1-2. Mwaha wa heeni ninrowelaahu woonela muthukumano wa wuupuwelela okhwa wa Yesu Kristu iyaakha sootheene?

 MWA iyaakha 2000 sivinre, Yesu aavaherera ekumi awe weera onoopole hiyo, nto tiyeeyo enneeriha hiyo okhalano eparakha ya ekumi yoohimala. Ohiyu ole Yesu aarowaawe okhwa, owo aaweerela atthareli awe weera yuupuweleleke mukuttho awe epakaka eyo mookhweya evarihelaka muteko epaawu ni eviinyu.—1 Akor. 11:23-26.

² Hiyo ninnatthara nlamulo nna na Yesu mwaha wooweera hiyo ninnamusivela. (Yoh. 14:15) Iyaakha soothesene mwa etempu yoowuupuwelela, hiyo ninneera asantte ele Yesu onipakenla awe niihiyeraka etempu weera nuupuwelele ele okhwa wa Yesu entaphulelaaya wa hiyo ni ovekela. Niilipiheraka mmutekoni moolaleera weera naawope atthu antxipale weera yoonele ni hiyo muthukumano owo, nihihiyeke weera mutthu naari etthu enootxeelihaka hiyo orowela woonela muthukumano wa wuupuwelela okhwa wa Yesu Kristu.

3. Yoosomeene yeela ninkela woona heeni?

³ Yoosoma ela, nnimoona ipontu 3 seiyo Anamoona a Yehova eniilipiheraaya weera yoonele muthukumano wa wuupuwelela okhwa wa Yesu Kristu: (1) yuupuwelelaka okhwa iwo ntoko Yesu mwaneene aaxuttinhaaweno, (2) yaawopaka atthu akina weera yoonele vamoha, ni (3) erowaka woonela muthukumano nnaamweera evirihaka maxupo.

4. Ikhaikhai heeni hiyo nnuupuwelelaahu etempu ya wuupuwelela okhwa wa Yesu Kristu, ni eheeni nintthuneyaahu ovaha mwiitti ikhaikhai iyo? (Luka 22:19, 20)

⁴ Iyaakha sootheene nihiku noowuupuwelela, hiyo ninniiwa mwaha yoowo onkhuma mBiblyani yoowo onthaliha, naari neere, oniiwexexiha okhwa wa Yesu ontaphulelaaya wa hiyo. Mwaha wa heeni atthu antthuneyaaya woopoliwa ni moota heeni okhwa wa mutthu mmoha onrowaaya owoopola atthu ootheene. Ninnawuupuwelela ale emphwanela okhuura epaawu ni owura eviinyu ni eheeni entaphulelaaya itthu iya piili. (Mmusome Luka 22:19, 20.) Opwaha mwa yeeyo, hiyo tho ninnathokorora mareeliho enrowa waakhela ale ari ni yooweherera yookha elapo ela ya vathi. (Yes. 35:5, 6; 65:17, 21-23) Nave ti vootthuneya ovaha mwiitti ikhaikhai iya. Atthu antxipale khesuwenle ikhaikhai iya, ni khanvaha mwiitti mukuttho wa Yesu. Opwaha mwa yeeyo, awo khanuupuwelela okhwa wa Yesu Kristu ntoko mwaneene oxuttinhaaweno. Moota heeni?

5. Arumeyi antxipale a Yesu akhwaakaru, yeereñye ti heeni?

⁵ Yesu ni atthareli awe ekhwaakaru, makristu oowootha yaahivoleihera mmilokoni sa makristu. (Math. 13:24-27, 37-39) Awo yannahima itthu soowootha weera “yaahapuxe arumeyi ale.” (Mit. 20:29, 30) Itthu ikina makristu ale oowootha “yaapatxenraaya oxuttiha,” yaari yooweera Yesu “khavanhe ekumi awe, emaara emoharu paahi weera amalihe soottheka saatthu antxipale,” ntoko Biblya onhimaawe, onnahima weera mukuttho wa Yesu wannatthuneya opakiwa veeli-veeli. (Aheb. 9:27, 28) Atthu antxipale olelo va annaakhulela yoowootha eyo. Awosa ennapwaha okerexa isemana sootheene akina mahiku ootheene weera yuupuwelele okhwa wa Yesu Kristu yeeyo eniithanaaya “emiisa yootteela.” b Itiini ikina atthu anoonela ikwaha vakhaaneene paahi, antxipale a yaawo khaniiwexexa eheeni entaphulelaaya mukuttho wa Yesu. Akina a yaawo anniikoha, ‘neereke mukutto wa Yesu ontaphulela weera soottheka saka sooleveleliwa?’ Akina ankhalano nikoho nno mwaha wooweera yaaleelinwe weera mukuttho wa Yesu khontxipiha soottheka saya. Makristu eekhaikhai enaakhavihera moota heeni atthu awo wuupuwelela okhwa wa Yesu Kristu moophwanelela?

