MWAHA ONTHOKORORIWA 40
“Yaathorihaka antxipale mwa xariya”
“Asuweli animwàrya ntoko warya wa erimu yale anàhusiha antxipele weettela exariya,animwàphila ntoko itheneri wa mahiku othene.”—DAN. 12:3.
ETXIPO 151 Owo Onoowiitthana
ELE NINKELA AHU OXUTTERA *
1. Itthu heeni soohakalaliha sonkela weereya mpuwa mwa iyaakha 1.000?
NYUWO mootoko wuupuwelela vaavo atthu ankelaaya ovinyererihiwa mpuwa mwa iyaakha 1.000 wa olamulelo wa Yesu Kristu? Moohihovela, nno ninkela okhala nihuku noohakalaliha! Atthu antxipale yayelenle amusi aya mookhwaani anninkheliwa ni annatthuna owona-tho awo veeli. Ti hiiho tho moota Yehova onoonelaawe. (Yobi 14:15) Nkeererani wuupuwelela moota atthu ankelaaya ohakalala vaavo ankelaaya owoona tho amusi aya ni asinthamwene aya yaakhwiiye. Ntoko noonnaahu yoosoma evinre, “anaxariya”, yaawo nilempwale nsina naya mu liivuruni mwa ekumi, ankela “ovinyererihiwa wa okumi.” (Mit. 24:15; Yoh. 5:29) Pooti weera atthu nayelenlaahu mookhwaani ovinyererihiwa avira vale Harmagedoni. * Opwaha wa yeeyo, aakhala “oohixariya” akina ankela ovinyererihiwa. Awo taale yahaakhanleno eparakha yoomusuwela nnene sene Muluku ni weettela malamulo awe ni onvarela muteko ni murimaaya wootheene ehinaakuve okhwa. Atthu awo ankela “ovinyerera weera ethorihiwe.”
2-3. (a) Moovarihana ni Yesaya 11:9, 10, eheeni enkela okhumelela woohima sa programa a oxuttiha yoowo onkela weereya elapo yootheene? (b) Eheeni ninkelaahu oxuttera yoosoma ela?
2 Ootheene ale ankela ovinyererihiwa ankela otthuneyaka oxuttihiwa. (Yes. 26:9; 61:11) Mwaha yeeyo, onoorowa otthuneyaka ovariwa muteko wooxuttiwa elapo yootheene. (Mmusome Yesaya 11:9, 10.) Mwaha wa heeni ankelaaya oxuttihiwa? Oohixariya ankela ovinyerera eneereke otthuna osuwela woohima sa Yesu, yoowopola, nsina na Muluku, niitthu sootheene sinhela mpuwa olamulela wa Yehova. Mpaka tho anaxariya annatthuneya oxuttihiwa weera esuwele woohima sa itthu sootheene Yehova aahimmaawe ni yootthuna awe emaara yeeyo apattuxaawe elapo. Atthu antxipale anvarenle muteko Yehova moororomeleya, ahinaaye omalihiwa Biblya olempwa. Anaxariya ni oohixariya anookhalano itthu sintxipale antthuneyaaya oxuttera.
3 Yoosoma ela ninkela wiiwa waakhuliwa wa makoho ala: Enkela okhala moota heeni eprograma ela yooxuttiha elapo yootheene? Eprograma ela enaatapha moota heeni atthu weera nalempwe nsina naya eliivuru ya ekumi? Waakhuliwa wa makoho ala ti wootthuneya wa hiyo. Ntoko ninkelaahu woona iprofesiya ikina sootthuneya muliivuruni mwa Daniyeli ni Apokalise. Sinookela onikhavihera wiiwexexa eheeni enkela okhumelela yavinyererihiwa vale alipa ookhwa. Mene yoopatxera ninkela woona itthu soohakalaliha sinkela weereya, seiyo sihimmwale va Daniyeli 12:1, 2.
