1. Eheeni ompakaawe mutthu oororomeleeya?

 MUTTHU oororomeleeya onnailipihera weera akwanihere etthu olaihenraawe ni wuuluma ekhaikhai. (Nsal. 15:4) Hiyo noosuwela weera onnareerela omuroromela mutthu owo. Hiyo nintthuneya okhala oororomeleeya ni asinnihu. Hiyo nnipake heeni weera nikhale oororomeleeya?

2. Eheeni ninkelaahu woona mwa yoosomeene yeela?

² Khanintthuneya waanyeserera atthu weera enroromeleke. Nintthuneya woonihera weera naatthu oororomeleeya. Atthu akina anhima weera ororomeleeya khonlikana ni musurukhu. Tiwooxupa ophwanya ni tiwookhweya oriheya. Moohihovela, ninnatthuneya omuroromela Yehova mwaha wooweera “itthu sothene ompakawe ti sororomeleya.” (Nsal. 33:4) Yehova ontthuna weera ntakiheke ntakihero nawe. (Aef. 5:1) Nnimoona matakihero arumeyi akhalayi yaatakinhe ntakihero nawe ni yoonihenre ororomeleeya. Nave-tho nnimoona mikhalelo mithanu sinrowa onikhavihera okhala oororomeleeya.

3-4. Moota heeni mprofeti Daniyeli oonihenraawe weera aari mutthu oororomeleeya, ni eheeni nneeraahu niikoheke?

³ Mprofeti Daniyeli ohiya ntakihero nooreera woohima sa okhala mutthu oororomeleeya. Nnamweera aakuxiwe omuthamiheriwoni oBabilonia, owo aawera okhala oororomeleeya wa atthu antxipale. Daniyeli ataphulelakaru yooloha ya mwene oBabilonia atthu antxipale yaavirelela omuroromela. Evinreene etempu vakhaaneene, Daniyeli waatthuneya olipa murima weera amulele mwene weera etthu aapankaawe yaamunanara  Yehova. Nto ohima eyo, khohiyono waari wookhweya mwaha wooweera mwene aasuweliwa okhala mutthu oowali yoowo yeera ehimusivele masu ale. (Dan. 2:12; 4:20-22, 25) Evinreene etempu muhoolo mwaya, Daniyeli aahoonihera weera aari mutthu oororomeleya. Nave-tho owo, aataphulela masu ootikiniha yaalempwe vaxirini empa ya mwene oBabilonia. (Dan. 5:5, 25-29) Muhoolo mwaya Dario, mwene oMedo Persia, ni ahooleli awe, yaasuwela weera Daniyeli aakhalano “munepa wootikiniha.” Atthu ootheene yaasuwela weera Daniyeli “aari mutthu oororomeleya khaakhanleno nthowa naari oyeha ephome yaatthu oohittheka.” (Dan. 6:3, 4) Mpaka ahooleli oBabilonia yahaamukokhorela Yehova, yaasuwela weera Daniyeli aari mutthu oororomeleya!

⁴ Muupuwelaka ntakihero na Daniyeli, mwiikoheke: ‘Kisuweliwe hayi mmulokoni? Neereke atthu akisuwenle okhala mutthu oororomeleeya, kinkwanihera miritti saka?’ Mwaha wa heeni oraaya wootthuneya wiipakela makoho ala? Mwaha wooweera naaroromeleyaka nneereke onvuwiha tithiihu a wiirimu.

5. Ti heeni yaamukhavihenre Hanani okhala mutthu oororomeleya?

⁵ Eyaakha ya 455 ahinaaye Kristu, governadore atthikiherakaru oteka ixiri sa oYerusalemu, owo aawaasa alopwana oororomeleeya weera ekosopeke esidade ya oYerusalemu. Mwa alopwana awo, Nehemiya amuthanla Hanani, yoowo aari komandante oolipiha. Biblya onhima weera Hanani aari “mulopwana  ororomeleya ni amova Muluku ekhaikhai wapwaha atthu othene”. (Neh. 7:2) Hanani annattittimiha yoothanleliwa eri poothe aakhelaawe. Owo aapaka eyo mwaha wooweera khantthuna omunyoonyiha Yehova. Otakiha ntakihero nna, nnoorowa onikhavihera okhala oororomeleeya mmutekoni mwahu nnivarelaahu Yehova.

