1. Etthu eheeni envoleela omutthu ahu?

 ASINNA akina, aBatizinwe khalayi, nto akina aBatizinwe viinaano vaava. Mene nihipwatthaka iyaakha ikavi nikhanlaahu niBatizinweene, ootheene hiyo, ninniilipihera weera nikhaleno omutthu ommusivela Yehova. Nto weera niwere okhalano omutthu ommusivela Yehova, ontthuneya weera nikosoopeke muupuwelo ahu. Mwaha wooweera, ele hiyo nnuupuwelaahu ennavoleela omutthu ahu. Wakhala weera yootthunaahu paahi ti yoohakalaliha sootthuna sa erutthu ahu, nnimuuluma naari opaka itthu soonanara. (Aef. 4:17-19) Wakhala weera ninnuupuwela itthu sooreera mmuruni mwahu, onoonikhweela wuuluma ni opaka itthu sooreera simmwisivela Yehova.—Agal. 5:16.

2. Ninkela waakhula makoho heeni mwa yoosoma ela?

² Ntoko nonnaahu mpuwa mwa yoosoma evinre, hiyo khaninwera woowuupuwela itthu soonanara. Mene, nookhalano owera woowehexexa soopaka sahu. Hiyo khanintthuneya opaka itthu moovarihana ni nyuupuwelo sahu soonanara. Nto, nintthuneya weemexera wuuluma ni opaka itthu, soomunanara Yehova. Nna nivalo noopatxera ni nootepa otthuneya, nintthuneyaahu opaka weera nihiye omutthu wa khalayi nihinaaye obatiziwa. Mene weera nimuhakalalihe Yehova khonkwana paahi ohiya opaka itthu soonanara, ontthuneya weera ‘niwareke omutthu wa nanano.’ (Akol. 3:10) Mpuwa mwa yoosomeene yeela, nnookela wiiwa waakhuliwa wa makoho ala: “Omutthu wa naanaano” ti eheeni? Ninkela okhalano hayi omutthu wa nanano ni ohiyeleela omutthu owo?

3. Moovarihana ni Agalata 5:22, 23, “omutthu wa nanano” ti eheeni? Ni mutthu onwera hayi owara omutthu wa naanaano?

³ Mutthu owanre “omutthu wa nanano” muupuwelo awe ni mapakelo awe itthu, ommutakiha Yehova. Mutthu awaravale omutthu wa naanaano, owo onnaakhalano mikhalelo sa soowiima sa munepa  wootteela wa Muluku. Ni onnahiya weera mikhalelo iyo, sivoleele muupuwelo awe ni soopaka sawe. (Mmusome Agalata 5:22, 23.) Mwa ntakihero, mutthu owanre omutthu wa naanaano, onnamwisivela Yehova ni asinna a munroromeloni. (Math. 22:36-39) Nave, mutthu owo, onnavirelela okhala oohakalala, nnaamweera avirihaka maxupo. (Yak. 1:2-4) Owo onniilipihera weera akhaleno murettele naatthu akina. (Math. 5:9) Toopixa murima ni ooreera murima. (Akol. 3:13) Mutthu tho owanre omutthu wa naanaano, onnamusivela opaka itthu sooreera. (Lu. 6:35) Nave, mutthu owanre omutthu wa naanaano, itthu sootheene ompakaawe sinnoonihera weera, ookhalano nroromelo noolipa wa Yehova. (Yak. 2:18) Ni mwaha woowiihiha, onkhala moomaaleleya vaavo ontannyiwaawe naatthu akina.—1 Akor. 9:25, 27; Tito 3:2.

4. Neereke vannawereya wunnuwihera mukhalelo mmoha mmoha oromolinwe va Agalata 5:22, 23? Muthalihe

⁴ Weera niwere owara omutthu wa naanaano, nintthuneya weera nivariheleke muteko mikhalelo sootheene sihimmwale va Agalata 5:22, 23 ni mikhalelo mikina tho sihimmwale impari ikina sa mBiblyani. * Mikhalelo iya, khasinkhala ntoko ikuwo nintxentxaahu owara. Mene ohima ekhikhai, mikhalelo iya sinnavarihana ni mikhalelo mikina. Mwa ntakinhero, wakhala weera nyuwo munnamusivela mukhwiinyu, nyuwo munkela ompixera murima ni omureerela murima. Weera nikhale ooreera murima, mweekhaikhai nintthuneya okhala oothokorora ni oowiisumaaliha.