‘ALIPA OOKHWA . . . ANOOVINYERERIHIWA’
4-5. Eheeni Daniyeli 12:1 onhimaawe nkela weereya muhoolo?
4 Mmusome Daniyeli 12:1. Eliivuru ya Daniyeli ennahima itthu seera sikhumelele mahiku oomalihera. Mwa ntakihero, Daniyeli 12:1 oneera: Mikhayeli yoowo ori Kristu “onakhala ni ana a muloko á [wa Muluku]”. Eparte ya eprofesiya ela ekwanenle eyaakha ya 1914 Yesu akhalakaru mwene a Omwene wa Muluku.
5 Mene tho Biblya onnahima weera “ehuhu ene yeeyo anaakhumelele Mikhayeli ntxelo eni yereye ehuhu yovalavela ehitonko wooneya okhuma woopatxerani mpaka etempu ene yeele.” “Etempu ela yooxupa” etempu ya “yoohoxa etokotoko” elempwale va Matheyo 24:21. Yesu onkela weemela weera aakhavihere atthu a Muluku owo onrowa opaka eyo okhwipi wa yoohoxa etokotoko, naari neere, Harmagedoni. Liivuru Apokalise onnahima atthu a Muluku ntoko muloko mutokotoko yoowo onkhuma wa ‘yoohoxa etokotoko’.—Apok. 7:9, 14.
6. Ninsuwela moota heeni weera ovinyerera onhimmwa va Daniyeli 12:2 onimweereya? (Moovarihana ni ovinyerera onkela weereya valaponi, nwehe erevista ela “Makoho empakiwa ni ale ensoma irevista sahu”.)
6 Mmusome Daniyeli 12:2. Eheeni enkela weereya mwa etempu ene yeele yaviravale maxupo matokweene? Eprofesiya ela kheenuluma ovinyerera wa ethoonyero naari wa omunepani oneereya mahuku oomalihera ala, ntoko naiwexexaahu khalayi. * Mweekhaikhai, eprofesia ela ya Daniyeli enuuluma sa ovinyererihiwa wa atthu elapo enyowani. Mwaha wa heeni ninhiimaahu hiiho? Masu ooweera “ntthupi” aavareliwa muteko va Yobi 17:16 etthunaka ohima “mahiye.” Eyo enthonyera weera Daniyeli 12:2 onuuluma sa ovinyerera onkela okhumelela avinreene Harmagedoni.
7. (a) Wa moota heeni atthu akina eneeraaya yavinyererihiwe weera yaakhele “okumi woohimala”? (b) Mwaha wa heeni ovinyerera iwo oraaya “wootepa oreera”?
7 Daniyeli 12:2 ontthuna ohima eheeni uulumaka weera akina anoovinyererihiwa weera yaakhele “ekumi yoohimala”? Eyo enthapulela weera mpuwa mwa iyaakha 1.000 ale ankela ovinyererihiwa, ankela oxutteraka woohima sa Yehova ni Yesu ni wiiwelela. Yapaka eyo, animwaakhela ekumi yoohimala. Mwa yeeyo, anaxariya ankela ovinyererihiwa, antthuneya wiilipihera weera yaakhele ekumi yoohimala. (Yoh. 17:3) Iwo onkela okhala “ovinyerera wootepa oreera” opwaha weereñye khalayi vaavo yaatthikihenraaya okumi atthu yaakhwiiye. (Aheb. 11:35) Mwaha wa heeni? Mwaha wooweera atthu ale yaavinyererihinwe yaatthikela okhwa.
