1. Eheeni mulopwana ontthuneyaawe opaka weera akhale mukristu oolipa moomunepani?

 MWENE Davidi aahinvaha miruku iya mwanawe Salomoni: ‘Wiilipihe ni okhale mulopwana.’ (1 Mam. 2:1-3) Miruku iya tisootthuneya wa aKristu ootheene entthuna okhala oolipa moomunepani. Weera eyo yeereye, entthuneya oxuttera malamulo a Muluku ni ovarela muteko mwa itthu sootheene awo empakaaya. (Luka 2:52) Mwaha wa heeni miruku iya siraaya sootepa otthuneya wa amiravo entthuna okhala aKristu oolipa moomunepani?

2-3. Mwaha wa heeni oraaya wootthuneya weera mmiravo akhale oolipa moomunepani?

² Mulopwana ori mukristu, ookhalano miritti sootepa otthuneya veemusini naari mmulokoni. Nyuwo mwaareene mmiravo apaale mootoko wuupuwela miritti munroowaanyu okhalano muhoolo. Apaale nyuwo mookhalano yooluluwanya yoovolowa muteko wa etempu yootheene, okhala murumeyi ookhavihera ni muhoolo mwaya okhala mutokweene a mmulokoni. Nave-tho pooti weeraka nyuwo munnatthuna othela ni muhoolo okhalano anamwane. (Aef. 6:4; 1 Tim. 3:1) Weera nwere okwanihera miritti iya, nyuwo onnatthuneya okhala mukristu oolipa moomunepani. b

³ Eheeni enrowa wookhaviherani okhala mukristu oolipa moomunepani? Sookhala itthu sintxipale sootepa otthuneya muntthuneyaanyu oxuttera. Vanonto eheeni munrowaanyu opaka weera muhoolo nwere okwanihera miritti sootheene munrowaanyu okhalano?

4. Munrowa ophwanya woowi matakihero ooreera munrowaanyu ottharaka? (Nwehe efootu.)

⁴ Mutthareke matakihero ooreera. MBiblyani aakhalamo matakihero ooreera amiravo ekhanlaaya ootthara. Matakihero awo taamiravo  yaamusivela Yehova ni yaawenre okwanihera soothanleliwa saya weera ekosoope muloko wa Yehova. Nave nyuwo pooti ophwanya matakihero awo veemusini vanyu naari mmulokoni. (Aheb. 13:7) Nave-tho nookhala ntakihero na Yesu yoowo aari oomalela. (1 Ped. 2:21) Vaavo munsomaanyu moomaaleleya matakihero ala, mphimeleleke mikhalelo sooreera asilopwana ala yoonihenraaya. (Aheb. 12:1, 2) Avinyaka moone moota mukhanlaanyu ootthara matakihero ala.

5. Moota heeni nyuwo munrowaanyu okhala mutthu a Miruku, ni mwaha wa heeni eyo eraaya yootthuneya? (Nsalmu 119:9)

⁵ ‘Musunke miruku.’ (Mir. 3:21) Mutthu orinono miruku onnuupuwelela nnene ahinaaye opaka etthu. Onnatthuneya wiilipihera weera munnuwihere mukhalelo owo. Mwaha wa heeni? Mwaha wooweera, elapo ela ahaatta atthu empaka itthu ettharaka nyuupuwelo saya. (Mir. 7:7; 29:11) Opwaha mwa yeeyo, Iviidiyu, Ifilme, internet ni redes sociais, pooti woovoleelani, nave pooti ovooleela moota munuupuwelaanyu ni mumpakaanyuno itthu. Vanonto munrowa okhala hayi mutthu amiruku? Munookhala mutthu a miruku muxutteraka miruku sa mBiblyani ni woona moota sinrowaaya wookhaviherani. Vaavo munvarihelaanyu miruku sa mBiblyani mwaapakaka soothanla munoorowa omuhakalaliha Yehova. (Musome Nsalmu 119:9.) Vaavo nyuwo munvarihelaanyu miruku sa mBiblyani weera mpake soothanla sanyu, munoorowa okhala mukristu oolipa moomunepani. (Mir. 2:11, 12; Aheb. 5:14) Nrowe noone moota miruku sinrowaaya wookhaviherani mwa itthu piili: (1) moota munwoonelaanyu asirokora ni ya (2) vaavo mumpakaanyu soothanla wa moota woowara ni wiireherera.

