1. Atthu akina eniisoonela moota heeni vaavo enlaleeraaya? (Nwehe efootu.)

 NTOKO atthu a Yehova, hiyo ninnaalaleera atthu akina mwaha wooweera ninnamusivela Tiithi ahu a wiirimu nave nintthuna waakhavihera atthu omusuwela owo. Anamalaleera antxipale, onnaasivela ovara muteko woolaleera, mene akina onnaaxupa ophwanya ohakalala mmutekoni mmo. Mwaha wa heeni? Akina mwaha wooweera onnaaxupa wuuluma ni kheniiroromela mwaneene aya. Akina ennoova orowa vaate ehiwompwaleene. Ni akina ennoova ohaakheliwa nnene. Akina aaxuttihiwa weera esepeke ovaanyihana ni atthu akina. Nnaamweera emusivelaka vantxipale Yehova, asinna awo ni asirokora, onnaaxupa owaattamela atthu ehaasuwenlaaya weera yaaleele mitthenka sooreera. Nnaamweera vareene hiiho, awo ennasuwela otthuneya waya muteko ola woolaleera, nave ennavara muteko owo moohihiyerereya. Moohihovela, Yehova onnahakalala vantxipale!

2. Wakhala weera nyuwo mookhalano maxupo oophwanya ohakalala mmutekoni moolaleera, mwaha wa heeni muhintthuneyaanyu okhulumuwa?

² Neereke emaara ekina onnooxupani okhala oohakalala vaavo munvaraanyu muteko woolaleera? Eyo yaaweereyaka ni nyuwo, muhikhulumuwe. Apaale eyo enoonihera weera nyuwo mwa mutthu oowiiyeviha ni khamuntthuna wiisunnuwiha naari ovaanyihana ni mutthu. Opwaha mwa yeeyo, khaavo ommusivela ohaakheliwa nnene, otepaxa wene wakhala weera naatthuna opaka etthu yooreera wa mutthu owo. Nto muroromeleke weera Tiithi anyu a wiirimu onnasuwela maxupo munvirihaanyu ni ontthuna wookhaviherani. (Yes. 41:13) Mwa yoosoma ene yeela, nnimoona soohimmwa 5 sinrowa onikhavihera owanano  miyuupuwelo iyo ni ovirelela ohakalala ni muteko woolaleera.

MUHIYE MASU A MULUKU YOOLIPIHAKANI

3. Eheeni yaamukhavihenre Yeremiya waalaleera atthu?

³ Nave-tho khalayi, mitthenka sa Muluku saahaalipiha arumeyi awe yaawo yaatthuneya opaka yoothanleliwa aya yooxupa. Moone ntakihero na mprofeti Yeremiya. Owo aaxupeya vantxipale vaavo Yehova aamurummaawe olaleya. Yeremiya enre: “Iii, Apwiy’aka Yahvéh! Òná, miyo nkinasuwela wuluma, miyo nlelo ká mwanamwane.” (Yer. 1:6) Eheeni yaamukhavihenre Yeremiya okhala oolipa murima weera alaleere? Etthu Yehova uulummaawe yaahimulipiha. owo enre: “Nto vavale nsu nawe nànavarela ntoko moro mmurimani mwaka, anyi, ntoko moro muhinani mwa makhuv’aka. Kòhèteteya wera kiwerye moro ole, nto kòhòtxela.” (Yer. 20:8, 9) Nnaamweera Yeremiya aarinono muttetthe wootepa oxupa, masu owo aakhenlaawe weera alaleye, yaahinvaha olipa murima aahaawelaawe weera awere ovara muteko awe.

4. Eheeni enkhumelela vaavo nimmusomaahu Biblya ni ophimelela? (Akolosi 1:9, 10)

⁴ Olelo-tho, akristu ennaphwanya olipa murima enhaawelaaya moorweela mwa Biblya. Vaavo murummwa Paulo aalepenlaawe muloko wa oKolosi, owo aahaaleela asinna weera, wakhala weera awo yaamuxuttera vantxipale woohima sa Yehova, eyo yaamurowa waakhavihera weettela “ephiro yowàphwanelela Apwiya” nave ‘wiimiha soowiima mwa miteko sootheene sooreera.’ (Mmusome Akolosi 1:9, 10.) Muteko ola wooreera, onhela mpuwa olaleera. Nto vaavo nimmusomaahu Biblya ni ophimelela ele ninsomaahu, nroromelo nahu ni Yehova ninnakhala noolipa nave ninniiwexexa mwaha wa heeni oraaya wootthuneya waaleela atthu woohima sa Omwene.

