1-2. Wakhala weera nyuwo khamwiirehenre weera mbatiziwe, mwaha wa heeni ohintthuneyaaya okhulumuwa? (Nwehe efootu ya vakhaapani.)

 WAKHALA weera nyuwo munuupuwela obatiziwa, hiyo ninnahakalala. Eyo etthu yootepaxa oreera. Neereke nyuwo munoona weera muri oolikaneene weera mbatiziwe? Wakhala weera nyuwo munaakhula aani, ni asitokweene annaakhulela eyo, pooti opaka eyo assembleya onwa naari kongresu. Mwapaka eyo, muroromeleke weera munookhalano ekumi yoohakalaliha mmutekoni mwa Yehova.

² Ankha mweereliwa vale weera aakhala matxentxo muntthuneyaanyu opaka muhinaaye obatiziwa? Apaale nyuwo mwaneene anyu mohoonelela eyo. Mene nto muhikhulumuwe, nyuwo pooti owera opaka matxentxo, weera mbatiziwe muhipwatthaka iyaakha sanyu.

3. Etthu heeni mwithiyope aamulenlaawe Filipe, ni nikoho heeni naakhumelenle mpuwa mwa waakhuliwa wawe? (Miteko 8:36, 38)

³ Musome Miteko 8:36, 38. Mutokweene mmoha a w’Ethiyopia aamukoha Filipe evanjelista: “Ti xeni enakhottiha wi kibatiziwe?” Mulopwana ola a w’Ethiyopia aatthuna obatiziwa. Neereke owo aari oolikaneene weera apake eyo?

4. Moota heeni mulopwana ole a w’Ethiyopia, oonihenraawe weera aari oolikaneene weera axuttere itthu sintxipale?

⁴ Mulopwana a w’Ethiyopia “arwenle omulapela Muluku o Yerusalemu.” (Mit. 8:27) Tthiri eyo enoonihera weera aahaakhulela ettiini ya aYuda. Mwaha woosoma soolepa sa eHeeberi, owo aaxuttera itthu sintxipale woohima sa Yehova. Nnaamweera vareene hiiho, owo aatthuna oxuttera itthu ikina. Mweekhaikhai, vaavo Filipe amphwannyaawe mulopwana ola mphironi, owo eera asomaka iroolu sa eprofesiya ya Yesaya. (Mit. 8:28) Iprofesiya iye saari ikhaikhai soowiixera sa mBiblyani. Mulopwana ole khaatthuna ni itthu seiye paahi aasuwenlaawe, mene aatthuna oxuttera itthu sintxipale sa mBiblyani.

5. Mulopwana ole a w’Ethiyopia aavarenle hayi ele aaxutteraawe?

 ⁵ Mulopwana ola a w’Ethiyopia, aari mutokweene ootepa otthuneya apwiyamwene Kandasi a w’Ethiyopia. Owo aari “namasamarya a mihakhu sawe sothene.” (Mit. 8:27) Nto mulopwana ola aari oowaatteliwa ni aakhalano miritti sintxipale. Nnaamweera vareene hiiho, owo annakhalano etempu weera amukokhorele Yehova. Ole khaatthuna paahi oxuttera ekhaikhai, mene owo aatthuna ovarela muteko ele aaxutteraawe. Nto mwaha wa yeeyo, yaamweeriha weetta ekwaha yoorakama okhuma w’Ethiyopia mpaka o Yerusalemu weera amukokhorele Yehova o peweni (templo). Ekhaikhai weera ekwaha ela khayaakhanle yookhuveya, mene waatthuneya oyeeha musurukhu muntxipale. Naari vareene hiiho, mulopwana ola annatthuna vantxipale omukokhorela Yehova. Nto mulopwana ole aapaka eyo, ahipwatthaka musurukhu mukavi eeraawe ayeehe.

6-7. Mulopwana ole a w’Ethiyopia nsivelo nawe ni Yehova naavirelenle moota heeni okhala noolipa?

