1. Etthu heeni mutthu ontthuneyaawe opaka weera akhale mukristu oolipa?

 HIYO ninnatikhiniheya vantxipale naawoonaka anamwane yaakuvaka wunnuwa. Ni eyo enneereya ntoko etthu empakiwa ni maakina. Mene wunnuwa iwo onnavirikana ni wunnuwa wa omunepani. b (1 Akor. 13:11; Aheb. 6:1) Weera mutthu akhaleno onthamwene woolipa ni Yehova, onnatthuneya wiilipihera vantxipale. Opwaha mwa yeeyo, mutthu onnatthuna nikhavihero na munepa wootteela weera awere okhalano mikhalelo sooreera ni wiireherera mwa miritti onkelaawe okhalano muhoolo. — Mir. 1:5.

2. Eheeni ninxutteraahu va Ephattuwelo 1:27, ni eheeni ninkelaahu woona mwa yoosoma ene yeela?

² Yehova aapanke atthu mulopwana ni muthiyana. (Musome Ephattuwelo 1:27.) Ekhaikhai weera asilopwana ni asithiyana, toovirikana. Nave-tho toovirikana mwa mikhalelo mikina. Mwa ntakihero, Yehova, aapanke alopwana ni athiyana ni miritti soovirikana, ni ohaavaha osuwela onaakhavihera okwanihera soothanleliwa saya. (Eph. 2:18) Mwa yoosoma ene yeela, ninkela woona moota mwaaruusi okhanlaawe ookhala murokora oolipa moomunepani, ni yoosoma enttharelana, nnookela woona moota mmiravo okhanlaawe ookhala munna mukristu oolipa moomunepani.

3-4. Amiravo enrowa ophwanya woowi matakihero ooreera otthara? (Nwehe efootu.)

³ Biblya onuuluma vantxipale woohima sa asithiyana ammusivela Yehova. (Moone mwaha oneera “O que podemos aprender das mulheres  mencionadas na Bíblia?” va site jw.org) Ntoko enooniheraaya yoolepa ya yoosoma ela, asithiyana awo, ‘yaari oomaala’ ni ‘oowiiwelela mwa soothesene.’ Mene nto olelo va mmilokoni aakhala matakihero aasirokora ookhomaala moomunepani yaawo asaaruusi naari asimwali eneeraaya etakiheke.

⁴ Asirokora, munoonela hayi waasa ntakihero na murokora mmoha oolipa moomunepani weera mutakiheke? Nwehexexeke mikhalelo oraaweno, avinyaka muupuwele moota munkelaanyu otakiha mikhalelo iyo. Iparagrafu sinttharelana, nnoorowa woona mikhalelo miraru sootepa otthuneya muthiyana ontthuneyaawe okhalano.

5. Heeni wiiyeviha oraaya wootepa otthuneya wa akristu asithiyana oolipa omunepani?

⁵ Wiiyeviha mukhalelo wootepa otthuneya mukristu otthuneyaawe okhalano. Wakhala weera muthiyana onimwiiyeviha, owo onookhalano onthamwene woolipa ni Yehova ni aneereke wiiraana ni atthu akina. (Yak. 4:6) Mwa ntakihero, muthiyana ommusivela Yehova ni ori oowiiyeviha, onnathanla wiiwelela miruku Yehova onnivahaawe. (1 Akor. 11:3) Miruku iyo sinnaahima ale Yehova aathanliyaawe weera ekosoopeke muloko ni emusi. c

6. Eheeni arokora ekhanlaaya ooxuttera ni wiiyeviha wa Rebeka?

⁶ Moone ntakihero na Rebeka. Owo aari muthiyana oosuwela ni oolipa murima, aasuwela liini ni moota woopakano itthu. (Eph. 24:58; 27:5-17) Nnaamweera vareene hiiho, Rebeka aari oottittimiha ni oowiiwelela. (Eph. 24:17, 18, 65) Wakhala weera nyuwo munookhala ntoko Rebeka mwiiyevihaka ni owiiwelela ale Yehova aavanhaawe miritti, nyuwo munoorowa ovaha ntakihero nooreera vemusini vanyu ni mmulokoni.

