1-2. Nintthuneya opaka eheeni weera Muluku aakhulele okokhorela wahu?

 NYUWO munuupuwela heeni mwiiwaka masu ooweera “okokhorela”? Araaya pooti weera nyuwo munamuupuwela munna okokhonre avekelaka ahinaakuve orowa okona. Naari nyuwo munuupuwela emusi emmukokhorela Muluku vatthokoni ni emusomaka Biblya ni ohakalala.

² Impari soopiili iya, atthu awo ammukokhorela Muluku. Vanonto neereke Yehova onnaakhulela okokhorela waya? Owo onkela waakhulela okokhorela waya, wakhala weera atthu awo annapaka itthu moovarihana ni yootthunaawe, ottittimiha malamulo awe ni omoonihera nsivelo. Hiyo ninnamusivela vantxipale. Hiyo ninnasuwela weera owo onnaphwanela okokhoreliwa, mene nto nintthuneya omukokhorela ntoko owo ontthunaawe.

3. Eheeni ninkelaahu woona mpuwa mwa yoosomeene yeela?

³ Mpuwa mwa mwahaahu ola, ninkela woona okokhorela Yehova aakhulelaawe ehuhu aalempwaawe Biblya. Nave-tho, ninkela woona mikhalelo 8 sineera sinikhavihere osuwela okokhorela Yehova onaakhulelaawe olelo va. Vaavo ninkelaahu woona impari iyo, muupuwele moota muneeraanyu mureherere mikhalelo Yehova onaakhulelaawe sa okokhorela. Nave-tho, ninkela woona mwaha wa heeni ninhakalalaahu vaavo nimmukokhorelaahu Yehova ntoko owo ontthunaawe.

4. Mwaha wa heeni alopwana akina anhimmwa Biblyani yaawenraaya omukokhorela, omuttittimiha ni omusivela Muluku?

⁴ Ahinaakuve oyariwa Yesu Kristu alopwana ntoko Habeli, Nowa, Abrahamu ni Yobi yaahoonihera weera yannamuttittimiha ni omusivela Yehova. Moota heeni? Alopwana awo yaawenre opaka  eyo, mwaha wooweera yanniiwelela, yaakhalano nroromelo ni yannapaka ele yaaweraaya weera emuhakalalihe Yehova. Biblya khanthaliha itthu sootheene yaatthuneyaaya opaka weera emukokhorele Muluku. Mene Biblya onnaiwanyeiha weera awo yannapaka ele yaaweraaya weera envuwihe Yehova. Yannamukokhorela ntoko owo ontthunaawe. Muhoolo mwaya, Yehova aavaha nlamulo na Mose nenno Yehova aahimaawe moota owo aatthunaawe okokhoreliwa. Nno, okokhorela waakhuleliwa Yesu ahinaakuve owa valaponi.

5. Eheeni yaatxentxiye woohima sa omukokhorela Muluku, Yesu akhwaakaru ni avinyererakaru?

⁵ Muhoolo mwaya Yesu akhwiiyeene ni avinyerenre, Yehova khaathalihe-tho weera atthu, etthareke nlamulo na Mose. (Arom. 10:4) Makristu waatthuneya otthara malamulo manyowani, “ikano sa Kristu.” (Agal. 6:2) Weera yiiwelele “ikano” iyo, makristu khawaatthuneya otthara elista ya malamulo a Mose, yaatthuneya otthara ntakihero na Yesu ni sooxuttiha sawe. Olelo va-tho, makristu annapaka ele anweraaya weera etthare ntakihero na Yesu. Opaka eyo onnaweeriha makristu ophwanya “witthuwa” ni omaaleleya.—Math. 11:29.

6. Mwaha ola onrowa wookhaviherani hayi?

⁶ Vaavo munthokororaanyu yeele eri epontu ya okokhorela wanyu, mwiikoheke ha: ‘Etthu heeni kintthuneyaaka oreherera epontu ela?’ Nave-tho, pooti ovirelela wiikoha ha: ‘Neereke kinooweera oreherera mukhalelo aka woomukokhorela Yehova?’ Ekhaikhai weera nyuwo munnatthuneya ohakalala ni matxentxo mpakaanyu mpaka olelo va, nave-tho, munvekele Yehova weera ookhavihereni opaka matxentxo nyuwo muntthunaanyu.