6. Moota heeni Tikhiko amoonihenraawe Paulo weera aari mutthu oororomeleeya?

⁶ Moone ntakihero na Tikhiko, mukristu yoowo murummwa Paulo amuroromelaawe vantxipale. Etempu Paulo atthukeliwaawe owannyawe, aathaliha nikhavihero na Tikhiko ahimaka weera aari “murumeyi òroromeleya.” (Aef. 6:21, 22) Paulo anvekela Tikhiko weera aroinhe ekarta alepenlaawe asinna a wEfeso ni wAkolosi weera aalipihe ni waamaliha asinna awo. Paulo khaahovela weera Tikhiko ampaka nnene yoothanleliwa ele. Ntakihero na Tikhiko ninnanuupuxera alopwana oororomeleeya a mmulokoni yaawo ankosoopa sootthuna sahu sa mmulokoni.—Akol. 4:7-9.

7. Ninxuttera heeni ni ororomeleya wa asitokweene ni arummwa oorumeela?

⁷ Olelo va, hiyo ninneera asantte vantxipale mwaha wookhalano asitokweene a mmulokoni ni arumeyi oorumela yaawo nneeraahu naaroromeleke. Ntoko yenraaya Daniyeli, Hanani ni Tikhiko, awo khankuxera matheela miritti saya mmulokoni. Mwa ntakihero, hiyo ninnaroromela iparte sootheene sa mithukumano sa variyari va semana seiyo simpakiwa ni asinna ni asirokora. Nave-tho asitokweene anneera asantte vantxipale vaavo asinna ni asirokora aniirehereraaya yavahiwa soothanleliwa! Mwa ntakihero, hiyo ninnaroromela iparte sootheene sa eriyari ya esemana nanwopaka-tho namasoma ahu a Biblya weera oonele mithukumano sootheene ni sookhwipi wa esemana vaavo ompakiwaaya mwaha waatthu ootheene. Hiyo-tho ninnaroromela weera nneereke okhalano iliivuru soovarela muteko woolaleera. Moohihovela, asinna arino miritti mmulokoni annakosoopa nnene mikhalelo sahu soomunepani, nto mwaha wa itthu iyo ninnamuxukurela Yehova! Mene nto mutthu ori poothe a hiyo anaapake heeni weera oonihere weera toororomeleya?

8. Mwaha wa heeni ontthuneyaaya okhala oowiikosoopa nuulumaka ni atthu akina? (Miruku 11:13)

⁸ Hiyo ninnaasivela asinna, nave nintthuna weera ekhalake nnene. Mene onnatthuneya ookhalano minlaano weera nihaaveehe. Etempu ya murummwa Paulo, atthu akina mmulokoni yaari “orakama nlumi ni yannuluma itthu sohiphwanela”, ewuulumaka atthu akina. (1 Tim. 5:13) Khavo a hiyo ontthuna okhala hiiho. Nkuupuwelani wakhala weera mutthu onooleelani etthu ni aneera weera muhimuleele mutthu mukina. Mwa ntakihero, pooti weera murokora onnathaliha maxupo awe a mweekumini oraaweno naari onvirihaawe ni annanleela weera muhimulele mutthu mukina, wakhala weera eyo yoheereya, hiyo nipakeke etthu owo onvekelaawe. * (Mmusome Miruku 11:13.) Vanonto ninkela woona itthu ikina okhanlaaya wootthuneya ohihima.

9. Moota heeni atthu ootheene veemusini eneeraaya yoonihereke weera toororomeleya?

⁹ Veemusini. Sookhala itthu ikina antthuneyaaya  osuwela amusiru. Mwa ntakihero, pooti weera mulopwana onuupuwela weera, mwaariye onnapaka itthu soowuuliha muru. Neereke itthu iyo aneereke waaleela atthu akina weera amwariye ennapaka itthu soowuuliha muru? Hooye! Owo onnaasivela amwariye ni khantthuna waanyoonyiha. (Aef. 5:33) Ale oowunnuwela annatthuneya okosoopiwa ni nttittimiho, asitiithi annatthuneya wuupuwelela eyo. Awo khantthuneya owuulihiha muru anamwane aya, nave-tho khontthuneya waaleela amusi akina ohimalela wa anamwane aya. (Akol. 3:21) Anamwene-tho onnatthuneya opaka etthu emoharu. (Ola. 5:16) Vaavo amusi ahinlaleyaaya isiiri, atthu ootheene ankhala oohakalala ni oowiiraana.