5. Yeeriwaka weera nintthuneya okhalano “miruku sa Kristu” eyo entthuna ohima eheeni ni mwaha wa eheeni nintthuneyaahu osoma voohima sa ekumi ya Yesu? (1 Akorinto 2:16)

⁵ Mmusome 1 Akorinto 2:16. Weera niwere okhalano omutthu wa naanaano, nintthuneya okhalano “miruku sa kristu,” eyo entthuna ohima weera, wi hiyo niwere okhalano miruku sa kristu, nintthuneya wiiwexexa moota Yesu onuupuwelaawe ni olikanxa ntakihero nawe. Yesu annatthara mikhalelo sootheene sa soowiima sa munepa wootteela wa Muluku, ntoko hihaale eneeraaya espelho. Yesu annatthara moomalela mikhalelo sootheene sa Yehova. (Aheb. 1:3) Nto vaavo hiyo nnuupuwelaahu ntoko Yesu uupuwelaawe, onookela okhala wookhweya opaka itthu ntoko owo aapakaawe nave okhalano omutthu awe.—Afil. 2:5.

6. Itthu heeni tthaaru hiyo nintthuneyaahu wuupuwelaka voohima sa okhalano omutthu wa naanaano?

⁶ Neereke tthiri vannawereya omulikaxa Yesu? Hiyo pooti wuupuwela ‘Yesu toomalela miyo nkinrowa owera omulikanxa owo.’ Wakhala weera nyuwo munuupuwela hiiho muupuwele itthu  iya: Yoopatxera, hiyo nipakinwe mwa enenero ya Yehova ni Yesu. Nto mwa wa eyo hiyo pooti waalikanxa awo ni okhala oolikana naawo. (Eph. 1:26) Yanaaveli, nintthuneya weera nuupuweleleke weera munepa wootteela, ikuru sootepa owera sa elapo yootheene inoowera onikhavihera opaka etthu ele hiyo naharowaahu owera opaka meekhaahu. Yanaararu, Yehova oosuwela weera hiyo khaninrowa owera okhalano soowiima iya sa muneepa wootteela moomalela vaanaano vaava. Nto ti yeeyo emweerinhe owo, waavaha iyaakha 1.000 ale arinono yooweherera ya okhala elapo ya vathi weera ekhale oomalela. (Apok. 20:1-3) Mene Yehova ontthuna weera mutthu ti mutthu ahiyo apakeke ele onweraawe nave aroromeleke nikhavihero nawe.

7. Ninrowa woona eheeni okhuma vaanano va?

⁷ Itthu heeni nintthuneyaahu omutakiha Yesu? Nnoorowa woona mikhalelo mixexe sa soowiima sa munepa wootteela wa Muluku ni moota Yesu oonihenraawe mikhalelo iyo. Nave nnoorowa woona moota ninkhumelaahu nnene naamutakihaka Yesu ni okhalano omutthu wa naanaano.

8. Yesu oonihenre hayi weera ookhalano nsivelo?

⁸ Moonihere weera munnamusivela Yehova mwaasivelaka atthu. Yesu annamusivela vantxipale Yehova, nto mwaha wa yeeyo, aapaka mukuttho wa Tiithi awe ni wa hiyo. (Yoh. 14:31; 15:13) Moota Yesu okhanlaawe elapo ela ya vathi ohoonihera weera owo annaasivela vantxipale atthu, mahuku ootheene owo aari ansivelo ni oomoriwa ikharari mpaka niiyaale yaamuttharatthara. Yesu ohoonihera weera annasivela atthu mwaha woowera owo annaaxuttiha atthu awo voohima sa Omwene wa Muluku. (Luka 4:43, 44) Opwaha mwa yeeyo, nsivelo Yesu oraaweno ntokweene opiyera owo ovaha ekumi awe ntoko mukuttho ahaawaka okhwa va mwirini va nihaaxero. Nto mwaha wa mukhuttho Yesu opankaawe, ootheene hiyo nookhala eparakha yookhalano ekumi yoohimala.

