1. Yehova ontthuna weera nipakeke eheeni?

 NIHIKU nootepa ohakalaliha mweekumini mwa anamathelana, nihiku emmuyaraaya mwanaya oopatxera. Nnaamweera asitiithi awo emusivelaka vantxipale mwanaya owo, awo khenweherera weera mwaana owo avireleleke okhala mwaana mahiku ootheene. Wakhala weera eyo yaamweereya, asitiithi awo yaamuxupeya vantxipale. Moolikana niiyo, nnaamweera Yehova ahakalalaka vantxipale vaavo nimpatxeraahu oxuttera woohima sa yoowo, owo khontthuna weera nivireleleke okhala ntoko anamwane wa mukhalelo woomunepani mahiku ootheene. (1 Akor. 3:1) Opwaha mwa yeeyo, owo ontthuna weera nikhaleke akristu “òwunnuwa.” — 1 Akor. 14:20.

2. Eheeni ninrowaahu woona mwa yoosoma ene yeela?

² Mwa yoosoma ene yeela, nnoorowa woona waakhuliwa wa makoho ala: Ontaphulela eheeni okhala mukristu oolipa moomunepani? Eheeni nintthuneyaahu opaka weera nikhale mukristu oolipa moomunepani? Mwaha wa heeni eyootxa yoolipa yoomunepani eraaya yootepa otthuneya weera nikhale oolipa? Ni mwaha wa heeni hiyo nintthuneyaahu osepa wiiroromela?

ONTAPHULELA EHEENI OKHALA MUKRISTU OOLIPA MOOMUNEPANI?

3. Entaphulela eheeni okhala mukristu oolipa moomunepani?

³ MBiblyani nuulumo na ekereku nintaphulela “wunnuwa” pooti otaphulela “olipa,” “omalela,” naari “wunnuwa woomalela.” a (1 Akor. 2:6) Ntoko mwaana onvirelelaawe wunnuwa mpaka okhala mutthu mutokweene, hiyo tho nintthuneya ovirelela olipiha onthamwene ahu ni Yehova, napaka eyo nnookhala akristu oolipa. Mene nnaamweera nreene akristu oolipa, nintthuneya ovirelela  wiilipihera weera nikhale akristu oolipa. (1 Tim. 4:15) Ootheene hiyo waahela mpuwa amiravo, nnoowera okhala oolipa moomunepani. Mene ninkela osuwela moota heeni waari weera hiyo ti akristu oolipa?

4. Mukristu oolipa moomunepani ti heeni?

⁴ Mukristu oolipa moomunepani onkhala moovarihana ni yootthuna ya Yehova, nave khonthanla opaka itthu paahi simmusivela owo. Ekhaikhai weera hiyo toohimalela ni ikwaha ikina nneereke opaka soottheka. Nnaamweera vareene hiiho, mukristu oolipa moomunepani onnoonihera mahiku ootheene weera onnuupuwela ni onnapaka itthu moovarihana ni yootthuna ya Yehova. Owo oowara omutthu onyowani ni ikwaha sootheene onniilipihera wuupuwela ntoko Yehova. (Aef. 4:22-24) Owo ooxuttera opaka soothanla sooreera mwaha wooweera onnuupuwelela miruku sa mBiblyani, mwaha wa yeeyo owo khontthuneya okhalano elista ya malamulo weera asuwele etthu yoopaka. Emaara ompakaawe soothanla, owo onniilipihera weera apakeke itthu sinvarihana ni yootthuna ya Yehova. — 1 Akor. 9:26, 27.

5. Eheeni enrowa weereya ni mukristu oohilipa moomunepani? (Aefeso 4:14, 15)

⁵ Mwa mukhalelo mukina, mukristu oohilipa moomunepani owo ti wookhweya ‘olokotthiwa’ ni ‘owokiwa’ ni yaale enhima soohimmwa soowootha naari owokiwa ni anamavaanyiha. b (Mmusome Aefeso 4:14, 15.) Mukristu oohilipa moomunepani, owo onnaakhalela nrima atthu akina, onnakumihera ohiiwanana mmulokoni, nave ti oowaakuva onyoonyiwa mwaha wa itthu atthu akina empakaaya nave ti wookhweya weereriwa opaka yoottheka etokweene. — 1 Akor. 3:3.