5. Moota heeni ninrowaahu ottottela mureerelo yoosoma ahu ya Biblya?

⁵ Weera muttottele mureerelo masu a Muluku, musomeke vakhaani-vakhaani ni mphimeleleke ele munsomaanyu. Musepeke waakuveya emaara munsomaanyu. Wakhala weera moosoma masu enooxupani wiiwexexa, muhihiye, opwaha mwa yeeyo, muthola-thole va Índice das Publicações da Torre de Vigia naari Guia de Pesquisa para Testemunhas de Jeová weera mphwanye wiiwanyeihiwa wa masu awo. Mwiihiyera etempu weera musome moomaaleleya, nyuwo munoolipiha nroromelo nanyu nooweera etthu Biblya onhimaawe ekhaikhai. (1 Ates. 5:21) Mwalipiha nroromelo nanyu,  munoohakalala waaleela atthu akina ele munxutteraanyu.

MWIIREHEREREKE NNENE MWAAROWAKA OLALEERA

6. Mwaha wa heeni nintthuneyaahu wiireherera nnene sene weera nalaleere?

⁶ Wakhala weera nyuwo munniireherera nnene muhinaaye orowa olaleera, onoorowa okhala wookhweya wuuluma ni atthu. Yesu aahaareherera nnene sene oohuseraawe ahinaaye waaruma orowa olaleera. (Luka 10:1-11) Awo yaavarihela muteko itthu Yesu aaxuttinhaawe, mwaha wa yeeyo awo yaahakalala vantxipale mwaha wa itthu sootheene yaawenraaya opaka. — Luka 10:17.

7. Moota heeni ninrowaahu wiireherera weera nalaleere? (Nwehe efootu.)

⁷ Moota heeni ninrowaahu wiireherera weera nalaleere? Hiyo onnatthuneya wuupuwela etthu ninrowaahu ohima, avinyaka woona moota ninrowaahu wuuluma moowiiwanyeya nivarihelaka muteko masu ahu. Nave ti wootepa otthuneya wuupuwela itthu iraru woohima sa muttetthe ahu nave ophwanya waakhuliwa wa etthu eri poothe. Avinyaka, vaavo ninrowaahu wuulumaka ni atthu, hiyo nikhaleke oohakalala, ootheya, ni asinthamwene.

8. Mwa mukhalelo heeni akristu eraaya ntoko miyaapu sa oloko sihimmwale ni murummwa Paulo?

⁸ Murummwa Paulo aahaaleela asinna eeraka: “[Hiyo] nòkhalano muhakhu ola mmwapuni mwa oloko.” (2 Akor. 4:7) Muhakhu owo ti heeni? Muteko woolaleera yoowo onvuluxa ikumi ni onuuluma woohima sa Omwene wa Muluku. (2 Akor. 4:1) Ankha nto miyaapu sa oloko ti heeni? Iyo sinthoonyera arumeyi a Muluku yaawo enlaleya mitthenka sooreera. Etempu ya murummwa Paulo, alipa anakoso yannavarihela muteko miyaapu sa oloko weera eteexe naari osunkamo itthu sootepa otthuneya, ntoko eyootxa, eviinyu naari musurukhu. Moolikana ni eyo, hiyo miyaapu sa oloko ni Yehova onnanivarihela muteko weera nlaleyeke mitthenka sootepa oreera. Nikhaviheriwaka ni Yehova, hiyo nnoorowa okhalano ikuru ninhaawelaahu weera nivirelele olaleya moororomeleya.

NVEKELEKE NVEKAKA OLIPA MURIMA

9. Moota heeni ninrowaahu owina woova naari owina owoova atthu ehintthuna wiiwa mitthenka? (Nwehe efootu.)

⁹ Emaara ekina, hiyo pooti omoova mutthu naari woova ohaakheliwa nnene. Nipakeke eheeni eyo yeereya vale? Moone nivekelo  arummwa yaapankaaya emaara yaakhoottiheriwaaya olaleera. Ohiya woova, awo yaavekela nikhavihero wa Yehova weera ‘evirelele olaleya nsu na Muluku moolipa murima.’ Yehova aahaakhula nivekelo nne moowaakuveya. (Mit. 4:18, 29, 31) Wakhala weera munnoova olaleera mwaha woomoova mutthu, nvekele nikhavihero na Yehova, munvekele Yehova weera ookhavihereni waasivela atthu ohiya owoova.

