1. Ekumi anyu yaari hayi muhinaakuve opatxera omusoma Biblya?

 EKUMI anyu yaari moota heeni muhinaakuve opatxera omusoma Biblya ni Anamoona a Yehova? Wakhala weera khoonoosivelani wuupuwelela moota ekumi anyu yaakhanlaaya muhinaaakuve opatxera omusoma Biblya, atthu antxipale-tho khoonasivela wuupuwelela. Itthu sooreera ni soonanara nuupuwelaahu seettihiwa ni makhalelo a elapo ela. ‘Hiyo khanaakhanleno yooweherera mene naakhala woohikhala Muluku mulaponi.’ (Aef. 2:12) Mene mwaha woomusoma Biblya ekumi ahu yootxentxeya!

2. Moonelenle eheeni mwa yoosomaanyu ya Biblya?

² Mpatxerakaru omusoma Biblya, nyuwo mwaahoonelela weera Yehova ori ntoko Tiithi a nsivelo, yoowo onoosivelani vantxipale. Nyuwo mwaahiiwexexa weera, mwaatthunaka omuhakalaliha Yehova ni weerela empari emusi awe, muntthuneya opaka matxentxo mweekumini mwanyu ni mmuupuweloni mwanyu. Yoosoma ya Biblya yoowooniherani weera mwaatthunaka opaka yootthuna ya Yehova, ontthuneya opaka itthu sooreera ni otthawa itthu owo onhimaawe weera tisoonanara.—Aef. 5:3-5.

3. Moovarihana ni Akolosi 3:9, 10, Yehova oninleela weera nipakeke heeni, ni yoosomeene yeela ninkela woona heeni?

³ Yehova Tiithi ahu ni mpattuxaahu. Mwa yeeyo, owo ookhalano edireitu yoowaaleela atthu a emusi awe, etthu ankelaaya opaka ni ohipaka. Nihinaakuve oBatiziwa Yehova anleela weera ontthuneya “orula omutthu wa khalayi ni miteko saya.” * (Mmusome Akolosi 3:9, 10.) Yoosoma ela, enookela waakhavihera yaale antthuna oBatiziwa waakhula makoho ala mararu: Nikoho noopatxera (1) “Omutthu wakhalayi ti heeni”? Nikoho nanaaveeli  (2) Mwaha wa heeni Yehova onhimmaawe weera nruleke omutthu wa khalayi? Nikoho nanaararu (3) Moota heeni nneeraahu nipakeke eyo? Yoosoma ela-tho enimwaakhavihera yaale abatiziwe osepa otthikela opaka itthu naari wuupuwela moovarihana ni omutthu wakhalayi.

4. Mikhalelo heeni onooniheraawe mutthu oneettihiwa ni “omutthu wa khalayi”?

⁴ Mutthu oneettihiwa ni “omutthu wakhalayi” onuupuwela ni opanka itthu sihimmusivela Yehova. Mutthu owo toowiitthuna, ohixukuru, owiisunnuwiha ni oowakuva onyoonyiwa. Pooti weera mutthu owo onnamusivela woona iviidiyu saatthu oohiwara ni lfilme soowuuliha muru naari sa ikhotto. Pooti weera mutthu owo ookhalano mikhalelo sooreera nave-tho onnamuriipaka murima mwaha wa itthu soonanara ompakaawe naari onuulumaawe. Mene wakhala weera khantthuna otxentxa muupuwelo awe ni itthu ompakaawe, mikhalelo sawe sooreera khasikhanle muteko.—Agal. 5:19-21; 2 Tim. 3:2-5.

5. Mwaha woohimalela, eheeni nintthuneyaahu wuupuwelaka? (Miteko 3:19)

⁵ Atthu ootheene eyarinwe ni yoottheka. Mwa yeeyo, khaninwera ohiya moomalela sootthuna ni nyuupuwelo soonanara. Ikwaha ikina, nneereke opaka naari wuuluma itthu seiyo muhoolo mwaya nneeraahu nttharuwe. (Yer. 17:9; Yak. 3:2) Vaavo ninhiyaahu omutthu wakhalayi, khanneettihiwa-tho ni makhalelo ni nyuupuwelo ni itthu soonanara. Neera haawo, hiyo ninnavirikana ni atthu akina.—Yes. 55:7; mmusome Miteko 3:19.

6. Mwaha wa heeni Yehova ontthunaawe weera nihiyeke nyuupuwelo ni sootthuna soonanara nakhalannaahu nihinaaye opatxera omusoma Biblya?

