1. Mateus oonihenraawe moota heeni weera annaroromela yooweherera ya ovinyererihiwa?

 MMIRAVO mmoha oneeriwa Mateus ookhalano eretta yootepaxa woopiha, mwaha wa yeeyo owo oopakiwa operasau ikwaha sintxipale. Ekwaha emoha emoonelaka programa a vamweerini a JW Broadcasting^®. Ehalelaka omala eprograma ahoonela eviidiyu yeeyo yooniheriwa atthu ewaakhelelaka alipa oovinyererihiwa mparadiso. b Okhwipi wa programa, Mateus aahaaweha asipapawe aavarela matata ayasa aneera: “Paapa, maaye, nyuwosa mohoona ho! Pooti miyo kikhwaaka miyo kinoovinyererihiwa. Muhihoveleke, mwakiweherereke paahi.” Neereke nyuwo munnawera wuupuwelela ohakalala wa asitiithi ala mwaha woosuwela weera mwanaya annaroromela yooweherera ya ovinyererihiwa?

2-3. Mwaha wa heeni wuupuwelela yooweherera ahu ya ovinyererihiwa oraaya wootthuneya wa hiyo?

² Wuupuwelela yoowehereraahu ya ovinyererihiwa etthu yootepa otthuneya wa mutthu ti mutthu a hiyo ontthuneyaawe opaka. (Yoh. 5:28, 29) Mwaha wa heeni? Mwaha wooweera hiyo khanisuwenle emaara ninkelaahu ovoreeiwa eretta yoowoopiha. Naari omuyeleela ole nimmusivelaahu mookhwaani. (Koh. 9:11; Yak. 4:13, 14) Yoowehereera ahu ya ovinyererihiwa pooti onivaha ikuru, weera niwere oviriha maxupo ninkumanaahuno. (1 Ates. 4:13) Biblya onnanroromeliha weera Yehova Muluku ahu a wiirimu, oonisuwela ni onnasiveliwa ni hiyo. (Luka 12:7) Owo oonisuwela nnenesene mpaka onoowera oruha omutthu ahu ni minyuupuwelelo iye naaraahuno. Nave owo, onnasiveliwa nihiyo vantxipale mpaka oonivaha eparakha ya okhala mahiku ootheene, nnaamweera otthuneyaka onivinyereriha.

³ Mwa yoosomeene yeela etthu yoopatxera ninkelaahu woona ori mwaha wa heeni nintthuneyaahu ororomela yooweherera ya ovinyererihiwa. Avinyaka ninkela woona yooweereya ya mBiblyani enlipiha nroromelo nahu. Yooweereyeene ti yeela ninphwanyaahu wa masu a mwaheene yoola onthokororiwa: “Murokor’á anavinyerere.” (Yoh. 11:23) Yoomalihera nnookela woona etthu hiyo nintthuneyaahu  opaka weera yooweherera ya ovinyererihiwa ekhale ekhaikhaixa wa hiyo.

4. Weera nroromele yoolaihera, eheeni nintthuneyaayu ororomela? Nvahe niphwanaphwaniho

⁴ Weera nroromele yoolaihera, nintthuneya ororomela weera mutthu opanke yoolaihera eyo, ookhalano ntthuno ni owera wookwanihera yoolaihera eyo. Muupuwele niphwanaphwaniho nla, muupuwelele weera oovira nayuupuri, ni empa anyu yoomora nipatho nave itthu sintxipale sintthuneya orehereriwa avinyaka nthamwene anyu onnawa anaweerelani: ‘Miyo kinimookhaviherani nyuwo oreherera empa anyu ela.’ Eyo enoonihera weera owo ookhalano ontthuno noowookhaviherani nyuwo. Wakhala weera nthamwene anyu peterero, ni ookhalano ikaruma soorehererano, nyuwo munereke ororomela weera owo ookhalano owera wookwanihera yoolaihera eyo. Nto mwaha wa yeeyo, nyuwo munnaroromela ele nthamwene anyu olaihenraawe. Neereke ninnatthuneya okhalano nroromelo nimoha-moharu na yooweherera ya ovinyererihiwa Muluku opankaawe? Neereke tthiri owo ookhalano ntthuno ni owera wookhwanihera yoolaihera eyo?

5-6. Mwaha wa heeni nintthuneyaahu ororomela weera Yehova ookhalano ntthuno noowaavinyereriha alipa ookhwa?

