1-2. Yoowopola ti heeni? Ni mwaha heeni naatthuneeyaahu woopoliwa?

ADAMU etthekakaru, yaayeleela ekumi yoohimala. Ohiya paahi yaawooru, ni-tho yoottheka eyo, yaahaavaliha anamwane aya. Khawaakhanlevo-tho ovekela oleveleliwa mwaha wa etthu ele yaapankaaya. Awo yaathanla ottheka ni yaahookhwa. Ankha nto anamwane aya? Anamwane awo khayaakhalanne nthowa mwaha wa yoottheka ya Adamu. (Arom. 5:12, 14) Neereke anamwane awo yaaphwanela ovuluxiwa mwa okhwa? Aani. Adamu etthekakaru, vakhaani-vakhaani Yehova annathaliha etthu eeraawe apake weera aavuluxe anamwane Adamu mwaha woolapheliwa okhwa. (Eph. 3:15) Muhoolo mwaya Yehova ammuruma mwanawe weera “orumele ni ovelela ekumi awe ntoko nlivo nowàvuluxa antxipale.”—Mar. 10:45; Yoh. 6:51.

² Yoowopola ti heeni? Mwa soolepwa sa egregu sa ekristu, yoowopola muttenko Yesu olinvaawe weera atthikihe ele Adamu aayelenlaawe. Yoowopola eri ntoko mutthu owaleliwe mukaliposo, ovinyaka mutthu mukina anavelela musurukhu weera amoopole mukhwaawe. (1 Akor. 15:22) Heeni naatthuneeyaahu woopoliwa? Mwaha wa nlamulo na exariya ya Yehova. Nlamulo Yehova aavanhaawe ana a Israeli, owo aahimme weera eliviweke ekumi ni ekumi. (Ott. 21:23, 24) Adamu aayeleela ekumi yookwanela. Vano weera ekwaniheriwe malamulo a exariya a Muluku, Yesu aavaha ekumi awe yookwanela. (Arom. 5:17) Mwa yeeyo, owo ookhala “Tithi a atthu othene” ale anoonihera nroromelo wa nlivo.—Yes. 9:5 [9:6 Traduçao do Novo Mundo]; Arom. 3:23, 24.

3. Moovarihana ni yoolepa ya Yohani 14:31; 15:13 mwaha wa heeni Yesu aalakenlaawe ovaha mukuttho wa ekumi awe yookwanela?

³ Yesu onnaasivela vantxipale Atiithi awe a wiirimu nave-tho onnamusivela mutthu ti mutthu a hiyo. Mwaha wa nsivelo  nno, owo ooveleela ekumi awe yookwanela. (Mmusome Yohani 14:31; 15:13.) Mwaha wa nsivelo aaraaweno, owo aalakela okhala oororomeleya mpaka okhwa ni opaka yootthuna yaatithawe. Mwa yeeyo, yootthuna yoopatxera ya Yehova voohima sa atthu ni elapo ya vathi enimweereya. Mwa yoosomeene yeela ninrowa woona mwaha wa heeni Yehova ahalaka omwihiya Yesu akhwaaka. Avinyaka nnoorowa woona moowaakuveya ntakihero nimoha na mulipa oomulepa Biblya moota aahelaawe mwiitti nlivo. Avinyaka nnoorowa-tho woona moota nneeraahu noonihere otthapela nlivo. Omamaliheroni, nnoorowa oxuttera moota nneeraahu noonihere otthapela mwaha wa mukuttho Yehova ni Yesu avanhaaya.

4. Muthalihe okhwa wa Yesu.

⁴ Nkuupuwelani nihiku noomalihera na Yesu. Owo anwera wiitthana ilejao sintxipale sa malaika weera simwaakihe, owo khaapanke eyo mene aahaahiya anakhotto ooRooma emmanaka ni omutthuka ehimmorelaka ikharari. (Math. 26:52-54; Yoh. 18:3; 19:1) Anakhotto yaavarela muteko murepettho onkumiha ethayi. Anakhotto ale emweepentheene ni okhalano makhwatta mpararini mwawe, yaamuteexiha mwiri woolemela, Yesu aapatxera opurula mwiri ole mpaka nipuro aarowaawe okhomeliwa. Anakhotto ale ooRooma yamuteexiha mulopwana mukina mwiri aapurulaawe Yesu. (Math. 27:32) Yesu aphiihiwakaru nipuro aarowaawe wiiviwa, anakhotto ale yaakhomela matata ni manaani awe vamwirini. Olemela wa erutthu awe wannaatxeerera makhwattaawe yaakumiheriwe ni ipereku. Asinthamwene awe yanniikhupanyera ameyawe yanninla, mene aYuda yannamutheya. (Lu. 23:32-38; Yoh. 19:25) Vaavo ehuhu yaaviraaya wannaattamela okhwawawe. Murima ni masasu a Yesu yaapatxera ovela, nto wannamuxupa omumula. Ni omumula wawe woomalihera, Yesu aapaka nivekelo nawe noomalihera onnakottola muru ni aanakhwa. (Mar. 15:37; Lu. 23:46; Yoh. 10:17, 18; 19:30) Moohihovela, okhwa wa Yesu waari wa vakhaani-vakhaani, woovoreya ni woowuuliha muru!