6. Wunnuwa moomunepani wa mukristu onlikanxeriwa ni eheeni? (Nwehe efootu.)

⁶ Ntoko nonnaahu, Biblya onnalikanxera wunnuwa woomunepani ni wunnuwa wa weerutthuni. Mwaana ontthuneya okosoopiwa ni ovahiwa miruku ni mutthu mutokweene, mwaha wooweera, owo khokhanleno sokumanano sa mweekumini. Mwa ntakihero, mmuupuwele maaye onvarela ntata na mwanawe weera atuphe musewe, ni moovira etempu, mwaana owo anninnuwa ni ameyawe ennamuhiya mwaana owo atuphaka musewe meekhaawe. Mene nnaamweera vareene hiiho, awo eneereke omuupuxera mwaana owo weera iikosoopeke  emaara antuphaawe musewe weera ahikhumuliwe ni ikaaro. Mwaana owo innuwa vale, anoosuwela etthu ontthuneyaawe opaka emaara ontuphaawe musewe. Moolikana ni mwaana ole ontthuneyaawe nikhavihero na mutthu mutokweene weera asepe erisa, mukristu oohilipa moomunepani ontthuneya nikhavihero na akristu oolipa moomunepani weera asepe etthu eri poothe yaakela onanariha onthamwene awe ni Yehova ni opaka soothanla sooreera. Mene mukristu oolipa moomunepani onnawera opaka soothanla sooreera sinvarihana ni miruku sa mBiblyani ni moota Yehova onuupuwelaawe, apaka eyo onoowera ovarela muteko ele oxuttenraawe.

7. Neereke mukristu oolipa moomunepani onnahaawela nikhavihero na akina?

⁷ Neereke eyo entthuna ohima weera mukristu oolipa moomunepani khonhaawela nikhavihero? Hooye. Asinna oolipa moomunepani ikwaha ikina ennahaawela nikhavihero. Mene munna oohilipa moomunepani owo ontthuna weera mutthu mukina amuleeleke etthu yoopaka naari etthu yoothanla. Mene mukristu oolipa moomunepani, onnaavekela nikhavihero ale arino sookumanano, ni erino miruku, ni onnasuwela weera Yehova ontthuna weera owo ‘ateexeke muritti awe.’ — Agal. 6:5.

8. Neereke akristu eeli oolipa moomunepani enoolikana?

⁸ Ootheene hiyo toovirikana mwa mukhalelo wa weerutthuni, moolikana niiyo, akristu oolipa moomunepani aakhalano mikhalelo soovirikana, mwa ntakihero, akina ti amiruku, akina oolipa murima, nave asinna akina toovaha, ni akina toowiihela nipuro na atthu akina. Mwaha wa yeeyo, akristu eeli enviriha etthu emoharu, pooti opaka soothanla soovirikana mene sinvarihana ni Biblya, eyo enneereya otepaxa wene yaahelaka mpuwa yoowuupuxera ya murima. Tivawonto awo ehinrowaaya onyakulihana mukina ni mukhwaawe mwaha wooweera aapaka soothanla soovirikana. Ohiya opaka eyo, awo enrowa waasaasera okhaliha murettele. — Arom. 14:10; 1 Akor. 1:10.

EHEENI NINTTHUNEYAAHU OPAKA WEERA NIKHALE MUKRISTU OOLIPA MOOMUNEPANI?

9. Neereke wunnuwa moomunepani oneereya meekhaayaru? Muthalihe.

⁹ Mwaana ori ootheene moovira etempu, onninnuwa, mene wunnuwa woomunepani khoneereya meekhaaya. Mwa ntakihero, akristu a wAkorinto yaaxuttera ekhaikhai, yaabatiziwa, yaahaakhela munepa wootteela nave yaaxuttera itthu sintxipale ni murummwa Paulo. (Mit. 18:8-11) Mene antxipale a yaawo nnaamweera saavinre iyaakha sintxipale ebatizinweene, khiyaakhanle oolipa moomunepani. (1 Akor. 3:2) Eheeni nintthuneyaahu opaka weera etthu yeereñye ni akristu ala eheereye ni hiyo?

10. Eheeni nintthuneyaahu opaka weera nikhale akristu oolipa moomunepani? (Yuda 20)

¹⁰ Onoorowa okhala wooxupa okhala mukristu oolipa moomunepani wakhala weera khanaanoono ntthuno noopaka eyo. “Masikini” yaawo ehintthuna orowa vahoolo, khenrowa okhala oolipa. (Mir. 1:22) Hiyo khanintthuna okhala ntoko atthu ale nnaamweera yunnunweene enaaweherera makholo aya weera yaaleele etthu yoopaka. Opwaha mwa yeeyo, hiyo nookhalano muritti woowunnuwa moomunepani ni ikwaha sootheene olipiha onthamwene ahu ni Yehova. (Mmusome Yuda 20.) Wakhala weera nyuwo munniilipihera weera mukhale mukristu oolipa moomunepani, munvekeleke Yehova weera oovaheeni ntthuno “ni tho opanka, ntoko ontthunaiye.” — Afil. 2:13.