⁵ Neereke Yehova ookhalano ntthuno noowaavinyereriha ale akhwiiye? Aani ookhalano. Weera anoonihere eyo, Yehova ahavarela muteko alipa yaamulepa Biblya weera yuulume woohima ya yooweherera eyo ya muhoolo. (Yes. 26:19; Hos. 13:14; Apok. 20:11-13) Vaavo Yehova ompakaawe soolaihera, owo onnakwanihera. (Yeh. 23:14) Apaale neere, Yehova onnoona opisa ewoora yoowaavinyereriha alipa ookhwa, nave waahokoloxera ekumi aya. Ninsuwela hayi eyo?

⁶ Mwa ntakihero, moone ele aalempaawe Yobi. Owo annaroromela weera akhwa vale Yehova aamunkheliwa ni aamutthuna onvinyereriha. (Yobi 14:14, 15, enoota.) Yehova tho ohinkheliwa ni arumeyi awe ale akhwiiye. Owo onnaweherera waavinyereriha ni waavaha ekumi yoohakalaliha. Ankhanto ibiliyawu saatthu ale akhwiiye ehikhanleno eparakha woosuwela ekhaikhai woohima sa Yehova? Muluku ahu tho ansivelo, onnatthuna waavinyereriha. (Mit. 24:15) Yehova ontthuna weera, awosa ekhaleno eparakha yookhala asinthamwene awe ni okhala mahiku ootheene valaponi. (Yoh. 3:16) Nto eyo enoonihera weera Yehova, ookhalano ntthuno noowavinyereriha alipa ookhwa.

7-8. Eheeni enniroromeliha weera Yehova ookhalano owera woowaavinyereriha alipa ookhwa?

⁷ Neereke tho Yehova ookhalano owera woowaavinyereriha alipa ookhwa? Moohihovela aani ookhalano! Mwaha woowera owo “onawerya sothesene.” (Apok. 1:8) Owo ookhalano owera otokotoko woomunyaanya yoole ori mwiittani awe omuhela mpuwa nookhwa. (1 Akor. 15:26) Osuwela eyo ennanivaha ikuru ni nimaaliho. Moone ntakihero na murokora Emma Arnold. Owo ni emusi awe yaaviriha maxupo mantxipale a weereriwa nroromelo naya, mpuwa mwa ekhotto ya naaveli ya elapo yootheene. Ohela mpuwa waayeleela amusi oosiveleyaxa ocampu wa konsetrasau Nazista. Weera aammaalihe mwanawe mwaamuthiyana murokora Emma enre: “Nookhwa aarino owera wookhottiha ovinyererihiwa waalipa ookhwa, owo aakela okhala oowera ompwaha Muluku, keera?” Nto khaavo ori oolipa ompwaha Yehova Muluku ahu ori ooweraxa. Okhala weera owo topattunxe ekumi, moohihovela ookhalano owera woowatthikihera ekumi ale akhwiiye.

⁸ Nookhalano tho mathowa makina anneeriha ororomela weera Muluku, onimwaavinyereriha alipa ookhwa. Muupuwelelo awe ti woosuwelaxa. Weera muupuwelele, owo onniitthana yeele eri ethenyeeri ni nsina naya. (Yes. 40:26) Opwaha wa yeeyo, owo onnawuupuwelela alipa ookhwa. (Yobi 14:13; Luka 20:37, 38) Wa Yehova ti wookhweya wuupuwelela yeele eri etthu, wa atthu ale  onkelaawe waavinyereriha. Ohela mpuwa ethoni aya, omutthu aya ni itthu evirinhaaya mweekumini vamoha ni nyuupuwelelo saya.

9. Mwaha wa heeni nyuwo munroromelaanyu yoolaihera Yehova opankaawe yoowaavinyereriha alipa ookhwa?

⁹ Nihihovelaka eetthu, hiyo pooti ororomela yooweherera Yehova onivanhaawe ya muhoolo yoowaavinyereriha alipa ookhwa. Mwaha wooweera owo ookhalano ntthuno ni owera weera akwanihere eyo. Ni opwaha mwa yeeyo, nrowe noone nthowa nikina ninneeriha omuroromela Muluku woohima sa alipa oovinyererihiwa: Mwaha wooweera Yehova aapaka eyo khalayi. Owo aahaavaha owera arumeyi awe omuhela mpuwa Yesu weera yaavinyererihe alipa ookhwa. Viinaano va ninrowa osoma yoovinyereriha Yesu aapankaawe yeeyo emphwanyeya va Yohani ekapiitulu 11.

