1-2. Niwehereraka elapo enyowani, etthu heeni nintthuneyaahu opaka?

 TI WOOREERA osuwela weera Yehova oolaihera weera onoomaliha elapo ela yoonanara ni oniruuhela elapo enyowani. (2 Ped. 3:13) Ekhaikhai weera khanisuwenle liini onrowaawe oruuha elapo eyo, mene nto nookhalano mathowa anniroromeliha weera khenrowa ovira etempu yintxipale weera akwanihere yoolaihera eyo.—Math. 24:32-34, 36; Mit. 1:7.

² Niwehereraka ophiya etempu eyo, ootheene hiyo ninnatthuneya olipiha nroromelo nahu wa yoolaihera ya elapo enyowani nihipwatthaka iyaakha ikavi nraahu mweekhaikhaini. Mwaha wa heeni? Mwaha wooweera nnaamweera nroromelo nahu nreene noolipa, nno pooti otteettheya. Khaiyono vasiyoni-vene murummwa Paulo aahimmaawe weera ohikhalano nroromelo “yottheka ennirwela hiyo vokhweya.” (Aheb. 12:1) Weera nroromelo nahu nihitteettheyeke, hiyo nintthuneya ophimelela ikwaha sootheene mathowa enneeriha weera elapo enyowani enoophiya moohipisa.—Aheb. 11:1.

3. Eheeni ninkelaahu woona mwa yoosomeene yeela?

³ Mwa yoosomeene yeela nnoorowa woona itthu tthaaru sinrowa olipiha nroromelo nahu wa yooweherera Yehova onivanhaawe woohima sa elapo enyowani: Etthu (1) ophimelela mukuttho wa Yesu, (2) wuupuwelela owera wa Yehova ni (3) ovara miteko sa omunepani. Avinyaka nnoorowa woona mutthenka Yehova anvanhaawe Habakuki ni moota onrowaaya olipiha nroromelo nahu mahiku ahu ala. Mene-nto yoopatxera, nrowe noone otthuneya waya okhalano nroromelo noolipa wa yoolaihera woohima ya elapo enyowani, weera niwere oviriha maxupo a mahikwaano.

 ITTHU SINNEERIHA OKHALANO NROROMELO NOOLIPA

4. Soothanla heeni nintthuneyaahu okhalano nroromelo noolipa?

⁴ Mahiku ootheene ninnapaka soothanla, soothanla seiyo siri sitokweene naari sikhaanene. Etthu enrowa onikhavihera opaka yoothanla yooreera ori okhalano nroromelo noolipa. Mwa ntakihero, mahiku ootheene, ninnapaka soothanla seiyo sinhela mpuwa asinthamwene ahu, matthekulelo ahu, osoma ofaculdade, othela, waayara anamwane ni muteko. Waarowa okhala wa miruku wiikoha ha: ‘Keereke soothanla saka sinnoonihera weera miyo kinnaroromela weera elapo ela ninkhalaahu moohipisa enoomala, ni enimoowa elapo enyowani? Keereke miyo kimpaka itthu imoha-moharu empakaaya atthu ale anuupuwela weera khonwereya okhala mwa mahiku ootheene?’ (Math. 6:19, 20; Luka 12:16-21) Nalipiha nroromelo nahu, nroromelaka weera elapo enyowani eri vakhiviru, hiyo nnoowera opaka soothanla sooreera.

5-6. Mwaha wa heeni nintthuneyaahu okhalano nroromelo noolipa vaavo ninvirihaahu maxupo? Mphwanaphwanihe.

⁵ Hiyo tho nintthuneya okhalano nroromelo noolipa weera niwere oviriha maxupo. Pooti weera ninviriha maxupo a ottharatthariwa, eretta ehinlammwa, naari etthu ekina ekhanle yoonikhulumula. Woopatxerani pooti woonaka weera nnoowera oviriha maxupo awo. Mene wakhala weera anoovirelela mwa etempu yintxipale, nintthuneya okhalano nroromelo noolipa weera niwere ovilela ni ovirelela onvarela muteko Yehova moohakalala.—Arom. 12:12; 1 Ped. 1:6, 7.

