1. Eparaisu yoomunepani ti heeni, ni nlakeleke opaka eheeni?

 OLELO va, elapo ya vathi yookhalano eparaisu yeeyo atthu antxipale enkhalaayamo ni murettele ni siraayamo itthu sintxipale soopaka. Atthu eri mparaisu mmo, ahiithanlela ohikhumamo-tho. Nave-tho awo entthuna weera atthu antxipale ekhale vamoha naawo nipuro nna nootepa oreera. Eparaisu heeni? Eparaisu yoomunepani! a

2. Etthu heeni yootikhiniha nuulumaka sa eparaisu yoomunepani?

² Ti wootikhiniha woona moota Yehova opankaawe nipuro nooreera elapo ela enlamuleliwa ni Satana yeeyo esareñye itthu soonanara, nthalu ni itthu soowoopiha. (1 Yoh. 5:19; Apok. 12:12) Nave Tiithi ahu a nsivelo oosuwela moota oraaya wooxupa okhala elapo ela yoonanara, nave owo onnanivaha ovareleleya ninhaawelaahu weera nivirelele wunnuwa moomunepani weera nivirelele onvarela owo moohakalala. Biblya onnalikanxera eparaisu yoomunepani ntoko ‘ntthawelo’ ni “ntharu norikeleliwa.” (Yes. 4:6; 58:11) Ni mareeliho a Yehova, ale eneerela eparte eparaisu yoomunepani, ennaphwanya ohakalala ni ovareleleya nnaamweera ekhalaka mahiku ala oomalihera eri ootepa oxupa. — Yes. 54:14; 2 Tim. 3:1.

3. Ekwaha heeni yoopatxera yaakwanenlaaya masu a Yesaya 65?

³ Yehova aahinvarela muteko Yesaya weera iiwanyeihe moota yaarowaaya okhala eparaisu yoomunepani. Nyuwo pooti osoma eyo ekapiitulu 65 ya Yesaya, eprofesiya ela epatxenre okwanela eyaakha ya 537 Yesu ahinaakuve owa. Emaara yeeyo aYuda yaakumihinwaaya oBabilonia erowaka elapo aya. Yehova aahaareeliha atthu awe ni aahaakhavihera omuteka Yerusalemu yoowo aanyaanyinwe,  aYuda yaamutthikihera Yerusalemu okhala nipuro nooreera weera ekhalekemo, nave-tho yaahiteka etemplu weera nikhale nipuro yeeraaya emukokhorelekemo Yehova. — Yes. 51:11; Zak. 8:3.

4. Masu a Yesaya 65 enkwanela hayi olelo va?

⁴ Okwanela wanaaveeli wa eprofesiya ya Yesaya, weereñye eyaakha ya 1919 Kristu awiiyeene. Arumeyi a Yehova a mahiku ala, aakumihiwa mBabilonia mutokweene. Yeereyakaru eyo, eparaisu yoomunepani yoopatxera wunnuwa. Ni miloko sintxipale sookhumelela elapo yootheene. Alopwana ni athiyana khalayi yaarinono mweettelo woonanara, yaapatxera woonihera mikhalelo sa ekristu ni ‘owara omutthu munyowani opattuxeriwe Muluku mwa exariya.’ (Aef. 4:24) Ekhaikhai weera mareeliho mantxipale Yesaya olempaawe, enkela okwanela muhoolo elapo enyowani. Mene viinaano, ale eri mparaisu yoomunepani ennaakhela mareeliho mantxipale. Ninkela woona mwaha wa heeni nihintthuneyaahu ohiya eparaisu eyo yoomunepani ni-tho ohikhumamo.