9. Ninkela olikanxa hayi ntakihero na Yesu?

⁹ Ninxuttera eheeni? Hiyo ninnamusivela Tiithaahu Yehova mpaka noopiyera ovaherera ekumi ahu ni oBatiziwa. Nintthuneya weera nimutakiheke Yesu ni noonihere weera ninnamusivela Yehova naathokororaka nnene atthu akina. Murummwa Yohani olempe ha: “Ole ohinamusivela mukhw’awe onamònaiye, khawerya omusivela Muluku ohinamònaiye.” (1 Yoh. 4:20) Nto mwaha wa yeeyo, nintthuneya weera niikoheke makoho ala: ‘Keereke miyo tthiri kinnaasivela veekhaikhai atthu akina? Keereke miyo kinaakosoopa atthu mooreerela murima nnaamweera awo ekitthokororaka moohixariya? Keereke miyo kinnavarihela muteko ikuru saka ni itthu saka weera khaakhavihere atthu akina oxuttera voohima sa Yehova? Keereke miyo kinniilipihera opaka eyo nnaamweera atthu antxipale ehihelaka mwiitti ele miyo kinpakaaka naari ekisonttaka? Keereke miyo pooti wiivaha ehuhu yintxipale weera keereleke empari muteko wooxuttiha ni woolaleera?’—Aef. 5:15, 16.

10. Yesu aaruhela hayi murettele?

¹⁰ Mwaasasereke murettele. Yesu aari mutthu aaruhela murettele, emaara owo aatthokororiwaawe moohixariya owo khaaliva yoottheka ni yoottheka, mweekhaikhai owo annakhala oopatxera oruhela murettele, mpaka annawooperera atthu akina weera elevelelaneke yatthekelana vale. Mwa ntakihero, owo aaxuttiha eeraka, weera mutthu amuhakalalihe Yehova ontthuneya weera akhalekeno murettele ni mukhwaawe. (Math. 5:9, 23, 24) Nave, Yesu aahaakhavihera arummwa awe oruhela murettele emara yeeyo yaakhulanaaya voohima sa taani mwa yaawo aari mutokweene.—Lu. 9:46-48; 22:24-27.

11. Ninkela oruuhela hayi murettele?

¹¹ Ninxuttera eheeni? Weera niruuhele murettele khaiyene paahi ontthuneya osempa ohiwanana, mene, ontthuneya opatxerihaka waasa oruuhela murettele ni atthu akina nave owooperera asinna ni asirokora weera epakeke etthu emoha-moharu. (Afil. 4:2, 3; Yak. 3:17, 18) Hiyo pooti wiikoha ha: ‘Miyo kinwera mpaka vaaviini oruuhela murettele ni atthu akina? Munna naari murokora akinyoonyiha vale, keereke kinnammira supi (omunyonyeriwa?)  Keereke miyo kinnanweherera mutthu mukina weera apatxerihe waasa murettele naari keere miyo kinpatxeriha, nnaamweera koonaka weera owo okitthekenle? Keereke miyo kinnawooperera asinna weera eruuheleke murettele mukina ni mukhwaawe?’