11. Moota heeni Yehova onnikhaviheraawe weera nikhale oolipa moomunepani? (Aefeso 4:11-13)

¹¹ Yehova khonweherera weera nikhale akristu oolipa nihikhaviheriwaka. Ale envara ntoko akukhuli ni ooxuttiha mmulokoni eri oolikaneene weera emukhavihere munna ori poothe okhala ‘oolipa’ moomunepani, ni “mphimelo wa osinku wa Kristu.” (Mmusome Aefeso 4:11-13.)  Yehova oonivaha tho munepa awe wootteela weera onikhavihere okhalano ‘muupuwelo wa Kristu.’ (1 Akor. 2:14-16) Opwaha mwa yeeyo, Yehova oonivaha tho ivanjelyu 4 seiyo sinnikhavihera woona moota Yesu uupuwelaawe, uulumaawe ni moota aapakaawe itthu emaara aalaleeraawe. Natthara ntakihero na Yesu na moota uulumaawe ni moota aapakaawe itthu, nnoowera okhala akristu oolipa.

OTTHUNEYA WAYA YOOTXA YOOLIPA YA OMUNEPANI

12. “Nihusiho nopatxera na Kristu” ti heeni?

¹² Weera nikhale akristu oolipa moomunepani, nintthuneya osuwela “nihusiho nopatxera na Kristu,” naari neere, itthu soopatxera nixuttenraahu woohima sa Yesu. Sooxuttiha sikina soopatxera ti ottharuwa, nroromelo, obatizo, ni ovinyerera wa alipa ookhwa. (Aheb. 6:1, 2) Iyo sooxuttiha soopatxera mukristu ori ootheene ontthuneyaawe osuwela ni ororomela. Tivawonto murummwa Pedru uulummaawe itthu iyo vaavo aalaleeraawe atthu antxipale nihiku na Pentekoste. (Mit. 2:32-35, 38) Weera nikhale mutthareli a Kristu, nintthuneya waakhulela sooxuttiha iyo. Mwa ntakihero murummwa Paulo ohiiwanyeiha nnene weera mutthu akhale mutthareli a Kristu onnatthuneya ororomela yooweherera ya ovinyerera wa alipa ookhwa. (1 Akor. 15:12-14) Mene, weera nikhale mukristu oolipa moomunepani nintthuneya opaka itthu ikina ohiya paahi oxuttera sooxuttiha iyo soopatxera.

13. Eheeni nintthuneyaahu opaka weera nittottele mureerelo eyootxa yoolipa yoomunepani yeeyo enhimmwa va Aheberi 5:14? (Nwehe efootu.)

¹³ Sooxuttiha soopatxera soovirikana ni yootxa yoolipa yoomunepani, mwaha wooweera eyo enhela mpuwa ohiya paahi malamulo a Yehova, mene tho miruku sawe, seiyo sinnikhavihera osuwela moota owo onuupuwelaawe. Weera nittottele mureerelo yootxa yoomunepani, hiyo onnatthuneya osoma, ophimelela, ovarihela muteko mweekumini mwahu masu a Muluku. Vaavo nimpakaahu eyo, hiyo ninnaxuttera opaka soothanla simmuhakalaliha Yehova. c — Mmusome Aheberi 5:14.

14. Moota heeni murummwa Paulo aakhavihenraawe akristu a wAkorinto wunnuwa moomunepani ni okhala oolipa?

¹⁴ Akristu oohilipa moomunepani ikwaha ikina onnaaxupa ophimelela moota enrowaaya  ovarela muteko miruku sa mBiblyani emaara empakaaya soothanla. Akina enuupuwela weera, mwaha wooweera mBiblyani khanikhanle nlamulo woohima sa etthu entthuneyaaya opaka, awo pooti opaka etthu entthunaaya. Akina entthuna ophwanya nlamulo mBiblyani mene nto ohitthuneyaka eyo. Mwa ntakihero, onooneya ntoko akristu a wAkorinto yanvekela Paulo weera akumihere nlamulo woohima sa otxa yootxa yaavahiwa amiluku eethiru. Ohiya waaleela etthu yaatthuneyaaya opaka, Paulo aawoonihera otthuneya waya ovarela muteko yoowuupuxera ya murima, ni aahiiwanyeiha weera mutthu ori poothe ookhalano “eparakha ya othanla.” Paulo aahaakhavihera Akorinto avarelaka muteko miruku sa mBiblyani, mwa yeeyo mutthu ori poothe anwera opaka soothanla avarelaka muteko yoowuupuxeraawe ya murima ni ohaakwattulihaka atthu akina. (1 Akor. 8:4, 7-9) Mwaha woopaka eyo, Paulo aahaakhavihera Akorinto wunnuwa moomunepani. Wa mukhalelo ola, awo yanwera ovarela muteko muupuwelo aya ohiya waaroromela atthu akina ni waasa malamulo mBiblyani.