⁶ Filipe aamuxuttiha mulopwana ole aari a w’Ethiyopia ikhaikhai sootthuneya ohela mpuwa taani aari Mesiya. (Mit. 8:34, 35) Mulopwana ole aatepa ohakalala vantxipale mwaha woosuwela ele yaataphulelaaya makeya a Yesu mwa yoowo. Mulopwana ole axutterakaru itthu iye, ti heeni aapankaawe? Mulopwana ole aari oottittimiheyaxa mwa ettiini ya aYuda, ni wanwereya owo ovirelela hiihaawo. Nnaamweera vareene hiihaawo, nsivelo nawe ni Yehova ni Yesu naahaatxeerereya. Mulopwana ole aalakela opaka matxentxo matokotoko mweekumini mwawe, weera abatiziwe ni okhala mutthareli a Yesu Kristu. Filipe aahoonelela weera mwitiyope ole aari oolikaneene, ni owo ambatiza.

⁷ Nyuwo tho munoowera wiirehera weera mbatiziwe mwatthara ntakihero na mulopwana ole a w’Ethiyopia. Nave nyuwo munookhalano nroromelo ntoko aaraaweno mulopwana ole ni aaphiyenraawe okoha: “Ti xeni enakikhottiha obatiziwa?” Nrowe noone itthu nyuwo munkelaanyu opaka ntoko mulopwana ole a w’Ethiyopia aapankaawe. Nvireleleke oxuttera, nvareleke muteko ele munxutteraanyu ni nvireleleke waatxeerera nsivelo nanyu ni Yehova.

8. Yohani 17:3, onhima eheeni nyuwo muntthuneyaanyu opaka?

⁸ Mmusome Yohani 17:3. Neereke masu ala a Yesu ahookhaviherani otthuna omusoma Biblya? Tiyeeyo yeereñye wa antxipale a hiyo. Vano neereke masu ala annanooperera hiyo ovirelela oxuttera? Aani. Hiyo khanintthuneya ohiya ovirelela oxuttera, ni ‘omusuwela Muluku mmoha a ekhaikhai.’ (Koh. 3:11) Hiyo nneereke ovirelela oxuttera woohima sa Yehova, mahiku ootheene. Nto vaavo hiyo ninxutteraahu woohima sa Yehova nneereke otepa omwaattamelaxa.—Nsal. 73:28.

9. Etthu heeni nintthuneyaahu opaka naxuttera vale itthu soopatxera sa mBiblyani?

 ⁹ Ekhaikhai weera vaavo nimpatxeraahu oxuttera woohima sa Yehova, hiyo nimpatxera ni itthu ninroromelaahu sa mBiblyani. Murummwa Paulo aahimme weera sooxuttiha sootthuneya naari soopatxera saari ntoko yootxa yoohilipa. Owo khaatthuna ohima weera itthu iya khasaakhanle sootthuneya, moohiyana niiyo, owo aahoonihera ni aalikanxera ni eyootxa ya mwaana nri nipele. (Aheb. 5:12; 6:1) Nto tiyeeyo murummwa Paulo aawooperenraawe akristu weera ehixuttereke itthu soopatxera sootthuneya paahi. Wannatthuneya awo oxuttera itthu soowiixera sa masu a Muluku. Ekhaikhai weera nyuwo onnoosivelani oxuttera itthu soowiixera sa mBiblyani, mene nto neereke nyuwo muri oolikaneene weera nvirelele wunnuwa ni oxuttera itthu sa Yehova ni sootthuna sawe?

10. Mwaha wa heeni akina anoonaaya oxupa osoma?

¹⁰ Antxipale a hiyo khonnikhweela osoma. Ankha nyuwo? Nyuwo wannookhweelani oxuttera itthu soosivelani osoma? Apaale nyuwo mwaakhalano maxupo, ni mpaka mahikwaano nyuwo munnoona weera konoosivelani osoma iliivuru? Antxipale anoonela hiiho, mene nto Yehova pooti wookhaviherani. Mwaha wooweera owo toomalela ni mulipa ooxuttiha ni oosuwelaxa okhanle.

