1. Etthu eheeni enoonaaya atthu ale enoonela mithukumano sa Anamoona a Yehova ekwaha yoopatxera? (Nwehe efootu.)

 NKUUPUWELANI weera ntheli nimoha ninnakela woonela muthukumano wa Anamoona a Yehova Empa ya Omwene ekwahaaya yoopatxera. Awo ennakhala ootikhiniheya vantxipele mwaha wa moota anaakheliwaaya nnene ni ennoona osivelana asinna eneeraaya. Yatthikela owaani vale, aathiyana enoonuma ha naiyaya: “Namaiyawe, Anamoona a Yehova aakhalano nsivelo nihinphwanyeya nipuro nikina.”

2. Moomoriha ikharari, mwaha wa heeni atthu akina enhiyaaya onvarela muteko Yehova?

² Nsivelo atthu Yehova enooniheranaaya ti na vameekhaaya naari neere, khaninphwanyeya nipuro nikina. Mene, Anamoona a Yehova khaiyene atthu oomalela. (1 Yoh. 1:8) Emaara nnaasuwelaahu nnene asinna a mmulokoni, onnakhala wookhweya woonelela soottheka saya naari neere, ifaaliya saya. (Arom. 3:23) Moomoriha ikharari, akina aahiya onvarela muteko Yehova mwaha woohimalela wa atthu akina.

3. Ensuwanyeya hayi atthareli eekhaikhai a Yesu? (Yohani 13:34, 35)

³ Nkawehani veeli yoolepa ya yoosoma ela. (Mmusome Yohani 13:34, 35.) Ensuwanyeha hayi atthareli eekhaikhai a Yesu? Etthu enaasuwanyeiha, nsivelo, ohiya omalela. Neereke nyuwo mohoonelela weera Yesu khahimme ha: ‘Ti mwemmo nyuwosa muneranyu musuwele wi muri ohuser’aka.’ Mene owo ohimme ha: “Ti mwemmo atthu othene enèraya esuwele wi muri òhuser’aka.” Ni masu ala, Yesu ohoonihera weera khaiyene atthareli awe paahi yeera esuweleke weera ennooniherana nsivelo mukina ni mukhwaawe mmulokoni. Atthu ehikhanle atthareli awe tho, yaaheereke owera woona eyo.

4. Makoho eheeni atthu akina ampakaaya woohima sa akristu eekhaikhai?

 ⁴ Apaale ale ehikhanle Anamoona a Yehova pooti wiikoha ha: ‘Moota heeni nsivelo nnooniheraaya weera mutthu ola mutthareli a Yesu? Yesu aawoonihenre moota heeni nsivelo arummwa? Vano, ninkela omulikanxa moota heeni Yesu mahukwaano?’ Nnaamweera hiyo nreene Anamoona a Yehova ninnatthuneya wuupuwelela makoho ala. Napaka eyo, onoorowa okhala wookhweya wooniherana nsivelo mukina ni mukhwaawe otepaxawene emaara yeeyo ninvirihaahu maxupo a ohimalela wa atthu akina.—Aef. 5:2.

5. Masu a Yesu eri va Yohani 15:12, 13 entaphulela eheeni?

⁵ Yesu aahimme weera atthareli awe yaaheereke wooniherana nsivelo noothanleya mukina ni mukhwaawe. (Mmusome Yohani 15:12, 13.) Nkawehani nlamulo Yesu aavanhaawe atthareli awe: “Mutthunaneke mukina ni mukhw’awe, ntoko kotthunnakani.” Eyo entaphulela eheeni? Yesu aahaaleela atthareli awe weera esivelaneke mukina ni mukhwaawe wiipwaha asinene aya. Atthareli awo waatthuneya weera ekhaleke oolikaneene mpaka ovaha ekumi aya weera envuluxe mukhwaaya waatthuneyaka vale. b

6. Biblya onoonihera moota heeni otthuneya wa nsivelo?

⁶ Biblya onxuttiha weera nsivelo etthu yootepaxa otthuneya. Atthu antxipale sinnaasivela soolepa iya: “Muluku ti osivela.” (1 Yoh. 4:8) “Onomutthune mukhw’á ntoko mwanen’á.” (Math. 22:39) “Osivelana onnakhunela sottheka sintxipale.” (1 Ped. 4:8) “Osivelana khorwa omala.” (1 Akor. 13:8) Iversikulu iya ni ikina sinnoonihera weera onnatthuneya woonihera mukhalelo ola wooreera, osivelana.