7. Yehova onoonela hayi mavekelo nimpakaahu ni murima wootheene?

⁷ Hiyo ninnamukokhorela Yehova vaavo nnivekela ahu. Soolepa sa mBiblyani sinnalikanxera mavekelo ahu ni rubani aavahiwa mpeweni nave-tho, muhoolo mwaya mutemplo. (Nsal. 141:2) Rubani ole annakumihera winkhela waamusivela Muluku. Sawasawa yeereyaaya khalayi, mavekelo ahu tho olelo va ankhuma va murimani “annamusivela” Yehova, nnaamweera ereene ookhuveya. (Mir. 15:8; Ola. 33:10) Hiyo pooti ororomela weera Yehova onnamusivela aaniwaka ninvekelaka, naamooniheraka nsivelo ni omuxukurela. Owo ontthuna weera nimuleeleke ipalano sahu, maxupo ahu, moonelo ahu ni sootthuna sahu. Muhinaaye ovenkela Yehova, munoonela hayi opatxera wuupuwela toko etthu munkelaanyu onvekela? Mwapaka eyo, munonvekela Yehova etthu yooreera ni mavekelo anyu ankela okhalaka ntoko “rubani” owiinkhela.

8. Eparakha heeni nikhalannaahu yonvuwiha Muluku?

⁸ Hiyo ninnamukokhorela Yehova vaavo nninvuwihaahu. (Nsal. 34:1) Hiyo ninnanvuwiha Yehova vaavo nnaaleelaahu atthu akina mikhalelo sawe seiyo sinnitikiniha ni-tho vaavo nimmuxukurelaahu Yehova onnakhweya onvuwiha. Wakhala weera ninniivaha ehuhu nuupuwela itthu sootheene sooreera—Yehova onipakenlaawe—nnookhalano mathowa mantxipale omuxukurela ni onvuwiha. Muteko woolaleera onnanivaha eparakha “yomuhela makeya òmutthapela Muluku woohihiyerereya, eyo tiiyo, yowima ya iyano sinalokoha nsina nawe.” (Aheb. 13:15) Ntoko hiihaale oraaya wootthuneya wuupuwela nnene ele ninkelaahu onvekela Yehova, tiwooreera-tho wuupuwelela nnene ele ninkelaahu wuuluma ni atthu ninkelaahu waalaleera. Hiyo nintthuna weera “makeyaahu onvuwiha” amusiveleke Muluku. Neera haawo, naalaleeraka atthu nneereke wuuluma ni murima wootheene. Mweekhaikhai ela eparakha etokweene nikhalannaahu yonvuwiha Muluku.

9. Ntoko mareeliho yaaphwanyaaya ana a lsrayeli mwaha woothukumana, mareeliho heeni nimphwanyaahu mwaha woothukumana? Nvahe ntakihero na moota mithukumano sookhavihenraayani.

 ⁹ Hiyo ninnamukokhorela Yehova vaavo nnoonelaahu mithukumano. Ana a Israyeli yaahaakhela nlamulo: “Imara tthaaru [va yaakhani] asilopwana á othene yèmele oholo wa Yahvéh Muluku á vanipuro onrowaiye othanla.” (Ola. 16:16) Eyo yaataphulela weera impa saya ni mireerelo saya saakela okhala soohivareleleya. Mene Yehova aahalaihera ana Israyeli weera: “Siso vanrowawe imara ttharu vayakhani owela wera wìsoneihe oholo wa Yahvéh, Muluku á, khavo onrowa winlela elapo á.” (Ott. 34:24) Mwaha woomuroromela Yehova, ana a lsrayeli yannarowa mmithukumano sene seiya sa vayaakhani. Mwaha woopaka eyo ana a lsrayeli yannaphwanya mareeliho mantxipale. Mwa ntakihero, awo yannakhalano eparakha yoowiiwa masu a Muluku ni ophimelela itthu Yehova aapakenlaawe ni ohakalala mwaha wookhala vamoha ni atthu ammukokhorela ni omusivela Yehova. (Ola. 16:15) Olelo va-tho, enneereya etthu emoha-moharu vaavo nimpaakaahu ele ninweraahu weera noonele mithukumano. Muupuwele moota Yehova onhakalalaawe woona vaavo nnirehereraahu nnene weera navahe ikomentariyu sookhuveya ni soolipiha.