8. Masu ooweera ovinyerera wa akina “woowuuliwa muru ni nttharuxo noohimala” entaphulela eheeni?
8 Nto khaiyene atthu ootheene eneera evinyererihiwe anookela waakhulela oxuttihiwa ni Yehova. Eprofesiya ya Daniyeli ennahima weera akina anoovinyerera “eyaaka mwa wuuliwa muru ni nttharuxo noohimala”. Mwaha wa ohiiwelela waya. Atthu ala nsina naya khaninkela olempwa mulivuruni mwa ekumi, ni atthu ala khanrowa waakhela ekumi yoohimala. Opwaha mwa yeeyo, atthu ala ankela waakhela “nttharuxo noohimala”, naari neere, onyaanyiwa. Daniyeli 12:2 ennuuluma sa atthu ale ankela ovinyererihiwa, moovarihana ni ele ankelaaya opaka yavinyererihiwa vale. (Apok. 20:12) Akina ankela waakhela ekumi yoohimala vaahera akina ankela onyaanyiwa. *
‘ANTXIPALE ANOOKUXIWA MWA EXARIYA’
9-10. Taani ankela ‘waara ntoko nsuwa’ ni eyo enkela weereya salini?
9 Mmusome Daniyeli 12:3. Eheeni enkela weeraaya yavira vale “maxupo matokweene”? Ohiya tho niiwalaahu va Daniyeli 12:2, eversu ya 3 ennuuluma etthu ekina enrowa weereya yaviravale yoohoxa etokotoko.
10 Taani anrowa “waara ntoko erimu”? Matheyo 13:43 onnanikhavihera waakhula. Yoolepa ela eneera: “Vaavo anaxariya animwaara ntoko nsuwa, momweneni wa Atith’aya.” Moovarihana ni yoolepa ela, hiyo nohoona weera Yesu anuuluma ni “anamwane a Omwene”, akristu oothanliwa anrowa olamulelaka nuuwo moomweneni mwawe. (Math. 13:38) Nto Daniyeli 12:3 onaahimma yaale oothanliwa ni muteko anrowaaya ovara mpuwa mwa iyaakha 1.000.
Asinna 144.000 oothanliwa anrowa ovara vamoha ni Yesu Kristu weera yiiwananele muteko wooxuttiha onrowa ovariwa mpuwa mwa iyaakha 1.000 (Nwehe eparagrafu 11)
11-12. Eheeni oothanliwa anrowaaya opaka mpuwa mwa iyaakha 1.000?
11 Moota heeni akristu oothanliwa anrowaaya okuxa ‘exariya yintxipale’? Akristu oothanliwa anrowa ovara vamoha ni Yesu Kristu weera empake programa ola ooxuttiha. Yoowo onkela opakiwa valaponi mpuwa mwa iyaakha 1.000. A 144.000 khankela ovara muteko wa omwene paahi, awo tho ankela okhala anamakeya. (Apok. 1:6; 5:10; 20:6) Ntoko anamakeya, awo anrowa waakhavihera “waalamiha atthu”, naari neere, ankela waakhavihera atthu vakhaani-vakhani okhala oomalela. (Apok. 22:1, 2; Ez. 47:12) Moohihovela, eyo enrowa okhala etthu yoohakalaliha wa oothanliwa awo!
12 Atthu heeni “antxipale” ankela okuxiwa mwa exariya? Ale ankela ovinyererihiwa ni ale ankela ovuluwa mwa Harmagedoni naari mwaana ori poo-the onkela oyariwa elapo enyowani. Sivinreene iyaakha 1.000 atthu ootheene a elapo ya vathi anrowa okhala oomalela. Nto salini atthu awo nsina naya ninkelaaya olempwa muliivuruni wa mahiku ootheene?
WEERERIWA WOOMALIHERA
13-14. Eheeni atthu ootheene oomalela enkelaaya opaka ehinaakuve waakhela ekumi yoohimala?
13 Onnatthuneya wuupuwelela weera omalela khommweeriha mutthu okhalano okumi woohimala. Nkuupuwelani weera Adamu ni Heva yaari atthu oomalela, Mene weera awo evirelele okhalano ekumi yoohimala waatthuneya ovirelela omwiiwelela Yehova. Mene ehiyakaru omwiiwelela Muluku awo yaayeleela eparakha yookhalano okumi woohimala. Mooripiha murima awo yaahiya omwiiwelela.—Arom. 5:12.
