Moone moota Biblya onaakhulaawe nikoho nna.

Miteko 24:15 oneera “enekhale envinyerero ya alipa òloka ni òhiloka.” Alipa ooloka tiyaale yaamwiiwelenle Muluku ehinaakuve okhwa ni mwaha wa yeeyo, masina aya alempwa muliivuruni mwa ekumi. (Mal. 3:16) Alipa oohiloka tiyaale yahaakhanleno eparakha ehinaakuve okhwa ya omusuwela ni oxuttera sa Yehova, mwaha wa yeeyo, masina aya khaalempwale muliivuruni mwa ekumi.

Yohani 5:28, 29 onhima tho igrupu seiya piili sinthalihiwa va Miteko 24:15. Yesu enre “yale yènre sorera” eyaka “movinyererani mwa ekumi”, ohera yale “yènre sonanara” eyaka “movinyererani mwa othorihiwa.” Anaxariya yaapaka itthu sooreera ehinaakuve okhwa. Ovinyerera waya onrowa okhala wa woowaakhela ekumi mwaha wooweera masina aya aalempwa muliivuruni mwa ekumi. Ankha oohixariya? Alipa oohixariya apanke itthu soonanara ehinaakuve okhwa, ovinyerera waya onrowa okhala wa othorihiwa. Masina aya ninlelo khalempwale muliivuruni mwa ekumi ni anooviriha ehuhu ya othorihiwa, naari neere ehuhu ya oyesiwa. Mpuwa mwa ehuhu eyo, awo anookhalano eparakha ya oxuttera woohima sa Yehova ni olempwa masina aya muliivuruni mwa ekumi.

Apokalise 20:12, 13 oneera ootheene eneera evinyererihiwe ontthuneya wiiwelala “itthu sootheene silempwale mbukhuni.” Ibuukhu iyo sinrowa okhalano malamulo yaawo Yehova onrowaawe onivaha elapo enyowani. Yehova onoorowa waanyanya ootheene yaale ahinrowa wiiwelela.—Yes. 65:20.

Daniyeli 12:2 oneera akina eneevinyerere eyaaka “wa ekumi yoohimala akina wa wuuliwa muru ni nttaruxo noohimala.” Yoolepa ela enahima itthu sinrowa weereya okhwipi wa iyaakha 1.000—akina anookhalano “ekumi yoohimala” ni akina “nttharuxo noohimala.” Naari neere, akina anrowa waakhela ekumi yoohimala ni akina anrowa onyaanyiwa weera ehikhale-tho.—Apok. 20:15; 21:3, 4.

Nkuupuwelani há. Yoowereya ya igrupu iya soopiili, pooti olikanxera ni anamarwa antthuna okhala elapo yaasineene. Anaxariya ankhala anamarwa enaakhuleliwa ovara muteko naari waakhuleliwa okhala, nto enakhalano idireitu ni otaphuwa vakhaanene. Vaahera oohixariya ankhala ntoko anamarwa yaakhuleliwe okhala etempu vakhaanene ntoko maturista. Anamarwa ala antthuneya woonihera weera toororomeleya yaatthunaka ovirelela okhala elapo ele yaaxinene. Emoharu, alipa oohixariya anrowa ovinyererihiwa antthuneya wiiwelela malamulo a Yehova ni woonihera weera awo toororomeleya yaatthunaka ovirelela okhala mparadiso. Nto naari yaakhuleliwaka okhala mahiku ootheene naari evahiwaka vistu a maturista, akina annaakhuleliwa okhala ntoko elapo aya, ni akina otthikiheriwa elapo aya. Sootheene iyo, sinrowa olipaka ni moota anikhalaaya elapo ele yaaxinene. Etthu emoharu ni alipa ovinyererihiwa, weera ekhaleno ekumi yoohimala naari onyanyiwa, onrowa olipaka ni moota anrowaaya okhalaka elapo enyowani.

Yehova Muluku a nsivelo, ni owo-tho Muluku a exariya. (Ola. 32:4; Nsal. 33:5) Nsivelo owo oraaweno nnimoonihereya aavinyereriharu alipa axariya ni oohixariya. Nave-tho Yehova onweherera weera ootheene anrowa ovinyererihiwa yiiwileleke malamulo awe woohima sa itthu sooreera ni soonanara. Yaale paahi anrowa omusivela Yehova ni okhala moovarihana ni malamulo awe tanrowa ovirelela okhala elapo enyowani.