10. Moota heeni Yehova onnikhaviheraawe okhala Anamoona awe? (Yesaya 43:10-12)

¹⁰ Yehova oonithanla hiyo ntoko Anamoona awe, ni owo onroromeliha weera onoorowa onikhavihera okhala oolipa murima. (Mmusome Yesaya 43:10-12.) Vano nrowe noone itthu ixexe sinrowa onikhavihera mwa mukhalelo ene yoowo. Yoopatxera, ikwaha sootheene Yesu onkhala ni hiyo vaavo ninlaleeraahu mitthenka sooreera. (Math. 28:18-20) Yanaaveeli, Yehova oothanla malaika yaawo ennikhavihera muteko ola woolaleera. (Apok. 14:6) Yanaararu, Yehova onnanivaha munepa awe wootteela weera onikhavihereke wuupuwelela ele ninxutteraahu. (Yoh. 14:25, 26) Yanaaxexe, hiyo ninnakhaviheriwa ni asinna vaavo ninlaleeraahu. Nikhaviheriwaka ni Yehova ni nikhavihero na asinna oosiveleya, hiyo nookhalano itthu sootheene ninhaawelaahu weera nikhale oolipa murima ni ovirelela olaleera.

MUKHALEKE OOWIISAAKUVIHA, NI MUKHALEKENO MOONELO WOOREERA

11. Moota heeni nneeraahu naaphwanye atthu emaara ninvaraahu muteko woolaleera? (Nwehe efootu.)

¹¹ Neereke nyuwo munnakhulumuwa vaavo munaaphwanyaanyu atthu vakhaaneene naari ohaaphwanyaru mmawannyaya? Mwiikoheke ha: ‘Emaara ela atthu amuttetthe ola eri woowi?’ (Mit. 16:13) ‘Neereke eronwe omutekoni naari omerkatu?’ Wakhala weera ti yeeyo, neereke miyo kinoowera waalaleera atthu antxipale mmuseweni? Munna mmoha oniitthaniwa Joshua ohimme ha, “Miyo kohoonelela eparakha yoolaleera keettaka mmerkatu naari mapuro oowaattiwa.” Owo ni mwaariye Bridget, yannaaphwanya atthu antxipale mmawannyaya vaavo yaaxekuraaya oxekuwa naari eDomingu othana. — Aef. 5:15, 16.

12. Moota heeni nneeraahu noonelele etthu mutthu onroromelaawe naari emmuxupa?

¹² Wakhala weera nyuwo mohoonelela weera mutthu khaanoono ntthuno, mwaasaase  osuwela etthu heeni emmuxupa. Joshua ni Bridget ennavarela muteko nikoho na efolhetu weera epatxere otthekula ni mutthu. Mwa ntakihero, evarelaka muteko efolhetu Munimonela haai Biblya? awo ennamukoha mutthu owo: “Atthu akina ennaakhulela weera Biblya eliivuru ya Muluku mene akina khenaakhulela eyo, ankha nyuwo munoonela hayi?” Yapaka eyo ennapatxeriha matthekulelo ooreera.

13. Mwaha wa heeni nintthuneyaahu ohakalala ni muteko woolaleera nnaamweera atthu ehiiwaka? (Miruku 27:11)

¹³ Ohakalala wahu mmutekoni moolaleera khonweela mwaha wooweera atthu ennaakhulela mitthenka naari hooye. Mwaha wa heeni? Mwaha wooweera hiyo nimpaka etthu Yehova ni Mwanawe Yesu entthunaaya weera hiyo nipakeke, nave ninnavaha onamoona woomalela. (Mit. 10:42) Nnaamweera nihaaphwanyaka atthu weera naalaleere naari atthu akina ekhoottaka mitthenka, hiyo ninnahakalala mwaha wooweera noosuwela weera nimpaka etthu emmuhakalaliha Tiithi ahu a wiirimu. — Musome Miruku 27:11.