NYUWO MUNIISOONELA HAYI MPARAISU YOOMUNEPANI

5. Moovarihana ni Yesaya 65:13, mareeliho heeni nimphwanyaahu mwaha wookhala eparaisu yoomunepani?

⁵ Ekumi yooreera ni otxa nnene. Eprofesiya ya Yesaya ennoonihera weera wookhala ovirikana eriyari ya ekumi ya ale enkhala mparaisu yoomunepani ni ale ehikhanle mparaisu yoomunepani. (Mmusome Yesaya 65:13.) Yehova onnaavaha itthu sootheene arumeyi awe enhaawelaaya weera evirelele omukokhorela owo. Owo onnaavaha munepa awe wootteela, masu awe Biblya ni yootxa yintxipale yoomunepani weera ‘etxeeke, . . . ewureke, . . . ni ehakalaleke.’ (Munwehe-tho Apokalise 22:17.) Ti woovirikana vantxipale ni mukhalelo wa ale ehikhanle eparaisu yoomunepani awo ‘ennavoliwa etala . . . , ntthona . . . , ni ennuuliwa muru.’ Awo ennoona weera yoohalela etthu mweekumini mwaya, mwaha wooweera khiyaanoono onthamwene ni Muluku. — Am. 8:11.

6. Moota heeni Yoweli 2:21-24 onhimaawe itthu ikina Yehova onnivahaawe, ni moota heeni ninrowaahu ottottela mureerelo itthu iyo?

⁶ Mprofeti mukina, Yoweli, owo aavarela muteko itthu sa nihiku ti nihiku ntoko sookhuura, eviinyu ni azeite, weera oonihere weera Yehova toovaha vantxipale, mwaha wa yeeyo, owo onnanivaha itthu sootheene ninhaawelaahu mwa mukhalelo woomunepani. (Yow. 2:21-24) Yehova onnapaka eyo anvarelaka muteko Biblya, iliivuru sahu, esite ahu jw.org, nave-tho mithukumano, assembleya ni akonkreesu. Niilipihera ottottela mureerelo itthu sootheene Yehova onnivahaawe,nnookhalano ekumi yooreera ni otxihiwa moomunepani.

7. Eheeni ‘enniteeliha murima’? (Yesaya 65:14)

⁷ Ohakalala ni otteeliwa murima. Atthu a Muluku “ennopa elulu” mwaha wooweera ennaxukurela itthu sootheene Yehova ompakaawe. (Mmusome Yesaya 65:14.) hiyo ‘ninnatteeliwa murima’ mwaha wa ikhaikhai sa mBiblyani seiyo sinnilipiha nave-tho mwaha wa nroromelo nahu noolipa mwaha wa mukuttho wa Yesu. Opwaha mwa yeeyo, otthekula woohima sa itthu iya vamoha ni asinna, onnaneeriha ohakalala! — Nsal. 34:9 [34:8, Tradução do Novo Mundo]; 133:1-3.

8. Mikhalelo heeni miili sootepa otthuneya sa eparaisu yoomunepani?

⁸ Eparaisu yoomunepani enhela mpuwa itthu piili sootepa otthuneya, nsivelo ni wiiraana wa atthu a Yehova. ‘Nlutte noowiiraaniha’ ninnoonihera moota enrowaaya okhala ekumi elapo enyowani, vaavo arumeyi ootheene a Yehova enrowaaya okhalano nsivelo ni murettele opwaha olelo va. (Akol. 3:14) Murokora mmoha onnahima etthu oonelenlaawe ekwaha yoopatxera aasuwenlaawe Anamoona a Yehova: “Nkaawera osuwela moota woohakalala naari veemusini vaka. Ekwaha yoopatxera  kaawonnaaka atthu yaakosoopaa mwa nsivelo, yaari Anamoona a Yehova.” Mutthu ontthuna ohakalala ni otteeliwa murima, ontthuneya osuwela eparaisu ahu ya omunepani. Atthu pooti ohima etthu eri poothe woohima sa Anamoona a Yehova, mene hiyo noosuwela weera nookhalano nsina nooreera ni mikhalelo sooreera ni Yehova vamoha ni asinna ni asirokora elapo yootheene. — Yes. 65:15.

