.

17-18. (a) Eheeni eneeraaya etthuneyeke opaka ale enkela ovinyererihiwa? (b) Moovarihana ni Apokalise 20:12, 13, ankela othorihiwa hayi ale ankela ovinyererihiwa?

 ¹⁷ Yavinyererihiwa vale atthu a xariya ni oohixariya eneereke otthuneya wiiwelela malamulo manyowani a murooluni yaawo ankela othalihiwa mpuwa mwa iyaakha 1.000. Murummwa Yohani aalepa yoowooniheriwaawe: “Ni kàwòna alipa òkhwa asitokwene ni asikhani, yèmenlene oholo wa ehitxe. Vano ibukhu sàkhunuliwa. Ni tho ebukhu ekina yàkhunuliwa, eyo tiyo, ebukhu ya ekumi. Ni àlipa òkhwa yàthorihiwa mowiwanana ni miteko saya, ntoko salempwaya mbukhuni.”—Apok. 20:12, 13.

¹⁸ Ankela othorihiwa “hayi” ale ankela ovinyererihiwa? Neereke ankela othorihiwa moovarihana niitthu apankaaya ehinaakuve okhwa? Hooye. Muupuweleke weera soottheka sa mutthu sinnaleveleliwa vaavo owo onkhwaawe. Mwa yeeyo, ale ankela ovinyererihiwa khankela othorihiwa “mwa itthu” epankaya ehinaakuve okhwa. Ale enkela ovinyererihiwa eneereke wooniwa moovarihana ni moota eneeraaya yooneleke nikhomaaliho eneeraaya yaakhele elapo enyowani. Mpaka alopwana oororomeleya a khalayi ntoko Nowa, Samuweli, Davidi ni Daniyeli ankela oxuttera woohima sa Yesu Kristu ni ororomela yoowopola. Wakhala weera alopwana ala oororomeleya ennatthuneya oxuttera itthu sintxipale, anootepa ale oohixariya eneera evinyererihiwe!

19. Eheeni enkela weereya ni ale eneekhootte eparakha yoomukokhorela Yehova?

¹⁹ Eheeni enkela weereya ni ale eneekhootte eparakha yoomukokhorela Yehova? Apokalise 20:15 oneera: “Vano ole anaphwanyiwe ahilempwe mbukhuni mwa ekumi, àvonyeriwe muntthiyani mwa moro ola.” Tiyeeyonto, eneeraaya etoloxiwe mahiku ootheene. Onnatthuneya tho wiilipihera weera nsina nahu nivirelele olempwa mulivuruni mwa ekumi!

20. Onkela weetta hayi muteko wootepa oreera wooxuttiha, onkela opakiwa mwa iyaakha 1.000? (Nwehe efootu ya vakaapani.)

²⁰ Olamulelo wa iyaakha 1.000 enkela okhala etempu yoohakalaliha! Itthu sintxipale sooreera sinimweereya, mwa itthu iyo enkela opatxera weereya, ori muteko wooxuttiha okhanle valaponi, ni-tho enkela okhala etempu enkelaaya owehawehiwaka anaxariya ni ale oohixariya. (Yes. 26:9; Mit. 17:31) Mene onkela weetta hayi muteko owo wooxuttiha? Mwa yoosoma enttharelana, nnookela oxuttera voohima sa muteko owo wootepa oreera.