12. Y esu oonihenre hayi weera aari ooreera murima?

¹² Mwaareereleke murima attthu akina. Yesu aari mutthu ooreera murima. (Math. 11:28-30) Owo annoonihera oreera murima iwo aatthokororaka nnene atthu akina nnaamweera emaara ekina waavila. Mwa ntakihero, emaara muthiyana oFinicia akokhonraawe ohoolo wawe anvekelaka Yesu weera amulamhe mwanawe, Yesu aahuuluma mooreera murima ni muthiyana ole. Woopatxerani Yesu khaapanke etthu ele muthiyana avekenlaawe, mene muhoolo mwaya, owo ahoona weera muthiyana ole aakhalano nroromelo ntokweene ni amulamiha mwana a muthiyana ole. (Math. 15:22-28) Nnaamweera Yesu aari mutthu ooreera murima, owo khaahiya ovaha miruku. Emaara ekina, owo annoonihera weera tooreera murima, aavahaka miruku sooluluwanya atthu yaale aasivelaawe. Mwa ntakihero, emaara Pedru ahimaawe weera Yesu khaatthuneya okhwa, Yesu aamuleela Pedru mooluluwanya ohoolo wa atthareli akina. (Mar. 8:32, 33) Yesu khuulume hiihaale weera amuulihihe muru Pedru hooye, opwaha mwa yeeyo owo aatthuna waatxentxeriha atthareli akina weera kentthuneya wiiroromela meekhaaya. Oweharu Pedru ahoona wuuliha muru, mene annatthuneya waakhela nttaruxo nne.

13. Ninkela okhala hayi atthu ooreera murima mweekhaikhai?

¹³ Ninxuttera eheeni? Naatthunaka okhala atthu ooreera murima, ontthuneya emaara ekina ovahaka miruku sooluluwanya. Emaara ekina, waahaaweleyaka ovaha miruku sooluluwanya, nitthuneya weera nimutakiheke Yesu nivahaka miruku sinkhuma mBiblyani. Mukhale ooreera murima emaara munuulumaanyu, muroromeleke weera ole ommusivela Yehova ni mummusivelaanyu onnatthuna opaka itthu sooreera nave onoorowa wiiwa ikano munanvahaanyu. Mwiikoheke ha: ‘Wakhala weera mutthu kimmusivelaaxaka vantxipale ohanle vakhaaniini opaka yoottheke, keereke miyo kamukhalano olipa murima weera kinvahe ikano owo onhaawelaawe? Keereke emaara kinvahaaka ikano kinvaha mooreerela murima naari kinvaha kiriipiwene murima? Emaara kinvahaaka ikano yootthunaaka tiivi? Keereke kinvaha ikano mwaha wooweera kiroonyoonyiwa ni mutthu owo naari keereke kintthuna mureerelo awe?’

14. Mwaha wa heeni Yesu aapakelaawe itthu sooreera atthu akina?

¹⁴ Mwaapakeleke atthu akina itthu sooreera ni yootthuna yooreera. Yesu khaiyono paahi aaroowooperera atthu akina weera epakeke itthu sooreera, hooye, mene owo annapaka eyo. Mwaha wa nsivelo aakhalannaawe ni Yehova, Yesu annapaka itthu sooreera ni yootthuna yooreera. Mutthu okhalanne murima wooreera, onnatthara ntakihero nna, nave onnapatxeriha waapakela itthu sooreera atthu akina. Mene weera mutthu akhale ooreera murima, khonkwana paahi opaka itthu sooreera, mene, ontthuneya opaka itthu iyo sooreera ni yootthuna yooreera. Nto atthu akina pooti wiikoha ha: ‘Neereke tthiri onnawereya waapakela atthu akina itthu sooreera ni yootthuna yooreera?’ Aani, mwa ntakihero, Yesu aahuuluma woohima sa atthu yaavaha atthu oohaawa iximola ni yootthuna weera yooniwe ni atthu akina, awo yaapaka eyo ni yootthuna weera ettottopeliwe naatthu. Mene wamaithoni va Yehova mutthu ole ompaka itthu sooreera ni yootthuna yoonanara, yoovaha eyo khemuteko.—Math. 6:1-4.

15. Waaweherera waakhela etthu mwaha wa etthu opankaawe, neereke onaapakela itthu sooreera atthu akina? Mwaha wa heeni?

¹⁵ Ninxuttera eheeni? Mutthu onimweera kohaapakela atthu akina etthu yooreera, wakhala weera khonweherera waakhela eetthu mwaha wa etthu opankaawe. Tivawo mwiikoheke ha: “Keereke miyo kookhalano yootthuna ya opaka etthu yooreera ni muhoolomwaya kihimpaka? Mweekhaikhai ene yootthunaaka tiivi kaapakela itthu sooreera atthu akina?”

