1-2. Nihiku na oBatizo nnoonaka eheeni, ni eheeni nintthuneyaahu ophimelela?

 NEEREKE nyuwo mootoko owoona atthu ale enrowa oBatiziwa mukongresuni naari mwaasembleya? Mene onnakhweya woona wiivaherera waya vaavo enaakhulaaya makoho ale meeli, ehinaaye oBatiziwa, nyuwo munnawoona amusaaya ni asinthamwene aya ehakalanleene, vaavo enkhumaaya mmaahini nyuwo munnoona makuphi yoopiwaka ni awosa ehakalanleene. Nakela okontarela, isemana sootheene imiliyawu sa atthu sinnabatiziwa, ekhalaka Anamoona a Yehova oBatiziwa ni oowiivaherera.

² Nankha nyuwo? Wakhala weera munuupuwela oBatiziwa, musuweleke weera nyuwo mwa mutthu ootepa otthuneya elapo ela yeepiphi. Nyuwo ‘munnamwaasa Muluku.’ (Nsal. 14:1, 2) Wakhala weera nyuwo mmiravo naari owuuluvala, mene yoosoma ela mpakelinwe nyuwo, ni wakhala weera nyuwo moobatiziwa, yoosoma ela enoolipiha yootthunaanyu yoovirelela onvarela muteko Yehova mahiku ootheene. Vano nto nrowe noone mathowa mararu enneeriha onvarela muteko Yehova.

3. Mwaha wa heeni arumeyi a Yehova enaasivelaaya ekhaikhai ni exariya? (Nsalmu 119:128, 163)

³ Yehova aahaaleela atthu a muloko awe weera ‘esiveliweke ni ekhaikhai.’ (Zak. 8:19) Yesu aawooperera oohusera awe weera yaasaaseke exariya. (Math. 5:6) Eyo entaphulela weera ontthuneya opaka ele Muluku onhimaawe okhala ya exariya ni yooreera. Nyuwo ennoosivelani ekhaikhai ni exariya? Khaninhovela weera aani, mwaha wooweera nyuwo munniitta wootha ni miyeettelo sootheene soonanara. (Musome Nsalmu 119:128, 163.) Ole onuuluma soowootha ontakiha mikhalelo sa Satana namalamulela a elapo ela. (Yoh. 8:44; 12:31) Ni etthu Satana ontthunaawe ori onanariha nsina nootteela na Yehova, okhuma olavilavi weereñye ojardi yo Edeni, Satana onnamwaramwara soowootha  woohima sa Muluku. Satana onnaweeriha atthu wuupuwela weera Yehova namalamulela oowiitthuna, oohiroromeleya ni onaakhoottihera atthu itthu sooreera. (Eph. 3:1, 4, 5) Itthu Satana ommootheraawe Yehova sinnananariha mirima sa atthu ni miyuupuwelo. Vaavo atthu enthanlaaya ohisiveliwa ni ekhaikhai, Satana pooti oweeriha opaka itthu soohixariya ni soonanara.—Arom. 1:25-31.

4. Eheeni Yehova opankaawe enoonihera weera owo Muluku ekhaikhai? (Nwehe efootu.)

⁴ Yehova ‘Muluku oororomeleya’ mene nto mooreera murima owo onnaaxuttiha atthu ootheene enamusivela. (Nsal. 31:6 [31:5, NM]) Mwaha woopaka eyo, Yehova onnaakhavihera atthu awo weera ehiwokiweke ni soowootha sa Satana nave tho Yehova onnaaxuttiha arumeyaawe okhala oororomeleya ni axariya ni eyo ennaakhavihera ale emmusivela Yehova okhalano nsivelo namwaneenaaya ni murettele. (Mir. 13:5, 6) Neereke nyuwo munnoona weera onnapaka eyo wa nyuwo vaavo mummusomaanyu Biblya? Nyuwo mooxuttera weera moota Yehova onpakaaweno itthu ti wooreera nave onnaakhavihera atthu ootheene woohelani mpuwa nyuwo. (Nsal. 77:14 [77:13, NM]) Nyuwo muntthuneya ovarexexa exariya ya Muluku. (Math. 6:33) Nyuwo muntthuna waakihera ekhaikhai ni woonihera weera ele Satana onhimaawe sa Muluku ahu Yehova ethiru. Nyuwo munkela opaka hayi eyo?

