1. Mwiiriira woopatxera Yesu aapanke woowi?

 MWEERERE wuupuwelela nreene eyaakha ya 29 Yesu apatxenreene muteko awe elapo ela ya vathi. Yesu, amannye ni oohusera awe akina ewonpwaleene efesta ya ekasamentu ecidade ya oKanani enkhala ohitto waattamela ecidade oyarinwaawe Yesu, oNazarethi. Maria, nthamwene a emusi yaanamathelana ale, moohihovela annakhavihera owaakhelela alipa oowonpwa. Mene nto mpuwa mwa efesta ele, yaakhumelela maxupo yaawo yaakela owuulihiha muru anamathelana ale—eviinyu yaaroomala. b Pooti weeraka nummeru na atthu owoonpwa naarimwaattaxa, nto Maria moowaakuveya aarowa wuuluma ni Yesu eeraka: “kharino evinyu.” (Yoh. 2:1-3) Yesu aapanke eheeni? Owo aapaka etthu yootepa otikiniha otatuxa maahi okhala “evinyu yosiva.”—Yoh. 2:9, 10.

2-3. (a) Miiriira heeni Yesu aapankaawe? (b) Eheeni ninkelaahu woona mwa yoosomeene yeela?

² Wa miiriira sootheene sintxipale Yesu aapankaawe areene elapo ela ya vathi, ola waari woopatxera. c Owo aavarenle muteko owera aaraaweno weera aakhavihere atthu antxipale apakaka miiriira. Mwa ntakihero ekwaha emoha owo aahaatxiha mwa miiriira atthu 5.000 alopwanaru paahi ni ekwaha ekina tho aahaatxiha atthu atthu 4.000 alopwanaru, naakontari athiyana ni anamwane nummeru nno ninnapwaha 27.000 aatxinhaawe. (Math. 14:15-21; 15:32-38) Mwa ikwaha iya piili Yesu tho aahaalamiha aretta. (Math. 14:14; 15:30, 31) Muupuwele  ohakalala yaaraayano atthu ale mwaha woolamihiwa ni otxihiwa mwa miiriira.

³ Hiyo pooti oxuttera itthu sintxipale ni miiriira Yesu aapankaawe. Mwa yoosomeene yeela, nnoorowa oxuttera moota miiriira iya sinrowaaya olipiha nroromelo nahu, avinyaka nnoorowa woona moota ninkelaahu otakiha aka wiiyeviha ni omoriwa ikharari Yesu oonihenraawe vaavo aapakaawe miiriira iye.

4. Vaavo ninxutteraahu woohima sa miiriira Yesu aapankaawe, ninxuttera woohima sa taani?

⁴ Miiriira Yesu aapankaawe khasinnixuttiha woohima sa Yesu paahi mene nto sa Yehova tho, mwa wooweera Yehova tanvanhe Yesu owera woopaka miiriira iye. Miteko 10:38 oneera: “Muluku amuttikitthenlaiye [Yesu] ni Munepa Wottela ni owerya, avinre apankaka sorera ni apenuxuka othene yale yalamuliwa ni Nanrima, okhala wera Muluku àri ni yowo.” Muupuwelele weera itthu sootheene uulumaawe ni aapakaawe—ohela mpuwa miiriira—owo aatakiha moomalela miyuupuwelo sa Atithawe. (Yoh. 14:9) Nrowe noone itthu tthaaru mukhanlaanyu ooxuttera ni miiriira Yesu aapankaawe.

5. Etthu heeni yaamweerinhe Yesu opaka miiriira? (Matheyo 20:30-34)

⁵ Yoopatxera, Yehova ni Yesu ennanisivela vantxipale. Emaara Yesu aaraawe elapo ela ya vathi owo aahoonihera moota aasivelaawe atthu apakaka miiriira weera amalihe ohaawa waya. Ekwaha emoha asilopwana eeli yahoona yaamutxonttela Yesu weera aakhavihere. (Mmusome Matheyo 20:30-34.) Yesu ‘aahaamorela ikharari’ asilopwana ale, nto ti yeeyo yaamweerinhe waalamiha. Masu a egueregu ataphulelinwe eversu ene yeela ntoko ‘omoriwa ikharari’ enoonihera miyuupuwelelo soowiixera emosawu yootepaxa, saari miyuupuwelelo sene seiya soowiixera soomoriwa ikharari saamweerinhe Yesu waatxiha alipa oovoliwa ni waalamiha anamakokho. (Math. 15:32; Mar. 1:41) Niroromeleke weera Yehova Muluku ‘a ikharari’ ni mwanawe Yesu kristu, ennasiveliwa vantxipale ni hiyo, opwaha mwa yeeyo awosa tho ennaxupeya vaavo ennoonaaya hiyo nihaawaka. (Luka 1:78; 1 Ped. 5:7) Khaninhovela weera Yehova ni Yesu ennatthuna vantxipale omaliha itthu sinnikumihera maxupo elapo ela ya vathi.

