1. Mwaha wa heeni nihintikhinaahu ohiroromeleya wa atthu mulaponi?

 MWA ELAPO ela enlamuleliwa ni Satana, atthu akina onnaaxupa waaroromela ananakoso, ahooleli a ittiini ni anapoliitika empakaya itthu, ennamaliha nroromelo na atthu akina. Mene nto, eyo ennaweeriha ohaaroromela asinthamwene aya, mavizinho aya, mpaka amusi aya. Mene hiyo khanintikhina eyo, mwaha wooweera Biblya aathaliha weera ‘mahiku oomalihera . . . , atthu . . . yaakela okhala oohiroromeleya, . . . owapa, . . . òwoka.’ Awo khiyaakela ororormeleya.—2 Tim. 3:1-4; 2 Akor. 4:4.

2. (a) Ninkela omuroromela taani moomalela? (b) Nikoho heeni atthu akina aniikohaaya?

² Mene hiyo nri makristu, mwa sootheene, ninnamuroromela Yehova moomalela. (Yer. 17:7, 8) Hiyo tho, ninnaroromela weera owo onnansivela ni “khanrowa” oninyanyala. (Nsal. 9:10) Nave-tho, ninnamuroromela Yesu mwaha wooweera owo oovaha okumi awe weera anoopole. (1 Ped. 3:18) Mene hiyo noosuwela weera mBiblyani sookhala miruku soororomeleya. (2 Tim. 3:16, 17) Hiyo ninnamuroromela ni murima wootheene Yehova, Yesu ni Biblya. Atthu akina pooti wiikoha, neereke miyo pooti waaroromela asinna a mmulokoni? Aani. Mene ninkela ororomela moota heeni eyo?

3. Eparakha heeni etokotoko nikhanlaahuno? (Marko 10:29, 30)

³ Hiyo nookhalano eparakha etokototo. Yehova oonithanla weera nipakele eparte emusi awe ya elapo yootheene, mene etthu eyo ennawiiha mareeliho. (Mmusome Marko 10:29, 30.) Nave-tho, hiyo nookhalano asinna ni asirokora elapo yootheene. Asinna awo annamusivela Yehova ni anniilipihera okhala moovarihana ni malamulo awe. Pooti weera makhalelo ahu, nuulumo nahu, mawarelo ahu okhala oovirikana. Mene hiyo ninnaasivela  vantxipale asinna awo naasuwenlaahu ni ti woorera okhala ni asinna awo weera nimukokhorele Yehova Muluku ahu!—Nsal. 133:1.

4. Mwaha wa heeni asinna ni asirokora eraaya ootthuneya?

⁴ Mahikwaano hiyo ninnatthuneya okhala oowiirana ni asinna ni asirokora, mwa ikwaha ikina awo pooti onikhavihera oviriha maxupo. (Arom. 15:1; Agal. 6:2) Nave-tho asinna awo, pooti onikhavihera opaka ele ninwerahu ni okhala olipa mmunepani. (1 Ates. 5:11; Aheb. 10:23-25) Nkupuwelani moota oraaya wooxupa ovilela elapo ela enlamuleliwa ni—Satana ni ovirelela ni okhavihera ni wakihera muloko. Mene ti woorera wupuwelela weera Satana onkela watuphela atthu a Muluku, emaara yeeyo sinkelaya wereya itthu iya ti woorera okhala vamoha ni asinna.

5. Mwaha wa heeni atthu akina onaaxupaaya waaroromela asinna a mmulokoni?

⁵ Atthu akina pooti waaxupa waaroromela asinna mwaha wooweera mutthu mukina oohima esiiri aya naari mwaha wooweera ohiya okwanihera etthu aalaihenraawe. Apaale pooti weera nyuwo monyonyiheya mwaha wa etthu mutthu mukina opankaawe naari ulummaawe, vavo sinkhumelelaya itthu ntoko iya ti wooxupa vantxipale waaroromela atthu akina. Vanonto, eheeni enkela onikhavihera waaroromela asinna a mmulokoni?

6. Nsivelo ninkela onikhavihera moota heeni waroromela asinna? (1 Akorinto 13:4-8)

⁶ Waaroromela wahu asinna onvarihana ni nsivelo. Ekapiitulu ya 13 ya ekarta yoopatxera ya Akorinto onniiwanyeiha weera nsivelo pooti onikhavihera waaroromela atthu akina naari otthikela omuroromela mutthu. (Mmusome 1 Akorinto 13:4-8.) Mwa ntakihero, eversu ya 4 eneera “osivela onnavilela ni osivela  onnamorela ikharari” Yehova onnanipixera murima nnamweera nimutthekelaka. Opwaha mwa yeeyo hiyo nintthuneya wapixera murima asinna ni asirokora nnaamweera awo epakaka etthu eninyoonyiha ni onivoreiha murima, eversu ya 5 nave-tho ennahima weera “[Osivela] khonanyonyiwa ni khanimira supi” nave-tho hiyo, khontthuneya ommira supi naari neere khontthuneya wuupuwelela etthu yoonanara munna onnipakelaawe Koheleti 7:9, ohimme weera “khontthuneya okhala owakuvela ommira supi”, ohiya ommira supi hiyo onnatthuneya opaka ele onhimawe Aefeso 4:26: “Khweli nsuwa nihinelele onyonyiwa wanyu!”