6. Eyaakha ya 1872, anamasoma a Biblya yoonelenle heeni?

⁶ Eyaakha ya 1872, Russel ni atthu akina yaapatxera omusoma Biblya mowiixera. Awo yaahiiwexexa eheeni waataphulelaaya mukuttho wa Yesu ni yaatthuneya wuupuwelelaka moota heeni. Nto eyaakha ya 1872, yaaphwanya waakhuliwa wa Biblya weera Yesu akhwiiye weera awoopole atthu ootheene. Awo yaahiilipihera weera yaaleele atthu antxipale. Evarihelaka muteko Iliivuru, iJornale ni itthu ikina. Hiihaale ntoko yaapakiwaaya etempu ya Arummwa, awosa yaapatxera wuupuwelela okhwa wa Yesu ekwaha emoha va yaakhani.

7. Ipesquisa yaapankaaya anamasoma a Biblya, ninvarela hayi muteko olelo va?

⁷ Olelo va, hiyo ninnavarela muteko itthu sootheene anamasoma a Biblya ale yoonelenlaaya. Yehova oonikhavihera wiiwexexa etthu entaphulelaaya mukuttho wa Yesu ni eheeni onrowaawe waapakela atthu ootheene elapo ela ya vathi. (1 Yoh. 2:1, 2) Nave tho noosuwela weera sookhala sooweherera piili wa atthu ale enanvarela Muluku muteko moororomeleya, akina anrowa okhala ni ekumi yoohimala wiirimu, ni imiliyawu sa atthu sinrowa waakhela ekumi yoohimala elapo ela ya vathi. Ophimelela  nsivelo Yehova oraaweno ni hiyo ni wuupuwela ele mukuttho wa Yesu ontaphulelaaya onnanaattameliha wa Yehova. (1 Ped. 3:18; 1 Yoh. 4:9) Hiihaale ntoko arumeyi ale akhalayi vamohamoharu hiyo tho ninnaawoopa atthu weera ewe yoonele muthukumano wa wuupuwelela okhwa wa Yesu ni hiyo ntoko nixuttihinwaahu.

8. Mwaha wa heeni atthu a Muluku eniilipiheraaya weera yaawope atthu weera yoonele muthukumano wa wuupuwelela okhwa wa Yesu Kristu? (Nwehe efootu.)

⁸ Mwa iyaakha sintxipale, atthu a Yehova annaawopa atthu akina weera yoonele muthukumano wa wuupuwelela okhwa wa Yesu. Eyaakha ya 1881, A Sentinela mmoha ampaka anuciu yaawopaka asinna ni asirokora weera yathukumane wa Allegheny, Pennsylvania, owannyawe munna mmoha wa muthukumano ola woothanleya. Ovirakaru owo, muthukumano wa wuupuwelela okhwa wa Yesu waapatxera opakiwa mmilokoni. Março a 1940, anamalaleera yaapatxera woopereriwa weera mmutekoni woolaleera yaawopeke atthu yaale antthuna woonela muthukumano wa wuupuwelela okhwa wa Yesu. Ni eyaakha ya 1960, eBetheli yaahimpirimiri nwopelo wa wuupuwelela. Ovenyera eyaakheene yeele mpaka olelo va, imiliyawu sa nwopelo sookawiwa. Mwaha wa heeni hiyo nniilipiheraahu weera naawope atthu?

9-10. Waawopa atthu weera yoonele muthukumano wa wuupuwelela okhwa wa Yesu Kristu, taani enttottela mureerelo? (Yohani 3:16)

⁹ Nthowa ntokotoko ninneeriha hiyo waawopa atthu ti yooweera ale anrowela muthukumano ekwaha yoopatxera, esuwele ele Yehova ni Yesu aapakenlaawe atthu. (Mmusome Yohani 3:16.) Yoowehereraahu, weera sootheene iye ankelaaya oxuttera etempu yowuupuwelela  saavare murima exuttere sintxipale sa Biblya ni ekhale arumeyi a Yehova. Mene atthu awo khaiyene yaaworu enttottela mureerelo.

