Mwaha wa heeni Yesu uulummaawe masu a Davidi eri va Nsalmu 22:2 [22:1 Tradução do Novo Mundo]?

Masu oomalihera a Yesu ahinaakuveene okhwa, tiyaale elempwe va Matheyo 27:46: “Muluku aka, Muluku aka, okihiyenre-ni?” Emaara uulummaawe masu ala, Yesu aakwanihera masu a Davidi elempwe va Nsalmu 22:2 [22:1 Tradução do Novo Mundo]. (Mar. 15:34) Yaakela okhala etthu yoonanara wuupuwela weera masu Yesu uulummaawe waari mwaha wooxupeya naari weera nroromelo nawe nammalela ehuhu ele. Mene Yesu annisuwela mwaha wa heeni waatthuneyaawe okhwa ni owo aahivaherera weera epakeye eyo. (Math. 16:21; 20:28) Nave Yesu aasuwela weera yaphiya ehuhu yookhwa, Yehova aanvinxa “naakihero nri poothe” neera nikhale mukhiviru mwawe. (Yobi. 1:10) Mwaha wa Yesu woopaka eyo aamoonihera weera aari oororomeleya wa Yehova naamwi aaviriha mahooxo ale, aani okhwa mootepa ovoreya.—Mar. 14:35, 36.

Mwaha wa heeni Yesu uulummaawe masu eri va Nsalmu nno? Naamwi nihithalihaka ekhaikhayeenexa, nrowe noone itthu sineera sinikhavihere wiiwexexa mwaha wa heeni uulummaawe masu ale. *

Apaale Yesu aatthuna othoonyihera weera Yehova khaarowa wootxeeliha okhwa wa Yesu? Owo aatthuneya ovaha ekumi awe ntoko yoowoopola ahikhaviheriwaka ni Yehova. Owo aari mutthu ntoko hiyo, nave aatthuneya okhwa  ntoko mutthu weera “oonihere okhwa wa atthu ootheene.”—Aheb. 2:9.

Apaale Yesu aahuuluma masu eri va nsalmu nna, weera aakhavihere atthu kina weera yuupuweleleke nsalmu nootheene? Mahuku a Yesu, aYuda wannaasivela ohela mmuru Masalmu. Nave wakhala weera awo yanniiwa eromoliwaka eversu emoha ya nsalmu, awo moowakuveya yannuupuwelela esalmu yootheene. Vano waakhanle weera ti yeeyo yaamweerinhe Yesu wuuluma nsalmu nne, apaale aatthuna waapakiha weera atthareli awe yaawo yaari ayuda yuupuwelela weera esalmu ele yaakhalano soolohera sintxipale voohima sa okhwawawe. (Nsal. 22:8, 9, 16, 17, 19, 25 [22:7,8, 15, 16, 18, 24 NM]) Opwaha mwa yeeyo, iversu soomalihera sa esalmu ela, enninvuwiha Yehova ni ennimuhima okhala ntoko mwene a elapo yootheene ya vathi.—Nsal. 22:28-31. NM

Apaale Yesu aatthuna woonihera weera owo khaatthenke etthu? Yesu ahiinaakuveene wiiviwa aathorihiwa moohixariya nave aahootheriwa weera anveeha Muluku. (Math. 26:65, 66) Mulattu awe wuulummwe mootthimaka oxekuwa ni khuwaakhanle moovarihana ni nlamulo ehuhu ele. (Math. 26:59; Mar. 14:56-59) Vaavo Yesu enraawe, “Muluku aka, Muluku aka, okihiyenre-ni?” Apaale owo aatthuna woonihera weera khaapanke etthu yaaphwanenle wiiviwa mooteene yoole.

Apaale Yesu aatthuna woonihera weera mahooxo yamphwannye Davidi khawaathoonyihera weera owo khaakhuleliwa vamaithoni va Yehova? Nikoho Davidi aapankaawe khanaathoonyihera weera nroromelo nawe nammalela. Opwaha mwa yeeyo, okhwipi wa nikoho nne, owo aahimme weera annimuroromela nvuluxaawe Yehova, nave Yehova annivirelela omureeliha Davidi. (Nsal. 22:24, 25, 28 [22:23, 24, 27 NM]) Moolikana, naamwi Yesu, “mwaana a Davidi,” ahaawa vamwirina wanihaaxero, eyo khiyaataphulela weera khaakhuleliwa vamaithoni va Yehova.—Math. 21:9.

Apaale Yesu aatthuna woonihera weera wanninvoreya mwaha wa Yehova ohimwaakihera ehuhu ele yoovoreya? Yehova khuwaamusivela omoona mwanawe ahaawaka naari omoona akhwaaka moota ole. Eyo yaaheereya mwaha wa ohiiwelela waakhumelenle w’Edeni. Yesu khaapanke etthu yoonanara, mene owo annitthuneya ohaawa ni okhwa weera avaanyihe soowootha sa Satana, ni weera moorweela mwa yoopola weera aahokoloxere etthu atthu yootxenlaaya. (Mar. 8:31; 1 Ped. 2:21-24) Eyo yanwereya wakhala weera ehuhu ele Yesu khaakhaviherinwe ni Yehova.

Apaale Yesu aatthuna waakhavihera atthareli awe wuupuwela mwaha wa heeni Yehova aakhulenlaawe weera Yesu akhwe moota ole? * Yesu annisuwela weera atthu antxipale yaamukwattuwa mwaha wa okhwa ntoko nakrime. (1 Akor. 1:23) Mene waakhanle weera atthareli awe yanniwehexexaxa mwaha wa heeni Yesu aakhwenlaawe, awo yaamwiiwexexa ele yaataphulelaaya okhwa wa Yesu. (Agal. 3:13, 14) Mwaha woowiveleela moota owo, atthareli a Yesu yammoona Yesu okhala nvuluxa ohiya omoona ntoko nakrime.

Nihipwatthaka mwaha wa heeni Yesu uulummaawe masu ale, owo aasuwela weera annitthuneya okhwa vamwirini wanihaaxero weera akwanihere yootthuna ya Yehova. Uulumakaru masu ale, Yesu enre: “Yòkwaniheriwa!” (Yoh. 19:30; Lu. 22:37) Aani, naamwi Yehova ahaamwaakihenreene ehuhu ele, Yesu aakwanihera moomalela ele yaamweerinhe Yesu owa elapo ya vathi. Nave yaamweeriha okwanihera masu yuuluma sa yoowo voohima sa “nlamulo na Mose, mamprofeti ni mMasalmuni.”—Lu. 24:44.