7. Moovarihana ni Matheyo 7:1-5 eheeni enkela onikhavihera waroromela asinna?

⁷ Etthu enkela onikhavihera waroromela asinna ori werera waweha ntoko Yehova onawehaawe. Yehova onnasivela asinna ni khanlepa itthu soonanara awo emupakelaya, nave-tho hiyo nintthuneya opaka emoharu. (Nsal. 130:3) Ohiya owehexexa mikhalelo soonanara sa asinna hiyo ontthuneya owehexexa mikhalelo sa asinna sa itthu soorera ankelaya opaka muhoolo. (Mmusome Matheyo 7:1-5.) Osivela “onìwelela sothene” mwa yeeyo hiyo ninnaroromela weera asinna anoopaka itthu sooreera muhoolo, ni khampaka itthu soonanara etthunaka. (1 Akor. 13:7) Eyo khentthuna ohima weera hiyo nintthuneya ororomelaka momalela elapo ela. Mene hiyo ontthuneya weera naaroromeleke yaale emphwanela waaaroromela. *

8. Nyuwo munkela waroromela hayi asinna?

⁸ Nroromelo nintthuneya waasaasiwa ntoko nttittimiho weera mutthu awere opaka eyo pooti oviriha etempu yintxipale. Nyuwo munkela waaroromela moota heeni asinna? Yoopatxera mwaasuwele nnene asinna, nyuwo pooti otthekula naawo mmithukumanoni orowa muteko woolaleera nawo, mukhaleke oopixa murima ni mwavaheke eparakha yoowonihera ororomeleya waya. Woopatxerani nyuwo pooti woona okhala woohilipa weera muulume itthu sa mwekumini mwanyu ni mutthu yoowo mmusuwenlanyu vanaano. Mene emaara nyuwo munvirelelaanyu wunnuwihera onthamwene anyu ni mutthu owo, nyuwo pooti okhala ootaphuwa weera mmulele woohima sa nyaha sa mwekumini mwanyu. (Luka 16:10) Eheeni nyuwo munkelanyu opaka wakhala weera munna mmoha oohima isiri sanyu? Muhimalihe onthanwene owo. Nvirihe ehuhu yintxipale ni muhihiye weera mukhalelo wa mutthu owo oweeriheni ohaaroromela asinna akina. Vano nrowe noone matakihero makina a arumeyi a Yehova yavirinhe maxupo mamoharu, mene nnaamweera yanyonyihinwe, yaavirelela waaroromela atthu akina.

9. (a) Nnaamweera atthu akina yaapaka sonanara moota heeni Ana aavirelenlaawe opaka? (b) Ntakihero na Ana ninnixuttiha moota heeni ororomela moota Yehova ompakaaweno itthu?

⁹ Neereke nyuwo motoko onyonyihiwa ni munna yoowo orino muritti mmulokoni? Waari weera eyo yoohereya ti woorera wuupuwelela ntakihero na Ana. Ehuhu ene yeele namakeya ari Eli aaholela omukokhorela Yehova. Mene anamwane awe khiyakhanleno ntakihero noreera, awosa yaari anamakeya etempu yootheene yaanivolohera oraruwa ni yoottheka ikina, mene tithaya Eli khailipihera weera attaruxe mene nnamweera vareene hiiho, Yehova khamwakhiye otokweene wa onamakeya. Ana aasuwela weera namakeya ari Eli ni khahiyale omukokhorela Yehova opeweni. Emaara yeeyo Eli amonnaawe Ana oxupenyene vantxipale ni avekelaka, owo uupuwela weera aarohapaliwa nto, aamuthoriha ohereraka osuwela eheeni yaamukhumelela. (1 Sam. 1:12-16) Nnaamweera  vaareene hiiho, Ana aalaihera weera akhalano mwaana mwamulopwana ammuroiha opeweni weera anvareleke muteko Yehova asuwelaka weera Eli taarowa omukosopa. (1 Sam. 1:11) Anamwane a Eli neereke yantthuneya ottaruxiwa? Aani. Yehova aapaka eyo mwa etempu yoophwanelela. (1 Sam. 4:17) Mwa etempu ela vakhanene yaahanle Yehova aamutthuvela Ana anvahaka mwana mwamulopwana, Samuweli.—1 Sam. 1:17-20.