6. Yehova onvanhe Yesu owera weera apakeke eheeni?

⁶ Ya naaveeli, Muluku onvaha Yesu owera woomaliha maxupo ootheene aatthu. Miiriira Yesu aapankaawe sinnoonihera weera owo ookhalano owera woomaliha maxupo yaawo nihinkelaahu owera omaliha meekhiihu. Mwa ntakihero. Owo ookhalano owera woomaliha maxupo ootheene antannyeriwa ni yoottheka, ntoko iretta ni okhwa. (Math. 9:1-6; Arom. 5:12, 18, 19) Miiriira Yesu aapankaawe sinnoonihera weera owo pooti olamiha “iretta sothesene” mpaka waavinyereriha alipa ookhwa. (Math. 4:23; Yoh. 11:43, 44) Owo tho ookhalano owera woomaaliha epheyo etokotoko ni waalamiha atthu enhasuliwa ni minepa soonanara. (Mar. 4:37-39; Luka 8:2) Hiyo ninnahakalala vantxipale mwaha woosuwela weera Yehova onvaha mwanawe Yesu kristu owera wootheene iwo.

7-8. (a) Miiriiira Yesu aapankaawe sinniroromeliha eheeni? (b) Mwiiriira heeni nyuwo muntthunaanyuxa woona elapo enyowani?

⁷ Ya naararu, nroromeleke moomalela weera Omwene wa Muluku onooruha mareeliho mantxipale elapo ela ya vathi. Miiriira Yesu aapankaawe sinnanoonihera etthu owo onkelaawe opaka ntoko Mwene a Omwene wa Muluku, ekwaha ela onkela waapakela atthu antxipale. Nrowe noone mareeliho yaawo  ninkela ahu waakhela moomweneni wa Yesu, ootheene nnookhalano ekumi yoomalela mwaha wooweera Yesu onoomaliha iretta sootheene ohela mpuwa orakala weiwo onaahasula atthu. (Yes. 33:24; 35:5, 6; Apok. 21:3, 4) Haavo onkela ovoliwaka etala naari ohaawa mwaha wa irisa sa ephattu. (Yes. 25:6; Mar. 4:41) Nnookela owaakhela amusi ahu yaale nnaasivela ahu “ari mmahiyeni.” (Yoh. 5:28, 29) Mwiiriira heeni nyuwo muntthunaanyuxa woona elapo enyowani?

⁸ Yesu aahoonihera omoriwa ikharari ni wiiyeviha vaavo aapakaawe miiriira, hiyo nintthuneya otakiha mikhalelo iya sa Yesu. Nrowe noone matakihero meeli, nipatxeraka ni ntakihero na ofestani ya ekasamentu ya oKanani.

9. Etthu heeni Yesu aapankaawe ofestani wa ekasamentu? (Yohani 2:6-10)

⁹ Mmusome Yohani 2:6-10. Emalakaru eviinyu ofestani iwe, neereke Yesu aaroonyesereriwa opaka etthu? Hooye, mwaha wooweera khiyaavo eprofesiya yaahima weera mwa miiriira Mesiya aamutatuxa maahi okhala eviinyu. Mweerere wuupuwelela emanleene eviinyu nihiku na ekasamentu anyu, woonaru Yesu oona omoriha ikharari emusi ele otepaxawene wa anamathelana ale khaatthuna weera awo yuulihiheye muru, ntoko noonalaahu woopatxerani wa yoosomeene yeela Yesu aapaka miiriira owo aatatuxa iliitru 390 sa maahi okhala eviinyu yootepaxa osiva, pooti weera  owo aatatuxa eviinyu yiintxipale weera yahala vale etumihiwe weera yaakhavihere anamathelana ale, pooti weeraka anamathelana ale yaatthapelaxa vantxipale nikhavihero Yesu aavanhaawe.

10. Yooweereya heeni yootthuneya ninsomaahu va Yohani ekapiitulu 2? (Nwehe efootu.)

¹⁰ Nrowe noone itthu sootthuneya wa yooweereya eri va Yohani ekapiitulu 2. Neereke nyuwo moowera woonelela weera khaiyene Yesu aasarinhe ijaaru iye maahi? Ohiya waasaasa wiisoneiha owo aavekenle aarummwa weera esarihe ijaaru iye. (Eversu 6 ni 7) Ni atatuxakaru maahi ale okhala evinyu Yesu khaahenle mukoophoni weera amulawihihe mutokweene a efesta ele, opwaha mwa yeeyo, owo aavekenle arumeyi weera yamulawihihe. (Eversu 8) Moohihovela, Yesu khaahenle eviinyu mukoophoni anarowa variyari va atthu yaawonpwale oneera: ‘Nkalawihani eviinyu ela miyo kipankaaka!’

