MWAHA ONTHOKORORIWA 31
ETXIPO 12 Yehova ti Muluku Muulupale
Etthu Yehova opankaawe weera aavuluxe atthu mwa yoottheka
“Khweli Muluku òtthuna vantxipale elapo ya vathi ophiyera onvaha Mwan’awe mmosaru.” — YOH. 3:16.
ELE NINKELA AHU OXUTTERA
Ninrowa woona moota Yehova opatxerinhaawe onikhavihera owanano yoottheka ni moota owo eerinhaawe weera hiyo nikhaleno ekumi yoohimala.
1-2. (a) Yoottheka ti heeni, ni moota heeni ninrowaahu owina ekhotto ahu ni yoottheka eyo? (Nwehe “Masu oowiiwanyeihiwa.”) (b) Eheeni ninrowaahu woona mwa yoosoma ene yeela, ni soosoma ikina simphwanyeya va yoosoma ene yeela ya Nwehereri? (Nwehe “Inoota wa ale ensoma” mwa erevista ene yeela.)
NEEREKE nyuwo munnatthuna osuwela moota Yehova Muluku onoosivelaaweni? Va, nyuwo munoosuwela waakhula wooreera woohima sa eyo: Moone etthu owo opankaawe weera oovuluxeni mwa yoottheka ni okhwa. Yoottheka a mwiittani oowoopiha yoowo nyuwo muhinweraanyu onwina meekhaanyu. Ootheene hiyo nenne nri nihiku ninnattheka nave ninnakhwa mwaha wa yoottheka. (Arom. 5:12) Mene sookhala mittenka sooreera, nikhaviheriwaka ni Yehova, hiyo nnoowera owina yoottheka, naari neere, ninnaroromela weera nnoowera owina moomalela!
2 Yehova Muluku, ohaakhavihera atthu owanano yoottheka mpuwa mwa iyaakha 6.000. Mwaha wa heeni? Mwaha wooweera owo onnansivela. Owo onnaasivela atthu ovinyera woopatxerani nave onnaakhavihera owanano yoottheka. Muluku oosuwela weera yoottheka enneeriha okhwa, nto owo khontthuna weera hiyo nikhweeke. Owo ontthuna weera nikhaleke mahikku ootheene. (Arom. 6:23) Ti yeeyo owo ontthunaawe wa nyuwo. Mwa yoosoma ene yeela, nnoorowa woona makoho mararu: (1) Moota heeni Yehova aavanhaawe yooweherera atthu oottheka? (2) Moota heeni atthu oottheka a etempu ya khalayi yaakhulelinwaaya ni Yehova? (3) Moota heeni Yesu owiiyaawe waavuluxa atthu oottheka?
MOOTA HEENI YEHOVA AAVANHAAWE YOOWEHERERA ATTHU OOTTHEKA?
3. Moota heeni asitiithi ahu oopatxera ekhanlaaya anamattheka?
3 Vaavo Yehova ampankaawe mulopwana ni muthiyana oopatxera, aatthuna weera ehakalaleke. Aahaavaha nipuro nooreera, yoovaha ya ntheli, ni muteko woohakalaliha. Awo yaamurowa waayara anamwane yaawo yaakela osareya elapo yootheene ni yaakela weeriha elapo ela okhala eparayiisu ntoko ejardim ya wEdeni. Owo aahaavaha nlamulo nimoha paahi nookhweya. Ni aahaaleela weera, wakhala weera khiyaarowa wiiwelela nlamulo nno emurukunuwelaka yoottheka aya eyo yanweeriha okhwa. Noosuwela etthu yeereñye. Munepa woohooneya yoowo wahaamusivela Muluku ni wahaasivela, waahiweeriha opaka yoottheka ele. Adamu ni Heva yaapaka etthu Satana aatthunaawe. Ehiyaka omuroromela Tiithi aya a nsivelo, yaattheka. Ntoko nisuwenlaahu, wohooneya weera masu a Yehova teekhaikhai. Ovinyera nihiku nne, awo yaapatxera oviriha maxupo ntoko: wuuluvala ni okhwipi waya yaakhwa. — Eph. 1:28, 29; 2:8, 9, 16-18; 3:1-6, 17-19, 24; 5:5.
