Miyo kiyarinwe eyaakha ya 1955, kaari oomalihera wa asinna aka araru. Miyo kinnunwe waattamela ecidade enkhala olitoral sul wa oFinlândia, olelo esuwelinwe okhala ecidade ya oVantaa.

Ameyaka ebatiziwe iyaakha sa muttuli kihinaaye oyariwa. Apapa aka khiwaasivenlevo amma okhala Namoona a Yehova, ni khiyaakhulela weera miyo ni asinna aka nsomihiweke Biblya ni amma naari onikuxera omithukumanoni. Mwaha wa yeeyo, amma yannanisomiha Biblya apapa yarakamela vale.

Okhuma enamwane aka, miyo kaalakela omwiiwelela Yehova. Mwa ntakihero, ekwaha emoha vaavo kaaraakano iyaakha 7, nihiku nimoha aprusoore aka yaanyoonyiwa vantxipale mwaha wooweera miyo nkaatthuna otxa yootxa ya verilättyjä (Eyootxa enaapeiwa oFinlândia evariheliwaka ephome). Ntata naya nimoha yaakivara marama aka weera ekaathamihe, ni ntata naya nikina yaakuxa ekaarfu entthuna ohela mmwaano mwaka yootxa eyo ya ephome. Miyo kaahiwera waakapasiha ekaarfu eyo emorela vathi.

Emaara kaaraakano iyaakha 12, apapa aka yaahikhwa. Nto miyo kannawera woonela mithukumano. Asinna a mmulokoni yaahikoonihera nsivelo, nto eyo yaahikeeriha wunnuwa moomunepani. Kaahipatxera omusoma Biblya mahiku ootheene ni osoma moomaaleleya irevista sahu. Wiikhoveleliha omusoma Biblya, waakikhavihera  obatiziwa. Miyo kaahibatiziwa nihiku na 8 a Agosto a 1969 kireeneno iyaakha 14.

Kimalihakaru exikola, miyo kaapatxera ovara ntoko pioneiru a nthiti. Ni isemana vakhaani saattharelana, miyo kaahirowa muttetthe woothowa anamalaleera oPielavesi waattamela ecentro ya oFinlândia.

OPielavesi, miyo kaamusuwela mwaaraka oosiveleyaxa, Sirkka. Miyo kaahisiveliwa vantxipale ni owo mwaha wa mikhalelo sawe, omaala, wiiyeviha ni aari mutthu oolipa moomunepani. Owo khaikhupanyera, annaxukurela ni itthu vakhaani aaraaweno sa weerutthuni. Ooweeli hiyo naatthuna opaka ele naaweraahu weera ninvarele Yehova, nihipwatthaka yoothanleliwa ahu. Hiyo nthelanne 23 a Março a 1974. Nthelanakaru, hiyo naarowa oKarttula, muttetthe yoowo yaathonwaayawo vantxipale anamalaleera.

Okhuma nihiku nthelannaahu, Yehova aahoonihera weera aamurowa onikosoopa mwa mukhalelo wa weerutthuni wakhala weera naamuhela Omwene nipuro noopatxera. (Math. 6:33) Mwa ntakihero, woopatxerani, oKarttula hiyo khinaarinono ekaaro. Hiyo neettaka vatxinkani. Menento nipuro nne ti nootepa oriira yaphiya vale eyiita. Weera niwere olaleera muttetthe ole mutokweene wa muloko, hiyo naatthuneya okhalano ekaaro, menento khinaarinono musurukhu weera nthume.

Nihiku nimoha, munnaka mmoha aahiwa onixekura. Nto owo aahinivaha ekaaro. Ni owo aahiliva itthu sootheene sa ekaaro ele. Hiyo paahi waatthuneya omuhelakamo Gasolina. Vano hiyo naahikhalano ekaaro naahaawelaahu vantxipale.

Yehova aahoonihera weera aamurowa okosoopa soohaawela sahu sa weerutthuni. Hiyo paahi naatthuneya ohela Omwene nipuro noopatxera.