7. Mwaha wa heeni Satana ohinkelaawe owera waaxuttiha atthu osivelana mukina ni mukhwaawe ni okhala oowiiraana?

⁷ Atthu antxipale anniikoha: ‘Onwereya moota heeni osuwela ettiini yeekhaikhai?’ Ittiini sintxipale sinhima weera sinnanxuttiha  ekhaikhai, mene yeele eri ettiini enxuttiha itthu soovirikana woohima sa Muluku. Satana onnawera opaka ittiini sintxipale soowootha, ni etthu eyo ennaahiya atthu oovalavela ene. Satana khanwera waathukumanya atthu a ilapo soovirikana weera ekhale emusi ya elapo yootheene ensivelana mukina ni mukwaawe. Yehova paahi onwera opaka eyo, mwaha wooweera nsivelo neekhaikhai ninkhuma wa Yehova—ale paahi erinono munepa wootteela ni mareeliho a Yehova enwera wooniherana nsivelo neekhaikhai mukina ni mukhwaawe. (1 Yoh. 4:7) Eyo enoonihera weera ele Yesu ahimmaawe eeraka nsivelo nnaasuwanyeiha akristu eekhaikhai, ekhaikhai.

8-9. Atthu akina anoonela hayi yamala vale woona nsivelo Anamoona a Yehova enooniheranaaya mukina ni mukhwaawe?

⁸ Ntoko Yesu aahimenraiye, atthu antxipale mahikwaano ennawera osuwela taani ari atthareli eekhaikhai a Kristu, atthu awo ennawera waasuwela atthareli awo mwaha wa nsivelo enooniheranaaya atthareli awo. Mwa ntakihero, munna mmoha oniitthaniwa Ian, onnuupuwela etthu heeni yaamuttuntthe murima ekwaha yoopatxera owo aakenlaawe omoonela kongresu. Kongresu owo aapakinwe waattamela owannyawe, ekampu yeeyo minyeeri sa muttuli owo aamoonenlaawo xooku. Owo ohimme ha: “Mukhalelo konnaaka iwe waari woovirikana. Anamoona a Yehova yaari atthu oolakeya, yaawara nnene ni anamwane aya yaari ooleeleya. Opwaha mwa yeeyo, awo waakhala ntoko yaakhalano murettele wa mmurimani, murettele yoowo miyo kaahaawelaaka. Miyo nkinuupuwelela muru wa mwaha waapakinwe okongresuni iwe, mene mikhalelo Anamoona a Yehova yoonihenraaya kinnuupuwelela mpaka olelo va.” c Etthu Ian onnaawe okongresuni iwe enkhumelela mwaha wa nsivelo neekhaikhai a Kristu enooniheranaaya mukina ni mukhwaawe. Naasivelaka asinna ni asirokora nneereke otthuna waakosoopa mooreera murima ni nttittimiho.

⁹ Munna mmoha oneeriwa John aahoona etthu emoha-moharu vaavo aapatxeraawe woonela mithukumano Empa ya Omwene, owo ohimme ha: “Miyo kaatikhiniheya ni wiiraana wa asinna ale . . . Yaakhala ntoko oohittheka. Nsivelo naya neekhaikhai naakiroromeliha miyo weera koopwanya ettiini yeekhaikhai.” d Yooweereya ela ni sooweereya ikina, sinnoonihera weera arumeyi a Yehova ti makristu eekhaikhai.

10. Etempu heeni hiyo ninkhalaahuno eparakha yoowoonihera asinna weera ninnaasivela? (Nwehe tho enoota.)

¹⁰ Ntoko nonnaahu woopatxerani wa yoosomaahu ela, khaavoovo naari mutthu mmoha mano mmulokoni ori oomalela. Ikwaha ikina asinna ni asirokora enimuuluma naari enoopaka etthu yeeyo enkela oninyoonyiha. e (Yak. 3:2) Wakhala weera eyo enimweereya, hiyo pooti owoonihera nsivelo nahu asinna awo moorweela wa itthu ninpakaahu. Etthu enkela onikhavihera owera opaka eyo ori osoma ntakihero na Yesu.—Yoh. 13:15.

11. Mukhalelo heeni woonanara oonihenraawe murummwa Yakobe ni Yohani? (Nwehe efootu.)

¹¹ Yesu khaaweherera weera atthareli awe ekhale oomalela. Opwaha mwa yeeyo, owo aahaakhavihera atthareli awe owina ohimalela waya weera ewere waakhuleliwa va maithoni va Yehova. Nookhala nihukunno Yohani ni Yakobe yaawo yaari arummwa a Yesu yaavekenlaaya ameyaya weera yuulume ni Yesu weera anvahe  Yohani ni Yakobe nipuro noothanleya Moomweneni. (Math. 20:20, 21) Etthu aapankaawe Yakobe ni Yohani yaahoonihera mukhalelo woonanara, wiisunnuwiha ni weera awo yaatthuna okhala atthu ootthuneyaxa waapwaha akina.—Mir. 16:18.