5. Etthu heeni yaatempe omuriipiha murima Yesu?

⁵ Etthu yaatempe omuriipiha murima Yesu khañyene moota owo aakhwiiyaawe. Nto etthu yaamuriipinhe murima waari orowa wiiviwa mwaha woowootheriwa onveha Muluku. Owo ahootheriwa onveha Muluku—eyo tiiyo ohimuttittimiha Muluku ni nsina nawe. (Math. 26:64-66) Wootheriwa onveha Muluku waamuthananiha Yesu mpaka onvekela Muluku weera amukhavihere ovilela etthu ele. (Math. 26:38, 39, 42) Mwaha wa heeni Yehova ahalaka omuhiya mwanawe oosiveleyaxa aahaawaka ni okhwa? Nnoorowa woona mathowa mararu.

6. Yesu akhwenle heeni vamwirini va nihaaxero?

⁶ Yoopatxera, Yesu aakhwenle vamwirini weera awoopole aYuda ni atthu ootheene yuulumeliwe mwaha wa yoottheka ya Adamu. (Agal. 3:10, 13) aYuda yaahulumeliwa mwaha wooweera yahakhulela wiiwelela nlamulo na Muluku, mene awo khayamukwanihenre natiri aya owiiwelela nlamulo. Mwaha wa yeeyo, ohiya okhwa mwaha wa yoottheka ya Adamu awo-tho yaakhalano nthowa mwaha woowulumeliwa. (Arom. 5:12) Nlamulo Muluku aavanhaawe ana Israeli nahima weera mutthu apaka yoottheka emphwanela wiiviwa, murutthu awe waatthuneya othomeiiwa vamwirini. * (Ola. 21:22, 23; 27:26) Mwaha woothomeiwa vamwirini, Yesu aheriha weera atthu ale yaamukhontte ekhavihereye ni mukuttho awe.

7. Etthu heeni yanaaveeli yaamweerihe Yehova omuhiya mwanawe ohaawa mooteene yoole?

 ⁷ Moone etthu yanaaveeli yaamweerihe Yehova omuhiya mwanawe ohaawa mooteene yoole. Yehova aammutxentxeriha Yesu weera awere muritti wa onamakeya muhoolo. Annoona moota oraaya woovila omwiiwelela Muluku, vaavo aavirihaawe yooweerera yootepa oxupa. Mahooxo Yesu aavirinhaawe yaari ootepa oxupa mpakana owo onvekela Muluku “n’okhuwela otokotoko ni maithori.” Moohihovela mwaha wookhalano estresse mmuupuweloni. Yesu onnasuwela soohaawa sahu ni “aneereke onikhavihera” wakhala weera “ninneereriwa ni sooweeha.” Ti wooreera Yehova onivaha namakeya oomoriwa ikharari yoowo aneera awere “osuwela otteettheya waahu.”—Aheb. 2:17, 18; 4:14-16; 5:7-10.

8. Etthu heeni yanaararu yaamweerihe Yehova omuhiya mwanawe ohaawa mooteene yoole?

⁸ Etthu yanaararu yaamweerihe Yehova omuhiya mwanawe ohaawa mooteene yoole, waari weera awere oviriha yooweeha yoovila weera aakhule yoovanyiha yootepa otthuneya: Neereke mutthu onoowera okhala oororomeleya naamwi avirihaka yooweerera yootepa oxupa? Satana oneera hooye! Owo oneera atthu aninvarela muteko Muluku mwaha wa mareliho anaakhelaaya. Ni-tho oneera, atthu—ntoko tiithi aya Adamu khammusivela—Yehova. (Yobi 1:9-11; 2:4, 5) Mene Yehova anniroromela weera Yesu anvirelela okhala oororomeleya, tiyeeyo yaamweerinhe omuhiya Yesu eereriwaka mpakana omkotelaawevo mutthu. Yesu aavirelela okhala oororomeleya ni aahoonihera weera Satana namootha.