6. Moota heeni Miruku sinkelaaya omukhavihera mmiravo woonihera nttittimiho wa asirokora?

⁶ Miruku sinoorowa wookhaviherani waattittimiha asithiyana. Khaiyene tivoonanara munna ompwattha murokora naari otthuna omusuwela nnene. Mene mmiravo onuupuwela nnene ahinaaye opaka yoothanla, khanrowa omweeriha murokora wuupuwelaka weera annamutthuna, mene ahitthunaka omuthela. (1 Tim. 5:1, 2) Ni wakhala weera munna owo oottomera, onnatthuneya okosoopa nnene mikhalelo sa murokora owo omuttomenraawe, ehikhalaka atthu eeli paahi ahikhanlevo mutthu mukina. — 1 Akor. 6:18.

7. Moota heeni Miruku sinkelaaya omukhavihera mmiravo opaka soothanla sooreera woohima sa ikuwo ontthuneyaawe owara ni mikhalelo sawe?

 ⁷ Moota mukina mmiravo onooniheraawe weera onnuupuwela ahinaaye opaka yoothanla, ori woohima sa mawarelo awe ni moota oniirehereraawe. Mawarelo enkumiheriwa mulaponi enkumiheriwa ni atthu ehimmuttittimiha Yehova ni erino ekumi yoowuuliha muru. Mikhalelo soowuuliha muru sa atthu awo, sinnooneya ni ikuwo enwaraaya soowaatira ni sihinsuwanyeya saari sa muthiyana naari sa mulopwana. Vaavo mmiravo oniilipihera weera akhale mukristu oolipa moomunepani onthanlaawe etthu yoowara, annapaka eyo attharaka miruku sa mBiblyani ni matakihero a mmulokoni. Navetho owo pooti wiikoha ha: ‘Keereke soothanla saka sinnoonihera weera kookhalano mikhalelo sooreera naari kinnaattittimiha atthu akina? Keereke mawarelo aka naari makhalelo aka ennawoonihera atthu weera ka murumeyi a Yehova?’ (1 Akor. 10:31-33; Tito 2:6) Mmiravo onuupuwelela itthu sootheene iya, onoorowa ottittimihiwa ohiya paahi mmulokoni mwawe, menento Tiithi awe a wiirimu Yehova.

8. Eheeni mmiravo ontthuneyaawe opaka weera akhale oororomeleya?

⁸ Mukhaleke mutthu oororomeleya. Mmiravo oororomeleya onnakosoopa nnene soothanleliwa sawe. (Luka 16:10) Muupuwele ntakihero noomalela na Yesu. Yesu annakwanihera nnene sene soothanleliwa sawe. Nave owo annakwanihera itthu sootheene Yehova aamuthanlelaawe, nnaamweera ikwaha ikina waakhala wooxupa. Owo annaasivela atthu otepaxa wene oohusera awe nave-tho owo aari oolikaneene oveleela ekumi awe wa yaawo. (Yoh. 13:1) Nyuwo pooti omutakiha Yesu nvaraka vantxipale weera mukwanihere yoothanleliwa anyu. Wakhala weera nyuwo khamunsuwela nnene etthu yoopaka, mukhaleke oowiiyeviha nave munvekele nikhavihero munna osuwenle. Musiveliweke ni etthu mumpakaanyu. (Arom. 12:11) Opwaha mwa yeeyo, mukwanihereke yoothanleliwa anyu, ohiya ntoko ‘munaavarela atthu, mene munvarelaka Yehova.’ (Akol. 3:23) Ekhaikhai weera nyuwo mutthu oohimalela, mwaha wa yeeyo mukhaleke oowiiyeviha ni mwaakhuleleke ifaaliya sanyu. — Mir. 11:2.