10. Mwaha wa heeni wiipa itxipo sonvuwiha Yehova oraaya wootepa otthuneya vaavo nimmukokhorelaahu Yehova?

¹⁰ Hiyo ninnamukokhorela Yehova vaavo nniipaahu wamoha ni asinna. (Nsal. 28:7) Wiipa waari wootepa otthuneya wa okokhorela wa ana a lsrayeli. Mwene Davidi aahaathanla Malevita 288 weera yiipeke itxipo mutemplu. (1 Sow. 25:1, 6-8) Olelo va-tho, hiyo pooti onvuwiha Muluku ni itxipo sahu. Nihipwatthaka waari weera ninniipa nnene, mene nto Yehova onnamusivela vaavo nimmwiipelaahu itxipo. Mwa ntakihero: “hiyo ninnattheka mwa itthu sintxipale mmasuni,” mene mwaha wa yeeyo hiyo khaninhiya wuuluma mmulokoni naari mmutekoni woolaleera. (Yak. 3:2) Etthu emoharu-tho, hiyo khontthuneya ohiya wiipa ninvuwihaka Yehova mwaha wooweera nnoona weera niipaka nnoonyala. Hiyo onnatthuneya wiipa ni mmilo ahu weera ninvuwihe Yehova.

11. Moovarihana ni Nsalmu 48:13, mwaha wa heeni oraaya wootthuneya omukokhorela Muluku vatthokoni?

¹¹ Hiyo ninnamukokhorela Yehova vaavo nimmusomaahu Biblya ni waaxuttiha anamwane ahu woohima sa yoowo. Esaabadu ana a Israeli yannakhalano eparakha yoowiitthuuwa ehivaraka muteko ni olipiha onthamwene aya ni Yehova. Ana a Israeli akina oororomeleya yaakhalano eparakha yoowaaxuttiha anamwane aya woohima sa Yehova ni itthu sooreera owo aapankaawe. (Ott. 31:16, 17) Olelo-tho va, hiyo nintthuneya wiihiyera ehuhu weera nisome masu a Muluku ni ophimelela. Eyo enneerela empari omukokhorela wahu Yehova ni ennanaattameliha wa Yehova. (Nsal. 73:28) Vaavo emusi—ekhalanne anamwane—empakaaya yoosoma ya vatthokoni, ennaakhavihera anamwane aya omwaattamela Tiithi aya a nsivelo, Yehova.—Mmusome Nsalmu 48:13.

12. Enkixuttiha eheeni moota Yehova oonenlaawe muteko wooteka itthu sa mpewe?

¹² Hiyo ninnamukokhorela Yehova vaavo nimpakaahu impa sa Omwene ni oreherera mapuro ookokhorela. Biblya onnathaliha weera muteko wooteka epewe waari “muteko wottela.” (Ott. 36:1, 4) Olelo va-tho, Yehova onnoona okhala “wootteela” muteko wooteka impa sa Omwene ni miteko mikina sooteka impa sa mareherero ahu. Eyo enxuttihaka weera muteko wooteka nooneke okhala wootteela. Asinna antxipale ni asirokora annahela mwiitti vantxipale muteko vaavo aniivahereraaya evirihaka ehuhu aya weera ekhavihere muteko ola. Wanooneya weera asinna awo-tho, annikhavihera muteko woolaleera akina a yaawo pooti weera antthuna okhala mapiyoneiru. Mweekhaikhai hiyo ninnaxukurela  vantxipale mwaha wa nikhavihero asinna awo anvahaaya. Asitokweene annoonihera weera annikhavihera muteko owo wooteka yaathanlaka asinna oophwanelela weera ekhale mapiyoneiru. Atthu ootheene hiyo pooti opaka ele ninweraahu weera nikhavihere muteko owo nnaamweera nihisuwenle oteka. Noopaka eyo nrehereraka mapuro awo ooteka weera akokhoreliwe Yehova.