7. Asimwali enkela oxuttera hayi wiiwelela ni ntakihero na Estheri?

⁷ Wiiwelela. Wiiwelala mukhalelo akristu ootheene antthuneyaaya okhalano. Biblya oneera “osuwela ori ni mutthu a miruku.” (Mir. 11:2) Estheri aari murumeyi oororomeleya a Yehova, nto mwaha woowiiwelela owo khaisunnuwinhe akhalakaru pwiyamwene. Owo anniiwelela miruku seiyo  aavahiwaawe ni Mordekayi yoowo aari mutokweene ompwaha Estheri ni annavarela muteko. (Esth. 2:10, 20, 22) Hiihaale ntoko Estheri, nyuwo tho pooti woonihera wiiwelela, mwasaasaka miruku sooreera ni nvarelaka muteko mweekumini mwanyu. — Tito 2:3-5.

8. Moovarihana ni 1 Timotheyo 2:9, 10, moota heeni wiiwelela onrowaaya omukhavihera murokora opaka soothanla sooreera ni moota woowara nnene?

⁸ Estheri aahoonihera wiiwelela mwa mukhalelo mukina. Owo aari ‘muthiyana ooreera ekhove ni oophwaneliwa’ nnaamweera vareene hiiho, owo khaisoonihera. (Esth. 2:7, 15) Moota heeni murokora onrowaawe otthara ntakihero na Estheri? Mukhalelo mmoha woopaka eyo ori ovarihela muteko ele nimphwanyaahu eliivuru ya 1 Timotheyo 2:9, 10. (Mmusome.) Eliivuru ela, murummwa Paulo onnaaleela asirokora weera onnatthuneya owara moophwanelela. Masu eKereku evariheliwe muteko va, enoonihera weera muthiyana onnatthuneya owara moophwanelela, ooniheraka weera onnathokorora nyuupuwelo ni nyoonelo sa atthu akina. Asirokora envarihela muteko miruku iya ni enwara moophwanelela, ennatthuneya ottottopeliwa vantxipale.

9. Eheeni nikhanlaahu ooxuttera ni ntakihero na Abigayili?

⁹ Iseru mukhalelo wootepa otthuneya. Vano iseru eheeni? Mukhalelo onkhavihera ovirikanyiha yooreera ni yoonanara, ni onkhavihera othanla yooreera. Moone ntakihero na Abigayili, aiyawe Abigayili yaapaka yoothanla yootepa onanara, yeeyo yaahela veerisani ekumi ya atthu ootheene yaakhalaayano ni ale yaavarela muteko. Mene Abigayili aapaka etthu moowaakuveya, iiwakaru owo vaanaanoru aapaka etthu yooreera, nto mwaha wa yeeyo owo aavuluxa ikumi sintxipale. (1 Sam. 25:14-23, 32-35) Iseru-tho sinnanikhavihera osuwela ewoora yoowuuluma ni ewoora yoomaala. Nave sinnanikhavihera waapwattha atthu akina nihiivoleiheraka mweekumini mwaya. — 1 Ates. 4:11.

10-11. Moota heeni osuwela osoma ni olepa nnene onrowaaya wookhaviherani nyuwo ni atthu akina? (Nwehe efootu.)

¹⁰ Murokora pooti oxuttera itthu seiyo sinrowa omukhavihera nihiku ti nihiku. Itthu ikina sa seiyo, sinxutteriwa mutthu oreene mwaana, mene sinnawera okhavihera ekumi yootheene. Moone matakihero vakhaanini.