9. Mwaha wa heeni mmiravo ontthuneyaawe oxuttera miteko sinrowa omukhavihera mweekumini mwawe?

⁹ Weera mukhale mukristu oolipa moomunepani, nyuwo muntthuneya oxuttera ovara miteko. Tiseiyo sinrowa wookhaviherani okwanihera miritti sanyu mmulokoni, ni owera ophwanya muteko yoowo oneera wookhavihereni okosoopa soothowa sa veemusini vanyu, opwaha mwa yeeyo, onimookhaviherani okhala oowiiraana ni atthu akina. Nrowe noone matakihero vakhaaniini.

10-11. Eheeni mmiravo onkelaawe opakela muloko wakhala weera oosuwela olepa ni osoma nnene? (Nsalmu 1:1-3) (Nwehe efootu.)

¹⁰ Muxuttere osoma ni olepa nnene sene. Biblya oneera, osoma masu a Muluku mahiku ootheene ni ophimelela ele nisommaahu, onoorowa omukhavihera  mutthu okhala oohakalala ni okhumela nnene mwa itthu sootheene. (Musome Nsalmu 1:1-3.) Omusoma Biblya mahiku ootheene, onoorowa wookhaviherani osuwela moota Yehova onuupuwelaawe, nave-tho onoorowa wookhaviherani wuupuwelela nnene ni ovarihela muteko miruku mumphwanyaanyu mBiblyani. (Mir. 1:3, 4) Mutthu ompaka etthu eyo, tootepa otthuneya mmulokoni. Mwaha wa heeni?

¹¹ Mmulokoni entthuneya asinna ooxuttiha nnene weera evaheke miruku sinkhuma mBiblyani. (Tito 1:9) Wakhala weera nyuwo munooxuttera osoma ni olepa nnene sene, nyuwo muneereke opaka nyaha soolipiha ni ikomentaariyu sooreera sinrowa olipiha nroromelo na asinna. Navetho nyuwo muneereke olepa itthu sootthuneya vaavo munsomaanyu, mmuthukumanoni, okongreesuni ni wa asembleya. Itthu munlepaanyu sinoorowa wookhaviherani nyuwo ni sinoolipiha nroromelo na asinna.

12. Eheeni enrowa wookhaviherani osuwela ovaanela nnene ni atthu akina?

¹² Musuweleke ovaanela nnene ni atthu akina. Owo mukhalelo mukristu ontthuneyaawe okhalano. Mutthu onvaanela nnene ni atthu akina onnawiiwelela moopixa murima nave onnawera osuwela nyuupuwelo ni nyoonelo sa atthu awo. (Mir. 20:5) Nave-tho owo onnawera osuwela mikhalelo sa atthu akina yaawuulumaka vale. Nyuwo khamunrowa osuwela itthu sootheene iyo wakhala weera khamuntthekula ni atthu awo. Wakhala weera nyuwo munanvarihela muteko telefooni naari imensagem weera muulume ni atthu awo, eyo enooweerihani ohaasuwela nnene atthu awo. Nto mwiihiyereke etempu weera mutthekule ni atthu awo. — 2 Yoh. 12.