13. Mwaha wa heeni idonativu ninvahaahu weera nikhavihere muteko woomwene siraaya sootthuneya?

¹³ Hiyo ninnamukokhorela Yehova vaavo ninvahaahu idonativu weera nikhavihere otekiwa impa sa Omwene. Ana a Israyeli khayaatthuneya orowa matataru vaavo yaakelaaya omukokhorela Yehova. (Ola. 16:16) Awo yannakuxa soovaha saya moovarihana ni mikhalelo saya. Mweekhaikhai opaka eyo yannoonihera weera yanneera asantte wa Yehova mwaha wa itthu soomunepani yaakhelaaya. Moota heeni nneeraahu nimoonihereke Yehova nsivelo ni omuxukurela mwaha wa itthu sootheene soomunepani nnaakhelaahu wa yoowo? Hiyo pooti opaka eyo nivahaka idonativu sahu weera nikhavihere miloko ni muteko wa elapo yootheene moovarihana ni mikhalelo ahu. Murummwa Paulo enre: “enivekelelaka ni nthiti ntokotoko mahala, wera ekawane muteko woowàkhavihera Òttela. Vekhaikhai otthuna worera onsiveleya, ekhale’vo etthu, kahiyo ehikhale’vo etthu.” (2 Akor. 8:4, 12) Yehova onnahela mwiitti etthu eri poothe ninvahaahu nnaamweera ereene vakhaaneene.—Mar. 12:42-44; 2 Akor. 9:7.

14. Moovarihana ni Miruku 19:17, Yehova onoonela hayi nikhavihero nnaapakelaahu asinnihu?

¹⁴ Hiyo ninnamukokhorela Yehova vaavo nnaakhaviheraahu asinnihu makristu. Yehova aahaaleela ana a Israyeli weera ewoonihereke nsivelo asinnaya oohaawa. (Ola. 15:7, 10) Mweekhaikhai vaavo hiyo nnaakhaviheraahu asinna ni asirokora oohaawa ninkhala ntoko nnimmooliha Yehova naari neere nninvaha etthu Yehova. (Mmusome Miruku 19:17.) Mwa ntakihero, makristu ofilipi yaanvaha etthu murummwa Paulo vaavo aaraawe mukateya owo aahimme weera yoovaha ele yaari ntoko “makeya òwakhuleliwa ni òmusivela Muluku.” (Afil. 4:18) Nwuupuweleke asinna a muloko anyu mwiikoheke ha: ‘neereke miyo kinoowera waakhavihera?’ Yehova onnahakalala vantxipale vaavo hiyo ninvirihaahu ehuhu ahu, ikuru sahu, ni itthu sahu saweerutthuni weera naakhavihere atthu anhaawela nikhavihero. Vamaithoni va Yehova itthu iyo sinneerela empari okokhorela wahu.—Yak. 1:27.

15. Mwaha wa heeni omukokhorela Yehova ontthuneyaaya ehuhu ni wiilipihera ni ohikhanlaaya etthu yooxupa?

¹⁵ Omukokhorela Yehova ntoko owo ontthunaawe, ontthuneya wiilipihera ni ikuru mene khoiyono tiwooxupa. (1 Yoh. 5:3) Mwaha wa heeni ninhimaahu hiiho? Mwaha wooweera nimmukokhorela ni nsivelo Yehova. Nkamuupuweleni mwaana ontthuna waavaha yoovaha aTithawe. Pooti weera onnaviriha ehuhu arehereka yoovaha eyo. Mene khanuupuwela weera ehuhu ovirinhaawe arehereraka yoovaha ele aananariha etempwaaweene. Emoharu-moharu, mwaha wooweera hiyo ninnamusivela Yehova, naavirihaka ehuhu ninvarelaka muteko naari omukokhorela khohiyono ninnanariha etempwaaheene, mwaha wooweera ninnamusivela.