12. Neereke Yakobe ni Yohani yaari yaaworu yoonihere mukhalelo woonanara? Muthalihe.

¹² Emaareene yeele, khaiyene paahi aari Yakobe ni Yohani yoonihenre mukhalelo woonanara. Nkawehani moota arummwa akina yoonenlaaya esuwelakaru etthu Yakobe ni Yohani yaapankaaya: “Vano òhusera akina mulokó, yìwakaru sisale, yànyonyiwa ni asinna eli.” (Math. 20:24) Veekhaikhai waakhala onyakulihana variyari va arummwa ale. Apaale awo yaahima ha: ‘Nyuwosa munuupuwela weera mwa taani weera nvekeleke nipuro nootthuneya Moomweneni? Nyuwosa khaiyene muri meekhaanyusa munvara moororomeleya ni Yesu, hiyo tho nookhalano eparakha eyo!’ Yeereye eyo eheereye, etthu ninsuwelaahu va ti yooweera etempu ele arummwa ale yaattiwala osivelana ni oreerelana murima mukina ni mukhwaawe.

13. Emaara Yesu aavirihaawe ohimalela wa arummwa oonela hayi? (Matheyo 20:25-28)

¹³ Yesu oonenle hayi mwaha ole? Owo aapixa murima. Owo khaahimme weera aamwaathanla arummwa akina ooreera murima, oowiiyeviha ni ekhanleno nsivelo. Ohiya opaka eyo, Yesu aatthekula naawo moowaapixera murima mwaha wooweera annasuwela weera arummwa ale yannatthuna opaka itthu sooreera. (Mmusome Matheyo 20:25-28.) Ela khaiyene yaari ekwaha yoopatxera naari yoomalihera  arummwa yaanyakulinhannaaya weera yoone taani ayaawo aari ootepaxa otthuneya naari neere, mutokweene variyari vaya. Nnaamweera vareene hiiho, Yesu ikwaha sootheene annaathokorora moowaareerela murima.—Mar. 9:34; Luka 22:24.

14. Arummwa yaahuuwale mapuro ahooleli a ittiini yaaxuttihaaya eheeni?

¹⁴ Moohihovela, Yesu aasuwela moota arummwa ale yaahuuwalaaya. (Yoh. 2:24, 25) Awo yaahuuwale mapuro yaawo ahooleli a ittiini yaaxuttihaaya weera mutthu weera akhale ootthuneya waatthuneya weera akhalekeno nipuro noothanleya mmuttettheni. (Math. 23:6; nwehe tho eviidiyu eneera: Primeiros Assentos na Sinagoga, na nota de estudo de Mateus 23:6.) Asitokweene aYuda yanniisoona okhala ootthuneya waapwaha atthu kina. f (Luka 18:9-12) Yesu aasuwela weera itthu sootheene iya sanvoleela moota arummwa ale yiisoonelaaya ni moota yaawoonelaaya atthu akina. (Mir. 19:11) Yesu aasuwela weera atthareli awe yaaheereke ottheka ni owo ahaapixera murima. Owo aasuwela weera atthareli awe yaakhalano murima wooreera, nto mwaha wa yeeyo, owo anniivaha etempu weera aaxuttihe okhala oowiiyeviha ni wooniherana nsivelo mukina ni mukhwaawe ohiya wiisoona okhala atthu ootthuneyaxa.

15. Yooweereya ya Yakobe ni Yohani ennixuttiha eheeni?

¹⁵ Hiyo pooti oxuttera itthu sintxipale ni etthu ele yaamweerenle murummwa Yakobe ni Yohani. Ovekela nipuro noothanleya Moomweneni khayaakhanle yoovekela yooreera. Mene arummwa akina tho yaahoonihera mukhalelo woonanara mwaha wooweera awo yaahaakhulela weera mwaha ole waakawanye. Mene Yesu aahaakosoopa arummwa ale 12 mooreera murima ni mwa nsivelo. Ninxuttera eheeni? Etthu eri yootthuneya khaiyene sootthekaru asinna ennitthekelaaya mene moota ninkelaahu hiyo woonela. Etthu heeni enkela onikhavihera opaka itthu sooreera wakhala weera noonyoonyihiwa? Wakhala weera noonyoonyihiwa ni munna hiyo pooti wiikoha ha: ‘Mwaha wa heeni etthu ela munna ola okipakenlaawe ekinyoonyaayaxa vantxipale? Neereke eyo enoonihera weera miyo kinnatthuneya oreherera mukhalelo aka? Neereke munna ola aakhala maxupo onvirihaawe? Nnaamweera miyo kirinoneene mathowa ooweera kikhale oonyoonyiwa, neereke miyo pooti woonihera nsivelo ni omulevelela?’ Naathokororaka atthu akina mwa nsivelo ninnoonihera tthiri weera na atthareli eekhaikhai a Kristu.