13. Eheeni mmiravo ontthuneyaawe oxuttera? (1 Timotheyo 5:8) (Nwehe efootu.)

¹³ Muxuttere moota woowiikhavihera. Mukristu oolipa moomunepani ontthuneya oxuttera moota woowiikhavihera ni okhavihera emusi awe. (Mmusome 1 Timotheyo 5:8.) Mapuro makina, amiravo ennaxuttera ovara muteko ni asipapaya naari ni amusi aya akina. Mapuro makina awo enxuttera ovara muteko emaara ensomaaya. Nihipwatthaka moota enxutteraayaa, tiwootthuneya oxuttera itthu sikhanle soowookhaviherani ophwanya muteko. (Mit. 18:2, 3; 20:34; Aef. 4:28) Mwiilipihereke weera musuweliwe ntoko mutthu a miteko ni ommalihera etthu opatxenraawe. Mweera haawo oneereke wookhweelani ophwanya muteko. Mikhalelo ni itthu nixuttenraahu iparagrafu sa muttuli, tisootthuneya tho wa mukristu weera akwanihere miritti sawe sa muhoolo. Nrowe noone miritti iyo.

14. Moota heeni mmiravo onrowaawe wiireherera weera avolowe muteko wa etempu yootheene?

¹⁴ Murumeyi a etempu yootheene. Asinna  antxipale oolipa moomunepani epatxenre ovara mwa etempu yootheene ereene amiravo. Okhala pioneiru onnaakhavihera amiravo waakhovelela atthu ootheene. Nave onnaakhavihera ovarihela musurukhu nnene ehinanarihaka vantxipale. (Afil. 4:11-13) Weera nyuwo nvare mwa etempu yootheene, onnatthuneya okhala pioneiro ookhavihera. Asinna akina aaviriha etempu yintxipale evaraka ntoko pioneiro ookhavihera, ni eyo yohaakhavihera okhala oolikaneene weera ekhale pioneiro a nthiti. Okhala pioneiro onoorowa woovahani eparakha yoovara mwa etempu yootheene. Mwa ntakihero, okhavihera muteko wooteka naari orowa oBetheli.

15-16. Eheeni enrowa omukhavihera mmiravo okhala murumeyi ookhavihera naari mutokweene a mmulokoni?

¹⁵ Murumeyi ookhavihera naari mutokweene a mmulokoni. Mulopwana ori ootheene a mmulokoni onnatthuneya okhalano yooluluwanya weera aakhavihereke asinna naari asirokora akhalaka mutokweene a mmulokoni. Biblya onhima weera asilopwana eniivaherera weera ekhaleno muritti ola ‘enniilipihera weera evare muteko wootepa oreera.’ (1 Tim. 3:1) Mutthu ohaakunveene okhala mutokweene a mmulokoni, ontthuneya toko okhala murumeyi ookhavihera. Arumeyi ookhavihera ennaakhavihera asitokweene a mmulokoni waakosoopa asinna. Asitokweene a mmulokoni ni arumeyi ookhavihera atthu oopixa murima ni oowiilipihera yaawo enaakhavihera asinna ni asirokora. Amiravo pooti othanliwa weera ekhale arumeyi ookhavihera. Ni murumeyi ookhavihera orinono mikhalelo sooreera, pooti othanliwa okhala mutokweene a mmulokoni nnaamweera areeneno iyaakha 20 naari opwahamo.

¹⁶ Eheeni nyuwo muntthuneyaanyu opaka weera mukhale murumeyi ookhavihera naari mutokweene a mmulokoni? Biblya onnavaha eliista ya itthu nyuwo muntthuneyaanyu opaka, mene muupuweleke weera itthu iyo nyuwo muntthuneyaanyu opaka sintthuneya seettihiweke ni nsivelo muraanyuno ni Yehova, emusi awe ni muloko. (1 Tim. 3:1-13; Tito 1:6-9; 1 Ped. 5:2, 3) Mwiilipihereke vantxipale weera musuwele itthu sintxipale sinhela mpuwa mikhalelo iyo. Opwaha mwa yeeyo, munvekeleke Yehova nvekelaka nikhavihero weera nwere wunnuwihera mikhalelo iyo. c