11. Yehova onoonihera moota heeni weera “Namuku”?

¹¹ Yehova mwaneene enre “Namuku.” (Yes. 30:20, 21) Owo namaxuttiha ooreera murima, oopixa murima, oowiiwexexa nave owo onaasaasa etthu yooreera wa anaxikola awe. (Nsal. 130:3) Owo khanweherera yeeyo hiyo nihinweraahu opaka. Nto muupuweleke weera owo topanke okooko ahu eri yoovaha yootepa oreera. (Nsal. 139:14) Ootheene hiyo nookhalano ntthuno nooxuttera itthu inyowani. Mpattuxa ahu Yehova ontthuna weera nipwaherere oxuttera ni nooneke okhala eparakha eyo. Waarowa okhala wa miruku ovirelela ohaawela ikhaikhai sa mBiblyani vaanaano. (1 Ped. 2:2) Muthanle sooluluwanya seiyo muntthunaanyu okwanihera, mmusomeke ni omuxuttera Biblya mahiku ootheene. (Yeh. 1:8) Mukhaviheriwaka ni Yehova, nyuwo oneereke woosivelani osoma ni oxuttera.

12. Mwaha wa heeni oraaya wootthuneya osoma woohima sa ekumi ya Yesu ni muteko awe vaavo ninpakaahu yoosoma ya mwaneene ahu?

¹² Mwiivitheleke etempu weera mphimelele ekumi ya Yesu ni muteko awe. Naatthunaka onvarela Yehova mwa moota wooreera, ti wootthuneya otthara ntakihero na Yesu otepaxa wene emaara yeeyo ninkumanaahuno maxupo. (1 Ped. 2:21) Yesu aari oororomeleya vaavo aalenlaawe atthareli awe weera yaamukumana ni maxupo. (Luka 14:27, 28) Nnaamweera vareene hiiho, Yesu khaahovela weera atthareli awe yanvirelela okhala oororomeleya vamaithoni va Yehova ntoko owo. (Yoh. 16:33) Musome moowiixera ekumi ya Yesu nave muthanle ipontu muntthunaanyu otakiha nenle nxiiye.

13. Eheeni nintthuneyaahu onvekela Yehova ni mwaha wa heeni?

¹³ Ekhaikhai weera osuwela ti wootthuneya, menento khomphiyera. Osuwela onookhavihera oxuttera itthu sintxipale woohima sa Yehova, wunnuwihera mikhalelo ntoko nsivelo ni omuroromela. (1 Akor. 8:1-3) Vaavo nyuwo munvirelelaanyu oxuttera woohima sa Yehova, munvekeleke weera oovaheeni nroromelo. (Luka 17:5) Owo onnaakhula mavekelo ahu. Mwakhalano nroromelo neekhaikhai, ninvarihana ni itthu musuwenlaanyu woohima sa Yehova, nyuwo munoowera ovarela muteko ele muxuttenraanyu.—Yak. 2:26.

14. Murummwa Pedru oonihenre moota heeni weera ti wootthuneya ovarela muteko ele ninxutteraahu? (Nwehe efootu.)

¹⁴ Murummwa Pedru avarelaka muteko ntakihero  na Nowa, aahoonihera weera ti wootthuneya ovirelela ovarela muteko yeele ninxutteraahu. Yehova aamuleela Nowa weera aamurupiha epula ya mirupi weera aanyaanye atthu oonanara mirima a ehuhu ene yeele. Osuwelaru paahi weera yaamurupa epula ya mirupi, khawaakwanela weera Nowa ni emusi awe yoopowe. Moovarihana ni sooweereya iya, ti wooreera woonelela weera murummwa Pedru, aavarela muteko masu ala oowera “apankaka nikula” ahimaka emaara yeeyo epula ehinaaye orupa. (1 Ped. 3:20) Eyo enoonihera weera Nowa ni amusi awe yaapaka moovarihana ni ele Muluku aahimmaawe etekaka nikula. (Aheb. 11:7) Murummwa Pedru aalikanxera etthu Nowa aapankaawe ni obatizo. Owo enre ha: “Mahi ala ti vanano vava ethonyero ya obatizo onovuluxani nyuwo tho.” (1 Ped. 3:21) Nto hiyo pooti olikanxera wiilipihera wanyu weera mbatiziwe ni moota Nowa ni amusi awe yiilipihenraaya etekaka nikula mwa iyaakha sintxipale. Vano munrowa wiilipihera hayi weera mukhale oolikaneene weera mbatiziwe?