5. Munoonihere hayi weera munnakhavihera ekhaikhai ni exariya?

⁵ Nyuwo pooti okhalano mweettelo yoowo onwoonihera atthu ootheene weera nyuwo munnasepa mikhalelo sa Satana ni munkhavihera ekhaikhai, nyuwo pooti woonihera weera muntthuna olamuleliwa ni Yehova ni opaka ele owo oneeraawe tiyooreera. Vanonto munkela woonihera hayi? Mpakaka nivekelo noomulaihera Yehova weera munonvarela owo ekumi anyu yootheene ni nwooniheraka atthu moorweela mwa oBatizo. Osiveliwa ni ekhaikhai ni exariya tonneeriha hiyo weera nibatiziweke.

6. Mathowa heeni eri va Nsalmu 45:5 [45:4, NM] enneeriha omusivela Yesu kristu?

⁶ Mwaha wa heeni nyuwo mummusivelaanyu Yesu kristu? Va Nsalmu 45:5 [45:4, NM] (Musome.) Ninnapwanya mathowa yaawo enneeriha omusivela owo. Yesu omusivela ekhaikhai, ti oowiiyeviha ni axariya, ti voowereya nyuwo omusivela Yesu kristu. Ti vaavonto moolipa murima Yesu aakiheraawe ekhaikhai ni exariya. (Yoh. 18:37) Moota heeni Yesu oonihenraawe weera nintthuneya okhala atthu oowiiyeviha?

7. Eheeni nyuwo yoosivenleni woohima sa wiiyeviha wa Yesu?

 ⁷ Moorweela mwa ntakihero nawe, Yesu ohoonihera weera nintthuneya okhala oowiiyeviha. Yesu khatonko wiivuwiha, mene nto ovuwa wootheene annaavaha Atithawe. (Mar. 10:17, 18; Yoh. 5:19) Munoonela hayi ntakihero nna noowiiyeviha? Moohihovela ninnaweerihani nyuwo omusivela Yesu ni otthuna omutthara. Mwaha wa heeni Yesu oraawe oowiiyeviha? Mwaha wooweera Yehova toowiiyeviha ni Yesu onnamusivela nave onnatthara ntakihero naatithawe (Nsal. 18:35; Aheb. 1:3) Eyo khenweerihani nyuwo otthuna omusuwela nnene sene Yesu yoowo ontakiha moomalela mikhalelo sa Yehova?

8. Mwaha wa heeni ninsiveliwaahu okhalano Yesu ntoko mwene ahu?

⁸ Hiyo onnanisivela okhalano Yesu ntoko mwene ahu. Mwaha wooweera owo namalamulela oophwanelela. Yehova omutxentxeriha Yesu ni oomuthanla weera akhale namalamulela. (Yes. 50:4, 5) Opwaha mwa yeeyo, mwaha wa nsivelo oraaweno ni hiyo, Yesu aahiya itthu sintxipale wiirimu. (Yoh. 13:1) Mwaha wookhala mwene ahu, Yesu onnaphwanela nsivelo nahu, nave owo aathaliha weera annawoona okhala asinthamwene awe ale yaamusivela. Nave-tho asinthamwene awe anoonihera nsivelo ekhalannaaya wa yoowo wakhala weera animwiiwelela malamulo awe. (Yoh. 14:15; 15:14, 15) Mene eparakha etokotoko okhala nthamwene a Mwaana a Muluku!