9. Ntakihero heeni murummwa Yohani onivanhaawe?

⁹ Makristu mantxipale naalipa nroromelo naya mwaha woowiiwexexa yooxuttiha ya yoowopola. Awo yaavirelela olaleya naamwi yaakhoottiheriwa olaleera ni esoondiwaka ni oviriha maxupo naamwi ereene oowuuluvala. Moone ntakihero namurummwa Yohani. Owo aalaleera moororomeleya voohima sa yoowopola apaale mwa iyaakha 60. Emaara owo aaraiyeno woona weene iyaakha 90. Omwene wooRooma waamutthukela ni omuroinha wiilhiya ya opatmos. Aatthenke heeni? “Mwaha woolaleya mitthenka sa Muluku ni omukhalela onamoona Yesu.” (Apok. 1:9) Tthiri nna ntakihero nooreera na nroromelo ni ovilela!

10. Moota heeni ibuukhu sa mBiblyani Yohani olempaawe sinnooniheraya weera owo annahela mwiitti yoowopola?

¹⁰ Ibuukhu sa mBiblyani Yohani olempaawe sinnoonihera moota owo amusivelaawe Yesu ni oxukurelawawe yoowopola. Ibuukhu sawe sookhalano ireferencia simpwaha 100 suulumaka sa yoowopola naari ele ennikhaviheraaya. Mwa ntakihero, Yohani olempe weera “Ni attheka mutthu, nòkhalano namwakiha wa a Tithi: ti Yesu kristu naxariya.” (1 Yoh. 2:1, 2) Ibuukhu Yohani olempaawe sinnoonihera thooni otthuneyawaya omuhelela “onamona Yesu.” (Apok. 19:10) Moohihovela Yohani annahela mwiitti yoowopola. Nnaamutakihe hayi?

11. Eheeni eneera enikhavihere okhootta opaka yoottheka?

¹¹ Mwiilipihere mweereriwaka opaka yoottheka. Wakhala weera hiyo ninaxukurela mwaha wa yoowopola, hiyo khaninkela wuupuwelaka há: ‘Mwaha wa heeni kineeraka kiilipihereke okhootta yooweerera? Miyo pooti opaka yoottheka mene muhoolo mwaya kivekeleke oleveleliwa.’ Ohiya wuupuwela hiiho, nereriwaka vale opaka yoottheka onnitthuneya ohima ha: ‘Hooye! Mwaha wa heeni kineeraka kipaka etthu moota ela mwa itthu sootheene  Yehova ni Yesu apankaaya wa miyo?’ Nittharaka muupuwelo owo ninvekeleke Yehova weera anikhavihere nivekelaka ha: ‘Txontte ohinihiye wuwela mowokiwani.’—Math. 6:13

12. Ninkela otthara hayi miruku siri va 1 Yohani 3: 16-18?

¹² Mwasiveleke asinna. Nooniheraka nsivelo, ninnoonihera-tho weera ninnaxukurela yoowopola. Mwaha wa heeni? Mwaha wooweera Yesu ovaha ekumi awe ohiya paahi wa hiyo mene-tho wa asinna ootheene nave mwaha woowiivaherera waakhwela awo, tiyooweera awo tootthuneyaxa vamaithoni va Yesu. (Mmusome 1 Yohani 3:16-18.) Moota woowoonihera nsivelo asinna ori waathokorora nnene. (Aef. 4:29, 31–5:2) Mwa ntakihero, pooti waakhavihera awo yaavoreiwaka naari yaavirihaka maxupo ntoko yaaphwanyiwa ottikinyeya wa etthaya. Vano ninrowa opaka eheeni wakhala weera munna ohuuluma naari opaka etthu enninanara?