4. Mwaha wa heeni Yehova oniittaawe yoottheka ni onnikhaviheraawe owanano yoottheka eyo? (Aroma 8:20, 21)
4 Yehova ooruma olempwa yooweereya ela yooriipiha murima weera enikhavihereke. Eyo ennanikhavihera wiiwexexa mwaha wa heeni Muluku oniittaawe yoottheka. Yoottheka ennanrakameliha ni Tiithi ahu, nave ennaneeriha okhwa. (Yes. 59:2) Tivawonto Satana, munepa yoowo omurukunuwenle Muluku nave okumihenre maxupo mootheene ala, onsiveliwaawe ni yoottheka ni anaasaaseraawe okumihera. Owo pooti weeraka uupuwela weera oowina ojardim wEdeni. Mene khaasuwenle moota Yehova oraawe a nsivelo. Muluku khatxentxale yootthuna awe wa osuulu wa Adamu ni Heva. Owo onnaasivela atthu, nto mwaha wa yeeyo owo moowaakuveya ohaavaha yooweherera. (Mmusome Aroma 8:20, 21.) Yehova aahisuwela weera osuulu mukina waamurowa othanla omusivela nave waamurowaka waasa nikhavihero nawe weera owaneno yoottheka. Nave ntoko Tiithi aya ni Mpattuxa, aamurowa opakavo etthu weera aataphule wa yoottheka ni omwaattamela owo. Etthu heeni Yehova aarowaawe opaka weera ewereye eyo?
5. Ekwaha heeni yoopatxera Yehova aavanhaawe yooweherera yoolipa atthu oottheka? Muthalihe. (Ephattuwelo 3:15)
5 Musome Ephattuwelo 3:15. Yehova aahaavaha atthu yooweherera yoopatxera vaavo aamuulumenlaawe Satana. Muluku aahima weera ‘osuulu’ waarowa waavuluxa atthu. Osuulu owo wammunyaanya Satana, omala-malihaka maxupo ootheene akumihenraawe wEdeni. (1 Yoh. 3:8) Menento weera yeereye eyo, osuulu owo wanviriha maxupo. Satana aamurowa ohasula osuulu owo mpaka wiiva. Eyo yaamunvoreya vantxipale Yehova. Menento ovoreya iwo waamweeriha itthu okhumela nnene okwipi waya, mwaha wooweera atthu antxipale yanvuluxiwa mwa yoottheka ni okhwa!
MOOTA HEENI ATTHU OOTTHEKA A KHALAYI YAAKHULELINWAAYA NI YEHOVA?
6. Itthu heeni alopwana oororomela ntoko Habeli ni Nowa, yaapankaaya weera emwaattamele Yehova?
6 Iseekulu sintxipale saattharelana, Yehova vakhaani-vakhaani ohoonihera nnene sene moota atthu oottheka ene yaarowaaya omwaattamela owo. Habeli mwaana a naaveeli a Adamu ni Heva, mutthu oopatxera oonihenre nroromelo nawe ekhumelelakaru maxupo wEdeni. Mwaha wooweera Habeli annamusivela Yehova ni annaasaasa omuhakalaliha ni omwaattamela, owo aahinvaha mukuttho. Habeli aari mukukhuli, nto aahiiva inama ikina ixaana weera anvahe Yehova. Yehova oonenle hayi? Owo “àmpwattha Habeli ni sovaha sawe.” (Eph. 4:4) Yehova aahoonihera waakhulela wawe mikuttho aavahiwaawe ni atthu yaamusivela ni yaamuroromela ntoko Nowa. (Eph. 8:20, 21) Vaavo aakhulelaawe mikuttho ntoko iyo, Yehova ohoonihera weera atthu oottheka ene yanwera waakhuleliwa ni omwaattamela owo. b
7. Ninxuttera eheeni vaavo Abrahamu aaraawe oolikaneene onvaha mwanawe ntoko mukuttho?
7 Yehova aahinvekela Abrahamu, mulopwana yoowo a nroromelo weera apake etthu yooxupa vantxipale, onvaha mwanawe Isakhi ntoko mukuttho. Moohihovela Abrahamu aaxupeya ni etthu ele aavekelinwaawe opaka. Menento owo aahiireherera weera apake eyo. Mene vaavo Abrahamu aahalelaawe omwiiva mwanawe, Muluku aamukhoottihera. Nnaamweera vareene hiiho, ntakihero nna ninnaaxuttiha etthu yootthuneya atthu ootheene arino nroromelo. Yehova aamurowa okhala oolikaneene onvaha mwanawe ammusivelaawe ntoko mukuttho. Yehova annaasivela vantxipale atthu. — Eph. 22:1-18.