10. Eheeni enhela mpuwa okhala nthamwene oororomeleya? (Miruku 17:17)

¹⁰ Ni asinthamwene ahu. Itempu ikina, ninnatthuneya ohima itthu sinnikhumelela mweekumini. Ikwaha ikina pooti okhala woovila wuuluma etthu nnuupuwelaahu. Pooti weera etthu eyo khannapaake. Nto, naamukhala oonyoonyiwa nasuwela vale weera nthamwene ahu oolaleya itthu sahu. Nto tivooreera osuwela weera nookhalano asinthamwene nnaaroromelaahu. Atthu yaale ansuka isiiri sahu ‘taasinthamwene ahu oororomeleya’!—Mmusome Miruku 17:17.

11. (a) Moota heeni asitokweene ni asaaraya ankelaaya woonihera weera toororomeleya? (b) Moovarihana ni efootu, ninxuttera heeni ni mutokweene aasunke esiiri mmulokoni, muhoolo mwaya ni emusi awe? (Nwehe efootu.)

¹¹ Mmulokoni. Asitokweene a mmulokoni ehinhima isiiri ankhala ntoko “nthawelo vanòpaya epheyo ni mukottha vanrupaya epula” wa muloko. (Yes. 32:2) Hiyo noosuwela weera pooti waaleela etthu eri poo-the nihoovaka weera anoomuleela mutthu mukina. Ni hiyo tho khaninkela waanyeserera asinna awo onleela itthu nihimphwanelaahu osuwela. Nave-tho, ninneera asantte vantxipale mwaha wa asaaraya asitokweene mwaha wooweera khaanaanyeserera asiiyaya waaleela  isiiri. Mene nto tiwooreera, vaavo mwaariye mutokweene a mmulokoni ohinsuwelaawe itthu sinaakhumelela asinna mmulokoni. Mwariye mutokweene mmoha a mmulokoni ohimme há: “Kinnaaxukurela vantxipale aiyaka mwaha woohikileela itthu sa asinna mmulokoni yaawo anaakhaviheraaya moomunepani. Awo khankileela taani ari asinna awo. Nkinkhala ooxupeya ni mwaheene yoowo, mwaha wooweera koosuwela weera nkinwera opaka etthu weera kaakhavihere. Muhoolo mwaya kinnakhala ootaphuwa ni asinna ootheene a mmulokoni. Miyo koosuwela weera kaaleela aiyaka etthu, khankela omuleela mutthu.” Ootheene hiyo nintthuna osuweliwa okhala mutthu oororomeleya. Mukhalelo heeni nintthuneyaahu okhalano naatthunaka eyo? Nrowe noone ele enkela onikhavihera okhala mutthu oororomeleya.

12. Mwaha wa heeni ninhimaahu weera nsivelo naapwiipwi a ororomeleya?

¹² Nsivelo naapwiipwi a ororomeleya. Yesu oothaliha weera malamulo meeli ootthuneya taala: omusivela Yehova ni mukhwiihu. (Math. 22:37-39) Hiyo ninnamusivela Yehova, mwa yeeyo nintthuneya okhala mutthu oororomeleya nimutakihaka yoowo. Naasivelaka vale asinna, hiyo khaninkela ohimaka isiiri saya. Mwaha wooweera noosuwela weera etthu eyo pooti owuuliha muru naari waavoreya.—Yoh. 15:12.

13. Moota heeni wiiyeviha oneeraaya onikhavihere okhala mutthu oororomeleya?

¹³ Wiiyeviha tho onoorowa onikhavihera okhala mutthu oororomeleya. Mutthu oowiiyeviha khaneerera wiihima aaleelaka atthu akina mwaha wookhala piyoneiru ni itthu ikina ihisuweliwe. (Afil. 2:3) Owo tho khanhima weera oosuwela itthu sa siiri seiyo ihisuweliwe ni atthu ni ohinaaleelaawe atthu akina. Wakhala weera nnimwiiyeviha, khaninkela othalihaka itthu seiyo Biblya ohinhimaawe naari iliivuru sahu.