¹⁰ Hiyo tho ninnaawopa ale enhiñye onvarela muteko Yehova. Ninnapaka eyo weera niwuupuxere weera Yehova ninlelo onnaasivela awo. Antxipale ennaakhulela nwopelo owo, ni hiyo ninnahakalala owoona awo ewaaka woonela. Woonela muthukumano owo onnawuupuxera moota yaaraaya oohakalala etempu yanvarelaaya Yehova. Moone ntakihero na Monica. c Mpuwa mwa koronaviru, owo aatthikela olaleera ni Anamoona a Yehova akina. Arowakaru woonela muthukumano wa 2021, owo aahimme ha: “Muthukumano ola wookivara murima miyo. Mwa ekwaha yoopatxera sivinrene iyaakha 20, miyo kohaawopa atthu weera yoonele muthukumano wa wuupuwelela. Miyo kinnaxukurela vantxipale etthu Yehova ni Yesu ekipakenlaaya, eyo ti etthu yaakeerinhe miyo wiilipihera waawopa atthu weera yoonele muthukumano.” (Nsal. 103:1-4) Hiyo ninniilipihera waawopa atthu nnaamweera akina ehaakhulelaka, etthu ennihakalaliha ti yooweera Yehova onnoona wiilipihera wahu.

11. Moota heeni Yehova onreelihaawe wiilipihera wahu vaavo nnaawopaahu atthu weera yoonele muthukumano wa wuupuwelela okhwa wa Yesu Kristu? (Hagayo 2:7)

¹¹ Yehova onnanreeliha vaavo nniilipiheraahu weera naawope atthu yoonele muthukumano wa wuupuwelela okhwa wa Yesu Kristu. Eyaakha ya 2021, nnaamweera nahataphuwa mwaha wa koronaviru, nummeru naatthu yoonenle muthukumano wa wuupuwelela okhwa wa Yesu Kristu nahantxeerereya mpaka imiliyawu 21.367.603. Nummeru nna ninnapwaha nummeru na Anamoona a Yehova ari elapo yootheene! Ekhaikhai weera Yehova, khampwatthaxa manummeru. Owo onaapwattha atthu anrowela muthukumano wa wuupuwelela okhwa wa Yesu Kristu. (Luka 15:7; 1 Tim. 2:3, 4) Hiyo kannihovela weera vaavo nnaawopaahu atthu weera yoonela muthukumano wa wuupuwelela okhwa wa Yesu Kristu, Yehova onnanikhavihera waaphwanya atthu ooreera murima.—Mmusome Hagayo 2:7.

12. Itthu heeni sikhanle soonotxeeliha orowa woonela muthukumano wa wuupuwelela okhwa wa Yesu Kristu? (Nwehe efootu.)

¹² Yesu aahima weera mahiku oomalihera, hiyo nanviriha maxupo mantxipale,—ntoko ottharatthariwa ni amusi, osonttiwa, ikhotto, iretta soowakuva omwaramwareya ni itthu ikina. (Math. 10:36; Mar. 13:9; Luka 21:10, 11) Itthu iyo, pooti onootxeeliha hiyo woonela muthukumano wa wuupuwelela. Moota heeni asinna ni asirokora enweraaya owina maxupo awo, ni Yehova onaakhavihera moota heeni?

13. Yehova aamureelinhe hayi Arteni mwaha woowiilipihera wuupuwelela okhwa wa Yesu Kristu nnaamweera aatthukinwe?

¹³ Otthukiwa. Asinnihu etthukinwe mwaha wa nroromelo naya ennapaka ele enweraaya weera yuupuwelele okhwa wa Yesu. Moone ntakihero na Arteni. Etempu yoowuupuwelela eyaakha ya 2020, owo aatthukiwa ni aaheliwa esala ekhaaneene ni maperesu 5. Owo aawera ottottela itthu ikhaani-khaani weera apake epaawu ni eviinyu, ni meekhaaweru yoowo aahireherera weera iipakele mwaha. Ni maperesu makina ale yannapaha ni yannuuluma masu ooruwana. Nto Arteni aapanke heeni? Aahaavekela weera ehiye opaha ni wuuluma masu ooruwana mwa ewoora emoha paahi. Mootikhiniha awosa yaahaakhulela, ni Arteni aahivaherera weera aaleele woohima sa wuupuwelela okhwa wa Yesu Kristu. Nnaamweera awosa yahaatthunne wiiwelela etempu ene yeele Arteni apatxerakaru wuupuwelela okhwa wa Yesu Kristu, muhoolo mwaya awosa yaapatxera ompaka makoho.