¹¹ Muxuttere osoma ni olepa nnene sene. Mapuro makina, atthu enuupuwela weera muthiyana khontthuneya oxuttera olepa naari osoma, mene ola mukhalelo wootepa otthuneya akristu ootheene entthuneyaaya okhalano. d (1 Tim. 4:13) Nto muhihiye etthu yookhoottiherakani nyuwo oxuttera osoma ni olepa nnene sene. Etthu heeni enrowa okhumelela? Nyuwo oneereke wookhweelani ophwanya muteko ni muneereke omwiiwexexa  nnene sene Biblya ni owera waaxuttiha atthu akina. Mene etthu yootepa ooreera nyuwo munoorowa oweera omusoma Biblya ni wuupuwelela ele elempwale, mweera haawo munoorowa omwaattamela vantxipale Yehova. — Yeh. 1:8; 1 Tim. 4:15.

12. Eheeni munxutteraanyu ni Miruku 31:26?

¹² Musuweleke ovaanela ni atthu. Osuwela ovaanela ni atthu mukhalelo wootepa otthuneya wa akristu. Mukhalelo ene ti yoola murummwa Yakobe avanhaawe miruku sineera: “Vano mutthu ti mutthu àkuvele owiriyana, apise wuluma.” (Yak. 1:19) Vaavo nyuwo munwiriyanaanyu ele atthu akina enhimaaya moomaaleleya, munnoonihera weera munniihela nipuro na atthu awo naari neere, munnaapwattha atthu akina. (1 Ped. 3:8) Wakhala weera nyuwo khamwiiwexenxe ele mutthu mukina oolenlaaweni naari moota oniisoonelaawe, mpakeke makoho oophwanelela, avinyaka mwiihiyere etempu weera muupuwelele muhinaaye ovirelela wuuluma. (Mir. 15:28, enoota) Mwiikoheke ha: ‘Etthu ela kinrowaaka wuuluma ekhaikhai ni enoorowa waalipiha atthu akina? Enimoonihera nttittimiho naari oreera murima?’ Muxuttereke ni asirokora yaawo eniiwelela moomaaleleya ni enuuluma mooreera murima. (Musome Miruku 31:26.) Mwiiwexexeke vaavo awo enuulumaaya, wakhala weera munoowera wuuluma ni atthu, eyo enookela wookhaviherani okhalano asinthamwene eekhaikhai ni okhalano murettele ni atthu akina.

13. Moota heeni nyuwo munrowaanyu oxuttera oreherera nnene vaate? (Nwehe efootu.)

¹³ Muxuttereke oreherera vaate. Mapuro mantxipale asithiyana tenreherera vaate, apaale pooti weeraka ameyanyu naari murokora mukina ohookhaviherani nyuwo opaka eyo. Murokora mmoha oniitthaniwa Cindy ohimme weera: “Etthu yootepa ooreera ameyaka ekipakenlaaya ori okixuttiha weera ovara muteko onnaphwanyiha ohakalala. Oxuttera waapeya, okwesa, ottottha ni okela othuma itthu, waaheeriha ekumi aka okhala yookhweya ni waakikhavihera onvarela Yehova, nave tho ameyaka yaakixuttiha okhala mutthu oowaakhela aletto. Mwaha wa yeeyo, miyo kohaasuwela asinna ni asirokora oovirikana yaawo eri ntakihero nooreera wa miyo.” (Mir. 31:15, 21, 22) Muthiyana oovara miteko, oowaakhela aletto ni onreherera nnene sene vaate vawe, mareeliho a vemusini vawe ni ntakihero na mmulokoni. — Mir. 31:13, 17, 27; Mit. 16:15.