⁶ Yehova ontthuna weera nihiyeke nyuupuwelo ni sootthuna soonanara seiyo naakhalannaahu nihinaaye opatxera omusoma Biblya. Owo onhima eyo mwaha wooweera onnansivela vantxipale ni ontthuna weera nikhalekeno ekumi yoohakalaliha. (Yes. 48:17, 18) Yehova oosuwela weera, wakhala weera khaninwanano nyuupuwelo ni sootthuna soonanara nnimwiikumihera maxupo ni-tho, wakumihera atthu akina. Wakhala weera eyo enimweereya eyo, Yehova onoomuriipa murima.

7. Moovarihana ni Aroma 12:1, 2, yoothanla heeni niitthuneya ahu opaka?

⁷ Pooti weera asinthamweene ahu naari amusi ontheeya vaavo nnapaka ahu matxentxo  ni ohiiya omutthu wakhalayi. (1 Ped. 4:3, 4) Awo pooti ohiima weera nyuwo mokhalano otaphuwa wa opaka ele muntthunanyu wakhala weera munnatthuna opaka matxentxo naari hooye muhaahiiyaka atthu akina woorumani. Mene ohiimwiiwelela Yehova khoiyono otxentxera. Opwaha mwa yeeyo, atthu aneera hiiho anettiihiwa ni elapo ela ya Satana. (Mmusome Aroma 12:1, 2.) Mwaha woweera otheene hiyo nokhalano ottaphuwa wopaka yothanla: Wari weera nnitthuna okhalaka ni omutthu wakhalayi, yoowo onnvariihana ni yottheka ya elapo ya Satana nari omuhiya Yehova onnikhaviheera opaka matxentxo weera nikhaleke nnene.—Yes. 64:8.

8. Eheeni enkela onikhavihera osepa minyupuwelo ni opaka itthu soonanara?

⁸ Yehova oosuwela weera khanniiwera ohiya muupuwelo ahu ni soopaka sahu soonanara moowaakuveya. (Nsal. 103:13, 14) Mene Yehova onnanivaha nikhaviihero nenno nintthuna ahu weera nipake matxentxo. Owo onnanikhavihera anvarelaka muteko Biblya ni munepa awe wootteela ni mareherero awe. Nereeke mweekhaikhai nyuwo muhoona moota Yehova okhavihenraaweni. Vanonto, ninkela woona eheeni eneera yookhaviiherani ohiya omutthu wakhalayi weera mphwaneelele oBatiziwa.

9. Moota heeni ankelaaya wokhaviherani masu a Muluku?

⁹ Munvareleke muteko Biblya weera musuwele makhalelo anyu. Masu a Muluku ari ntoko espelho naari neere, eloola yeeyo ennikhavihera osuwela mikhalelo sahu sooreera ni soonanara, nave-tho muupuwelo ni mapakelo ahu itthu. (Yak. 1:22-25) Ole onoosomihani Biblya naari mukristu mukina owiithwa moomunepani pooti wookhaviherani. Mwa ntakihero, owo pooti onvarela muteko Biblya weera awoonihereni mikhalelo sanyu sooreera naari nipuro nooreerela oreherera. Nave owo pooti wooxuttihani moota munkelaanyu waasaasa soohimmwa seiyo sinkela wookhaviherani owanano ni otteettheya wanyu. Ni muupuweleke weera Yehova ori olikaneene weera ookhavihereni. Khaavo mutthu owera okhavihera onampwaha Yehova, mwaha wowera Yehova oosuwela murima ahu. (Mir. 14:10; 15:11) Mwa yeeyo, okhuma olelo vaava mpatxerihe omusoma Biblya ni ovekela mahuku ootheene.

10. Muxuttenre eheeni ni yoweereya ya Elie?

¹⁰ Muhihoveleke otthara itthu Yehova onnirumaawe weera nipakeke, tiwooreera. Itthu sootheene Yehova onnivekelaawe weera nipakeke onnerela yoohi. Mutthu ompaka yootthuna ya Yehova onnakhalano ekumi yoohakalaliha mweekhaikhai. (Nsal. 19:7-11) Opwaha mwa yeeyo, ale ahinimwiiwelela Yehova ele onhimaawe annariipiwa murima mwaha yoottheka apankaaya. Moone etthu yaakhumelenle ni mulopwana oneeriwa Elie. Owo ahuuwale ni asitithawe yaamusivela Yehova. Mene Elie, unnuwakaru aakhalano asinthamwene oohireerela. Elie aapatxera otxa mirette soohapala ni aakhalano ekumi yoohihakalaliha ni aapatxera wiiya. Owo onnathaliha weera ekumi awe yannavirelela okhala yoowali. Mene owo onnaakhulela eraka “[Miyo] kannapaka itthu sootheene seiyo Yehova ohintthunaawe.” Mene Elie khattiiwanle etthu aaxuttenrawe vaavo araawe mwaana ni aatthikela omusoma Biblya. Owo aahiilipihera vantxipale weera ahiye sookhovelela soonanara ni aaBatiziwa eyaakha ya 2000. Moota heeni otthara miruku sa Yehova waamukhavihenraaya? Elie ohimme ha: “Olelo kookhalano murettele mmuupuweloni ni yowuupuxera ya murima yooreera.” * Yoweereya ela ennonihera weera ohitthara miruku sa Yehova, mutthu onniikhumihera maxupo mwanenaawe. Nnamwi vareene  hiiho, Yehova ontthuna waakhaviihera atthu ala otxentxa mukhalelo aya.