10. Mitthenka heeni Yesu aakhenlaawe, ni etthu neeni aapankaawe? (Yohani 11:1-3)

¹⁰ Mmusome Yohani 11:1-3. Muupuwelele okhwipi wa eyaakha ya 32 Yesu ayarinweene. Muttetthe mmoha oneeriwa Bethania, Yesu aakhalano asinthamwene ooreera murima muttetthe ole—Lazaro ni asirokorawe eeli Marta ni Maria. (Luka 10:38-42) Nto Lazaro aavoreiwa vantxipale, nto asirokorawe yaaxupeyaxa nto mwaha wa yeeyo, awosa yaarumihela mitthenka wa Yesu yoowo aari okhopela wa Yordani. Weiwo weettiwa mukwaha wa mahiku meeli weera mutthu aphiye. (Yoh. 10:40) Moomoriha ikharari emaara Yesu aakhenlaawe mitthenka iye, Lazaro aahookhwa. Nnaamweera aasuwenle weera nthamwene awe ohookhwa, Yesu aweherera mahiku meeni weera eette mukwaha arowaka oBethania. Nto Yesu aaphiya oBethania emanleene mahiku maxexe Lazaro akhwiiyeene. Vano mwaha wa heeni Yesu aaweherenraawe ovira etempu eyo? Mwaha wooweera owo khaatthuna paahi omukhavihera nthamwene awe ole, owo aatthuna opaka etthu yaakela onvuwiha Yehova Muluku.—Yoh. 11:4, 6, 11, 17.

11. Ninxuttenre eheeni woohima sa onthamwene ni yooweereya ya Lazaro?

¹¹ Yooweereya ela ennanixuttiha etthu yootepa otthuneya woohima sa onthamwene. Nkuupuwelani ha: Vaavo Marta ni Maria yamurumihenlaaya Yesu mitthenka iye, awosa khayanvekenle weera owo arowe oBethania. Nto yaatthuna weera paahi Yesu asuwele weera nthamwene awe oosiveleyaxa, anvoreiwa. (Yoh. 11:3) Opwaha mwa yeeyo, Yesu anwera onvinyereriha Lazaro naari ahitthikenle oBethania, nto Yesu aalakela otthikela oBethania weera akhale vamoha ni asinthamwene awe Marta ni Maria. Neereke nyuwo mookhalano nthamwene hiiha? Owo ori oolikaneene weera ookhavihereni nnaamweera nyuwo muhivekenle nikhavihero, nto muroromeleke weera nthamwene anyu owo “ehuhu yothene” onnatthuna wookhaviherani. (Mir. 17:17) Hiihaale ntoko Yesu hiyo pooti okhala ntoko owo wa asinthamwene ahu. Vano nrowe noone sooweereya woohima sa Lazaro nave-tho nrowe noone etthu yeereñye muhoolo mwaya.

12. Yesu aamulaihenre eheeni Marta, ni mwaha wa heeni owo aatthuneyaawe ororomela yoolaihera eyo? (Yohani 11:23-26)

¹² Mmusome Yohani 11:23-26. Vaavo Marta iiwalaawe weera Yesu ahaattamela oBethania, owo aatthimaka ni amphwanya amweerela: “Pwiya, wakhanle vava, sano ahakhwiye murokor’aka.”  (Yoh. 11:21) Ekhaikhai weera Yesu anwera omulamiha Lazaro. Mene owo aatthuna opaka etthu yootepa otikiniha. Owo aaleihera eeraka: “Murokor’á anavinyerere.” Opwaha wa yeeyo, owo aanvaha nthowa nikina Marta, naamweerihe ororomela yooweherera eyo, vaavo eeralaawe: “Miyo kiri evinyerero ni ekumi.” Yesu aahaakhela owera wa Muluku woowaavinyereriha alipa ookhwa. Nnaamweera owo aavinyererinhe atthu eeli wa mukhalelo woovirikana: vaavo anvinyererinhawe mwaarusi mmoha eera okhwaaru, ni mmiravo mmoha yoowo avinyererinhiwe nihiku nnene nenlo aakhwiiyaawe. (Luka 7:11-15; 8:49-55) Ankha woohima sa Lazaro, yoowo aakhwiiye ni yaavira mahiku maxexe murutthu awe waapatxenre winkha, neereke Yesu anwera onvinyereriha?