14. Eheeni nyuwo muxuttenraanyu ni ntakihero na Crystal? Itthu heeni muntthuneyaanyu owehexexaka?

¹⁴ Muxuttere moota woowiikhavihera. Mukristu ori ootheene ontthuneya oxuttera opaka eyo. (Afil. 4:11) Murokora mmoha oneeriwa Crystal enre: “Apapa aka yaakikhavihera othanla ekursu yeeyo yeera ekixuttihe itthu sootthuneya, apapa aka yaakooperera omusoma kontabilidade ni eyo yaakikhavihera vantxipale.” Ophwaha mwa yeeyo, nyuwo muntthuneya oxuttera. Nyuwo muntthuneya oxuttera ohiya paahi etthu eneera yookhavihereni ophwanya muteko, nyuwo tho muntthuneya oxuttera moota woovarihela musurukhu mwa miruku. (Mir. 31:16, 18) Nwehexexeke sooluluwanya sanyu soomunepani ni muhaatteleke okopha. Mweera haawo, onimookhaviherani okhalano ekumi yookhweya ni yoohakalaliha. — 1 Tim. 6:8.

15-16. Mwaha wa heeni asirokora oohitheliwa eraaya yoovaha ya mmulokoni? (Marko 10:29, 30)

¹⁵ Winnuwihera mikhalelo soomunepani ni oxuttera itthu, sinoorowa wookhaviherani wiireherera wa itthu sinrowa okhumelela mweekumini mwanyu. Moone matakihero vakhaani a itthu muntthuneyaanyu othanla.

¹⁶ Nyuwo pooti othanla ohitheliwa. Yesu aahimme weera asithiyana akina yaamuthanla ohitheliwa nnamweera mapuro makina atthu evahaka mwiitti othela. (Math. 19:10-12) Asithiyana akina apaale ennathanla ohitheliwa mwaha wa itthu ikina, mene nyuwo muroromeleke weera Yehova ni Yesu ennaavaha mwiitti ale ehithelinwe. Elapo yootheene asirokora oohitheliwa mareeliho ammulokoni. Mwaha wookhala ansivelo ni oowaapwattha atthu, awo ennakhala asirokora ni asimaaye a atthu antxipale mmulokoni. — Mmusome Marko 10:29, 30; 1 Tim. 5:2.

17. Moota heeni murokora onrowaawe wiireherera weera avolowe muteko wa etempu yootheene?

¹⁷ Nyuwo pooti ovolowa muteko wa etempu yootheene. Muteko woolaleera onvariwa elapo yootheene, antxipale anvara muteko owo asirokora. (Nsal. 68:12 [68:11, NM]) Neereke nyuwo pooti ompaka planu oovolowa muteko wa etempu yootheene? Nyuwo pooti okhala piyoneira, wiivaherera okhavihera muteko wooteka, ni ovara oBetheli. Nvekeleke woohima sa yooluluwanya anyu. Nave mutthekuleke ni atthu yaawo ewenre okwanihera sooluluwanya saya avinyaka mweerereke woona etthu muntthuneyaanyu opaka weera mpake etthu emoharu, nave mumpakeke palano yoowo onrowa wookhaviherani okwanihera sooluluwanya sanyu. Nto muroromeleke weera ovolowa muteko wa etempu yootheene, onimoovahani iparakha sintxipale mmutekoni mwa Yehova.

