1-2. (a) Nooneleke hayi vaavo ninphimelelaahu ekumi wa Yesu ni itthu owo aapankaawe? (b) Eheeni ninkelaahu woona mwa yoosoma ela?

 VAAVO nimmuyeleela ahu mutthu nimmusivela ahu mookhwaani, hiyo ninnunkheliwa nuuwo, woopatxerani nyuwo pooti oriipiwa murima mwaha wa wuupuwela etthu yeereñye ohinaaye okhwa mutthu owo, wuupuwelela moota ahaawiyaawe. Mene nto etempu ekina nyuwo pooti wuupuwelela etthu owo ooxuttinhaaweni vaavo aaraawe mukumi, apaale etthu owo opakenlaaweni naari uulummaawe yoosivenleni.

² Emoha-moharu, hiyo ninnariipiwa murima vaavo ninsomaahu itthu Yesu avirinhaawetepaxa wene vaavo nnuupuwelelaahu okhwa wa Yesu Kristu. Hiyo ninnivaha etempu weera niphimelele otthuneya waya mukuttho wa Yesu Kristu wa hiyo. (1 Akor. 11:24, 25) Opwaha mwa yeeyo, hiyo ninnahakalala mwaha wa etthu Yesu aapankaawe ni aahimmaawe etempu aaraawe elapo ya vathi, ti woolipiha wuupuwelela itthu owo ompakaawe vinaano va ni itthu onrowaawe opaka muhoolo. Ntoko ninrowaahu woona mwa yoosomeene yeela, ophimelela itthu iya ni nsivelo Yesu oraaweno wa hiyo onooneeriha woonihera weera ninnamuxukurela ni soopaka sahu.

3. Mathowa heeni enneeriha oxukurela mukuttho wa Yesu?

³ Naaphimelelaka ekumi ni okhwa wa Yesu Kristu hiyo ninnaxukurela. Vaavo Yesu aaraawe elapo ela ya vathi owo aahaaxuttiha atthu weera Omwene wa Muluku onooruha mareeliho mantxipale elapo ela ya vathi. Hiyo ninnavaha mwiitti ele Biblya onnixuttihaawe woohima sa mukuttho wa Yesu kristu, ni ninneera asantte vantxipale mwaha wa mukutthu wa Yesu mwaha wooweera eyo ennanivaha eparakha ya okhalano onthamwene woolipa ni Yehova. Ale arino nroromelo wa  Kristu aakhalano yooweherera ya okhalano ekumi yoohimala elapo ela ya vathi, nave tho aanoorowa owoona amusi aya ale ekhwiiye evinyererihiwaka. (Yoh. 5:28, 29; Arom. 6:23) Hiyo khaninphwanela mareeliho awo, nave khaninwera oliva etthu Yehova ni Yesu enipakenlaaya. (Arom. 5:8, 20, 21) Hiyo ninrowa woonihera moota heeni weera ninnaxukurela mukuttho wa Yesu?

4. Maria Madalena oonihere moota heeni oxukurela wawe? (Nwehe efootu.)

⁴ Moone ntakihero na muthiyana mmoha oneeriwa Maria Madalena. Owo annihaxiwa ni minepa soonanara mithanu orwa miili ‘sete’ ni annahaawa vantxipale mwaha wa minepa iye, mpaka owo aaphiyera wuupuwelela weera khaawera oviriha maxupo ale, nto vanooneya weera Maria aamuxukurela Yesu vaavo aamulaminhaawe. Oxukurela iwo waamweeriha okhala mutthareli a Yesu, ni avarihelaka muteko etempu awe, ikuru sawe ni itthu aakhanlaaweno weera akhavihere muteko woolaleera. (Luka 8:1-3) Maria annavaha mwiiti etthu Yesu anpakenlaawe, nto pooti weera owo khaasuwenle itthu ikina Yesu aarowaawe opaka muhoolo mwaya weera owo anvaha ekumi awe “wera yeyo eri yothene enamwìwelela ehiriheye, nto ekhaleno ekumi yohimala.” (Yoh. 3:16) Nnaamweera vareene hiiho, owo annoonihera oxukurela avirelelaka okhala oororomeleya ni vaavo Yesu aahaawaawe vamwirini wa nihaaxero Maria aamwattamela weera amulipihe ni aalipihaka atthu akina. (Yoh. 19:25) Vaavo Yesu aakhwiiyaawe Maria ni athiyana akina yaathuma itthu weera ereherere murutthu wa Yesu. (Mar. 16:1, 2) Maria aareelihiwa mwaha wa nroromelo nawe ni owo aakhalano eparakha etokotoko yoowuuluma ni Yesu vaavo aavinyererihinwaawe, eparakha yeeyo arumeyi akina yahakhanlaayano.—Yoh. 20:11-18.