10. Nnaamweera Davidi apitukuweliwe eheeni ahahinyaawe opaka?

¹⁰ Nyuwo mootoko orukunuweliwa ni nthamwene anyu? Waari weera eyo yoohereya ni nyuwo, nwehe etthu yamukhumelenle mwene Davidi. Owo akhalano nthamwene awe eeriwa Ahitofeli, mene mwaana a Davidi eeriwa Absaloni aatthuna omwakha Omwene tithaawe, Ahitofeli yaamukhavihera Absaloni amurukunuwelaka Davidi. Mene yoowereya ela yaari yooxupa wa Davidi, omoona mwanaawe amurukunuwelaka ni nthamwene awe amuroromelawe. Mene nnaamweera itthu iye saakhumelenle khisamuhihale Davidi waroromela atthu akina, owo aamuroromela nthamwene awe eeriwa Husayi yoowo akhontte omurukunuwela Davidi. Ni Davidi akhalano mathowa yaamweeriha omuroromela Husayi, owo ahonihera vavo aahenlaawe okumi awe varisani weera amukhavihere Davidi.—2 Sam. 17:1-16.

11. Moota heeni murumeyi mmoha a Nabali onihenraawe weera anamuroromela Abigayili?

¹¹ Nwehe etthu yaamukhumelenle murumeyi mmoha a Nabali, Davidi ni anakhotto awe moorerela murima yawakihera arumeyi ana israeli a namuhakhu mmoha eeriwa Nabali. Evireene etempu Davidi amukoha Nabali, waari weera anwera onvaha eyootxa owo vamoha ni anakhotto awe etthu eri poothe. Ela yaari yoovekela yookhweya, mene Nabali aakhotta omukhavihera nto Davidi, anyoonyiwa vantxipale ni onatthuna omwiva Nabali vamoha ni amusi awe. Murumeyi mmoha a Nabali amuleela etthu ele Abigayili mwaariye Nabali, mwaha wookhala murumeyi mmoha a Nabali ekumi awe tho yaari varisani, ohiya otthawa owo omuroromelaka Abigayili weera ampaka vo etthu, mwa etthu ele yaakela weereya. Owo anaroromela mwaha wooweera asuwela weera Abigayili aasuweliwa okhala muthiyana amiruku. Mwa etthu  ele yakhumelenle owo ahanihera weera akhalano mathowa mantxipale yaamweeriha omuroromela Abigayili. Owo molipa murima ahuluma ni Davidi amuhihaka etthu owo aatthunaawe opaka. (1 Sam. 25:2-35) Owo aroromela weera Davidi ampaka etthu yooreera.

12. Yesu onihenre moota heeni weera owo annaaroromela atthareli awe nnaamweera yaari oohimalela?

¹² Yesu annaaroromela atthareli awe nnaamweera awo yaari oohimalela. (Yoh. 15:15, 16) Emaara yeeyo Yohani ni Yakobe yanvenkelaaya Yesu weera ephwanye otokweene momweneni, Yesu khaathorinhe mwaha wa etthu ele yaatthunaaya okhalano weera envarele muteko Yehova nnakhala khaakhontte okhala atthareli awe. (Mar. 10:35-40) Evinreene etempu atthareli ootheene a Yesu yaamutthawa ohiyu ole ni atthukiwa. (Math. 26:56) Nnaamweera vareene hiiho Yesu khahinye waaroromela awo. Yesu aasuwela weera yaari oohimalela nnaamweera vareene hiiho owo ahaasivela “mpaka okhwipi.” (Yoh. 13:1) Avinyererihiwakaru Yesu aahaavaha atthareli awe 11 oororomeleya muritti wootepa otthuneya wa oholela muteko woolaleera ni othokorora iputtiputthi. (Math. 28:19, 20; Yoh. 21:15-17) Nroromelo Yesu akhalannaawe ni alopwana ale oohimalela naari nootepa oreera. Avinyaka awo yaakhala oororomeleya mpaka okhwipi wa ekumi aya yootheene. Moohihovela Ana, Davidi, murumeyi a Nabali, Abigayili ni Yesu ahiya matakihero ootepa oreera a waaroromela atthu oohimalela.

13. Eheeni enkela onixupa waaroromela atthu akina?

¹³ Neereke nyuwo motoko omuleela munna esiri anyu, avinyaka munoonelela weera munna owo oomuleela mutthu mukina. Mutthu ori poothe amuxupeya. Ekwaha emoha, murokora mmoha aamuleela mutokweene mmoha a mmulokoni nyaha sa mweekumini mwawe ni aamuroromela weera owo khaakela omuleela mutthu mukina. Mene nihuku naattharelana amwaariye mutokweene ole a mmulokoni yaamuligarela murokora ole ni enamulipiha. Vanoneya weera aiyaawe yamuthalihera esiri owo alelinwaawe, nave-tho ninniiwexexa weera murokora ole aaxupeya moota woomuroromela veeli munna ole. Mooripiha murima murokora ole ahasasera nikhavihero wa asinna akina, owo aathaliha moota anyonyihiwa ni awo yamukhavihera ootthikela omuroromela munna ole.