8. Mikuttho sintxipale saalempwale munlamuloni saathoonyera eheeni? (Onamakeya 4:27-29; 17:11)
8 Sivirakaru iyaakha sintxipale, nlamulo ana a Israeli yaavahinwaaya nannawooperera opaka mikuttho sintxipale weera sileveleliwe soottheka sa atthu a Muluku. (Mmusome Onamakeya 4:27-29; 17:11.) Mikuttho iyo, soonihera mukuttho mutokweene yoowo waarowa waavuluxa atthu moomalela wa yoottheka. Maprofeta a Muluku yaahuupuxeriwa wiiwanyeiha weera osuulu waalaiheriwe, Mwaana oothanleya a Muluku, aamurowa ohaawa ni okhwa. Owo aamurowa wiiviwa ntoko eputtiputthi weera opakiwe mukuttho. (Yes. 53:1-12) Nkuupuwelani ha: Yehova aamurowa onvaha Mwanawe oosiveleya ntoko mukuttho weera aavuluxe atthu ootheene wa yoottheka ni okhwa woohelani mpuwa nyuwo!
MOOTA HEENI YESU AAWIIYAAWE WAAVULUXA ATHU?
9. Itthu heeni Yohani mpatisa aahimmaawe woohima sa Yesu? (Aheberi 9:22; 10:1-4, 12)
9 Eseekulu yoopatxera Kristu awiiyeene, murumeyi a Muluku Yohani mpatisa, aamuhima Yesu Munazarethi eeraka: “Omòne vá Mwaputtiputthi a Muluku, onvinxa yottheka ya elapo.” (Yoh. 1:29) Masu ala oowuupuxeriwa, ennoonihera weera Yesu osuulu yoole waalaiheriwe. Owo anvaha mukuttho yoowo waalaiheriwe. Vano atthu oottheka ene yaamurowa okhalano yooweherera yoolipa opwaha khalayi, owina yoottheka moomalela. — Mmusome Aheberi 9:22; 10:1-4, 12.
10. Moota heeni Yesu oonihenraawe weera ‘aawiiye owiitthana’ anamattheka?
10 Yesu annaawehexexa vantxipale atthu ale yaaxupeya mwaha wa okhala anamattheka nave aahaawopa weera ekhale atthareli awe. Owo aasuwela weera yoottheka yaari etthu yaaxupa atthu. Nto annawaakhela alopwana ni athiyana yaawo yaasuweliwe okhala anamattheka. Avarihelaka ntakihero, Yesu aahiiwanyeiha eeraka: ‘Khaiyene akumi anamuhaawela meediku, mene ale envoreiwa’ nave aahaatxeerera eeraka: “Khweli nkirwenle owìtthana anaxariya, hoye, mene anamattheka.” (Math. 9:12, 13) Yesu aavarela muteko masu ala. Owo mwa ikharari aalevelela soottheka sa muthiyana yoowo aarapinhe inaani sawe ni maithori awe. (Luka 7:37-50) Owo aamuxuttiha ikhaikhai soovareleya muteko muthiyana musamariya va poosu, nnaamweera aasuwenle weera aari namararuwa. (Yoh. 4:7, 17-19, 25, 26) Nave Muluku onvaha Yesu owera woomaliha maxupo ootheene enkhumelela mwaha wa yoottheka, ori okhwa. Moota heeni? Yehova onvaha Yesu owera woowaavinyereriha atthu, alopwana, athiyana, anamwane ni oowuuluvala. — Math. 11:5.
11. Mwaha wa heeni anamattheka waasivelaaya omwaattamela Yesu?
11 Ninnawera wiiwexexa mwaha wa heeni atthu yaari anamattheka waasivelaaya omwaattamela Yesu. Owo annaapixera murima ni anniihela nipuro naya. Awo yanniisoona okhala ootaphuwa omwaattamela. (Luka 15:1, 2) Ni Yesu aahaattottopela ni waareeliha atthu ala mwaha woowoonihera nroromelo naya wa owo. (Luka 19:1-10) Owo ohoonihera moomalela, mukhalelo wa omoriwa ikharari wa Tiithi awe. (Yoh. 14:9) Moorweela mwa masu awe ni miteko sawe, owo ohoonihera weera, Tiithi awe oopixa murima ni oomoriwa ikharari, onnaasivela atthu ni ontthuna waakhavihera ootheene owina yoottheka. Yesu ohaakhavihera atthu oottheka okhala ni ntthuno wootxentxa mweettelo aya ni omutthara. — Luka 5:27, 28.