5. Ninrowa woonihera moota heeni weera ninnaxukurela etthu Yehova ni Yesu anipakenlaaya?

 ⁵ Hiyo pooti woonihera ni oxukurela etthu Yehova ni Yesu anipakenlaaya, hiyo pooti opaka eyo nivarihelaka etempu ahu ni ikuru weera nikhavihere mareherero a Yehova. Mwa ntakihero, hiyo pooti wiivaherera weera nikhavihere oteka impa sa Omwene naari oreherera.

6. Mwaha wa heeni nyuwo munrowaanyu weera mukuttho etthu yootthuneya wa nyuwo?

⁶ Wuupuwelela nsivelo Yehova ni Yesu ekhalannaaya wa hiyo ninnaneeriha waasivela tho awo. (1 Yoh. 4:10, 19) Vaavo ninsuwela ahu weera Yesu okhwiiye weera onoopole, nsivelo nraahuno ni Yehova ni Yesu ninnalipa. Murummwa Paulo aahoonihera weera annaxukurela mukuttho wa Yesu vaavo alenpawe ha: “Mwana a Muluku, okitthunne miyo ni ìvelenle nthowa na miyo.” (Agal. 2:20) Mwaha wa mukuttho, Yehova oowiittanani nyuwo weera mukhale nthamwene awe. (Yoh. 6:44) Oosuwela weera Yehova ohoona etthu yooreera wa nyuwo ni ooliva weera awoopoleni, nyuwo khamunhakalala mwaha wa yeeyo? Neereke eyo khenwerihani nyuwo nsivelo mukhalannaanyu ni Yehova ni Yesu olipa? Hiyo ninnitthuneya wiikoha weera ‘nsivelo nna ninkeeriha opaka eheeni?’

7. Ntoko noonnaahu va footuni, moota heeni ootheene hiyo ninrowaahu woonihera nsivelo nikhalannaahu ni Yehova ni Yesu? (2 Akorinto 5:14, 15; 6:1, 2)

⁷ Nsivelo nraahuno ni Yehova ni Yesu ninnaneeriha waasivela atthu akina. (Mmusome 2 Akorinto 5:14, 15; 6:1, 2.) Moota woowonihera nsivelo nno ori wiilipihera ovara muteko woolaleera, mwaha wooweera hiyo ninnatthekula ni atthu ootheene nnaaphwanya ahu nihipwatthaka eraasaaya nuulumo naya naari itthu ekhalannaaya. Nto naapakaka hiiho, ninnoonihera mukhalelo wa Yehova weera atthu ootheene yoopowe “siso ephiye osuwela ekhaikhai.”—1 Tim. 2:4.

8. Ninkela woonihera hayi weera ninnaasivela asinna ni asirokora?

⁸ Hiyo tho ninnoonihera weera ninnamusivela Yehova ni Yesu vaavo nnaasivelaahu asinna ni asirokora. (1 Yoh. 4:21) Mwaha wooweera ninnaapwattha ni ninnaakhavihera vaavo envirihaaya maxupo, ni wakhala weera munna mmoha ookhweliwa hiiva ninnamulipiha, avoreyiwa hiiva ninnamuxekura ni axupeyaxa hiiva ninniilipihera weera nimuhakalalihe. (2 Akor. 1:3-7; 1 Ates. 5:11, 14) Hiyo ninnaavekelela asinnihu mwaha wooweera “nivekelo na naxariya ti na ikuru.”—Yak. 5:16.

9. Moota heeni mukina ninrowaahu woonihera weera ninnaasivela asinna ni asirokora?

⁹ Moota mukina wowoonihera nsivelo wa asinna ni asirokora ori wiilipihera okhaliha murettele, ni Yehova namalevelela mutokweene okhanle. Nto hiyo nintthuneya omutakiha owo, ni Yehova aalakela onivaha mwanawe weera akhwe mwaha wa soottheka sahu, nto neereke hiyo khaninrowa waalevelela asinna ni asirokora anitthekenle? Hiyo khanintthuna okhala ntoko kaporo ole Yesu amulikanxenraawe wa niphwanaphwaniho nawe, nnaamweera pwiyawe amulevelenle yookopha aarinaawe yintxipale, nto owo khaawenre omulevelela kaporo mukwaawe ni yookopa aarinaawe vakhaaneene. (Math. 18:23-35) Wakhala weera nyuwo moohiittana ni munna mmoha mmulokoni munoonela hayi wiiraana nihinaaye ophiya nihiku na wuupuwelela okhwa wa Yesu? (Math. 5:23, 24) Moohihovela opaka eyo nyuwo munimoonihera weera munnamusivela Yehova ni Yesu.