9. Obatizo ahu onlikana hayi ni wa Yesu?

⁹ Nlamulo nimoha a malamulo a Yesu toweera atthareli awe antthuneya obatiziwa. (Math. 28:19, 20) Ni owo aavaha ntakihero nno. Ekhaikhai weera obatizo wa Yesu ti woovirikana ni obatizo ahu, mwa mikhalelo mikina. (Nwehe equaadru “ Moota obatizo wa Yesu oraaya woovirikana ni obatizo wa atthareli awe.”) Nnaamweera vareene hiiho, sookhala itthu sinlikana. Yesu abatiziwakaru aahoonihera weera aatthuna opaka yootthuna ya Atithawe. (Aheb. 10:7) Vamoha-moharu, emaara yeeyo nimbatiziwaahu, ninnoonihera variyari va atthu ootheene weera noovaherera ekumi ahu wa Yehova. Ovinyera emaareene yeele etthu yootepa otthuneya veekumini vahu ori opaka yootthuna ya Yehova ohiya yootthunaahu. Emaara ninpakaahu eyo, nintthara ntakihero na Yesu.

10. Eheeni eneera eweeriheni otthuna obatiziwa?

¹⁰ Nkuupuwelani vakhaaneene itthu nyuwo musuwenlaanyu woohima sa Yesu. Nyuwo moosuwela weera Yesu mwaana mmoharu a Muluku, ni weera owo oothanliwa okhala mwene weera alamuleleke elapo ya vathi. Nto nyuwo munnoona weera Yesu onnatakiha moomalela wiiyeviha wa Atithawe. Mooxuttera tho weera Yesu aahaavaha atthu yootxa yaavolinwe etala, ni aahaalipiha ele yaakhulumunwe mpaka aahaalamiha aretta. (Math. 14:14-21) Nyuwo munnoona moota Yesu oneettihaawe miloko olelo va. (Math. 23:10) Nave nyuwo moosuwela weera, owo ntoko mwene a Omwene wa Muluku, onoopaka itthu sintxipale muhoolo. Mwamala wuupuwela itthu sootheene iya, nyuwo munrowa woonihera hayi weera munnamusivela Yesu? Mutthareke ntakihero nawe. (Yoh. 14:21) Nave etthu yoopatxera muntthuneyaanyu opaka ori wiivaherera wa Yehova, ni obatiziwa.

11. Mathowa heeni ootepa otthuneya anneeriha otthuna obatiziwa ni mwaha wa heeni?

¹¹ Nthowa heeni nootepa otthuneya ninneeriha otthuna obatiziwa? Yesu aahaakhula nikoho nna, vaavo aathalinhaawe sa nlamulo ntokotoko onivanhaawe. Owo enre: “Siso wàtthune Apwiya Muluku á ni murim’á wothene, ni munep’á wothene, ni wupuwela wá wothene, ni ikuru sá sothene.” (Mar. 12:30) Neereke nyuwo munnoona weera munnamusivela Yehova mooteene yoola?

12. Mwaha wa heeni nyuwo mummusivelaanyu Yehova? (Nwehe efootu.)

 ¹² Aakhala mathowa mantxipale anneeriha omusivela Yehova. Mwa ntakihero, nyuwo mooxuttera weera owo “ephattuwelo ya ekumi” “eparakha eri yothene ni yovaha yothene yomalela” enkhuma wa yoowo. (Nsal. 36:10 [36:9, NM]; Yak. 1:17) Ni Yehova Muluku ahu, owo toovaha, ansivelo, toovanheni itthu sootheene muraanyuno veekumini.