12. Etthu heeni Yesu oxuttinhaawe woohima sa okhwa wawe?
12 Yesu aasuwela itthu aarowaawe oviriha muhoolo. Ikwaha ikina-tho, owo aahaaleela atthareli awe weera aamurowa oveleeliwa ni okhomeliwa vamwirini. (Math. 17:22; 20:18, 19) Owo aasuwela weera mukuttho awe waamurowa okumiha yoottheka mulaponi, ntoko hiihaale Yohani aahimmaawe nave-tho maprofeta yaahimmaaya. Nave-tho Yesu annaxuttiha weera aveleela ekumi awe vale, ‘aamwaapurulela atthu ootheene wa yoowo.’ (Yoh. 12:32) Atthu oottheka yanwera omuhakalaliha Yehova emwaakhulelaka Yesu ntoko Pwiyaya ni ettharaka iphiro sawe. Wakhala weera yampaka eyo, awo yaamurowa ‘woopoliwa wa yoottheka.’ (Arom. 6:14, 18, 22; Yoh. 8:32) Nto Yesu aahiiveleela moolipa murima weera avirihe okhwa wootepa ovoreya. — Yoh. 10:17, 18.
13. Yesu aakhwiiye moota heeni, ni etthu heeni okhwa wawe onnixuttihaaya woohima sa Yehova Muluku? (Nwehe efootu.)
13 Yesu aaveleeliwa, otthukiwa, oveehiwa, wootheriwa, othorihiwa ni mpaka ohasuliwa. Anakhotto yaamukuxera nipuro aarowaawe wiiviwa ni yaamukhomela vamwirini wa nihaaxero. Vaavo owo aavirihaawe ovoreya iwe moororomeleya, aakhala mutthu mukina aatepa woona ovoreya. Owo aari Yehova Muluku. Owo khaavarihenle muteko ikuru sawe soohimala, weera anvuluxe. Mwaha wa heeni? Etthu heeni yaarowa omweeriha Tiithi a nsivelo opaka itthu mwa mukhalelo ola? Mwaha wa etthu emoha, nsivelo. Yesu ohimme ha: “Khweli Muluku òtthuna vantxipale elapo ya vathi ophiyera onvaha Mwan’awe mmosaru, wera yeyo eri yothene enamìwelela, ehiriheye, nto ekhaleno ekumi yohimala.” — Yoh. 3:16.
Vaavo aakhulenlaawe weera mwanawe iiviwe, Yehova aahoona ovoreya vantxipale nihinweeraahu wuupuwelela weera anivuluxe wa yoottheka ni okhwa (Nwehe eparagrafu 13)
14. Mukuttho wa Yesu onooxuttihani eheeni?
14 Mukuttho wa Yesu onnoonihera moota Yehova onsivelaawe osuulu wa Adamu ni Heva. Eyo ennoonihera moota Yehova onoosivelaaweni nyuwo. Owo ohiilipihera vantxipale avilelaka ovoreya otokweene weera awoopoleni nyuwo mwa yoottheka ni okhwa. (1 Yoh. 4:9, 10) Aani, owo ontthuna omukhavihera mutthu ori poothe a hiyo owanano yoottheka ni owina!
15. Etthu heeni nintthuneyaahu opaka weera nttottele mureerelo yoovaha ya Muluku ya mukuttho wa yoowoopola wa Yesu?
15 Yoovaha ya Muluku, mukuttho woowoopola wa Mwanawe mmoha ene, onneeriha owereya oleveleliwa soottheka sahu. Mene weera naakhele nlevelelo na Muluku nintthuneya opakavo etthu. Etthu heeni? Yohani mpatisa ni Yesu mwaneene ennaakhula yeeraka: ‘Ttharuwani, khweeli omwene wa wiirimu wookhuveela.’ (Math. 3:1, 2; 4:17) Hiyo onnatthuneya ottharuwa wakhala weera ninnatthuna owanano yoottheka ni omwaattamela Tiithi ahu a nsivelo. Mene etthu heeni enhela mpuwa ottharuwa ni moota heeni eyo enrowaaya onikhavihera owanano mukhalelo ahu woottheka? Yoosoma enttharelana enoorowa waakhula.
ETXIPO 18 Ninnixukhurela Yowoopola
a MASU OOWIIWANYEIHIWA: Mbiblyani, masu ooweera “yoottheka” pooti ohimmwa itthu soonanara nimpakaahu, naari okhala naari opaka itthu weiwo ohinvarihana ni malamulo a Yehova. Mene masu ooweera “yoottheka” pooti-tho otaphulela ohimalela wahu naari yoottheka yeeyo nivalihinwaahu ni Adamu. Yoottheka nivalihinwaahu ni Adamu, ti yeeyo enneeriha ootheene ahu okhwa.
b Etthu yaamweeriha Yehova waakhulela mikuttho atthu a khalayi oororomeleya yaavahaaya, waari mukuttho wa Yesu Kristu yoowo waakela waavuluxa atthu moomalela mwa yoottheka ni okhwa. — Arom. 3:25.