14. Mwaha wa heeni hiyo nintthuneyaahu ohakalala wakhala weera munna omphwanya mutthu ontthuna oxuttera?

¹⁴ Hiyo ninnahakalala vantxipale vaavo munna mmoha onamphwanyaawe mutthu ontthuna wiiwa ekhaikhai. A Sentinela oolikanxera muteko woolaleera ni omwaasa mwaana ariheñye. Atthu antxipale ennavolowa muteko ola woomwaasa mwaana, annaasiwa mapuro oovirikana, avinyaka mwaana owo annaphwanyiwa, ni atthu ootheene ennahakalala ohiya paahi waha wa mutthu ole amphwannye. Moolikana niiyo, atthu ootheene mmulokoni ennakhavihera muteko woolaleera ni ennalaleya muttetthe aya, ni ootheene ennahakalala vantxipale vaavo mutthu mmoha ompatxeraawe woonela mithukumano.

NWEHEXEXEKE NSIVELO NANYU WA YEHOVA NI ATTHU

15. Matheyo 22:37-39 onkela onikhavihera moota heeni waatxeerera ohakalala wahu mmutekoni moolaleera? (Nwehe efootu ya vakaapani.)

¹⁵ Nsivelo nahu wa Yehova ni atthu ninnakhavihera waatxeerera ohakalala wahu mmutekoni moolaleera. (Mmusome Matheyo 22:37-39.) Nkuupuwelani moota Yehova onhakalalaawe vaavo onniwehaawe nivaraka muteko woolaleera ni moota atthu enhakalalaaya vaavo empatxeraaya omusoma Biblya! Muupuwele tho ovuluxiwa wa atthu ale enaakhulela  mitthenka ninlaleyaahu. — Yoh. 6:40; 1 Tim. 4:16.

16. Moota heeni muneeraanyu muhakalale ni muteko woolaleera nnaamweera muhikhumaka owaani? Nvahe matakihero.

¹⁶ Ankhanto wakhala weera nyuwo khamunwera okhuma owannyinyu? Wakhala weera eyo enimweereya, nwehexexeke etthu muntthuneyaanyu opaka weera moonihere nsivelo nanyu wa Yehova ni wa atthu. Mpuwa mwa eretta ya COVID-19, Samuel ni Dania khiyaawera okhuma owannyaya. Mpuwa mwa etempu ele yooxupa, awo yannalaleera envarihelaka muteko telefooni, elepaka ikaarta ni yannapakiha soosoma sa Biblya envarihelaka Zoom. Samuel aakhalano eretta ya câncer ni owo annattottela mureerelo emaara yeeyo aarowaawe oclinica aalaleeraka atthu ootheene aaphwanyaawe. Owo ohimme ha: “Maxupo pooti onikhulumula wa mukhalelo wa mmuupuweloni, wa weerutthuni ni woomunepani. Mwaha wa yeeyo, onnatthuneya okhala oohakalala mmutekoni mwa Yehova.” Mpuwa mwa ehuhu ele, Dania aamora ni aahaabaxari mpuwa mwa miyeeri 3. Avinyaka owo aaheetta va ekadera ya maroda mpuwa mwa miyeeri 6. Dania ohimme ha: “Miyo kanneerera opaka ele kaaweraaka moovarihana ni makhalelo aka, miyo kannaalaleera a enfermeira yaawo yaawa okiweha moota miyo kaaraaka nave kannavaanela ni ale yaakixekura. Nave miyo kaakhalano otthekula wooreera kinvarihelaka muteko telefooni ni muthiyana mmoha yoowo aakikhavihera woohima sa ekumi aka.” Mwaha wa makhalelo aya, Samuel ni Dania khiyaawera opaka itthu ntoko yaapakaaya khalayi, mene nnaamweera vareene hiiho awo yannapaka ele yaaweraaya ni yannahakalala ni itthu saakhumelela mwaha wa wiilipihera waya.

17. Moota heeni muneeraanyu muttottele mureerelo itthu sihimmwale mwa yoosoma ene yeela?

¹⁷ Mweerereke ovarihela muteko soohimmwa 5 sihimmwale mwa yoosoma ene yeela. Yoohimmwa eri poothe enkhala ntoko itomate ni icebola sihelinwe mmathaapani, vaavo simpwexeereriwaaya ni mathapa awo, yookhumelela ti yooweera mathapa awo enootepa osiva. Wakhala weera nnoovarihela muteko soohimmwa iya 5 hiyo nnookhala oorehereya weera niwaneno miyuupuwelo soohireera ni okhala oohakalala vaavo ninlaleeraahu.