⁶ Vaavo ninvirihaahu maxupo, hiyo pooti opatxera wuupuwelela weera elapo enyowani Yehova olaihenraawe kheerwa ephiya. Neereke eyo entthuna ohima weera nroromelo nahu khanilimpe? Khaiyene ti hiiho! Muupuwele niphwanaphwaniho nla, eyiita yaapisaka ovira, hiyo pooti wuupuwelelaka weera, elimwe kherwa ephiya. Mene elimwe khenooxelaka ophiya. Vamoha-moharu, vaavo nintteettheyaahuxa, hiyo pooti wuupuwelelaka weera elapo enyowani kherwa ephiya. Mene-nto nroromelo nahu nakhala noolipa, nnookela ororomela moohihovela weera soolaihera sa Muluku sinookwanela. (Nsal. 94:3, 14, 15; Aheb. 6:17-19) Nakhalano nroromelo nno, omukokhorela wahu Yehova, oneereke ovirelela okhala wootepa otthuneyaxa mweekumini mwahu.

7. Mukhalelo heeni woonanara hiyo nintthuneyaahu osepa?

⁷ Hiyo-tho nintthuneya okhalano nroromelo noolipa weera nlaleere. Wa atthu antxipale nnalaleraahu ‘mitthenka sooreera’ sa elapo enyowani, enoona okhala sooreeraxa weera sikhala ikhaikhai. (Math. 24:14; Ez. 33:32) Mene hiyo nihihiyeke muupuwelo owo wa atthu onivoleelaka. Weera nsepe ontthuneya olipiha nroromelo nahu. Nrowe noone mikhalelo miraru nikhanlaahu oopaka eyo.

MPHIMELELEKE MUKUTTHO WA YESU

8-9. Mwaha wa heeni ophimelela mukuttho wa Yesu onlipihaaya nroromelo nahu?

⁸ Moota mukina woolipiha nroromelo nahu ori ophimelela mukuttho wa Yesu. Mukuttho wa Yesu onnaroromeliha weera Muluku onookwanihera itthu sootheene olaihenraawe. Ophimelela mwaha wa heeni Yehova onivanhaawe mukuttho ni itthu sootheene owo opankaawe weera eyo yeereye, sinoolipiha nroromelo nahu mwa soolaihera sa Muluku, woohima sa ekumi yoohimala ni elapo enyowani sinookwanela. Mwaha wa heeni ninhimaahu hiiho?

⁹ Weera anivahe mukuttho, Yehova aanirumihela mwanawe oosiveleyaxa weera ayariwe  elapo ela ya vathi ntoko mutthu oomalela. Emaara aarawe elapo ela ya vathi, Yesu aaviriha maxupo mantxipale, avinyaka owo aahookhwa, okhwa wawe waari wootepa ovoreyaxa. Mweekhaikhai, nlivo Yehova onithummaweno ti nootepaxa waatta. Muluku ahu ansivelo khaarowa waakhulela weera mwanawe ahaawe mooteene yoole ni okhwa, weera hiyo nakhaleno ekumi mwa iyaakha vakhaaneene paahi. (Yoh. 3:16; 1 Ped. 1:18, 19) Okhala weera ooliva nlivo nootepaxa waatta, Yehova onoopaka sootheene onweraawe weera akwanihere yoolaihera ya onivaha ekumi yoohimala elapo enyowani.

MUUPUWELELEKE OWERA WA MULUKU

10. Moovarihana ni Aefeso 3:20, Yehova ookhalano owera woopaka eheeni?

¹⁰ Etthu yanaaveli enkela olipiha nroromelo nahu ti wuupuwelela owera wa Yehova. Owo ookhalano owera wookwanihera itthu sootheene olaihenraawe. Ekhaikhai weera wa moonelo wa mutthu soolaihera sa Muluku woohima sa elapo enyowani, pooti okhala ntoko khasinrowa weereya. Nto Yehova ohaalaihera atthu itthu seiye mutthu ohinkelaawe owera opaka. Opwaha mwa yeeyo, owo nanwera sootheene. (Yobi 42:2; Mar. 10:27) Neereke Yehova ampaka yoolaihera yeeyo mutthu ori poothe eeraawe awere okwanihera?—Mmusome Aefeso 3:20.

11. Nvahe ntakihero mwa soolaihera sikwaniherinwe seiyo vamaithoni va atthu saakhala ntoko khasaakela owereya. (Nwehe equadru “ Soolaihera sootikhiniha sikwaniherinwe.”)