9. Moovarihana ni Yesaya 65:16, 17, eheeni enrowa weereya ni itthu sinnikumihera maxupo?

⁹ Omaaleleya. Yesaya 65:14 onnoonihera mikhalelo sa atthu ehikhanle eparaisu yoomunepani eeraka ‘awo enookhuwela noothanana ni enoohihimera mmunepani mwaya moohommwa.’ Ekhaikhai weera atthu a Muluku ennaviriha maxupo mantxipale. Mene itthu iya ‘sinoottuwaliwa ni sinoovithiwa vamaithoni va Muluku.’ (Mmusome Yesaya 65:16, 17.) Yehova onoomaliha maxupo ootheene ninvirihaahu, noovira etempu, miyuupuwelo soonanara seiyo sinnikumihera maxupo, sinoorowa omala.

10. Mwaha wa heeni munoonaanyu weera mareeliho okhala vamoha ni asinna ni asirokora? (Nwehe efootu.)

¹⁰ Nave-tho olelo va, muupuwelo ahu onnakhala woomaaleleya vaavo ninrowaahu mmithukumanoni, omithukumanoni hiyo ninnakhala oomaaleleya nave ninnattuwala itthu sootheene sookhulumula sa elapo ela yoonanara. Vaavo nnooniheraahu mikhalelo sa yoowiima ya munepa wa Muluku ntoko, nsivelo, ohakalala, murettele, ovilela ni oreera murima, hiyo ninnakhavihera omaaleleya okhanle eparaisu ela yoomunepani. (Agal. 5:22, 23) Wa hiyo, eparakha etokweene okhala vamoha ni mareherero a Muluku! Ni ale eri eparaisu yoomunepani, moohipisa va enoorowa woona okwanela woomalela wa yoolaihera ya Muluku, vaavo onrowaawe opaka ‘erimu enyowani ni elapo enyowani.’

11. Moovarihana ni Yesaya 65:18, 19, moota heeni nyuwo muniisoonelaanyu vaavo musuwenlaanyu weera Yehova oopaka eparaisu yoomunepani?

¹¹ Oxukurela ni ohakalala. Yesaya oonivaha nthowa nikina ninneeriha ‘ohakalala ni otteeliwa murima’ mparaisu yoomunepani. Mwaha wooweera eparaisu eyo epakinwe ni Yehova. (Mmusome Yesaya 65:18, 19.) Mareherero empakiwa ni elapo, khenaaxuttiha atthu woohima sa Muluku! Mwaha wa yeeyo, hiyo khanintikhina vaavo Yehova onnivarelaawe muteko weera aakumihe atthu awo mmarehereroni mmo, ni weera awo yeereleke eparte eparaisu ela yootepa oreera ya omunepani. Hiyo ninnahakalala vantxipale ni mareeliho nnaakhelaahu mwaha wookhala mweekhaikhaini, ni hiyo nintthuna waaleela atthu ootheene woohima sa mareeliho awo. — Yer. 31:12.

12. Moota heeni nyuwo muniisoonelaanyu vaavo munsomaanyu yoolaihera eri va Yesaya 65:20-24, ni mwaha wa heeni?

 ¹² Neereke nyuwo murima anyu onnahakalala ni oxukurela vaavo munuupuwelaanyu yooweherera nraahuno mwaha wookhala eparaisu yoomunepani? Muupuwele moota enrowaaya okhala ekumi anyu elapo enyowani! Biblya onnalaihera eeraka: ‘Mwemmo khaphwanyeya mwaana a mahiku vakhaani naari mutokweene ahikwanihenre mahiku awe.’ Hiyo nnoorowa ‘oteka impa sahu, ni nnookhalamo asineene ahu, nnoophatteya imatta sa eviinyu ni nnootxa inuku saya.’ Hiyo ‘khaninrowa okhulumuwa vasiiyoni vene’ mwaha wooweera ‘nnooreelihiwa ni Yehova.’ Owo oolaihera onivaha ekumi erinono yoolakela, yoovareleleya ni yoohakalaliha. ‘Eni yeereye-tho wi, yaawo ehaakunve onvekela’ Yehova onoorowa osuwela etthu eri poothe mutthu ontthunaawe ni ‘onoorowa owaakhula.’ — Yes. 65:20-24; Nsal. 145:16.