Emaara naaraahu exikola ya mapioneiru eyaakha ya 1978, munna Raimo Kuokkanen, a mmoha a ale yaanixuttiha, aahinooperera opaka epetiçao ya exikola ya oGileyadi. Nto naapatxera oxuttera nuulumo na english weera naakhuleliwa. Menento eyaakha ya 1980 nihinaaye opriyenxeri ipetiçao, naawompwa orowa ovara eBetheli ya oFinlândia. Etempu ele, ale yaakhala oBetheli khiyaapriyenxeri ipetiçao weera ekele oGileyadi. Mene hiyo naatthuna ovara weiwo Yehova aatthunaawewo,  ohiya hiyo naatthunaahuwo. Mwaha wa yeeyo, hiyo naahaakhulela nwopelo ole. Nnaamweera vareene hiiho, hiyo naavirelela oxuttera engles wakhala weera nihiku nikina naamwiitthaniwa oGileyadi.

Iyaakha saattharelana, Mukuttula Woolamulela waahaakhulela weera ale yaavara oBetheli eroweleke exikola ya oGileyadi. Moowaakuveya hiyo naahipriyenxeri ipetiçao, khaiyene waamuhinsivela muteko ole wa oBetheli. Khaiyene ti yeeyo! Mene hiyo naatthuna okhala oolikaneene okhavihera mapuro oothowa anamalaleera wakhala weera naamwaakhuleliwa. Hiyo naahiwompwa orowa osoma eturma 79 ya oGileyadi, mweeri wa Setembro a 1985. Hiyo naathanleliwa ovara oColômbia.

Emaara hiyo naaphiñyaahu oColômbia, naathanleliwa ovara oBetheli. Miyo kaahipaka ele kaaweraaka weera kiikhovelelihe ni miteko sa oBetheli, menento evirakaru eyaakha emoha, miyo kaavekela otxentxiwa yoothanleliwa aka. Ela yaari ekwaha yoopatxera ni yoomalihera mweekumini mwaka kaapankaaka eyo, hiyo naathanleliwa okhala mamisiyonaariyu, nikhumaka muttetthe woothowa anamalaleera nirowaka ecidade ya oNeiva, eDepartamentu ya Huila.

Miyo okhuma khalayi, okisivela olaleera. Emaara kahaathenlaaka kivaraka ntoko pioneiru oFinlândia, miyo kaakhuma owaani wooixelo kaatthika oxekuwa. Vaavo miyo ni Sirkka naathelannaahu, nannaviriha nihiku nootheene nlaleeraka. Vaavo naakelaahu mittetthe soorakamela owaani, hiyo nannakonaka mukaaroni mwahu, mwaha wa yeeyo, hiyo nannattottela mureerelo mukwaha ole ni nannapehera olaleera nihiku naattharelana.

Ovara ntoko mamisiyonaariyu wannaneeriha ohakalala ntoko khalayi. Muloko ahu waahunnuwa vantxipale ni hiyo naahoonelela weera asinna a oColômbia yaari oottittimiha, oosivelana ni ooxukurela.

Waattamela weiwo naakhalaahuwo oNeiva, khaariwowo naari Namoona mmoha a Yehova. Miyo kannatthuna vantxipale weera kaalalenre mitthenka sooreera nipuro nne. Menento mwaha wa ekhotto, nipuro nne khinaari noovareleleya wa atthu yahaakhanle a weiwe. Mwaha wa yeeyo, miyo kannanvekela Yehova weera mutthu a ecidade ele, akhale Namoona a Yehova. Miyo kuupuwela weera waamukhala wa miruku mutthu mmoha a ecidade ele yoowoopiha, oxuttera ekhaikhai weiwo naavaraahuwo oNeiva, abatiziwe ni akele vahoolo moomunepani, ni avinyaka atthikeleke elapo awe ni apatxereke olaleera. Miyo nkaasuwela weera Yehova ampaka etthu yootepa ooreera opwaha ele kuupuwelaaka.

Muhoolo mwaya, miyo kaapatxera omusoma Biblya ni mmiravo mmoha oniitthaniwa Fernando González. Owo aakhala wAlgeciras, ecidade yeeyo ahaakhanlaawewo Namoona a Yehova. Fernando anneetta ikiloomu soophiyeraka 50 weera avare oNeiva. Owo anniireherera nnene sene vaavo aarowaawe omusomaka Biblya ni annoonela mithukumano. Okhuma esemana yoopatxera ya omusoma wawe Biblya, Fernando aapatxera waaleela atthu a ecidade awe ikhaikhai aaxuttenraawe mBiblyani.