14 Savira iyaakha 1.000 atthu ootheene mulaponi anrowa okhala oomalela. Neereke atthu ootheene oomalela anrowa omwiiwelelaka Yehova wa mahiku ootheene? Naari neereke atthu akina anrowa okhala ntoko Adamu ni Heva—yaawo yaahiyale omwiiwelela Yehova? Makoho ala ankela waakhuliwa, mene moota heeni?
15-16. (a) Salini atthu a elapo yootheene ankelaaya woonihera weera toororomeleya wa Yehova? (b) Weereriwa woomalihera enkela okhumelela heeni?
15 Mpuwa mwa iyaakha 1.000 Satana onootthukiwa. Mwa etempu ene yeeyo, owo khanrowa waathweleliha atthu. Okhwipi wa iyaakha 1.000 Satana onootaphuliwa ni oonimweerera waathweleliha atthu veeli, yaawo ankela okhala oomalela. Mwa yoowereriwa ela yoomalihera, atthu ootheene oomalela mulaponi anookhalano eparakha yoowoniheera weera annattittimiha nsina na Yehova ni okhavihera olamulelo awe. (Apok. 20:7-10) Moota mutthu onkelaawe opakaka itthu, ankela woonihera weera onnaphwanela olempwa muliivuruni wa mahiku ootheene naari hooye.
16 Biblya onnahima weera atthu akina, khanaasuwenle atthu akavi ankela ohiiwelela ntoko Adamu ni Heva ni ahinkela waakhulela olamulela wa Yehova. Eheeni enkela waakhumelela? Apokalise 20:15 oneera: “Vano ole ophwanyinwe ahilempwale mbukhuni mwa ekumi avonyeriwa mutthiyani mwa moro ola.” Ootheene ahinkela wiiwelela anoonyanyiwa weera ehikhale-tho. Ni atthu antxipale anooviriha weereriwa woomalihera, nave nsinanaya nnolempwa muliivuruni mwa okumi wa mahiku ootheene.
MPHUWA WA “MAHIKU OOMALIHERA”
17. Eheeni nlaika namuleenlaaya Daniyeli, yaarowa weereya mahuku ahu ala? (Daniyeli 12:4, 8-10)
17 Ti yooreera wuupuwelela ele enkela weereya muhoolo! Mene viinano va hiyo pooti okhala etempu yoohakalaliha. Daniyeli ahaakhelela mutthenka wootthuneya woohima sa mahiku ahu ala, naari neere “etempu yoomalihera”. (Mmusome Daniyeli 12:4, 8-10; 2 Tim. 3:1-5) Nlaika naamweerela Daniyeli: “Nto osuwela onimunnuwa.” Naari neere, atthu a Muluku yaaheereke wiiwexexa nnenesene iprofesiya sa Daniyeli. Nlaika naamuleela-tho weera ‘atakhali eneetepe weera sootakhala, nto atakhali oothene animootxela wiiwamo’.
18. Moohipisa eheeni enkela weereya ni atthu oohixariya?
18 Mahikwaano atthu ampaka itthu soonanara pooti okhala ntoko khanttaruxiwa. (Mal. 3:14, 15) Mene moohipisa Yesu onimwaathoriha atthu awo empaka itthu ntoko ipuri, ni waavalaanyiha naale enkhala ntoko iputtiputthi. (Math. 25:31-33) Atthu oohixariya khanrowa ovuluwa mwa yoohoxa etokotoko ni khanrowa ovinyererihiwa elapo enyowani. Masinnayasa khanrowa ophwanyeya wa “eliivuru yoowuupuwelela” yoowo onhiimwa va Malakhiya 3:16.