13. Moota heeni Yesaya 65:25 onhimaawe matxentxo empakaaya ale enxuttera ekhaikhai?

¹³ Ovareleleya ni murettele. Ekhaviheriwaka ni munepa wootteela wa Yehova, atthu antxipale khalayi yaari oowoopiha, oowali ni oohiroromeleya, aapaka matxentxo ootthuneya mweekumini mwaya. (Mmusome Yesaya 65:25.) Mwaha woowiilipihera vantxipale awo aawera ohiya mikhalelo saya soonanara. (Arom. 12:2; Aef. 4:22-24) Ekhaikhai weera mwaha wookhala oohimalela, ikwaha ikina hiyo ninnapaka soottheka. Mene Yehova oowiiraaniha “atthu othene” yaawo emmusivela ni ensivelana mukina ni mukhwaawe, ni yookhumelela aya ti yooweera hiyo nookhalano murettele weekhaikhai ni wiiraana. (Tito 2:11) Owo mwiiriira pahiru Muluku nanwera sootheene opankaawe!

14. Moota heeni yooweereya ya munna mmoha enooniheraaya weera masu a Yesaya 65:25 teekhaikhai?

¹⁴ Neereke mutthu onnawereya opaka matxentxo mweekumini mwawe? Moone yooweereya ya mmiravo mmoha yoowo mwa iyaakha 20 aatthukinwe mwa ikwaha sintxipale mwaha wookhalano ekumi yoowuuliha muru ni yoowoopiha. Owo aahitthukiwa mwaha woowiiya ikaaro, wiiya mpaani ni itthu ikina. Owo aari oolikaneene waakhulana ni mutthu ari poothe. Mene vaavo iiwalaawe ikhaikhai sa mBiblyani, ni opatxera woonela mithukumano sa Anamoona a Yehova, owo annaroromela weera aaphwanya etthu yeeyo yaarowa ohakalaliha ekumi awe, eparaisu yoomunepani. Ni vaavo aabatizinwaawe, owo anneemela weera uupuwelele masu a Yesaya 65:25 moota yaavareleyaaya muteko mweekumini mwawe. Owo oohiya okhala mutthu oowali ni oowoopiha ntoko kharamu, nto vano owo mutthu oowiiyeviha ntoko eputtiputthi.

15. Mwaha wa heeni nintthuneyaahu waawopa atthu akina weera ekhale ni hiyo mparaisu yoomunepani, ni ninrowa opaka moota heeni eyo?

¹⁵ Yesaya 65:13 ompatxera eeraka ha: “Ti siso ùlummaiye Yahvéh.” Nave-tho eversu ya 25 emmalihera yeeraka “ti siso ùlummaiye Yahvéh.” Nave hiyo noosuwela weera soolaihera sa Yehova sinnakwanela. (Yes. 55:10, 11) Naari neere eparaisu yoomunepani ti yeekhaikhai. Yehova ohiiraaniha emusi ya arumeyi awe ehinlikana ni egrupu ekina. Eriyari ya atthu a Yehova ninnakhala ni murettele ntoko khanikhanle elapo ene yeela yoonanara. (Nsal. 72:7) Ti vawonto nintthunaahu waakhavihera atthu antxipale weerela eparte emusi ela ya elapo yootheene. Hiyo nnoopaka eyo niwehexexaka muteko woowaapaka atthareli. — Math. 28:19, 20.