13. Mwaha wa heeni yoowoopola eraaya yoovaha yootepa otthuneya?

¹³ Makeya a Yesu yoovaha yootepa otthuneya naakhenlaahu wa Yehova. Hiyo nookhalano mathowa woohima eyo. Mwa ntakihero, neereke nyuwo mootoko wuupuwelela moota Yehova ni Yesu araaya oowiiwanana? Yesu enre: “Atithi annakitthuna” nave “kinnatthuna Atithi.” (Yoh. 10:17; 14:31) Yehova ni Yesu aaviriha ibiliyawu sintxipale sa iyaakha ereene ootheene, nto mwaha wa yeeyo, onthamwene aya ori wootepa olipa. (Mir. 8:22, 23, 30) Vano nkuupuwelani ovoreya Yehova oonnaawe, vaavo aakhulenlaawe weera mwanawe ahaawe mpaka ophiyera okhwa. Yehova ohaakhulela weera mwanawe oosiveleyaxa akhwe weera anivahe eparakha ya okhala mahiku ootheene. Itthu sootheene iya sinoonihera weera Yehova onnaasivela atthu, woohelani mpuwa nyuwo. (Yoh. 3:16; Agal. 2:20) Yoowoopola ya Yesu nthowa ntokotoko ninneeriha hiiva omusivela Yehova.

14. Yoolakela heeni yootepa oreera muntthuneyaanyu okhalano mweekumini?

¹⁴ Nsivelo nanyu ni Yehova nannantxerereya, vaavo mwaavirelelaanyu oxuttera woohima sa yoowo. Moohihovela, nyuwo muntthuna  ovirelela omwaattamela owo ni eyo enoowereya. Yehova onoovekelani weera muhakalalihe murima awe. (Mir. 23:15, 16) Nto nyuwo pooti owera opaka eyo, ohiya paahi ni masu, mene nto ni soopaka. Makhalelo a ekumi anyu animoonihera weera mweekhaikhai munnamusivela Yehova. (1 Yoh. 5:3) Eyo yoolakela yootepa oreera muntthuneyaanyu okhalano mweekumini.

15. Nyuwo munkela woonihera hayi weera munnamusivela Yehova?

¹⁵ Moota heeni munkelaanyu woonihera weera munnamusivela Yehova? Mpake nivekelo noothanleya mmulaiheraka onvarela. (Nsal. 40:8) Avinyaka moonihere yoothanla eyo vaatthuni morweela mwa obatizo. Ntoko noonalaahu mwa yoosomeene yeela, nihiku na obatizo nihiku nootepa otthuneya na mweekumini mwahu. Mutthu onnapatxera ekumi enyowani ohiikhalelaka mutthu mwaneene awe, mene Yehova. (Arom. 14:8; 1 Ped. 4:1, 2) Eyo yoothanla etokotoko ya mweekumini. Nave-tho ennahula milako wa ekumi yootepa oreera ekhanle. Moota heeni?

16. Moovarihana ni Nsalmu 41:13 [41:12, NM] moota heeni Yehova onkelaawe waatthuvela ale avaherenre ekumi aya wa yoowo?

¹⁶ Yehova mutthu ootepa ovaha okhanle. Muhipwatthaka moota muniilipiheraanyu onvarela, Yehova onrowa voovahani itthu sintxipale. (Mar. 10:29, 30) Owo onimoovahani ekumi yootepa ohakalaliha ni yooreera nnaamweera nreene elapo ela yoonanara ehanle omala. Ekumi muneeraanyu mukhaleno mwa batiziwaru, pooti okhala ya mahiku ootheene. Nyuwo munoovirelela, onvarela muteko Tiithi ahu ansivelo a wiirimu mahiku ootheene, nsivelo nanyu ni Yehova, nnoovirelela waatxerereya ni nyuwo munookhala mahiku ootheene ni yoowo.—Musome Nsalmu 41:13 [41:12, NM].

