Mulopwana Biblya omwiitthanaawe “Nnexe” aarowa onanariha moota heeni yoohiyeriwaawe waakhanle weera oothelana ni Ruthi? (Ruthi 4:1, 6)

Etempu aalempwaawe Biblya mulopwana oothela akhwa ahaayanre anamwane, yaannakhumelela makoho, mwa ntakihero, eheeni yeereya ni imatta sawe? Neereke nsina nawe naamuttuwaliwa? Nlamulo na Mose nannaakhula makoho ala.

Etthu heeni yaakhumelela ni imatta mwaneene akhwa vale, naari atumiha vale mwaha woohaawa? Munnawe naari mmosi awe mukina wannatthuneya othuma. Opaka eyo imatta iya sannavirelela okhala sa veemusini.—Onam. 25:23-28; Nam. 27:8-11.

Vano nsina na mulipa ookhwa naarowa ovirelela hayi okhala? Moorweela mwa ntheli na olamu. Yaari yeeyo ene yeereñye ni Ruthi. Mulopwana wannatthuneya omuthela naamukhweli weera amuyare mwaana, mwaana owo eera ahaleno imatta sa mulipa okhwiiye ni ovireleliha nsina na veemusini. Owo waari moota woowoonihera nsivelo ni waathokorora ale yaari anamukhweli.—Ola. 25:5-7; Math. 22:23-28.

Moone ntakihero na Nowemi, owo aathelinwe ni mulopwana yoowo eeriwa Elimeleki. Elimeleki ni anamwane awe eeli ekhwaakaru, Nowemi aahala meekhaiye. (Ru. 1:1-5) Nowemi atthikelakaru oYuda, owo aamweerela mwaara a mwanawe Ruthi weera anvekele Boaz weera akhale namukalanpaaya naari neere athume imatta. Boaz aari mmosi a Elimeleki xaaxaaxa. (Ru. 2:1, 19, 20; 3:1-4) Mene Boaz aamuupuxera Ruthi weera aakhala mulopwana yoowo Biblya omuhimaawe okhala “nnexe” aari mmosi a Elimeleki tho xaaxaaxa. Eyo enoonihera weera Boaz aakhalano edireitu yoothuma ematta.—Ru. 3:9, 12, 13.

Woopatxerani “nnexe” aari oolikaneene weera akhavihere. (Ru. 4:1-4) Nnaamweera eyo yaahela mpuwa onanariha musurukhu muntxipale. Owo aahoonelela weera Nowemi khaarowa omuyara mwaana yoowo eera ahaleno imatta sa Elimeleki. Nto mwaha wa yeeyo imatta saarowa okhala sa nnexe nave mwaha wa yeeyo owo aamukhuma awinaka.

Mene nnexe aatxentxa miruku oonelelakaru weera aakela omuthela Ruthi. Owo aahime ha: “Nkinawerya othuma ematta yele ntoko namukalampa, wera kihinanarihe yohiyariwa aka.” (Ru. 4:5, 6) Etthu heeni yaamweerinhe nnexe otxentxa miruku?

Waakhanle weera nnexe naari mulopwana mukina oomuthela ni emuyara mwaana, mwaana ola eera ahaleno imatta sa Elimeleki, vanonto va moota heeni nnexe eeraawe “ananarihe yohiyeriwa”? Biblya khanhima samwaheene yoola, hiyo nnoorowa othokola etthu heeni yaamweerihe owo opaka eyo.

• Etthu yoopatxera, nnexe aamuyeleela musurukhu eeraawe athumele imatta sa Elimeleki, eyo yaakela weereya mwaha wooweera mwaana eeraawe amuyare ni Ruthi aamurowa ohalano imatta iye.

• Yanaaveli, nnexe aamukhalano muritti woomukosoopa Nowemi ni Ruthi wa mukhalelo wa weerutthuni.

• Yanaararu, waakhanle weera Ruthi aahaayara anamwane akina ni nnexe, anamwane awo tho yaamukhalano edireitu soohalano imatta sa nnexe, vamoha ni anamwane akina aayanraawe ni athiyana akina.

• Yanaaxexe, waari weera nnexe khaakhanleno mwaana mukina, mwaana yeeraaya emuyare ni Ruthi aamukhalano edireitu ya ohalano imatta sa Elimeleki, vamoha ni imatta sa nnexe. Vaavo nnexe eeraawe akhwe, imatta saarowa ohala ni mwaana mmoha yoowo ahaarowa okuxa nsina nawe mene na Elimeleki. Nnexe khaatthuna onanariha yoohiyeriwaawe, weera amukhavihere Nowemi. Owo aalakela omuhiyera Boaz weera akhale namukalampa a Elimeleki. Ni Boaz aapaka etthu eyo mwaha wooweera, “apwahererihe nsina nawe mohiyeraniwa mwawe”.—Ru. 4:10.

Onooneya weera nnexe, etthu aatthunaawexa waari ovireleliha nsina nawe ni yoohiheriwaawe, owo aari oowiitthuna. Nnexe aatthuna ovireleliha nsina nawe, mene aahootxeela. Olelo va khaavo asuwenle nsina nawe naari neere moota itthaniwaawe. Nnexe aayeleela eparakha yoothanleya yeeyo aavahinwaawe Boaz. Boaz aakhala muhavinre awe Mesiya yoowo ori Yesu Kristu. (Math. 1:5; Luka 3:23, 32) Yooweereya ela enoonihera emalihero ya atthu ale ari oowiitthuna ehitthunaka waakhavihera akhwaaya!