13. Moovarihana ni masu ninphwanyaahu va Yohani 11:32-35, Yesu aapanke eheeni vaavo amoonnaawe Maria ni atthu akina yinlaka? (Nwehe efootu.)

¹³ Mmusome Yohani 11:32-35. Nkuupuwelani nyuwo mureene weiwo, moonaka itthu sootheene seereya. Maria murokorawe mukina Lazaro, onnakumana ni Yesu ni owo onnahima etthu emoha-moharu aahimmaawe munneewe, eeraka: “Pwiya, wakhanle vava, sano ahakhwiye murokor’aka.” Maria vamoha ni atthu akina, ennaripiwa murima, vaavo Yesu onwoonaawe yinlaka, owo tho onnakhala ooripiwa murima oonaka ovoreya wa asinthamwene awe eripinwe murima. Nave Yesu onnapatxera winla. Owo aasuwela weera ti woovoreya murima omuyeleela ole nimmusivelaahu.

14. Etthu Yesu aapankaawe vaavo aamoonnaawe Maria anlaka ennixuttiha eheeni woohima sa Yehova?

¹⁴ Etthu Yesu aapankaawe vaavo amonalaiye Maria inlaka, ennanixuttiha weera Yehova Muluku toomoriwa ikharari. Nto ninsuwela moota heeni eyo? Ntoko noonalaahu wa yoosoma evinre, Yesu onnatakiha moomalela mikhalelo sa Atithawe. (Yoh. 12:45) Vaavo ninsomaahu sa Yesu, ninnoona weera owo annaamorela ikharari asinthamwene awe mpakana winla. Nto hiyo ninnaroromela weera Yehova onnanimorela ikharari vaavo onnoonaawe ninlaka. (Nsal. 56:8) Wuupuwelela eyo ennaneeriha hiyo, okhalano ntthuno noowaatxeerera onthamwene ahu ni Yehova Muluku ahu a nsivelo. Neereke nyuwo khamunaakhulela?

15. Moovarihana ni Yohani 11:41-44, etthu heeni yeereñye Yesu aphiyakaru vamahiyeni a Lazaro? (Nwehe efootu.)

¹⁵ Mmusome Yohani 11:41-44. Yesu onnaphiya vamahiyeni va Lazaro ni onnavekela weera  nivenxiwe nluku nawalelinwaayano mahiye. Marta onoona weera khaiyene va miruku opaka eyo mwaha wooweera murutthu awe, wannankha. Mene nto Yesu onnamwaakhula: “Nkolenle wi wiwelela onimona ovuwa wa Muluku?” (Yoh. 11:39, 40) Avinyaka Yesu onnaweha wiirimu ni onnapaka nivekelo ohoolo wa atthu ootheene. Owo aatthuna onvaha ottottopeliwa wootheene Yehova mwa etthu ele aakelaawe opaka vale. Avinyaka Yesu onnakhuwela ni mmilo wootheene eeraka: “Lazaro okhumele vate!” Nto Lazaro onnakhuma eettaka! Mene nto Yesu aapaka etthu yeeyo atthu yuupuwelaaya weera khayaakela owereya.—Nwehe enoota ya Yohani 11:17.

16. Ekapiitulu ya 11 ya Yohani, enlipiha moota heeni nroromelo nahu woohima sa yooweherera ya ovinyererihiwa?

¹⁶ Ekapiitulu 11 ya Yohani, ennalipiha nroromelo nahu woohima sa ovinyererihiwa. Moota heeni? Muupuwele yoolaihera Yesu ampakenlaawe Marta: “Murokor’á anavinyerere.” (Yoh. 11:23) Ntoko Atithawe, Yesu tho ookhalano ntthuno ni owera wookwanihera yoolaihera ela. Mwaha woowinla, onnoonihera weera Yesu, ookhalano ntthuno ni murimaawe wootheene woommaliha nookhwa ni maxupo ontannyeraawe. Opwaha mwa yeeyo, emaara Lazaro aakhumaawe mmahiyeni, Yesu aahonihera weera ookhalano owera woowavinyereriha alipa ookhwa. Avinyaka muupuwele ele yesu aamwerenlaawe Marta: “Nkolenle wi wiwelela onimona ovuwa wa Muluku?” (Yoh. 11:40) Hiyo nookhalano mathowa matokotoko yawo anniroromeliha weera yoolaihera ya Muluku woohima sa ovinyererihiwa enookwanela moohihovela. Vanonto eheeni nintthuneyaahu opaka weera nroromeleke yoolaihera eyo ni murimaahu woothene?