 Fernando abatizinwe Janeiro a 1990, sivirakaru miyeeri 6 amusomaka Biblya. Ni muhoolo mwaya, owo aahikhala pioneiru a nthiti. Okhala weera ecidade ele ya wAlgeciras aahikhalawo Namoona a Yehova mmoha, eBetheli yaahaathanla mapioneiru oothanleya weera yakhavihere ecidade ele. Fevereiro a 1992, waapakiwa muloko.

Menento Fernando khaiyene aalaleera paahi ecidade aweru. Hooye! Vaavo aathenlaawe, owo ni amwaarawe yaahithaamela oSan Vicente del Caguán, ecidade ekina yahaakhanlaayawo Anamoona a Yehova. Iwo-tho, awo yaahikhavihera opaka muloko. Eyaakha ya 2002, Fernando aahithanliwa okhala mutokweene a esirkwiitu, owo ni amwaarawe, olga, ennavirelela ovara yoothanleliwa ela mpaka olelo.

Ni yooweereya ela, miyo kooxuttera weera mutthu onnatthuneya ohima etthu ontthunaawe waapakaka mavekelo moovarihana ni yoothanleliwa ahu naari muteko mukina. Yehova pooti opaka etthu hiyo nihinweraahu opaka. Mwaha wooweera, muteko ti wa Yehova ohiya wawihu. — Math. 9:38.

Eyaakha ya 1990, naathanleliwa osirkwiitu. Yoothanleliwa ahu yoopatxera yaari okapitaale ya oBogotá. Hiyo naaxupeya mwaha wooweera khinaakhovelenle okhala ecidade etokweene ni yoowaattiwa. Miyo ni mwaaraka naatthu nihisuwenle itthu sintxipale. Mene hiyo nohoona moota Yehova okwanihenraawe etthu aanilaihenraawe va Afilipi 2:13: ‘Veekhaikhai, ti Muluku oneeriha mwa nyuwo otthuna ni-tho opanka ntoko ontthunaiye.’

Moovira etempu, hiyo naahithanleliwa ovara esirkwiitu ya oMedellín, ecidade yeele kihimmaaka woopatxerani. Atthu a muttetthe ole, yaakhovelela itthu soowoopiha ehimpwattha. Mwa ntakihero, ekwaha emoha, kipakihaka yoosoma ya Biblya, kaahiiwa ikapwitthi soopiwaka vaate. Miyo kaahanle wiivonyera vathi, mene namasoma ole a Biblya, aahivirelela osoma iparagrafu moomaaleleya ntoko khiyaavo yeereya. Amalihakaru osoma, aahikivekela weera akhume. Ni owo aahitthika aakunxeene anamwane awe eeli ni aahikileela moomaaleleya, “Mukilevelele, kaakenle waakuxa anamwane aka.”

Hiyo-tho naahiviriha itthu ikina soowoopiha. Nihiku nimoha, vaavo naalaleeraahu empa ni empa, amwaaraka yaakitthimakela yoovaka vantxipale. Awo yaaheera weera ookhala mutthu aatthuna owoopela. Miyo kaahoova. Mene moottharelana hiyo naahoonelela weera mutthu owo aatthuna omoopela mulopwana aavira waattamela va Sirkka; ohiya Sirkka.

Olipa murima wa asinna a ecidade ele, waanikhavihera oviriha maxupo oowoopiha ntoko ala. Hiyo naahoonelela weera, wakhala weera Yehova annaakhavihera asinna a ecidade ele, owo-tho aamurowa onikhavihera. Opwaha mwa yeeyo, hiyo ninnaakhela miruku naavahiwaahu ni asitokweene a mmulokoni a ecidade ele. Nanniikosoopa vantxipale ni nannahiya mmatatani mwa Yehova itthu sootheene.

Mene itthu ikina khaiyene saari soowoopiha ntoko nuupuwelaahu. Nihiku nimoha kaamuxekuraaka mwaneene vaate, miyo koona weere asithiyana eeli yaamunyakulihana ni owana vaate. Miyo nkaatthuna waaweha atthu ewanaka,  mene mwaneene vaate aahikinyeserera weera nawehe etthu yeereya. Niphiyakaru iwe naahoonelela weera “onyakula” iwe yaari apalame eeli yaatakiha mavizinyu aya.