15. Munrowa woonihera moota heeni mweekhaikhai weera moottharuwa?

¹⁵ Etthu yoopatxera nintthuneyaahu opaka ori ottharuwa soottheka sahu. (Mit. 2:37, 38) Nnoowera opaka matxentxo wakhala weera noottharuwa mweekhaikhai. Neereke nyuwo moowera ohiya opaka itthu seiyo simmunanara Yehova, ntoko ompaha soona, okonihana woohireerela, ni wuuluma masu oohireera? (1 Akor. 6:9, 10; 2 Akor. 7:1; Aef. 4:29) Wakhala weera nyuwo khamuwenre ohiya mikhalelo iyo, muhikhulumuwe nvirelele wiilipihera. Opwaha mwa yeeyo, munvekele nikhavihero muhusiha anyu a Biblya naari mwaavekele miruku asitokweene a mmulokoni. Wakhala weera nyuwo mwa mmiravo ni munkhala ni asipapinyu mwaavekele awo weera yookhavihereni ohiya mikhalelo iyo sinwootxeelihani obatiziwa.

16. Etthu heeni enhela mpuwa okhalano yookhovelela ya omunepani?

¹⁶ Etthu yootepa otthuneya ori okhalano yookhovelela ya omunepani. Yeeyo enhela mpuwa woonela mithukumano ni muteko woolaleera. (Aheb. 10:24, 25) Vaavo nyuwo mumpatxeraanyu ovara muteko woolaleera, mpakeke eyo muhitxompelaka. Vaavo munvirelelaanyu ovara muteko onoopola ikumi, oneereke ovirelela woosivelani muteko ola. (2 Tim. 4:5)  Waari weera nyuwo mwa mmiravo ni munkhala ni asipapinyu: ‘Neereke asipapaka ontthuneya okuupuxera weera kirowe omithukumanoni naari woolaleerani? Apaale miyo kimpaka itthu iya kihuupuxerinwene?’ Opaka itthu iya muhuupuxeriwaka onoonihera nroromelo, nave onoonihera weera munnamusivela Yehova ni munneera asantte mwa itthu sootheene oopakenlaaweni. Ntoko Biblya onhimaawe, opaka eyo onrowa woonihera omuttittimiha Muluku, ni masu makina, nikela weera nyuwo munnanvaha yoovaha yootepa otthuneya Yehova. (2 Ped. 3:11; Aheb. 13:15) Sootheene hiyo nnanvahaahu Yehova ni murimaahu ni otthuna wahu wootheene, ennamuhakalaliha yoowo. (Munwehe-tho 2 Akorinto 9:7.) Nto wa hiyo onvaha Yehova ele ninweraahu onnanihakalaliha.

17-18. Itthu heeni sootthuneya sinkela wookhaviherani nyuwo okela vahoolo ni obatiziwa? (Miruku 3:3-6)

¹⁷ Vaavo muniirehereraanyu weera mbatiziwe, nyuwo munookumanano maxupo. Atthu akina anrowa owuulumakani mwaha wa itthu munroromelaanyu, nave akina mpaka woosonttani. (2 Tim. 3:12) Opwaha mwa yeeyo, pooti weera nyuwo moohokoleela opaka etthu mwiilipiheraanyu weera muhiye. Apaale nyuwo pooti okhulumuwa muupuwelaka weera khamurwa nwera okwanihera sooluluwanya sanyu. Nto mwa itthu ntoko iya, eheeni enkela wookhaviherani? Etthu yootepa otthuneya enkela wookhaviherani, nri nsivelo nanyu ni Yehova.

¹⁸ Nsivelo nanyu ni Yehova, etthu yootepa othanleya. Ni moonelo wootepa otthuneya nyuwo mukhanlaanyuno. (Musome Miruku 3:3-6.) Moonelo owo khonkela oriirela noovira etempu. Nsivelo nanyu ni Yehova nimmookhaviherani ovilela maxupo a mweekumini. Ikwaha sinxipale, Biblya onnuuluma sa nsivelo noororomeleya Yehova oraaweno ni arumeyi awe. Eyo entaphulela weera khawa aattiwala naari ohiya waasivela. (Nsal. 100:5) Muupuwele weera owo oopankeni mwa enenero awe. (Eph. 1:26) Vano nyuwo munrowa woonihera moota heeni nsivelo noororomeleya?