11. Itthu heeni Yehova oniittaawe?

¹¹ Muxuttere wiitta itthu Yehova oniittawe. (Nsal. 97:10) Biblya onnihima weera Yehova onniitta “maitho owixona, orakama nlumi ni matata anayeha ephome ya atthu ohittheka.” (Mir. 6:16, 17) Owo tho “onnatoloxa yale anuluma sowotha.” (Nsal. 5:6) Yehova onniitta itthu iya, tiyeeyo yamweerinhe waatoloxa atthu a mahuku a Nowa mwaha wooweera awo yaari oowuma murima. (Eph. 6:13) Yehova tho onnawiitta yaale antthuna omwalana ni aiyaya naari amwaaraaya ehikhanle mathowa oorereela. Vamaithoni wa Yehova okokhorela waya atthu awo khomkhala muteko, atthu awo ankela othorihiwa mwaha wa miteko saya.—Mal. 2:13-16; Aheb. 13:4.

12. Entaphulela eheeni ‘othanya etthu yonanara’?

¹² Aroma 12:9 oneera: “Muthanye itthu sonanara.” Tiyeeyo Yehova ontthunaawe wa hiyo “othanya” ontaphulela wiitta vantxipale ophweliwa ni etthu. Etthu emoha-emoharu yamwereya wakhala weera mutthu ohovekelani otxa eyotxa yowuntxa. Pooti weera wupuwelaru nyuwo munnathanya. Hiyo pooti okhalano muupuwelo mmoharu vaavo nnittaahu itthu Yehova onhimaawe weera ti soonanara.

13. Mwaha wa heeni ontthuneyaaya okosoopa nyuupuwelo sahu?

¹³ Mukosoopeke nyuupuwelo sanyu. Nyuupuwelo sahu sinnaneeriha opaka itthu. Ti yeeyo Yesu aahimmaawe weera nikhootteke nyuupuwelo sineera sineerihe opaka yoottheka. (Math. 5:21, 22, 28, 29) Mweekhaikhai nintthuna weera ekumi ahu emuhakalalihe Yehova. Weera eyo yeereye, ontthuneya okhootta moowakuveya nyuupuwelo soonanara seiyo sinkhumelela mmuupuweloni mwahu.

14. Etthu nnuulumaahu enoonihera eheeni, ni makoho heeni nintthuneyaahu wiipakela?

¹⁴ Mukosoopeke masu munuulumaanyu. Yesu ahiimme ha: “Sotheene sinkhuma mmwanoni sinakhuma mmurimani.” (Math. 15:18) Mwekhaikhai ele nnuulumaahu ennonihera etthu eri vamurimani vahu. Niikoheke ha: ‘Ikwaha sootheene kinnuuluma ekhaikhai, nnamweera eyo eriki ekikumihere maxupo? Neereke kinnaattittimiha aiyaka naari amwaaraka kulumaka masu anoonihera weera kinnamutthuna muthiyana mukina naari mulopwana mukina? Keereke kinniilipihera weera kihuulume itthu sowuuliha muru? Keereke kinnakhala oomaaleleya  vaavo mutthu mukina onkiveehaawe?’ Wuupuwela makoho ala animookhaviherani vantxipale. Ntoko hiihaale onxupaaya orula maleya ohinaaye ohula ibotau, onnaxupa-tho ohiya omutthu wakhalayi wakhala weera onnavirelela wuuluma moowali noothaka ni wuuluma itthu soowuliha muru.

15. Eheeni enntaphulelaya ohela vamwirini “omutthu wa khalayi”?

¹⁵ Mpakeke ele munweraanyu. Murummwa Paulo avarihela muteko ntakihero nooreera atthunaka wiiwanyeiha otthuneya waya opaka matxentxo mweekumini. Owo aahimme weera nintthuneya okhomela “vamwiirini” “omutthu wakhalayi.” (Arom. 6:6) Naari neere, nintthuneya otthara ntakihero na Yesu. Owo aari oolikaneene weera aveleele ekumi awe weera amuhakalalihe Yehova. Emoha-emoharu, hiyo tho nitthuneya okhala oolikaneene weera nimuhakalalihe Yehova nihiyaka itthu sootheene seiyo Yehova oniittaawe. Nitthuneya okhalano yoosuweliha ya murima yooreera weera nikhaleno okumi woohimala muhoolo, nintthuneya opaka matxentxo awo. (Yoh. 17:3; 1 Ped. 3:21) Yehova khanrowa otxentxa itthu ohimmaawe weera ti soonanara naari sooreera weera anihakalalihe hiyo. Mweekhaikhai, hiyo nintthuneya opaka matxentxo weera nimuhakalalihe.—Yes. 1:16-18; 55:9.