16. Etthu heeni nintthuneyaahu opaka nenne nxiiye, ni mwaha wa heeni?

¹⁶ Khanintthuna wuupuwelela weera wiilipihera wahu weera nikhaleno omutthu wa naanaano, onkota naBatiziwaru. Mene nnaamweera niBatiziwene, onnatthuneya okosoopa “omutthu ahu wa vaanaano.” Hiyo pooti opaka eyo, naasaaseraka eparakha yoowoonihera soowima sa munepa wootteela nenne nxiiye. Muupuweleke wi Yehova Muluku, Muluku onvarihela munepa awe wootteela weera apake itthu. (Eph. 1:2) Nto mwaha wa yeeyo, yoole ori mukhalelo wa yoowima ya munepa wootteela, ontthuneya weera onooperereke opaka etthu. Mwa ntakihero, Yakobe ohimme ha, “wiiwelela [ororomela] ohikhanleno miteko saya ti yokhwene.” (Yak. 2:26) Etthu eyo tho enneereya ni mikhalelo mikina sa munepa wootteela wa Muluku. Wakhala weera hiyo khaninvarela muteko mikhalelo iya, iyo sinookhwa mpuwa mwa hiyo. Emaara yootheene hiyo nnooniheraahu mikhalelo soowiima sa munepa wootteela, ninnoonihera weera mikhalelo iyo sinnanikhavihera.

17. Nipakeke eheeni wakhala weera nihuku tinno nohootxela woonihera soowiima sa munepa wootteela wa Muluku?

¹⁷ Atthu ale aBatizinwe mpuwa mwa iyaakha sintxipale tho, ennavirelela okhala oohimalela ni ikwaha ikina annapaka itthu iye awo yahaatthunaaya ntoko ohoonihera soowiima sa munepa wootteela. Mene etthu eri yootepa otthuneya, ori ohikhulumuwa. Nkuupuwelani niphwanaphwaniho nna: wakhala weera ekuwo anyu enoosivelani owara yoopereya nipuro nikhaanini, neereke nyuwo mwaamuriha? Hooye. Araaya nyuwo mwaamuroiha ottotthiha nipuro nne naahunwe nave mwaamwiilipihera weera etthu eyo eheereye veeli. Wamoha-moharu, wakhala weera nihuku tinno nyuwo mohootxeela omoonihera mutthu ooreera murima ni oopixa murima, muhikhulumuwe. Mweerere opaka murettele ni ovekela oleveleliwa, eyo pooti wookhaviherani nyuwo okhalano onthamwene ni mutthu owo. Nave mwiilipihereke weera ohitthikele ohiiwanana iwo veeli.

18. Nroromeleke eheeni?

¹⁸ Moohihovela ti wooreera otthara ntakihero nooreera na Yesu. Emaara yeeyo, hiyo nimmutakihaahu moota woowuupuwela, onnakhala wookhweya opaka itthu ntoko owo ompakaawe. Naapakaka itthu ntoko Yesu ompakaawe, nnoowara omutthu waanaanano. Mpuwa mwa yoosoma ela, noothokorora mikhalelo mixexe sa munepa wootteela wa Muluku. Munoonela hayi wiivaha ehuhu weera musome mikhalelo mikina sa soowiima sa munepa wootteela, ni ophimelela moota nyuwo munooniheraanyu mikhalelo iya? Nyuwo pooti ophwanya nyaha sintxipale sinuuluma sa mwaha ola va Elivuru Enaakhaliherya Anamoona a Yehova Otokosa Myaha. Mwaasaase nipuro nneera “ekumi ya akristu” avinyaka mukele nipuro nneera “soowima sa munepa wa Muluku” nyuwo muroromwele weera, wakhala weera munoopaka empari anyu, Yehova onkela wookhaviherani okhalano omutthu wanaanaano mpaka khalayi.