19. Moota heeni nyuwo munkelaanyu woonihera oxukurelaxa mwaha wa itthu Yehova oopakenlaaweni? (Agalata 2:20)

¹⁹ Nivalu noopatxera weera nikhaleno nsivelo noororomeleya, ti oxukurela. (1 Ates. 5:18) Nenle nxiiye mwiikoheke: ‘Yehova onoonihera hayi weera onnakisivela?’ Mwarowa ovekela mmuxukureleke Yehova, muhimaka etthu owo oopakenlaaweni. Yehova onnoosivelani vantxipale, ni owo oopaka itthu sa winyuru paahi. Nto mweerereke woona itthu iyo, ntoko murummwa  Paulo enraaweno. (Mmusome Agalata 2:20.) Mwiikoheke ha: ‘Keereke miyo kinnatthuna woonihera weera kinnamusivela Yehova?’ Nsivelo muraanyuno ni Yehova ninkela wookhaviherani ovilela weereriwa ni vaavo munvirihaanyu maxupo. Ni nsivelo nene ti nenno ninkela wookhaviherani ovarexexa mukhalelo anyu wa omunepani ni omoonihera Yehova mahiku ootheene moota nyuwo mummusivelaanyu.

20. Etthu heeni enhela mpuwa ovaherera ekumi anyu wa Yehova, neereke yoothanla eyo ti yootthuneya?

²⁰ Noovira etempu mwaha wa nsivelo muraanyuno ni Yehova, munoorowa okhalano ntthuno noopaka nivekelo noothanleya. Mpuwa mwa nivekelo nno, nyuwo munniivaherera wa Yehova. Mwiivaherera wa Yehova, nyuwo munookhalano yooweherera yootepa oreera: ya onvarela muteko Yehova mahiku ootheene a veekumini vanyu. Vaavo muniivahereraanyu wa Yehova, munnamulaihera onvarela muteko imaara sootheene naari itthu sixumpeene mweekumini mwanyu. Wiivaherera wa Yehova, yoolaihera mumpakaanyu ekwaha emoha veekumini. Ekhaikhai weera yoothanla ela ti yootepa otthuneya mwa soothanla sootheene munkelaanyu opaka mweekumini. Mene nto muupuweleke ha, mwa soothanla soothesene munkelaanyu opaka mweekumini, ela ti yootepaxa oreera opwaha sootheene. (Nsal. 50:14) Satana onimweerera oriiriha nsivelo nanyu ni Yehova. Owo ontthuna weera nyuwo muhiye okhala oororomeleya. Nto muhimuhiye Satana oowinakani. (Yobi 27:5) Nsivelo nanyu ni Yehova nakhala noolipa, nyuwo munoowera okwanihera yoolaihera mwaampakenlaanyu, ni muneereke ovirelela omwaattamela owo.

21. Mwa mukhalelo heeni obatizo ohikhanlaaya emalihero, mene epatxerero?

²¹ Mwiivaherera wa Yehova muulume ni asitokweene weera yooleeleni taavi ari mavalo oottharelana. Nave muupuweleke weera obatiziwa khontaphulela weera itthu sootheene khasinkotela vaavo. Ovinyera emaara mumbatiziwaanyu, munimweera opatxera woonihera weera munkela onvarela Yehova ekumi anyu yootheene. Ti vawonto oraaya ootthuneya ovinyera vaanaano va olipiha nsivelo muraanyuno ni Yehova. Weera nsivelo nanyu nunnuweke nenle nxiiye ontthuneya okhalano sooluluwanya, othanla mavalo awo animookhaviherani nyuwo obatiziwa. Nlo ninrowa okhala nihuku noothanleya veekumini vanyu. Mene muupuweleke weera opatxera iwo. Hiyo ninnaweherera weera nsivelo muraanyuno ni Yehova vamoha ni mwanawe, nnoovirelela wunnuwa mahiku ootheene.