13. Mwaha wa heeni nintthuneyaahu ovirelela waalevelela atthu akina?

¹³ Onnooxupani omulevelela munna wakhala weera ohootthekelani? (Onam. 19:18) Mwa yeeyo mutthare miruku iya ineera: “Nvilelaneke ni mulevelelaneke mukina ni mukhw’awe. Sawasawa Apwiya tho yolevelenlayani, siso nyuwo tho mulevelelaneke.” (Akol. 3:13) Emaara yootheene nnalevelelaahu asinna naari asirokora, nnoonihera wa tithihu a wiirimu weera ninnaxukurela mwaha wa yoowopola. Ninkela opaka heeni weera nivirelele oxukurela wa yoovaheene yeeyo ya Muluku?

14. Nnoonihere hayi oxukurela wahu mwaha wa yoowopola?

¹⁴ Mmuxukureleke Yehova mwaha wa yoowopola. Joana murokora mmoha a iyaakha 83 yoowo onkhala wIndia, oneera: “Miyo kinoona weera ti wootthuneya kaavekelaka mahiku ootheene oromola yoowopola ni omuxukurela Yehova mwaha wa yeeyo.” Mwaavekelaka vale, meekhiinyu, muupuwele yoottheka mpankaanyu voovira nihuku. Vano munvekeleke Yehova weera ooleveleleni mwaha wa yoottheka eyo. Ekhaikhai weera mwapaka yoottheka etokotoko nyuwo ontthuneya ovekela nikhavihero wa asitokweene a mmulokoni. Awo anoowiiwani ni woovahani miruku sinkhuma mBiblyani awo anoovekela vamoha ni nyuwo ni onvekela Yehova weera ooleveleleni mwaha wa yoowopola ya Yesu. Mweera haawo, nyuwo munoolama [moomunepani] ni otthikihera onthamwenaanyu ni Muluku.—Yak. 5:14-16.

15. Mwaha wa heeni nneeraahu nisomeke ni otthokelela voohima sa yoowopola?

 ¹⁵ Mutthokeleleke yoowopola. Rajamani, murokora a iyaakha 73, oneera: “Kaasomaka sa ohaawa wa Yesu, maitho aka annasareya maithori.” Nave-tho, nyuwo pooti woona mooteene yoowo aahaawiyaawe mwaana a Muluku. Wakhala weera munoovirelela otthokelela yoovaha ya Yesu, nsivelo nanyu nneereke waatxeerereya wa yoowo ni Yehova. Weera mukhavihereye otthokelela yoowopola munoona hayi ohela mpuwa mwahene yoowo mwa yoosomaanyu yoomeekha?

16. Mwaha wa heeni waaxuttiha akina voohima sa yoowopola eraaya yooreera wa hiyo? (Nwehe elataratho ya vakaapani)

¹⁶ Mwaaxuttiheke akina voohima sa yoowopola. Vaavo nnaaleelaahu akina sa yoowopola ninkela woonihera otthapela waahu. Hiyo nookhalano ikaruma seiyo sinnikhavihera waaxuttiha akina mwaha wa heeni Yesu onikhwenlaawe. Mwa ntakihero, pooti ovarihela muteko yoosoma 4 ya ebroxura Mitthenka sooreera sinkhuma wa Muluku! Yoosoma eyo yookhalano muru oneera “Yesu kristu taani”? Pooti tho ovarela muteko ekapiitulu ya 5 ya ebuukhu Biblya onxuttiha eheeni? Muru wa ekapiitulu yeeyo oneera “Yesu okhwenle heeni”? Iyaakha soothesene ninnaatxeerera otthapela wahu yoowopola mwaha woowoonela muthukumano wa Wuupuwelela okhwa ni nilipiheraka waawopa akina weera yoonele muthukumano owo. Ninnahakalala vantxipale mwaha wa Yehova onivaha eparakha yoowaaxuttiha akina voohima sa mwanawe!

17. Mwaha wa heeni yoowopola eraaya yoovaha etokweene ya Muluku wa atthu?

¹⁷ Moohihovela aakhala mathowa enipakiha otthapela mwaha wa yoowopola. Mwaha wa yoowopola, naamwi nreene anamattheka hiyo nnokhalano onthamwene woolipa ni Yehova. Mwaha wa yoowopola, miteko sootheene sa Satana sinootoloxiwa. (1 Yoh. 3:8) Mwaha wa yoowopola, yootthuna ya Yehova ya elapo ela ya vathi enookwanela. Elapo yootheene ya vathi enookhala eparadiso atthu ootheene mwasuwenlanyu anrowa omusivela ni onvarela Yehova. Mwa yeeyo, nenne nxiiye mpake ele munweraanyu weera moonihere otthapela yoovaha etokweene ya Muluku wa atthu—yoowopola!