Va 1 Akorinto 15:8, Paulo ohimme há: “Nomalá sothene, àhìsoneiha wa miyo kiri ntoko mwana òvirela weiwo.” Iliivuru sahu sannahima weera Paulo aahima yookumanano aaraweno ya omoona Yesu areene moovuwani wiirimu. Aakhala ntoko weera owo aroyariwa veeli, naari ovinyererihiwa weera akhaleke wiirimu, nnamweera owo ahaakunve ovinyerera. Mene niiwexexakaru nnene eversu ela, noona okhala vootthuneya otxentxa wiiwexexa wahu.

Paulo aahima yoowonihiwa aaraweno ya omoona Yesu emaara arowaawe oDamasco. Vano, eheeni owo aatthunaawe ohima ni masu ooweera “kiri ntoko mwana òvirela weiwo”? Moone miruku sinttharelana.

Moota Paulo okhanlaawe muristu ti woowaakuveya ni wootutuxera. Mwana oovirela weiwo, mayareliwo awe ankhala ootutuxera. Ti yeeyo yeereñye ni Saulo (yowo muhoolo mwaya eriwa Paulo) emaara eetthawe mukwaha ayaaka oDamasco waasontta akristu. Owo khatonko wuupuwelela weera amokhalano yoowonihiwa ya omoona Yesu yowo avinyererihiwe. Waari wootutuxera Paulo okhala wawe mukristu, ohiya paahi wa yoowo, mene wa akristu ootheene oDamasco. Etthu yeereñye ni Paulo yoowakuveya ni yootutuxera, mpaka owo owela evasi mwa etempu vakhaanene.—Mit. 9:1-9, 17-19.

Paulo aakhala mukristu “othana-thanaru.” Masu egregu ooweera “kiri ntoko mwaana òvirela weiwo” navetho pooti othaphulela “oyariwa othana-thanaru.” Bíblia Almeida, revista e atualizada oneera: “Ntoko mwaana onyariwa othana-thanaru.” Emaara Paulo aakhanlaawe mukristu Yesu eera atthikenleene wiirimu. Ale ahimmwale iversu soopatxera, yaamoona Yesu avinyererihiweene ahinaakuve owela wiirimu. (1 Akor. 15:4-8) Woohima sa Paulo, Yesu areene wiirimu aamukhumelela Paulo ewoora owo ahaawehereraawe, nto eyo yaakhala ntoko weera amukhumelenle “othana-thanaru.”

Paulo ahiiyeviha uulumaiye woohima sa yoowo. Moovarihana ni asomi akina, masu Paulo ovarenlaawe muteko va, aniwexexeya ntoko owo amwiithoriha. Waari weera Paulo aaisonela hiiho, owo annasuwela weera khaaphwanela okhalano eparakha ya okhala murummwa. Mpakana owo aahuluma ha: “Khweli miyo kiri mwamukhanixa àrummwa: nkinaphwanela witthaneliwa nsina na murummwa niwoko khottharatthara muloko wa Muluku. Nto mwaha wa mahala a Muluku kiri yeyo kiraka.”—1 Akor. 15:9, 10.

Oweharu Paulo aahima itthu iya tthaaru: (1) moota Yesu amukhumelenlaawe mootutuxera, (2) moota aakhanlaawe mukristu othana-thanaru ni (3) aisoonawe ohiphwanelela okhala murummwa. Khaninsuwela ettitthu Paulo aahimaawe, mene ninsuwelaahu ti yoowera owo aahela mwiitti yoowoniheriwa awe. Yaari yoowonihiwa ela yaamuroromeliñye Paulo weera Yesu ovinyerera mwa alipa ookhwa. Khonhoveleya weera owo annaleela atthu akina yookumanano ela emaara alaleyaawe woohima sa ovinyerera wa Yesu.—Mit. 22:6-11; 26:13-18.