15. Moota heeni Paulo aakhavihenraawe akristu Aheberi okela vahoolo moomunepani?

¹⁵ Hiyo ninnaxuttera etthu yootepa otthuneya yeeyo murummwa Paulo aalepenlaawe akristu Aheberi. Akristu akina khiyaakhanle oolipa moomunepani awo ‘nlelo yaari alipa oowura [eleite], khaiyene eyootxa yoolipa.’ (Aheb. 5:12) Awo khiyaaxuttenre waakhulela itthu inyowani Yehova aaxuttihaawe. (Mir. 4:18) Mwa ntakihero, vaavo Kristu aakhwiiyaawe, nlamulo na Mose naahiya otthariwa, mene akristu akina aYuda yaavirelela otthara nlamulo nna. Neereke mpuwa mwa iyaakha 30 khawaakhanle woowereya aYuda oreherera moota yuupuwelaaya? (Arom. 10:4; Tito 1:10) Mutthu ori poothe aarowa osoma ekaarta yoowuupuxeriwa murummwa Paulo aalepenlaawe Aheberi, aamurowa waakhulela weera eliivuru eyo yaakhalamo eyootxa yoolipa yoomunepani. Ekaarta eyo yaahaakhavihera woona moota mukina woomukokhorela Yehova, yoowo waari wootepa oreera ni waarowa waavaha olipa murima weera evirelele olaleya nnaamweera yaatthara-tthariwa ni aYuda. — Aheb. 10:19-23.

NISEPEKE WIIROROMELA

16. Ohiya paahi okhala oolipa, etthu heeni nintthuneyaahu opaka?

¹⁶ Hiyo ninnatthuneya wiilipihera ohiya paahi weera nikhale oolipa mene ovirelela okhala oolipa.  Eyo entaphulela weera nintthuneya osepa wiiroromela mwaneene ahu. (1 Akor. 10:12) Nave hiyo onnatthuneya ‘wiikohaka mwaneene ahu’ weera noone wakhala weera ninnarowa vahoolo. — 2 Akor. 13:5.

17. Moota heeni ekaarta ya Paulo aalepenlaawe akristu a wAkolosi enooniheraaya otthuneya waya ovirelela okhala oolipa?

¹⁷ Ekaarta aalepenlaawe Akolosi, murummwa Paulo aahuuluma woohima sa otthuneya waya ovirelela okhala oolipa. Akolosi yaari akristu oolipa moomunepani, nnaamweera vareene hiiho, Paulo aawooperera otthuneya waya osepa wuupuwela ntoko atthu a mulaponi. (Akol. 2:6-10) Ni Epafra aahaasuwela nnene sene asinna a muloko ole, ni annaavekelela weera ‘ekhale oomalela’ naari neere, oolipa moomunepani. (Akol. 4:12) Ninxuttera eheeni? Paulo ni Epafra yannasuwela weera, weera mutthu okhale oolipa moomunepani ontthuneya wiilipihera vantxipale ni okhaviheriwa ni Muluku. Awo yaatthuna weera akristu a wAkolosi evirelele okhala oolipa moomunepani nnaamweera yaakumana ni maxupo.

18. Eheeni enrowa weereya ni mukristu oolipa? (Nwehe efootu.)

¹⁸ Murummwa Paulo aahaaleela akristu Aheberi weera mukristu oolipa pooti ohaakhuleliwa ni Yehova mahiku ootheene. Murima wa mukristu pooti okhala wooxupa mpaka ohitthuna ottharuwa ni ohileveleliwa ni Yehova. Moohakalaliha, akristu Aheberi khiyaaphiñye wa mukhalelo ene yoowo. (Aheb. 6:4-9) Ankha nto woohima sa akristu a mahikwaano enkhulumuwa ni enkumihiwa mmulokoni mene moovira etempu enattharuwa ni enatthikela mmulokoni? Awo toowiiyeviha ni ennattharuwa yooniheraka weera toovirikana ni ale murummwa Paulo aahimmaawe weera pooti ohaakhuleliwa ni Yehova. Ekhaikhai weera, asinna awo yamutthikela Yehova enoorowa ohaawelaka nikhavihero. (Ez. 34:15, 16) Asitokweene a mmulokoni enoorowa omuthanla munna mmoha orino sookumanano sintxipale weera aakhavihere otthikela okhala oolipa mwa mukhalelo woomunepani.

19. Teevi eri yoolakelaahu?

¹⁹ Wakhala weera nyuwo munniilipihera weera mukhaleno mukhalelo woolipa, nyuwo munoorowa okwanihera yootthunaanyu eyo! Nvirelele oxuttera ikhaikhai soowiixera sa mBiblyani ni wuupuwela ntoko Yehova onuupuwelaawe. Wakhala weera nyuwo ti mukristu oolipa moomunepani, mpakeke ele munweraanyu weera nvirelele okhala oolipa mahiku ootheene.