¹¹ Nrowe noone soolaihera seiyo Yehova aalaihenraawe atthu awe akhalayi. Seiyo saakhala ntoko khasaawereya okwanela. Owo aamulaihera Abrahamu ni Sara weera naari awo yaari oowuuluvala, awosa yaammuyara mwaana. (Eph. 17:15-17) Owo-tho aamweerela Abrahamu weera, anvaha osuulu awe elapo ya oKanani. Yoolaihera ela yaakhala ntoko khayaakela okwanela, mwaha wooweera ana a Israeli yaawo yaari osuulu wa Abrahamu yaakhala iyaakha sintxipale wExipitu ntoko akaporo. Mene yoolaihera ela yaakwanela. Muhoolo mwaya, Yehova aamulaihera muthiyana mmoha oowuuluvala Elizabethi, weera aamukhalano mwaana. Nave owo tho aamulaihera Maria mwali mmoha oohipatxeriwa (virgem) weera ammuyara mwaana a Muluku. Akwaniheraka yoolaihera owo aapankaawe mwa iyaakha sintxipale sa mutthuli, oJardim wEdeni!—Eph. 3:15.

12. Soolepa sa Yehoxuwa 23:14 ni Yesaya 55:10, 11, sinoonihera hayi owera wa Yehova?

¹² Vaavo nimphimelelaahu moota Yehova aakwanihenraawe soolaihera aapankaawe, nroromelo nahu soohima sa oruuha elapo enyowani ninnakhala noolipa. (Mmusome Yehoxuwa 23:14; Yesaya 55:10, 11.) Neera haawo nnookela okhala oorehereya weera naakhavihere atthu akina wiiwexexa weera elapo enyowani khohiyono oloha. Yehova ohimme ha woohima sa erimu ni elepo enyowani: “Masu ala t’òroromeleya ni a ekhaikhai.”—Apok. 21:1, 5.

MWAATTELIWEKE NI ITTHU SA OMUNEPANI

13. Mithukumano sinrowa olipiha moota heeni nroromelo nahu? Muthalihe.

¹³ Etthu yanaararu enrowa onikhavihera olipiha nroromelo nahu, ori ovihereriwa ovara miteko sa omunepani. Nkuupuwelani ntakihero na mithukumano, murokora mmoha oniitthaniwa Ana, yoowo onvara muteko wa ehuhu yootheene mwa iyaakha sintxipale ohimme ha: “Mithukumano sinnalipiha nroromelo naka, sinkhala ntoko ankora. Nnaamweera namahoolela a mithukumano ohimukhweelaka wuuluma, naari oxuttiha itthu miyo kisuwenlaaka, mene ikwaha sootheene miyo kinnattottela mureerelo ni ti yeeyo enlipiha nroromelo  naka.” b Opwaha mwa yeeyo, nroromelo nahu ninnalipa vaavo asinna, anvahaaya ikomentaariyu omithukumanoni.—Arom. 1:11, 12; 10:17.

14. Muteko woolaleera onlipiha moota heeni nroromelo nahu?

¹⁴ Ovara muteko woolaleera wookhalano owera woolipiha nroromelo nahu. (Aheb. 10:23) Barbara yoowo onanvarela Yehova mwa iyaakha 70, ohimme ha: “Wa miyo ovara muteko woolaleera, etthu enlipiha nororemo naka. Vaavo miyo kinuulumaka ni atthu akina woohima sa soolaihera sooreera sa Yehova, nroromelo naka ninnalipa.”

15. Yoosoma ya omeekha enlipiha moota heeni nroromelo nahu? (Nwehe efootu.)

¹⁵ Etthu ekina ya omunepani enlipiha nroromelo nahu, eri yoosoma ya omeekha. Murokora mmoha oniitthaniwa Susana owo onnamusivela oreherera yoosoma awe. Owo onhima ha: “Edomingu, miyo kinnareherera yoosoma ya Nwehereri ya esemana enttharelana, nanaaveli ni namararu miyo kinnareherera mithukumano sa eriyari ya esemana. Ni mahiku makina a esemana miyo kookhalano eprojeto ya yoosoma ya omeekha.” Mwaha wa woopaka eprograma ya yoosoma, Susana onnawera olipiha nroromelo nawe. Irene murokora mmoha onanvarela muteko Yehova mwa iyaakha sintxipale, oSede Mundial ohimme ha: “Osoma iprofesiya sa mBiblyani, sinnalipiha nroromelo naka. Ni owo onnavirelela othaliha eeraka, miyo kinnatikhiniheyaxa vaavo iprofesiya sa Yehova, sinkwanelaaya moomalela.” c