Eyaakha ya 1997, miyo kaathanleliwa okhala mulipa ooxuttiha a exikola yoowaaxuttiha anamalaleera. b Wa miyo eparakha etokweene orowela ixikola soomuxuttiha Biblya, nto miyo nkaasuwela weera kaamukhala mulipa ooxuttiha a exikola emoha sa ixikola iye.

Moovira etempu miyo kaahikhala mutokweene a edistritu. Vaavo muteko ola weemexerinwaaya, miyo kaahitthikela okhala mutokweene a esirkwiitu. Nto mpuwa mwa iyaakha 30, miyo kinnahakalala mwaha wookhala mulipa oowaaxuttiha asitokweene a esirkwiitu. Soothanleliwa iya, sookivaha mareeliho mantxipale. Mene, khaiyene waari wookhweya, miyo kinoorowa wiiwanyeiha nnene sene eyo.

Miyo ka mutthu oolipa murima. Ni tiyeeyo ekikhavihenre oviriha itthu sootepa woopiha. Mene ikwaha ikina miyo kannavaha miruku mmulokoni moohireerela. Ekwaha emoha, miyo kaahuuluma ni asinna otthuneya waya okhalano nsivelo ni wiiyeviha. Nto emaara kaavahaaka miruku iyo kaahuuluma mwa mukhalelo woohireerela, mpaka miyo ohoonihera mikhalelo iyo sa nsivelo. — Arom. 7:21-23.

Ikwaha ikina miyo kinnakhulumuwa mwaha wa ohimalela waka. (Arom. 7:24) Ekwaha emoha miyo kaahinvekela Yehova weera waamukisivela ohiya yoothanleliwa aka ya omisiyonaariyu ni otthikela oFinlândia. Menento ekwaha ene yeele kaahoonela muthukumano. Ni etthu kiiwalaaka omuthukumanoni, yaahikittuttha murima weera kaatthuneya ovirelela mwa yoothanleliwa aka ni owanano ohimalela waka. Nivekelo kaapankaaka ni moota Yehova aakhunlaawe, kinnatikiniheya mpaka olelo. Opwaha mwa yeeyo, miyo kinnamuxukurela Yehova mwaha wookipixera murima ni okikhavihera owanano itthu saakikhulumula.

Miyo vamoha ni Sirkka ninnamuxukurela Yehova mwaha woonivaha iparakha yooviriha ekumi ahu yootheene ninvarelaka Yehova mwa etempu yootheene. kinnamuxukhurela Yehova mwaha wookivaha mwaaraka a nsivelo ni oororomeleya mwa iyaakha iya sootheene.

Kakwaniha vale iyaakha 70, miyo kineereke otthuneya ohiya okhala mulipa ooxuttiha ni mutokweene a esirkwiitu. Nto eyo khenkikhulumula naari vakhaani. Moosuwela mwaheene heeni? Mwaha wooweera koosuwela weera wa Yehova etthu yootthuneya ori onvarela moowiiyeviha ni okhalano murima woosareya nsivelo ni oxukurela, ti yeeyo enanvuwiha Muluku ahu. (Mik. 6:8; Mar. 12:32-34) Weera ninvuwihe Yehova khontthuneya okhalano yoothanleliwa yoothanleya.

Emaara kinuupuwelelaaka soothanleliwa kaaraakano, miyo kinnasuwela weera nkaakhenle iparakha iye mwaha wooweera ka mutthu ootthuneyaxa waapwaha atthu akina, naari koosuwela itthu sintxipale. Hooye. Opwaha mwa yeeyo, Yehova ookivaha iparakha iye mwaha wa mahala awe. Nave Yehova oheemerera weera kikhaleno itthu iya nnaamweera saakhanle itthu saakikhulumula. Miyo koosuwela weera koowera opaka itthu sootheene kikhaviheriwaka ni Yehova. Ti vawonto kineeraaka, itthu saakikhulumula sohoonihera owera wa Yehova. — 2 Akor. 12:9.