16. Moovarihana ni Aheberi 6:10, Yehova onoonela hayi wiilipihera nimpakaahu weera nimuhakalalihe ni omukokhorela?

¹⁶ Tiithi a nsivelo khanweherera weera anamwane awe ootheene envaheke itthu moolikana. Owo onnasuwela weera anamwane awe aakhalano mikhalelo soovirikana. Etthu emoharu tho, Tiithiihu a wiirimu oosuwela itthu sootheene hiyo ninweraahu ni nihinweraahu. Mene nto onnanthokorora moovarihana ni makhalelo ahu. Pooti weera nyuwo munnawera opaka itthu waapwaha atthu akina, nave-tho, pooti weera atthu akina khanwera  opaka itthu munweraanyu mwaha wa wunnuwa, ovoreiwa, mwaha woowaatteliwa miteko weera etxihe imusi saya, waatteliwa miteko, naari itthu ikina sooxupa sa mweekumini nto wakhala weera eyo ennaweerelani muhikhulumuwe. (Agal. 6:4) Yehova khankela ottiwala ele mumpakaanyu waakhala weera nyuwo mumpaka ele munweraanyu weera mmuhakalalihe. (Mmusome Aheberi 6:10.) Yehova onnasuwela mirima saatthu. Owo onnahakalala mwaha wa wiilipihera nimpakaahu weera nimokokhorele.

17. (a) Eheeni munkelaanyu opaka wakhala weera mookhalano maxupo opaka itthu soomukokhorela Yehova? (b) Etthu heeni enkela wookhaviherani? Mukomentari moota nyuwo mwaakhavihereñyaanyu mwaha woopaka itthu sithalihiwe vakwaadruni “ Mwaatxerere ohakalala wanyu”?

¹⁷ Wakhala weera nyuwo munnakhalano maxupo woohima sa ipontu sihimmwale yoosomeene yeela, ntoko yoosomaanyu ya Biblya, omukokhorela Yehova naari muteko woolaleera, waakhala weera nyuwo munimwiilipihera oneereke opatxera woosivelani, nyuwo mmweereke ohakalala. Mweekhaikhai, tiyeeyo eneereya wakhala weera nnoopatxeriha yoosoma ya opaka exersisiyu naari wakhala weera ninxuttera wiipa ikaruma ya emuusika mene waakhala weera ninnatxompela veeli-veeli, khaninkela oxuttera. Hiyo pooti wiipa veeli-veeli weera nikhovelele naatxereraka vakhaani-vakhaani vaavo nnoonaahu weera ninnawera oneereke onsivela ni nneereke ohakalala. Etthu emoharu, enimweereya ni miteko nimpakaahu weera nimukokhorele Yehova.

18. Hiyo nipakiwe weera nimukokhoreleke taani, ni mathowa heeni anneriha opaka eyo?

¹⁸ Hiyo nipakiwe weera nimukokhoreleke Yehova. Tiyeeyo enkhumelela waakhala weera ninnapaka eyo ni murima wootheene ninnakhalano ekumi yoohakalaliha mahuku ootheene mwaha woomukokhorela Yehova. (Mir. 10:22) Opwaha mwa yeeyo, hiyo ninnakhalano murettele mmuupuweloni Mwaha woosuwela weera atthu antxipale ammukokhorela Yehova annaviriha maxupo mamoharu. (Yes. 41:9, 10) Mweekhaikhai nna nthowa noomalihera noomukokhorela Tiithiihu a nsivelo Yehova yoowo omphwanela “wakhela ovuwa ni nttittimiho ni owerya” wa itthu sootheene opattunxaawe!—Apok. 4:11.