18. Mwaha wa heeni oraaya wootthuneya weera murokora amuthanle nnene mulopwana oothelanano? (Nwehe efootu.)

¹⁸ Nyuwo pooti othanla otheliwa. Mikhalelo sootheene nonnaahu mwa yoosoma ene yeela, sinoorowa wookhaviherani nyuwo okhala muthiyana ooreera mwatheliwa vale. Ekhaikhai weera wakhala weera munnupuwela otheliwa, nyuwo muntthuneya omuthanla nnene sene mulopwana munrowaanyu othelanano. Mwaha wooweera ela yoothanla yootepa otthuneya munrowaanyu opaka mweekumini mwanyu. Muhittiwaleke weera, muneereke otthuneya wiiwelela soothanla sa mulopwana munrowaanyu othelanano onrowaawe opakaka. (Arom. 7:2; Aef. 5:23, 33) Vanonto mwiikoheke makoho ala: ‘Keereke ola mukristu oolipa moomunepani? Keereke onnahela nipuro noopatxera mweekumini mwawe itthu soomunepani?  Keereke onnapaka soothanla sooreera? Keereke onnaakhulela soottheka sawe? Onnaattittimiha asithiyana? Keereke onoowera okikosoopa miyo wa mukhalelo wa omunepani, wa weerutthuni ni wa mmuupuweloni? Neereke ola onnakwanihera miritti sawe? Mwa ntakihero, miritti heeni oraaweno mmulokoni, ni moota heeni onweeraawe okwanihera?’ (Luka 16:10; 1 Tim. 5:8) Mene ekhaikhai weera, wakhala weera nyuwo muntthuna omphwanya mulopwana oolipa moomunepani, onnatthuneya-tho nyuwo wiireherera weera mukhale muthiyana oolipa omunepani.

19. Mwaha wa heeni muthiyana ootheliwa ontthuneyaawe ohakalalaka iitthaniwaka okhala “ekhavihero?”

¹⁹ Biblya oneera muthiyana ootheliwa “ekhavihero” ya aiyawe ni “ekwanihero aya.” (Eph. 2:18) Neereke eyo enoonihera weera mulopwana tootthuneyaxa ompwaha muthiyana? Hooye! Okhala ekhavihero etthu ya mwiitti, mwaha wooweera ikwaha sintxipale Biblya onnamuhima Yehova okhala “ekhavihero.” (Nsal. 54:6 [54:4, NM]; Aheb. 13:6) Muthiyana onnoonihera okhala ekhavihero ya ekhaikhai, akhaviheraka soothanla sa aiyawe ni iilipiheraka weera etthu awo ethanlalaaya ekhumele nnene. Ni mwaha woomusivela Yehova owo onnapaka ele onweraawe weera atthu akina yooneke mikhalelo sooreera sa aiyawe. (Mir. 31:11, 12; 1 Tim. 3:11) Nyuwo pooti wiireherera weera mukhale muthiyana ooreera mwatheliwa vale, mwaatxeereraka nsivelo nanyu ni Yehova ni mukhalaka ekhavihero wa atthu akina veemusini vanyu naari mmulokoni.

20. Itthu heeni sooreera maaye ontthuneyaawe opakela emusi awe?

²⁰ Nyuwo pooti okhala maaye. Mwatheliwa vale nyuwo ni aiyanyu pooti okhalano anamwane. (Nsal. 127:3) Mene onooreera ohiya mmuupuweloni etthu entthuneya weera mukhale maaye ooreera. Mikhalelo ni miteko nixuttenraahu mwa yoosoma ene yeela, sinoorowa wookhaviherani okhala muthiyana naari maaye ooreera. Wakhala weera nyuwo munookhala muthiyana ansivelo, ooreera murima, ni oopixa murima, emusi anyu enoorowa okhala yoohakalala ni anamwane anyu eneereke wiisoona okhala oovareleleya ni oosiveliwa. — Mir. 24:3.

21. Nnoonela hayi itthu asirokora empakaaya ni mwaha wa heeni? (Nwehe efootu ya vakaapani.)

²¹ Asirokora oosiveleya, hiyo ninnoosivelani nyuwosa mwaha wa itthu sootheene munampakelaanyu Yehova, ni atthu awe. (Aheb. 6:10) Nyuwosa munniilipihera weera mukhaleno mikhalelo sa omunepani ni wunnuwihera miteko sooreera, wiireherera wa miteko sa muhoolo, mwaha wa yeeyo nyuwo muneereke okhalano ekumi yootepa ohakalaliha, ni munnaweerela itthu sooreera atthu ootheene ari vakhiviru vanyu. Nto muroromeleke weera nyuwosa tootthuneya vantxipale mmarehereroni mwa Yehova!