10-11. Asitokweene munrowa woonihera moota heeni weera munnamusivela Yehova ni Yesu? (1 Pedru 5:1, 2)

¹⁰ Moota heeni asitokweene ammulokoni enrowaaya woonihera weera ennamusivela Yehova ni Yesu? Ori vaavo enkosoopaaya sookukhula sa Muluku siri variyari vaya. (Mmusome 1 Pedru 5:1, 2.) Yesu ahoonihera eyo wa murummwa Pedru. Noomala omukhootta ikwaha ttharu, Pedru aaxupeya moota woowoonihera waari weera annamusivela Yesu. Nto noomala ovinyererihiwa Yesu owo aamukoha Pedru: “Simoni mwana a Yohani onnakitthuna?” Nto moohihovela Pedru ampaka ele aaweraawe weera oonihere omusivela wawe Yesu. Nto Yesu aamweerela Pedru “okukhule iputtiputthi saka.” (Yoh. 21:15-17) Nto mpaka okwipi wa ekumi awe Pedru aakosoopa mwansivelo iputtiputthi sa Yesu. Ooniheraka veettiitthuni weera annamusivela owo.

¹¹ Asitokweene, yaphiya etempu ya wuupuwelela moota heeni nyuwo munrowaanyu woonihera weera ele Yesu aamulenlaawe Pedru ti yootthuneya wa nyuwo? Nto nyuwo pooti woonihera omusivela wanyu Yehova ni Yesu vaavo munihiiyeraanyu etempu weera mwaalipihe asinna ni waakhavihera ale ehiñye omukokhorela Yehova weera etthike. (Ez. 34:11, 12) Nyuwo pooti waalipiha anamasoma a Biblya ni atthu akina enweela woonela muthukumano wa wuupuwelela okhwa wa Yesu mpaka ele munweraanyu weera yiisoone weera ennaakheliwa, muhittiwalaka weera awo pooti okhala atthareli a Yesu.

12. Mwaha heeni masu Yesu aahimmaawe ohiyu woomalihera ennilipihaaya? (Yohani 16:32, 33)

¹² Ohiyu woomalihera wa Yesu, owo ahaalela atthareli awe weera “mwelaponi mú munrowa okhalano sovalaveliha, mene nto mulipihe murima: miyo kòwera elapo ya vathi.” (Mmusome Yohani 16:32, 33.) Eheeni yaamukhavihenre Yesu okhala oolipa murima vaavo aattamelinwaawe ni amwiittani  awe ovirelela okhala oororomeleya mpaka okhwa wawe? Nto owo annamuroromela Yehova moomalela ni Yesu annasuwela weera atthareli awe yanviriha maxupo ntoko owo avirinhaawe, mwaha wa yeeyo, Yesu aamuvekela Yehova weera aakosoope. (Yoh. 17:11) Nto mwaha wa heeni eyo ennilipihaaya murima? Mwaha wooweera toolipa waapwaha amwiittani ahu ootheene. (1 Yoh. 4:4) Yehova onnoona sootheene sineereya nto nroromeleke weera owo onoonikhavihera owina maxupo ahu ni olipa murima.

13. Moota heeni Yosefe Arimatheya oonihenraawe olipa murima?

¹³ Moone ntakihero na Yosefe Arimatheya. Owo aari mulopwana aattittimihiwa mmuttetthe wa aYuda mwaha wooweera owo aavara vakhiviro wa mwene, mpuwa wa muteko woolaleera wa Yesu owo aahiya okhala oolipa murima. Ni Yohani aahima weera Yosefe aari “mutthareli a Yesu nto moowipitheya mwaha wooweera owo annaawoova aYuda.” (Yoh. 19:38) Nto Yosefe aakhalano nroromelo noolipa wa Yesu mene nto annipithiha wa atthu akina, owo anniisiipithiha oovaka weera oneleliwa weera ari mutthareli a Yesu ammuhiya ottittimihiwa, Biblya onnathaliha weera akhwakaru Yesu, Yosefe moolipa murima “àrowa wa Pilatu ni àvekela erutthu ya Yesu.” (Mar. 15:42, 43) Nto muhoolo mwaya atthu yaasuwela weera owo aari mutthareli a Yesu ni Yosefe khoovale eyo.