14. Atthu a Muluku, yaawenre hayi wuupuwelela okhwa wa Yesu Kristu nnaamweera yaakhanle eretta ya koronaviru?

¹⁴ Eretta ya koronaviru. Mwaha wa eretta ela ya koronaviru, Anamoona a Yehova khayaawenre othukumana nipuro nimoha weera yuupuwelele okhwa wa Yesu Kristu. Nto eyo khiyaakhottihenre wuupuwelela okhwa wa Yesu Kristu. d Yaawera woonela muthukumano owo envarihelaka muteko Zuum, miloko saakhanle ni interneti, atthu yaawera woonela muthukumano weiwo envarihelaka muteko zuum. Nto imiliyawu saatthu seiyo sahakhanleno interneti saapanke heeni? Ilapo sikina, atthu yaawera woonela muthukumano wa wuupuwelela okhwa wa Yesu envarihelaka muteko Radio naari TV. Opwaha mwa yeeyo, iBetheli saawera otaphulela nyaha mwa muulumo simpwaha 500, avinyaka saakuxiwa igravasau sene seiyo eroiheliwaka asinna. Hata ale yaakhala mapuro ooxupa ophwanya interneti yaawera wuupuwelela okhwa wa Yesu Kristu.

15. Etthu heeni nyuwo muxuttenraanyu ni Suwe?

¹⁵ Ottharatthariwa ni amusi. Etthu ekina enwootxeeliha atthu orowela muthukumano wa  wuupuwelela okhwa wa Yesu, ori mwaha woottharatthariwa ni amusi aya. Nwehe ntakihero na namasoma a Biblya mmoha oneeriwa Suwe. Eyaakha ya 2021, nihinaaye ophiya nihiku noowuupuwelela, Suwe aamuleela murokora aamusomiha Biblya weera khaakela owera orowa woonela muthukumano wa wuupuwelela mwaha woottharatthariwa ni amusi awe. Nto murokora ole aamusomela Luka 22:44. Aamuleela weera vaavo ninvirihaahu maxupo, nintthuneya otthara ntakihero na Yesu nihiyaka itthu sootheene mmatatani mwa Yehova, owo annanvekela Yehova ni annahiya itthu sootheene mmatatani mwawe. Nihiku naattharelana, Suwe, aawera ophwanya epaawu ni eviinyu ni aawera woonela mwaha wooxeexelo wa nihiku noowuupuwelela va jw.org. Nihiku nenne ohiyu, owo aawera woonela muthukumano wa wuupuwelela, anvarihelaka muteko telefooni okwaartu wawe. Avinyaka, Suwe aamulepela ekarta murokora ole aamusomiha Biblya eeraka: “Etthu nyuwo mukilenlaanyu osilo yaakilipiha vantxipale. Miyo kaahiilipihera weera koonele muthukumano wa wuupuwelela, ni Yehova aakikhavihera. Miyo nkaano masu oohima wa moota kihakalanlaka ni moota kimmweerelaka asantte Yehova!” Neereke nyuwo munnaroromela weera Yehova onimookhaviherani mwaavirihaka maxupo ntoko ala?

16. Moovarihana ni Aroma 8:31, 32, heeni nintthuneyaahu ororomela weera Yehova onooreeliha wiilipihera wahu weera noonele muthukumano wa wuupuwelela okhwa wa Yesu?

¹⁶ Yehova onnavaha mwiitti wiilipihera wahu weera noonele muthukumano wa wuupuwelela okhwa wa Yesu. Nroromeleke weera Yehova ononreeliha vaavo nnooniheraahu oxukurela mwa itthu sootheene owo onipakenlaawe. (Mmusome Aroma 8:31, 32.) Ti yeeyo nto nraahu oolikaneene weera noonele wuupuwelela okhwa wa Yesu wa eyaakha ela, ni wiilipihera weera nivareke miteko soomunepani, mwa etempu eyo yoothanleya.