“ONOKWANIHERIWA, KHAWÒTXELA”

16. Heeni ninhimaawe weera masu Yehova aamulenlaawe Habakuki, annavareleya tho muteko wa hiyo olelo va? (Aheberi 10:36, 37)

¹⁶ Arumeyi akina a Yehova annaweherera omala wa elapo ela mwa iyaakha sintxipale. Wa moonelo wa atthu, pooti okhala ntoko soolaihera sa Muluku sinoopisa okwanela. Mene nto Yehova oosuwela nnene sene moota arumeyi awe anoonelaaya. Vale tho owo amwerela  mprofeti Habakuki: “Niwoko monelo onnathonyera ehuhu yothanliwa, onnùluma sa mahiku òmalihera, ahòthaka. Wapisaka, oweherereke, niwoko onokwaniheriwa, khawòtxela.” (Hab. 2:3) Neereke Yehova uulumme masu ala weera amulipihe Habakuki paahi? Neereke masu ala annavareleya muteko wa hiyo olelo va? Opwaha mwa yeeyo, Paulo aavarela muteko masu ene yaala weera aalipihe akristu anweherera elapo enyowani. (Mmusome Aheberi 10:36, 37.) Nnaamweera wa moonelo ahu noonaka weera soolaihera iya sinnapisa vantxipale okwanela, ‘sinookwaniheriwa khasinootxela!’

17. Murokora mmoha aavarihenle moota heeni miruku Yehova anvanhaawe Habakuki?

¹⁷ Mwa iyaakha sintxipale, asinna antxipale annavarela muteko miruku sa Yehova sa ovirelela oweherera. Mwa ntakihero, Louise yoowo opatxenre onvarela muteko Yehova eyaakha ya 1939, ohimme ha: “Etempu ene yeele, miyo kuupuwela weera Harmagedoni aamurwa miyo kihinaaye omaliha osoma. Mene tho eyo khayeereñye. Etthu yaakikhavihenre mwa iyaakha iye, waari osoma sooweereya sa mBiblyani sa atthu yanweherenre Yehova okwanihera yoolaihera awe. Ntoko Nowa, Abrahamu, Yosefe ni akina. Ovirelela oweherera, onnakikhavihera miyo ni atthu akina, ororomela weera elapo enyowani ehanle ophiya.” Moohihovela, asinna yaawo ananvarela Yehova mwa iyaakha sintxipale, annaakhulela masu ala.

18. Moota heeni owehexexa soopattuxiwa sinlipihaaya nroromelo nahu weera elapo enyowani enoophiya?

¹⁸ Ekhaikhai weera elapo enyowani vaanaano va kheekhanle. Mene nto muupuweleke matakihero a itthu sikhanle. Ntoko ithenyeeri, miri, asinama ni atthu. Khaavo onkela weera itthu iya khasikhanle, mene yaakhala etempu sahaakhanlaaya. Itthu iya sookhala mwaha wooweera Yehova oroopattuxa. (Eph. 1:1, 26, 27) Muluku ahu oolaihera oruha elapo enyowani, ni owo onooruha. Yoolaihera ela yakwanela, atthu ankela okhalano ekumi yoomalela mahiku ootheene. Mwa etempu yoophwanelela ya Yehova elapo enyowani enookhala ntoko hiiho sinkhanlaaya itthu sootheene sinnirukurera.—Yes. 65:17; Apok. 21:3, 4.

19. Moota heeni nyuwo munkelaanyu oliphiya nroromelo nanyu?

¹⁹ Vaavo ninwehereraahu elapo enyowani, hiyo nintthuneya ottottela mureerelo iparakha sootheene nraahuno weera nlipihe nroromelo nahu. Imaara soothesene nimuxukureleke Yehova mwaha wa mukuttho wa Yesu. Ni nuupuweleleke owera Yehova okhanlaaweno. Opwaha wa yeeyo, mwaatteliweke ovara miteko sa omunepani. Mweera haawo, nyuwo munookhala variyari va atthu ale “mwa wiwelela ni mwa ovilela alipa òwàtakiha yale anavolowa mukalampa wa anatiri Muluku àmanenlaiye.”—Aheb. 6:11, 12; Arom. 5:5.