14. Etthu heeni nyuwo muntthuneya anyu opaka wakhala weera munnawoova atthu?

¹⁴ Neereke nyuwo mootoko owoova atthu ntoko Yosefe wa Arimatheya? Nyuwo mootoko owuulihani muru osuweliwa weera mwa Namoona a Yehova omutekoni naari oskola? Neereke nyuwo munnoova okhala namalaleera naari oBatiziwa mwaha woowuupuwelela ele atthu enrowaaya ohima wa nyuwo? Muhihiye woova iwo owootxeelihakani nyuwo opaka etthu yooreera, nyuwo pooti oomuleela Yehova vaavo munvekelaanyu weera mukhale oolipa murima weera nwere onvarela muteko owo, nyuwo moonelela vale weera Yehova onaakhula mavekelo anyu nto munookhala oororomeleya ni oolipa murima.—Yes. 41:10, 13.

15. Ohakalala atthareli a Yesu yaakhalanaaya waaweerihe opaka eheeni? (Luka 24:52, 53)

¹⁵ Vaavo Yesu aakwiiyaawe attharelaawe yaariipiwa murima. Nkeererani wiihela mmapuroni mwaya, ni awo yaamuyeleele nthamwenaaya  mmoha ni khiyakhalanne yooweherera. (Luka 24:17-21) Oriipiwa murima aya iwo khowaavirelenle, mwaha wooweera Yesu aavinyererihiwa ni aahaaphwanya ni aahaalela weera ovinyererihiwa wawe waakwanihera iprofesiya sa mBiblyani. Ni aahaavaha muteko wootepa otthuneya weera evareke. (Luka 24:26, 27, 45-48) Nto evinreene mahiku 40, Yesu aatthikela wiirimu, nto oriipiwa murima wa atthareli awe awe waathatuwa ohakalala, awosa yaahakalala vantxipale mwaha woosuwela weera Yesu ari mukumi, ni yaari oolikaneene weera ekwanihere muteko Yesu aavahaawe. Mwaha wa ohakalala yaakhalannaaya waaweeriha onvarela muteko Yehova moohikhulumuwa.—Mmusome Luka 24:52, 53; Mit. 5:42.

16. Ninrowa waatakiha hayi atthareli a Yesu?

¹⁶ Ninrowa waatakiha haayi atthareli a Yesu? Nyuwo pooti okhalano ohakalala omukokhorela Yehova ohiya paahi etempu ya wuupuwelela okhwa wa Yesu. Mene nto, iyaakha sootheene, weera nwere opaka eyo nyuwo ontthuneya ohela Omwene wa Muluku nipuro noopatxera, ni asinna antxipale ennapaka eyo, akina aatxentxa ewoora yaavaraaya muteko weera ekhalaneke etempu yoowoonela mithukhumano olaleera ni okokhorela vatthokoni, akina aahiya muteko waawiiyera etempu weera envarele Yehova mapuro oothowa anamalaleera. Veettiitthuni weera niwere opaka eyo nintthuneya wiilipihera ni okhala oororomeleya vamaithoni va Yehova. Nto owo ooniroromeliha weera nahela Omwene nipuro noopatxera owo onoonireeliha.—Mir. 10:22; Math. 6:32, 33.

17. Eheeni mulakenlaanyu opaka etempu ya wuupuwelela okhwa wa Yesu Kristu? (Nwehe efootu.)

¹⁷ Hiyo ninnaweherera moohakalala wuupuwelela okhwa wa Yesu Kristu, yoowo onkela weereya nanaaveli 4 a Abril a eyakheene yeela. Nto hiyo khaninweherera ophiya nihiku nno weera niphimelele okhwa wa Yesu ni nsivelo Yehova ni owo enoonihenraaya. Nto nintthuneya ophimelela itthu sootheene iya etempu yoowuupuwelela, mwa ntakihero, mwiivahe etempu weera musome ni ophimelela itthu siri va tabelani ya mBiblyani “A Última Semena de Jesus na Terra no Apêndice B12 da Tradução do Novo Mundo.” Nto mwaasomaka sooweereya iyo mwaasaase soolepa sa mBiblyani ororomelo nanyu oxukurela anyu ni ohakalala anyu. Nto muupuwelele moota munkela anyu woonihera oxukurela wanyu, moohihovela Yesu onoovaha mwitti wiilipihera wanyu etempu ya wuupuwelala okhwa wawe.—Apok. 2:19.