ATTHU antxipale aasuwela yoowereya ya Yesu, weera owo aakhomeliwe vamwirini variyari va anamwiiya eeli. (Math. 27:35-38) Atthu akina khenakhulela ele Biblya onhimaawe, ahimaka weera murutthu wa Yesu waareheriwa ni waavithiwa mmahiye.—Mar. 15:42-46.

Asomi akina a ivanjelyo, annahovela weera mutthu aakhomeliwe vamwirini aamuruwa ovithiwa moottittimiheya. Awo yaaroromela weera mutthu okhomeliwe vamwirini khavaawereya ovithiwa moottittimiheya. Jornalista Ariel Sabar, oolepa va erevistani Smithsonian ahimaka mwaha wa heeni atthu akina yuupuwelaaya hiiho: “Okhomeliwa vamwirini naari nthtaruxu yaavahivaaya attiyamaaru a mmittettheni. Maerudiitu makina, annoona weera ti woonanara waakhulela weera aRoma yaamwaakhulela weera mutthu okhomeliwe vamwirini, ovithiwa moottittimiheya.” Aroma yaatthuna waahasula ni owuulihiha muru atthu oottiya maaru, yaahiyaka atthu ale ookhweene yaakhomeliwe vamwirini weera irutthu saya sitxiweke ni asinama a mutuphini. Makhuva aya yaahala, yannavonyeriwa mulittini yaavonyeriwaayamo makhuva aatthu akina oottiya maaru.

Mene Arqueologia, onnahima itthu soovirikana wa aYuda akina yaakhwiiye mwaha wa wookhomeliwa. Eyaakha ya 1968, yaaphwanyiwa makhuva a mulopwana mmoha, yoowo aakhomeliwe ehuhu ya Yesu. Makhuva awo yaaphwanyiwe waattamela oYerusalemu, mahiye yaawo yaari a emusi emoha yaari ya aYuda. Makhuva awo yaphwanyinwe mukaaxani yaahelinwaayamo makhuva. Wa makhuveene yaala, naaphwanyiwavo nikhuva na etthottopwa yaakhalanne eperegu ya 11.5 centimetro (4.5 in.) etthottopwa eyo. “yaari ya mulopwana eeriwa Yehochanan,” “ti yeeyo yaakhavihenre omaliha onyakulihana waakhumelenle mwaha wa ele ivanjelyo saahimaaya woohima sa ovithiwa wa Yesu.” “Nna ntakihero nnoonihera weera aRoma, yannaakhulela weera mutthu aakhomeliwe avithiwe moottittimiheya.”

Nikhuva na etthottopwa niphwanyaniwe eperegu ninnaakhavihera osuwela ni okhalano moonelo woohima sa moota aakhomeliwaawe Yesu. Mene ekhaikhai tiila, nnaamweera Yesu aakhomelinwe ntoko namwiiya, makhuva awe khayaariheliwe mulittini yaariheliwaayamo makhuva aatthu oottiya maaru. Nto ele Biblya onhimaawe weera muttembo wa Yesu waavithiwa mmahiye, ekhaikhai. Soohima sa Arqueológico sinnakhavihera ele onhimaawe Biblya.

Etthu ninsuwelaahu ni yootepa otthuneya ti yooweera, Yehova taaprofetizenre weera Yesu aakela ovithiwa variyari va anamuhakhu, ni khaavo onwera woottxeeliha okwanela wa masu a Yehova.—Yes. 53:9; 55:11.