17. Moota heeni mmiravo onkelaawe wiireherera weera akhale mulopwana oothela ni muhooleli a vatthokoni? (Nwehe efootu.)

¹⁷ Mulopwana oothela ni muhooleli a vatthokoni. Moovarihana ni masu a Yesu, akristu akina aathanla ohithela. (Math. 19:12) Mene wakhala weera nyuwo muntthuna othela munoorowa okhalano muritti wookhala mulopwana oothela ni muhooleli a vatthokoni. (1 Akor. 11:3) Yehova ontthuna weera mulopwana aasiveleke ni aakosoopeke amwaarawe mwa mukhalelo wa weerutthuni, wa  mmuupuweloni ni woomunepani. (Aef. 5:28, 29) Mikhalelo sootheene nonnaahu mwa yoosoma ene yeela, ntoko, miruku, waattittimiha asithiyana ni okhala oororomeleya, sinoorowa wookhaviherani okhala mulopwana ooreera mwathela vale. Mweera haawo, nyuwo munoorowa okhala oowiireherera weera mukhale mulopwana oothela ni muhooleli a vatthokoni.

18. Moota heeni mmiravo onrowaawe wiireherera weera akhale tiithi?

¹⁸ Tiithi. Nyuwo mwathela vale, pooti weeraka munookhala tiithi. Eheeni nyuwo munxutteraanyu ni ntakihero na Yehova woohima sa okhala tiithi ooreera? Munnaxuttera itthu sintxipale. (Aef. 6:4) Yehova khoona wuuliha muru omweerela mwanawe Yesu Kristu weera annamusivela ni annamwaakhulela. (Math. 3:17) Wakhala weera nyuwo munookhala tiithi, muhittuwaleke omweerela mwaninyu weera munnamusivela. Nave mmuttottopeleke mwaha wa etthu yooreera apankaawe. Asitiithi entthara ntakihero na Yehova, ennaakhavihera anamwane aya okhala akristu oolipa moomunepani. Nyuwo pooti wiireherera weera mukhale tiithi ooreera murima mwaakosoopaka atthu viinaano vaava amusi anyu, asinna mmulokoni nave mwaaleelaka asinna awo moota nyuwo munaasivelaanyu. (Yoh. 15:9) Itthu iya sinimookhaviherani muhoolo wakhala weera nyuwo munookhala mulopwana oothela naari tiithi. Mene nwehereraka, muroromeleke weera nyuwo tootthuneya vamaithoni va Yehova, veemusini vanyu ni mmulokoni.

19-20. Eheeni enrowa waakhavihera Amiravo okhala mukristu oolipa moomunepani? (Nwehe efootu ya vakaapani.)

¹⁹ Amiravo, weera mukhale akristu oolipa moomunepani, onnatthuneya wiilipihera vantxipale. Nyuwo muntthuneya otthara matakihero ooreera, nave wunnuwihera mikhalelo ntoko, miruku, ororomeleya ni oxuttera ovara miteko sooreera sinrowa wookhaviherani mweekumini mwanyu, nave wiireherera wa miritti munrowaanyu waakhela muhoolo.

²⁰ Apaale vaavo munuupuwelaanyu miritti munrowaanyu waakhela muhoolo, nyuwo munnoova. Mene muroromeleke weera munoowera. Nave muroromeleke weera Yehova onnatthuna wookhaviherani nyuwo. (Yes. 41:10, 13) Nave-tho muroromeleke weera, asinna ni asirokora a mmulokoni, enoorowa wookhaviherani tho. Vaavo nyuwo munkhalaanyu mulopwana Yehova ommutthunaawe, ekumi anyu enoorowa okhala yoohakalala ni yooreera. Hiyo ninnoosivelani vantxipale, nyuwo amiravo! Muroromeleke weera Yehova onoorowa wooreelihani vantxipale vaavo muniilipiheraanyu weera mukhale mukristu oolipa moomunepani. — Mir. 22:4.