16. Mwaha wa heeni nyuwo muntthuneyaanyu ovirelela owanano mikhalelo soonanara?

¹⁶ Nvirelele owanano ni sootthuna soonanara. Nnamwera niBatiziweene khalayeene, nneereke ovirelela owanano mikhalelo soonanara. Moone yoowereya ya munna oneeriwa Maurício. Ehuhu aaraawe mwaana aakhalano mukhalelo wookonihana alopwanaru. Evirakaru ehuhu aahaasuwela Anamoona a Yehova ni aeapatxera omusoma Biblya. Opankene matxentxo matokweene mweekumini mwawe, aaBatiziwa eyaakha ya 2002. Nnamweera aavirinheene iyaakha sintxipale anvarelaka muteko Yehova owo onnahima ha: “kinnaakhulela weera: Yaakhala ehuhu miyo kaatthuneyaka owanano mikhalelo soonanara. Mene Maurício khaahiiye itthu iyo simukhulumulaka. Maurício onnahima eeraka ha: etthu yaakilipinhe waari ohiya itthu iye weera kimuhakalalihe Yehova.” *

17. Eheeni yoosivenleni ni yoowereya ya murokora Nabiha?

¹⁷ Munvekeleke nikhavihero Yehova ni muroromeleke munepaawe wootteela ohiya osuwela wanyu. (Agal. 5:22; Afil. 4:6) Weera niwere ohiya omutthu wakhalayi, nintthuneya wiilipihera vantxipale.  Moone ntakihero na murokora oneeriwa Nabiha. Owo aatthawiwa ni apapawe akhalanneene iyaakha ithanu namosa [6]. Owo onhima ha: “Etthu eyo yaakeeriha okhala mutthu oowali.” Muhoolo mwaya owo aapatxera otxa mirette soohapala aatthukiwa akhala okadeya iyaakha sintxipale. Areene mukadeya mwemwe Anamoona Yehova yahoowa omuxura ni aapatxera omusoma Biblya. Nabiha aapatxera opaka matxentxo matokweene mweekumini mwawe. Owo ohimme ha: “Itthu ikina saakisivela opaka saari sokhweeya ohiya. Mene nto, ohiya ompaha soona khuwaakanle wookhweya.” Nabiha aawanano vantxipale evinreene eyaakha emoha aahiya ompaha soona. Mene owo awenre hayi? Owo ohimme ha: “Etthu yaakikhavihenre owina maxupo ale yaari mavekelo, onvekela Yehova. Kinnaroromela, wakhala weera miyo kowera opaka matxentxo weera kimuhakalalihe Yehova, atthu ootheene anowerya!” *

18. Moovarihana ni 1 Akorinto 6:9-11, eheeni arumeyi a Yehova awenraaya opaka?

¹⁸ Ehuhu ya arummwa, alopwana ni athiyana yaathanliwe weera yalamulele ni Yesu wiirimu, yaapaka itthu soonanara ehinaakuve okhala makristu. Mwa ntakihero, akina a yaawo yaari anamararuwa, anamwiiya ni akina yaakonihana athiyanaru naari alopwanaru. Mene ekhaviheriwaka ni munepa wootteela yaawera ohiya omutthu aya wakhalayi. (Mmusome 1 Akorinto 6:9-11.) Etthu emoharu ennereya mahuku ahu ala. Biblya ohaakhavihera atthu antxipale opaka matxentxo mwekumini mwaya. * Atthu awo aawera owina sookhovelela soonanara seiyo yahaaweraaya ohiya khalayi. Matakihero ala annoonihera weera nyuwo tho munooweera opaka matxentxo muhiyaka sookhovelela soonanara weera mphwanelele oBatiziwa.

19. Eheeni ninkelaahu woona mpuwa mwa yoosoma enttharelana?

¹⁹ Onnatthuneya wuupuwelela weera ale antthuna oBatiziwa antthuneya ohiya paahi omutthu wakhalayi. Entthuneya wiilipihera weera ekhaleno omutthu wa naanaano. Yoosoma enttharelana enimoonihera moota heeni ninkelaahu opaka eyo ni moota enkelaaya onikhavihera hiyo ni atthu akina.