17. Vaavo ninsomaahu sooweereya siri mBiblya sa ovinyererihiwa nuupuweleleke eheeni?

¹⁷ Mwiisukere etempu weera musome sooweereya seereñye khalayi. Mbiblyani ninnaphwanya sooweereya 8 sa atthu yaavinyererihinwe weera ekhaleke elapo ela ya vathi. c Nyuwo munoonela hayi wiihiyera etempu weera musome moomaaleleya sooweereya iyo? Emaara munsomaanyu  muupuweleke weera atthu ale yaakhala mweekhaikhai, alopwana, athiyana ni anamwane. Mwaasasereke axuttera etthu yeele eri yooweereya. Emaara munsomaanyu, muupuweleleke moota enniroromelihaaya weera Yehova, ookhalano ntthuno ni owera woowaahokoloxera ekumi atthu ale akhwiiye. Otepaxa wene mwiihiyereke etempu weera musome ni wuupuwelela ovinyererihiwa wootepa otthuneya wa Yesu. Ovinyererihiwa wa Yesu, waahooniwa ni atthu antxipale, nave ennalipiha nroromelo nahu. Nihittiwaleke eyo.—1 Akor. 15:3-6, 20-22.

18. Munkela ottottela hayi mureerelo itxipo sinhima sa ovinyererihiwa? (Nwehe enoota.)

¹⁸ Mwiiweleleke itxipo sa mareherero ahu seiyo sinhima sa ovinyererihiwa. d (Aef. 5:19) Itxipo iyo sinnalipiha nroromelo nahu woohima sa yooweherera ahu yootepa oreera. Weera haawo yoowehereraahu ya ovinyererihiwa enoolipa. Mwiiwelele ni muxuttere itxipo iyo. Nyuwo tho pooti othanla itxipo sene seiyo weera mwiipe naari muxuttere vaavo mummukokhorelaanyu Muluku vatthokoni. Muhele itxipo iyo mmuupuweleloni mwanyu ni vamurimani vanyu. Mwapaka eyo enimookhaviherani vaavo munvirihaanyu erisa naari mwamuyeleela mutthu oosiveleyaxa mookhwaani. Munepa wootteela wa Yehova onimookhaviherani wuupuwelela itxipo iyo, nyuwo munoorowa okhalano ikuru ni omaaliheya mwaha wa itxipo iyo.

19. Itthu heeni nintthuneyaahu wuupuwelelaka woohima sa ovinyererihiwa? (Nwehe equaadru “ Etthu heeni nyuwo munrowaanyu waakoha?”)

¹⁹ Nvarele muteko wuupuwelela. Yehova oonivaha owera woowupuwelela nreene mparadiso. Murokora mmoha ohimme ha: “Miyo kooviriha etempu yintxipale kuupuwelelaka ekumi aka elapo enyowani. Kaakhala ntoko miyo kannoona winkela ifuloori sithapuruwaka mparadiso.” Muupuweleke moota onkelaaya okhala wooreera waasuwela alopwana ni athiyana ororomeleya a etempu aalempwaawe Biblya. Taani muntthunaanyu waasuwela mparadiso? Makoho heeni munkelaanyu waapakela? Muupuweleleke-tho moota onkelaaya okhala wooreera waaphwanya amosi anyu ni asinthamwene anyu ale ekhwiiye. Muupuweleleke itthu sootheene sinkela weereya mwakumana vale, etthu heeni yoopatxera munkelaanyu ohima? Waakhupaarela, ni moota nyuwo munkelaanyu winla mwaha woohakalala.

20. Eheeni nlakenlaahu opaka?

²⁰ Hiyo ninnamuxukurela vantxipale Yehova, mwaha wa yooweherera ya ovinyererihiwa. Nave hiyo khaninhovela weera owo onookwanihera mwaha woowera owo ookhalano ntthuno ni owera wookwanihera eyo. Ti yeeyo nlakenlaahu olipiha nroromelo nahu mwa yooweherera ahu yootepaxa oreera. Opaka eyo onoonaattamelihaxa wa Yovaha Muluku yoowo onlaihenre. ‘Ale nyuwo munasivelaanyu anoorowa ovinyerera.’