Nyuwo mwaasuwela?
Mwaha wa heeni yaakhanlaaya amalapo variyari va anakhotto a Davidi?
VARIYARI va anakhotto amalapo yanvarela mwene Davidi yaahikhalavo Seleki a w’Amoni; Uriya muhethi; ni Yitima ò Mowabi. a (1 Sow. 11:39, 41, 46) Anakhotto a Davidi yaahela tho mpuwa ‘Akreti, Apleti ni Axidodi.’ (2 Sam. 15:18) Akreti ni Apleti onooneya weera yaakhumme wa afilisti. (Ez. 25:16) Axidodi yaakhumme ecidade ya afilisti oGathi. — Yeh. 13:2, 3; 1 Sam. 6:17, 18.
Menento mwaha wa heeni Davidi aakhulenlaawe weera alopwana ala epwexeererane ni anakhotto awe? Owo annaroromela weera alopwana awo yannaroromeleya wa Davidi ni otepaxa wene, wa Yehova. Mwa ntakihero, Dicionariyu mmoha a mBiblyani ohimme ha woohima sa Akreti ni Apleti: “Awo yaavirelela ororomeleya wa Davidi emaara yeeyo Davidi aakumanaaweno maxupo mpuwa mwa olamulelo awe.” Moota heeni awo yoonihenraaya ororomeleya waya? Vaavo ‘alopwana ootheene a wIsraeli’ yaahiñyaaya omutthara Davidi, onooneya weera mwaha wa ‘mulopwana mmoha mulolo yoowo eeriwa Xeba’, Akreti ni apleti yaavirelela okhala ni Davidi nave yaahimukhavihera omala-maliha orukunuweliwa ni Xeba. (2 Sam. 20:1, 2, 7) Ekwaha ekina tho mwaana a Davidi, Adoniya, aaheerera okhala mwene nipuro na Salomoni. Menento Akreti ni Apleti yaavirelela okhala oororomeleya wa Davidi ni yaahimukhavihera Salomoni okhala mwene, mwaha wooweera ela yaari yoothanla ya Yehova. — 1 Mam. 1:24-27, 38, 39.
Mulopwana mukina ahaakhanle mwIsraeli mene aari oororomeleya wa Davidi, aari Itayi Mugathi. Itayi ni alopwana 600 yaawo yaamuhoola, yaahimukhavihera Davidi vaavo mwanawe Absaloni aamurukunuwenlaawe ni aatthunaawe weera ana a Israeli ootheene epake etthu emoharu. Woopatxerani, Davidi aahimuleela Itayi, okhala weera khaiyene aari mwIsraeli, owo khaatthuneya wiivoleihera ekhotto eyo. Itayi waakhula enre: “Nthowa na ekumi ya Yahvéh ni ya munepa á, pwiy’aka mwene, vothevene onrowaiye okhala pwiy’aka mwene, akhwiye nari mukumi, aheé, vavo tho anakhale’vo murumeyi á.” — 2 Sam. 15:6, 18-21.
Itayi aahiroromeleya wa Davidi, mwene yoowo aathanlinwe ni Yehova
Nnaamweera Akreti, Apleti, ni Axidodi yaari amalapo, awo yaahisuwela weera Yehova Muluku eekhaikhai ni weera Davidi aathanlinwe ni Yehova. Moohihovela mwene Davidi aaxukurela vantxipale mwaha wookhalano asilopwana ale oororomeleya.
a Moovarihana ni malamulo Yehova orummaawe olempwa va Olaleya 23:3-6 Amoni ni Amowabi khiyaakhuleliwa ovolowa muloko wa Israeli. Mene onnooneya weera malamulo ala yaahima paahi ale yahaakhuleliwa okhala asitokweene a wIsraeli, mene khiyaakhoottihera awo okhala vamoha ni atthu a Muluku. Nwehe masu ooweera “Amonitas” va Estudo Perspicaz das Escrituras, Volume 1, epaax. 111.