17. Moota heeni nyuwo munkelaanyu omuxukurela Yehova?

¹⁷ Vaavo nyuwo muniivahereraanyu wa Yehova ni obatiziwa, nyuwo munnakhalano eparakha yonvaha etthu yootepa otthuneya Yehova. Itthu sootheene sooreera mwaakhanlaanyuno khalayi ni mukhanlaanyuno viinaano, onvaha Yehova. Nto nyuwo pooti omuxukurela mwaneene erimu ni elapo ela ya vathi munvahaka etthu yootepa otthuneya,—ororomeleya  wa yoovo, ni onvarela muteko ni murimaanyu wootheene. (Yobi 1:8; 41:11; Mir. 27:11) Mweekhaikhai, owo mukhalelo wootepa oreera woovarihela muteko ekumi anyu. Moohihovela, nsivelo muraanyuno ni Yehova, nri nthowa ntokotoko nneera niweeriheni nyuwo obatiziwa.

18. Makoho heeni nyuwo muntthuneyaanyu wiipakelaka?

¹⁸ Nyuwo munnatthuna obatiziwa? Nikoho nna ti nyuwo munwera waakhula. Apaale waamureera wiikoha ha: ‘kinweherera eheeni?’ (Mit. 8:36) Muupuwele mathowa mararu noonalaahu mwa yoosomeene yeela. Noopatxera, nyuwo enoosivelani ekhaikhai ni exariya. ‘Keereke miyo kinnatthuna okhala elapo yeeyo atthu ootheene ankelaaya wuulumaka ekhaikhai ni opaka ele eri ya exariya?’ Nanaaveeli, nyuwo munnamusivela Yesu. Mwiikoheke ha: ‘Keereke miyo kinnatthuna weera mwaana a Muluku akhale mwene aka ni otthara ntakihero nawe?’ Nanaararu, moohihovela nyuwo munnamusivela Yehova. Vano mwiikoheke ha: ‘Keereke kinnapaka sootheene weera kimuhakalalihe Yehova?’ Wakhala weera makoho ootheene ala munaakhula weera aani, vano heeni muhimbatiziwaanyu? Munweherera heeni?—Mit. 16:33.

19. Mwaha wa heeni muhintthuneyaanyu woona wuuliha muru obatiziwa? Muthalihe. (Yohani 4:34)

¹⁹ Wakhala weera nyuwo munnoona wuuliha muru obatiziwa, muupuwele niphwanaphwaniho Yesu aapankaawe. (Mmusome Yohani 4:34.) Yesu aalikanxera opaka yootthuna ya Yehova ni yootxa. Mwaha wa heeni? Mwaha wooweera eyootxa ennanikhavihera, ni Yesu aasuwela weera itthu soothesene Yehova onnivekelaawe opaka sinnanikhavihera. Yehova khaakela onivekela opaka etthu yeeyo yeera enihasule. Neereke obatizo onneerela yootthuna ya Yehova? Aani. (Mit. 2:38) Nto nyuwo muhihoveleke weera wiiwelela nlamulo na obatizo onoorowa wookhaviherani nyuwo-tho. Nyuwo khamwaakela woona wuuliha muru otxa yootxa yooreera, vanto heeni mweeraanyu mooneke wuuliha muru obatiziwa?

20. Eheeni ninkelaahu woona mwa yoosoma enttharelana?

²⁰ Munweherera eheeni? Atthu antxipale ennaakhula nikoho nla yeeraka: “Nkinaaye wiireherera.” Opaka yoothanla yoowiivaherera wa Yehova ni obatiziwa, etthu yootepa otthuneya nyuwo mukhanlaanyu oopaka mweekumini mwanyu. Mene pooti weeraka onnatthuneya wuupuwelele moomaaleleya yoothanla ela. Apaale pooti ovira etempu yintxipale wuupuwelela moomaaleleya ni wiilipihera weera nyuwo mukhale oolikaneene. Wakhala weera nyuwo munnatthuna obatiziwa etthu heeni nyuwo muntthuneyaanyu opaka weera mwiireherere? Nnimoona waakhuliwa wa nikoho nna mwa yoosoma enttharelana.