11. Mwiiriira Yesu aapankaawe onnixuttiha eheeni?

¹¹ Mwiiriira Yesu aapankaawe wootatuxa maahi okhala eviinyu ennixuttiha eheeni? Ninnaxuttera weera nitthuneya okhala oowiiyeviha, Yesu khaihima mwaha wa miiriira aapakaawe, mweekhaikhai owo khatonko wiihima mwaha wa itthu aapakaawe, moovirikana niiyo, Yesu aari oowiiyeviha ni ovuwa wootheene aavaha Atitha awe. (Yoh. 5:19, 30; 8:28) Natthara ntakihero na Yesu ni okhalano moonelo woowiiyeviha wa asimuneenaahu nnoosuwela weera khiyaavo ninweraahu opaka nihikhaviheriwaka ni Yehova. Nihipwatthaka etthu nimpakaahu mmutekoni mwa Yehova, ti va miruku ohittuna wiisoneiha mene nto onvaha ottottopeliwa wootheene Yehova Muluku ahu. (Yer. 9:23, 24) Owo onnapwanela ovuwa, neere ha: Etthu heeni neeraahu niwereke opaka nihikhaviheriwaka ni Yehova?—1 Akor. 1:26-31.

12. Wa moota heeni mukina nikhanlaahu ootthara ntakihero na Yesu? Nvahe ntakihero.

¹² Moone moota mukina nikhalaahu wootthara ntakihero noowiiyeviha na Yesu. Mmupuwele mutokweene mmoha a mmulokoni onviriha etempu yintxipale amukhaviheraka murummwa oorumeela mmiravo oreherera mwaha awe woopatxera wa atthu ootheene, mwaha wa wiilipihera mmiravo ole onnapaka mwaha awe wooreera ni atthu ootheene mmulokoni ennahakalala vantxipale. Noomala mutukumano munna mmoha onnamwaattamela mutokweene ole eeraka: ‘Mwaha woolelo khowaakweñye oreera keera?’ Mutokweene ole wakhala weera khoniiyeviha pooti waakhula eeraka: ‘Ekhaikhai miyo kooviriha etempu yintxipale kimukhaviheraka munna ole.’ Menento waamurowa okhala wa miruku mutokweene waakhula ha: ‘Ekhaikhai miyo koohakalala vantxipale mwaha wa mwaha ole.’ Nakhala atthu oowiiyeviha khaninkela otthuna ottottopeliwa mwaha wa itthu sooreera nnaapakelaahu atthu akina, mene nto wa hiyo onnanihakalaliha osuwela weera Yehova onnoona itthu nimpaka ahu nave onnavaha mwiitti. (Nwehe yoolepa ya Matheyo 6:2-4; Aheb. 13:16) Moohihovela, Yehova onnahakalala vantxipale vaavo ninttaraahu ntakihero noowiiyeviha na Yesu.—1 Ped. 5:6.

13. Vaavo Yesu onvolaawe ecidade ya oNayimi aapanke eheeni? (Luka 7:11-15)

¹³ Mmusome Luka 7:11-15. Apatxenreene muteko awe Yesu aaheetta ekwaha arowaka oNayimi ecidade ya oGalileya waattamela Oxunemi weiwo mprofeti Eliseyo anvinyererinhaawe mwaana anaamukheli mmoha mwa iyaakha 900 samuttuli. (2 Mam. 4:32-37) Mweerere wuupuwelela Yesu aattamelaka mulako wa ecidade ele owoonaka atthu yaarowa  oriha murutthu ole, yooweereya ele tiyoovoreya vantxipale murima mwaha wooweera naamukhweli ole aamuyelenle mwanawe mmoha aaraaweno, mene nto maaye ola khaakhanle meekhaawe owo ari ni atthu amuttetthe ole, Yesu onnaweemexa atthu ale ni onnapaka etthu maaye ole ohinkhelaawe ottiwala mweekumini mwawe owo onnanvinyereriha mwanawe, ola mwiiriira woopatxera wowaavinyereriha atthu Yesu aapankaawe ori mu evanjeliyuni.