16. Etthu eheeni ekina ninxutteraahu ni ntakihero na Yesu?

¹⁶ Ntakihero na Yesu ninnanoonihera tho etthu yootepa otthuneya, owiiwexexa asinna. (Mir. 20:5) Ekhaikhai weera Yesu annawera woona mirima sa atthu. Hiyo khaninwera opaka eyo, mene hiyo pooti waapixera murima asinna vaavo annitthekelaaya mwaha wa ohimalela waya. (Aef. 4:1, 2; 1 Ped. 3:8) Etthu enrowa onikhavihera opaka eyo ori waasuwela nnene asinna. Nwehe yooweereya emoha.

17. Moota heeni omusuwela munna mmoha waamukhavihenraaya mutokweene mmoha a esirkwiitu?

¹⁷ Mutokweene mmoha a esirkwiitu onvara muteko wAfrica Oriental onnuupuwelela weera ookhala munna mmoha aarino mikhalelo sooxupa wiiwexexa seiyo. Vano mutokweene ole a esirkwiitu aapanke eheeni? Owo onnahima ariki: “Ohiya miyo omusepa munna ole, miyo kaalakela omusuwela nnene munna ole. Emaara kaapakaaka eyo, kaahoonelela weera moota  munna ole aahuuwalaawe khavakweñye ni mahuweliwo awe awo yannavoleela moota aakosoopaawe atthu akina.” Mutokweene a esirkwiitu onnavirelela ohima: “Emaara kiiwexenxaaka moota waaraaya wooxupa munna ole opaka matxentxo a mikhalelo sawe weera awere okhala ni atthu akina ni matxentxo aapankaawe, miyo kaapatxera omutikhina. Hiyo naakhalano onthamwene wooreera.” Ekhaikhai weera emaara yeeyo hiyo ninpakaahu ele ninweraahu weera niwiiwexexe asinna ni osuwela ele envirihaaya, onnakhala wookhweya waasivela.

18. Nanyoonyihiwa ni munna, makoho heeni nintthuneyaahu wiipakelaka? (Miruku 26:20)

¹⁸ Ikwaha ikina nneereke woona okhala wootthuneya okela wuuluma ni munna onnyoonyinhe, ni yootthuna weera nimalihe ohiiwanana wahu. Mene nihinaaye okela wuulumano, waamukhala wooreera wiikoha ha: ‘Keereke miyo kohiiwexexa itthu sootheene seereñye?’ (Mir. 18:13) ‘Neereke munnoola opanke etthu ela mwaayiini?’ (Koh. 7:20) ‘Keereke miyo kohinta opaka yoottheka ntoko ela?’ (Koh. 7:21, 22) ‘Wakhala weera miyo kinoorowa otthekula nuuwo, neereke maxupo awo enoomala naari neereke enoovirelela?’ (Musome Miruku 26:20.) Wakhala weera nnimwiivaha etempu weera nuupuwele nnene sene makoho ala, pooti weera nnimoonelela weera etthu yooreera opaka ori woonihera nsivelo ni ohiya mwaha owo oviraka.

19. Nyuwo mulakenle opaka eheeni?

¹⁹ Anamoona a Yehova enoonihera weera awo atthareli eekhaikhai a Yesu mwaha wooweera ennasivelana mukina ni mukhwaawe. Ni mutthu ti mutthu a hiyo onnoonihera weera mutthareli eekhaikhai a Yesu emaara yeeyo nimmooniheraahu munna nsivelo neekhaikhai, nnaamweera munna owo areene oohimalela. Naapakaka eyo, atthu akina ennoonelela weera hiyo nri ettiini yeekhaikhai nave awo eneereke otthuna omukokhorela Muluku ahu ansivelo, Yehova. Ti vawonto, mulakele ovirelela woonihera nsivelo, nsivelo nenno nnaasuwanyeiha atthareli eekhaikhai a Yesu.