14. Moota heeni miruku sinnikhaviheraaya okhala mutthu oororomeleya?

¹⁴ Mutthu amiruku oosuwela weera yookhala ‘etempu yoomaala ni yootthekula.’ (Koh. 3:7) Sookhala soohimmwa sa elapo ekina sineera: “Wuuluma onlikana ni epratha, mene omaala onlikana ni etxikukhu.” Eyo entaphulela weera, onnareerela okhala oomaala ohiya wuuluma. Tiyeeyo nto Miruku 11:12 oneeraawe: “Pixa murima onnamaala.” Moone ntakihero na munna mmoha. Owo mutokweene mwa iyaakha sintxipale, mwaha wa sookumanano sawe, owo aawompwa muloko mukina weera areherere iprubulema sootepa ovila. Mutokweene mmoha aavaraaweno vamoha aamuleela weera: “Owo waatthuneya wiikosoopa weera ahimuleele mutthu mukina nyaha sa isiiri sa muloko mukina.” Etthu munna ole aahimaawe yaamweeriha ottittimihiwa ni asitokweene akina mwaha wa miruku iye aavahiwaawe ni mutokweene ole. Awo yaasuwela weera onnareerela omuroromela.

15. Nvahe ntakihero na moota ororomeleya onnikhaviheraya okhala atthu annene.

¹⁵ Ororomeleya mukhalelo hiyo ootheene nintthuneyaahu ookhalano weera atthu akina enroromeleke. Hiyo ninnamuroromela mutthu yoole onuuluma ekhaikhai. (Aef. 4:25; Aheb. 13:18) Muupuwele ela. Wakhala weera nyuwo muntthuna oreherera mukhalelo anyu woowaaxuttiha atthu akina. Avinyaka munnanvekela mutthu osuwenle nnene weera ookhavihereni oreherera. Mwaarowa onvekela taani? Mutthu oororomeleya yoowo  eera ooleeleni ekhaikhai naari oohiroromeleya yoowo eera ooleeleni ethiru atthunaka woosivelihani? Nyuwo mwaatthunaka oreherera mikhalelo sanyu, Biblya pooti wookhaviherani. Owo oneera: “Namalaka a ekhaikhai t’òrera ompwaha nthamwene òkhuwakhuwa. Makuma a nthamwene t’èkhaikhai.” (Mir. 27:5, 6) Pooti okhala wooxupa omwiiwa nthamwene ahu anleelaka masu eekhaikhai, nto moovira etempu, eyo enookhala etthu yooreera.

16. Moovarihana ni Miruku 10:19, mwaha wa heeni nintthuneyaahu okhala oowiihiiha?

¹⁶ Naatthunaka weera atthu akina enroromele, hiyo nintthuneya okhala atthu oowiihiiha. Etthu eyo enoorowa onikhavihera osepa ohima isiiri. (Mmusome Miruku 10:19.) Etthu eyo pooti okhala yoovila wakhala weera nri muredes sociais. Naahiikosoope pooti moohitthuna ohima isiiri saatthu akina. Mwahimavale isiiri iyo, nyuwo pooti ohiwera otxipiha muredes sociais, nave khaninwera osuwela moota sinwaaya ovareliwa muteko itthu eyo ni maxupo enrowaaya okumihera. Nave-tho wiihiiha onakhavihera emaara yeeyo anamavaanyiha aneereraaya ohima itthu seiyo inaahela asinna varisani. Etthu eyo pooti weereya elapo muteko ahu onkhottihiwaaya ni asinna annakohiwa ni mapolisiya. Nto vanooreera ovarela muteko miruku sa Nsalmu 39:1, yoowo enre: “Kinothokorora eyano aka ni mikhoyi.” Ootheene hiyo ninnaatthuna atthu oororomeleya, pooti okhala amusi ahu, asinthamwene ahu, asinna ni asirokora naari mutthu mukina. Ni nakhala mutthu oororomeleya, nnootthuneya okhala oowiihiiha.

17. Nnikhavihere hayi muloko okhala woororomeleya?

¹⁷ Ninneera asantte wa Yehova mwaha wooweerela empari emusi ya elapo yootheene yaatthu a nsivelo ni oororomeleya. Ootheene nookhalano muritti woowoonihera atthu akina okhala oororomeleya. Wakhala weera ootheene hiyo nnimoonihera nsivelo, ororomeleya, wiiyeviha, miruku, ni wiihiiha muloko wootheene onookhala woororomeleya. Osuweliwa okhala mutthu oororomeleya khohiyono etthu empakiwa ekwaha emoha, nintthuneya opaka ikwaha sootheene. Napaka eyo, nnoomutakiha Muluku ahu Yehova ni nneereke owoonihera atthu ootheene weera na mutthu oororomeleya.