14. Etthu heeni yootthuneya niphwanyaahu va yooweereya ya Luka ekapiitulu 7? (Nwehe efootu.)

¹⁴ Moone itthu sootepa otthuneya Luka ekapiitulu 7 onhimaawe, vanooneya weera vaavo Yesu ‘aamonnaawe’ maaye ole naari neere muthiyana, nto ‘owo ammorela ikharari.’ (Eversu 13) Pooti weeraka Yesu aawoona ameyawe mwaana ole yinlaka vaavo yeettaaya vakhiviru wa murutthu wa mwanaya ni aahaamorela ikharari. Mene nto Yesu khaamorenle ikharariru paahi athiyana ale, owo aawoonihera waamorela ikharari awaattamelaka ni aahuluma ni nsu noomaliha eeraka: “Ohìnle” nto Yesu aapaka etthu weera aakhavihere ni anvinyereriha mmiravo ole ni “ànvelela wa amey’awe.”—Eversu 14, 15.

15. Ninxuttera eheeni ni mwiiriira ola Yesu aapanka awe?

¹⁵ Mwiiriira ola wa Yesu onnixuttiha eheeni? Ninnaxuttera weera nintthuneya waamorela ikharari ale yaayelenle amusi aya mookhwaani. Ekhaikhai weera hiyo khaninwera waavinyereriha atthu ntoko Yesu, mene nto hiyo pooti waawehexexa ni owoonihera omoriwa ikharari atthu ale yaayelenle amusi aya, hiyo pooti opatxeriha opaka etthu weera naakhavihera ni waamaaliha. d (Mir. 17:17; 2 Akor. 1:3, 4; 1 Ped. 3:8) Masu ookhuveya ni itthu ikhaanini nimpakaahu sinoowera okhavihera vantxipale.

16. Moovarihana ni efootu, eheeni nyuwo muxuttenraanyu ni yooweereya ya maaye omuyelenle mwanawe naanaanoru?

¹⁶ Nrowe noone yooweereya emoha. Mwa iyaakha samuttuli yiipiwaka etxipo omuthukumanoni murokora mmoha aahoonelela weera maaye mmoha aamwinla ni etxipo yaahima sa yooweherera ya ovinyererihiwa, owo eera  amuyelenleene mwanawe vaanaanoru ahuupuwenle ikwaha piili, murokora ole aarowa ni anahela ntata nawe va nikhatani va maaye ole ni enapatxera wiipa etxipo ele ootheene. Maaye ole ohimme ha: “Miyo kaahiisoona okhala osiveleyaxa wa asinna ni asirokora.” Owo aahakalala mwaha woorowa omuthukumanoni. Owo onnavirelela ohima eeraka: “Nikhavihero nahu, nri Empa ya Omwene.” Hiyo pooti ohima ni murima wootheene weera Yehova onnoona nave onnavaha mwiitti itthu ikhaanini hiyo ninpakaahu weera niwoonihere omoriwa ikharari ale eri ni “munepa wopwexiwa.”—Nsal. 34:19 [34:18, NM].

17. Ntoko nonnaahu mwa yoosomeene yeela eheeni enkela onilipiha?

¹⁷ Hiyo nnoolipa vantxipale napeskisari miiriira Yesu aapankaawe seiyo ninphwanyaahu nvanjeeliyuni. Ivanjeliyu iyo sinnaxuttiha moota Yehova ni Yesu ennisivelaaya nave sinnoonihera moota Yesu okhalannaawe owera woomaliha maxupo ootheene ninvirihaahu nave sinnaniroromeliha weera soolaihera sootheene Yehova olaihenraawe opaka muhoolo moohipisa sinookwanela. Vaavo ninsomaahu sooweereya iya hiyo pooti ophimelela moota nneeraahu ntakihe mikhalelo sa Yesu. Munoonela hayi emaara munpakaanyu yoosomaanyu ya omeekha naari emaara mummukokhorelaanyu Yehova vatthokoni wiihiyera etempu weera muxuttere woohima sa miiriira ikina Yesu aapanka awe? Moone itthu inyowani nyuwo munkela anyu oxuttera ni mwaaleele atthu akina itthu muxuttenraanyu. Muupuweleleke weera imaara sootheene nyuwo munrowaanyu otthekulaka, munoohakalala!—Arom. 1:11, 12.

18. Eheeni ninkelaahu woona mwa yoosoma enttharelana?

¹⁸ Ahalelaka omaliha muteko awe elapo ela ya vathi, Yesu aapaka mwiiriira wa naararu yoowo ninphwanyaahu mBiblyani, ekwaha ela waari onvinyereriha nthamwene awe osiveleyaxa, yooweereya ela ti yoovirikana ni soovinyereriha ikina. Eheeni ninxutteraahu ni mwiiriira ola? Nave ninkela olipiha hayi yoowehereraahu ya ovinyererihiwa? Makoho ala nnimoona waakhuliwa mwa yoosoma enttharelana.