19. Vanonto nipakeke eheeni ni mwaha wa heeni? (Malakhiya 3:16-18)
19 Ela etempu hiyo nneeraahu noonihereke ni miteko sahu weera naatthu axariya. (Mmusome Malakhiya 3:16-18.) Yehova onnatthukumanya “atthu awe oothanleya”, naari neere atthu ootepa ootthuneya. Moohihovela hiyo ninnatthuna okhala mmoha aatthu yaala.
Onkela okhala woohakalaliha omoona Daniyeli, amusi ahu ni asinthamwene ahu ‘evinyereraka’ weera yaakhele yoohiyeriwa aya elapo enyowani! (Nwehe eparagrafu 20)
20. (a) Etthu heeni Yehova omulaihenraawe Daniyeli? (b) Mwaha wa heeni nyuwo muntthunaanyu woona okwanela wa eprofesiya ela?
20 Hiyo ninkhala etempu yoohalalaliha. Ninlelo itthu soohakalalihaxa sinimweereya moohipisa. Voohipisa va hiyo nnimoona okhwipi wa maxupo ootheene. Avinyaka ninkela woona okwaniheriwa wa eprofesiya Yehova ampakenlaawe Daniyeli, va Daniyeli 12:13: “[Weyo] onavinyerere weera waakhele yoohiyeriwá.” Moohihovela nyuwo munnoona opisa ophiya etempu Daniyeli amusi awe ni asinthamwene awe anrowaaya ‘ovinyererihiwa’. Nave nyuwo-tho munnoona opisa nihuku nenno ankelaaya ovinyerera amusi anyu, asinthamwene anyu mpaka Daniyeli. Nto mpakeke ele munweraanyu vaanaano vaava weera mukhale Murumeyi oororomeleya a Yehova, Mwapaka eyo moohihovela nsina nanyu khanirwa ntxipihiwa muliivuruni mwa ekumi.
ETXIPO 80 Mweererye, ni Moone Wira Yehova Tooloka
^ Yoosoma ela ninkela woona otxentxiwa wa wiiwexexa wahu yoolepa ya Daniyeli 12:2, 3, vaavo onuulumaawe woohima sa eprograma yooxuttiha yeeyo. Ninkela osoma salini eyo enkelaaya weereya ni taani ankela weerela eparte eprograma ene yeeyo yooxuttiha. Nave-tho ninkela woona moota eprograma ela yooxuttiha enkelaaya waakhavihera atthu ootheene valaponi, weera yiirehere mwa yoowereriwa yoomalihera okhwipi wa iyaakha 1.000, wa Olamulelo wa Yesu Kristu.
^ Pooti weera ovinyererihiwa ankela opatxera ale envarenle muteko Yehova mahuku oomalihera, avinyaka ankela ovinyererihiwa yaale ekhwiiye awo ehinaaye. Wakhala weera ovinyerera onkela weereya hiiho, atthu ankela owaakhelaka atthu yaakhwiiye yaawo yaathelanaaya. Opwaha mwa yeeyo, Biblya oohima weera ale ankela ovinyererihiwa weera yakhaleke wiirimu, “anookhala mmapuroni mwaya”, naari neere, ankela okhala ooreherereya. Ti vawonto hiyo ninhimaahu weera ale ankela ovinyererihiwa weera yakhaleke valaponi, ankela otthikela mooreherereya.—1 Akor. 14:33; 15:23.
^ Owo wiiwexexa wahu wa vaanaano va ori muliivuruni Preste Atenção à Profecia de Daniel!, capítulo 17, ni A Sentinela a 1.º a Julho a 1987, epaax. 21-25.
^ Wa moota mukina atthu “oloka” ni “ohiloka” va Miteko 24:15 “taale apanke itthu sooreera” ni “soonanara” yaawo aphwanyeya va Yohani 5:29 sinhimmwa itthu epankaaya ehinaaye okhwa yaale anrowa ovinyererihiwa.