14. Etthu heeni yamukhavihenre munna ole otthikela waaroromela asitokweene mmulokoni?

¹⁴ Evinreene etempu yintxipale munna mmoha aaxupeya ni asitokweene eeli a mmulokoni ni khaaroromela. Nihuku nimoha anwehaka JW Broadcasting^® munna mmoha a Mukuttula Woolamulela aahima masu ookhweya wiiwanyeya owo aahimme ha: “mwiittani ahu Satana wahiya asinna,” munna ole aahuupuwelela etthu ele woohima sa eheeni aakelaawe opaka. Avinyaka anvekela Yehova weera amukhavihere okhaliha murettele ni asinna ale.

15. Mwaha wa heeni otthikela waaroromela asinna onviraaya etempu yintxipale? Nvahe ntakihero.

¹⁵ Mootoko oyelela eparakha mmulokoni? Eyo yaari yookumanano yootepa oxupa, mpuwa mwa alemanha nazista muteko ahu wannakhottihiwa. Murokora mmoha oneeriwa Grete ni ameyaawe yavirelela okhala oororomeleya, Grete ahaakhela eparakha ya omukopiyari Nwehereri weera aavaheke asinna akina. Mene emaara asinna yoonelenlaaya weera apapaawe yaari namavaanyiha, awo yaamwakha eparakha eyo yoovaka weera apapaawe yaamwaleela anamalamulela woohima sa muloko. Mene khiyakhanle yeeyooru paahi mpuwa mwa ekhotto yanaaveeli ya elapo yootheene, asinna khiyanvanhe ikopiya nnakhala omulumiha vaavo yamphwanyaaya mphironi. Eyo yaamunyonyiha vantxipale Grete ni yaamweriha oviriha etempu yintxipale ohiweraka walevelela ni otthikela waroromela.  Evireene etempu owo aaphiya omamaliheroni, waari weera Yehova ohaaroromela asinna ala. Nave-tho miyo kinnitthuneya opaka etthu emoha-moharu. *

16. Mwaha wa heeni nintthuneyaahu oxuttera waaroromela asinna?

¹⁶ Waari weera nyuwo munviriha maxupo mamoha-moharu mwilipihere weera mutthikele waaroromela atthu akina. Araaya nyuwo pooti oviriha etempu weera nwere waaroromela atthu akina, mene ti wootthuneya wilipihera. Nkupuwelani ntakihero nna, wakhala weera nyuwo muntxa eyootxa yoosukumana muhitthunaka ni evinreene etempu ennapatxera woovoreyani. Moohihovela nyuwo munkela wiikosoopaka ni etthu munkelanyu otxaaka, mene vanooneya weera yootxa yoonanara khenkela woohiihani nyuwo otxa mwekumini mwanyu. Emoha-moharu yookumanano yoonanara nihiihiyeke eririhaka waaroromela wahu asinna. Hiyo noosuwela weera na atthu oohimalela. Emaara yeeyo nintthikelaahu waaroromela asinna ninnahakalala, opwaha mwa yeeyo, ninnawera oweha ele hiyo ninkelaahu opaka weera nlipihe munepa wa ororomelana mmulokoni.

17. Mwaha wa heeni nroromelo nraaya nootthuneya, ninkela woona heeni yoosoma enttharelana?

¹⁷ Elapo ela enlamuleliwa ni Satana waaroromela atthu akina etthu yootepa oxupa. Mene nto, hiyo naaroromeleke asinnihu mwaha wooweera ninnaasivela vantxipale ni awo ennansivela. Nroromelo, ninnaneeriha okhala owiirana, ohakalala vaanano va ni ninkela okhala mwaakiho vaavo ninvirihahu maxupo. Mene waari weera mutthu mukina onooninyoonyiha, neereke nyuwo munoowera omuroromela mutthu owo? Nweheke maxupo awo ntoko Yehova onoonaawe, nvariheleke muteko miruku sa mBiblyani ni munnuwihereke nsivelo nanyu wa asinna ni muxuttere ni matakihero a mBiblyani. Hiyo pooti otthikela waaroromela asinna nnaamweera nikhalaneene mupuwelo woonanara, ovarela muteko itthu sootheene iya sinkela onikhavihera okhala ohakalala ni okhalano asinthamwene antxipale yaawo “anapwaha onna.” (Mir. 18:24) Mene hiyo nintthuneya opaka eparte ahu, ni asinna antthuneya osuwela eyo weera anroromeleke. Yoosoma enttharelana ninkela woona moota woowaaroromela asinna.