NAAKHAVIHERE ATTHU AKINA OTTHUNA OVOLOWA EPARAISU YOOMUNEPANI

16. Eheeni enrowa waakhavihera atthu akina otthuna weerela eparte eparaisu yoomunepani?

¹⁶ Mutthu ori poothe a hiyo ookhalano etthu yootepa otthuneya weera aakhavihere atthu  akina otthuna ovolowa eparaisu yoomunepani. Hiyo ninnapaka eyo vaavo nimmutakihaahu Yehova. Yehova khommukhanyerera mutthu weerela eparte mareherero awe. Opwaha mwa yeeyo, Yehova ‘onnaapurula’ atthu mwa mukhalelo wooreera. (Yoh. 6:44; Yer. 31:3) Ti vawonto, vaavo mutthu onxutteraawe woohima sa mikhalelo sa Yehova ni omutthu awe, onnamweeriha mutthu owo otthuna okhala nthamwene a Yehova. Mene moota heeni mikhalelo sahu sooreera ni itthu nimpakaahu sinrowaaya waapurulela atthu mparaisu yoomunepani?

17. Moota heeni ninrowaahu waapurulela atthu eparaisu yoomunepani?

¹⁷ Mukhalelo mmoha woowaapurulela atthu mparaisu yoomunepani, ori waathokorora asinna ni asirokora mwa nsivelo. Vaavo mutthu omphiyaawe ekwaha yoopatxera Empa ya omwene, hiyo nintthuna weera ooneke ntoko yonnaaya ale yoonenle mithukumano khalayi muloko wa oKorinto. Awo yaahiroromela ni yaaheera: “Vekhaikhai Muluku ori ni nyuwo.” (1 Akor. 14:24, 25; Zak. 8:23) Mwaha wa yeeyo, hiyo onnatthuneya ovirelela otthara miruku sa ‘okhalano murettele mukina ni mukhwaawe.’ — 1 Ates. 5:13.

18. Eheeni enrowa waapurulela atthu mmarehereroni mwahu?

¹⁸ Imaara sootheene nintthuneya owoonaka asinna ntoko Yehova onwoonelaawe. Ninnapaka eyo vaavo ninwehexexaahu mikhalelo saya sooreera ohiya ohimalela waya. Mwaha wooweera ohimalela iwo onoomala moohipisa. Onnatthuneya oreherera maxupo ootheene nraahuno ni asinna mwa mukhalelo wooreera ni nikhaleke ‘oomaala murima, ni a ikharari mukina ni mukhwaawe nilevelelanaka mukina ni mukhwaawe.’ (Aef. 4:32) Mwa mukhalelo ola, eparaisu yoomunepani enimwaattuttha  murima atthu entthuna okosoopiwa mwa mukhalelo ene yoola. b

NVIRELELE OKHALA EPARAISU YOOMUNEPANI

19. (a) Moovarihana ni ekwaadru “ Awo yaakhuma ni aatthika,” eheeni atthu akina enhimaaya vaavo entthikelaaya eparaisu yoomunepani? (b) Nlakeleke opaka eheeni? (Nwehe efootu.)

¹⁹ Hiyo ninnahakalala vantxipale mwaha wooweerela eparte eparaisu yoomunepani! Olelo va, eparaisu yoomunepani ti yootepa ooreera opwaha khalayi, nave khenakhale atthu oowaatta eneerela eparte eparaisu ela. Wa mahiku ootheene, hiyo nnoovirelela oxukurela mwaha wa eparaisu ela Yehova apankaawe, otepaxa wene anipakenlaawe hiyo. Wakhala weera mutthu ontthuna otteeliwa murima, ovareleleya ni okosoopiwa, onnatthuneya weerela eparte eparaisu yoomunepani ni ohihiya eparaisu eyo! Menento onnatthuneya wiikosoopa, mwaha wooweera Satana onnapaka ele onweraawe weera aniwoke ni anivinxe mparaisu yoomunepani. (1 Ped. 5:8; Apok. 12:9) Hiyo khontthuneya waakhulela weera Satana awere opaka eyo. Onnatthuneya opaka ele ninweraahu weera nikosoope oreera, otteela ni murettele nraahuno mparaisu yoomunepani.