1. Nimuupuwelelaka Abrahamu, nikoho heeni nintthuneyaahu wiipakela?

 ATTHU antxipale ahiiwa yuulummwaka woohima sa Abrahamu, mene, ensuwela itthu vakhaaniini woohima sa yoowo. Mene hiyo, ninnasuwela itthu sintxipale woohima sa owo. Mwa ntakihero, noosuwela weera Abrahamu aahiitthaniwa ‘nikholo na ootheene ale eniiwelela.’ (Arom. 4:11) Apaale nyuwo munniikoha, ‘Keereke kinoowera okhalano nroromelo noolipa ntoko na Abrahamu?’ Aani, eyo ennawereya.

2. Mwaha wa heeni oraaya wootepa otthuneya osoma ntakihero na Abrahamu? (Yakobe 2:22, 23)

² Mukhalelo mmoha wookhalano nroromelo noolipa ntoko na Abrahamu, ori oxuttera ni ntakihero owo onihiyenraawe. Aakhelakaru nlamulo na Muluku, Abrahamu aathaamela muttetthe woorakamela ni mwa iyaakha sintxipale aahikhala mutentani. Ni owo aari oolikaneene onvaha mwanawe aamusivelaawexa, Isakhi. Itthu iya sohoonihera weera Abrahamu aahikhalano nroromelo noolipa ni Yehova. Nroromelo Abrahamu aaraaweno vamoha ni miteko, saaheeriha waakhuleliwa ni Muluku ni wiitthaniwa nthamwene awe. (Mmusome Yakobe 2:22, 23.) Yehova ontthuna weera hiyo vamoha ni nyuwo nikhale asinthamwene awe. Ti mwaha wa yeeyo, aamuupuxenraawe murummwa Paulo ni Yakobe olepa woohima sa ntakihero na Abrahamu mBiblyani. Mwa yoosoma ene yeela, nnoorowa woona eliivuru ya Aroma ekapiitulu 4 ni eliivuru ya Yakobe ekapiitulu 2 etthu ennixuttihaaya woohima sa Abrahamu. Ikapiitulu iya piili, hiyo ninnasoma woohima sa itthu sootepa otthuneya woohima sa Abrahamu.

3. Iversu heeni sa mBiblyani murummwa Paulo ni Yakobe yuulummaaya?

³ Paulo ni Yakobe yaahuuluma masu yaawo emphwanyeya va Ephattuwelo 15:6: “[Abrahamu] àmwìwelela Yahvéh, ni Yahvéh àmòna yowo ntoko mutthu òroromeleya.” Wa Yehova mutthu a xariya ti yoole ompaka yootthunaawe ni onamusiveliha. Ti wooreera  osuwela weera atthu oohimalela ntoko hiyo, Muluku pooti onoonaka ntoko atthu axariya, naari oohikhala nthowa! Neereke nyuwo khamwaakela osiveliwa Yehova oweerelani haawo? Mene waari haawo, ninrowa woona mwaha wa heeni Yehova aamwiitthannaawe Abrahamu naxariya, ni eheeni nintthuneyaahu opaka weera Yehova aniitthane haawo.

4. Eheeni enaakhoottihera atthu okhala anaxariya?

⁴ Paulo ekaarta aalepenlaawe aroma, aahiiwanyeiha weera atthu ootheene aattheka. (Arom. 3:23) Vanonto, onwereya hayi Muluku, owoonaka atthu ntoko anaxariya ni oohikhalano nthowa? Weera aakhavihere akristu wiiwexexa epontu eyo, Paulo aahiiwanyeiha woohima sa Abrahamu.

5. Mwaha wa heeni Yehova amwiitthannaawe Abrahamu naxariya? (Aroma 4:2-4)

⁵ Vaavo Abrahamu aakhalaawe oKanani, Yehova aahimweerela weera aari naxariya. Mwaha wa heeni Yehova aahimmaawe eyo? Neereke mwaha wooweera Abrahamu, annatthara nnene nlamulo na Mose? Hooye. (Arom. 4:13) Ninnasuwela eyo mwaha wooweera, nlamulo na Mose, yaahivahiwa ana a Israeli sivinreene iyaakha 400 Muluku amweerenleene Abrahamu weera aari naxariya. Vanonto mwaha wa heeni Yehova ahimmaawe weera Abrahamu aari mutthu axariya? Yehova aahinvaha mahala Abrahamu ni aahimwiitthana naxariya mwaha wa nroromelo nawe. — Mmusome Aroma 4:2-4.

6. Mwaha wa heeni Yehova oneeraawe awiitthaneke atthu oohimalela anaxariya?

⁶ Paulo aahiiwanyeiha weera mutthu orinono nroromelo ni Muluku, ‘wiiwelela wawe onnamukhaliha yoowo naxariya.’ (Arom. 4:5) Nave Paulo onnavirelela wiiwanyeiha eeraka: “Ntoko Davidi tho oneraiye wi oreriwa ti mutthu okhalihinwe naxariya ni Muluku, sihikhanle sopanka: ‘Ooreeriwa ti yaawo eleveleliwe sootakhala saya ni evitherinwe soottheka saya.’ ‘Ooreriwa ti mulopwana ole Apwiya ahinamusomelaaya niwoko na soottheka sawe.’” (Arom. 4:6-8; Nsal. 32:1, 2) Muluku onnalevelela soottheka sa yaale erinono nroromelo wa yoowo. Owo tho, onnalevelela moomalela ahuupuwelaka soottheka sa mutthu owo. Mutthu orinono nroromelo, Muluku onnamoona okhala mutthu a xariya ni oohikhalano nthowa.

7. Mwaha wa heeni nneeraahu nihimeke weera arumeyi a Yehova akhalayi yaari anaxariya?

⁷ Ekhaikhai weera Abrahamu ni Davidi ni arummwa akina oororomeleya a Yehova awo yaahiitthaniwa okhala anaxariya, nnaamweera vareene hiiho, awo yaavirelela okhala oohimalela ni oottheka. Mene mwaha wa nroromelo awo yaaraayano, Yehova aahaawoonela okhala oohikhalano nthowa otepaxa wene aalikanxeraka ni ale yahaamukokhorela. (Aef. 2:12) Ekaarta Paulo aalepenlaawe aroma, ennoonihera weera nintthuneya okhalano nroromelo weera nikhale asinthamwene a Muluku. Ntoko, Abrahamu ni Davidi, wakhala weera nnookhalano nroromelo wa Yehova nnoorowa okhala asinthamwene awe.

8-9. Nyoonelo heeni soohireera sikhanle woohima sa soolepa sa Paulo ni Yakobe, ni mwaha wa heeni?

⁸ Mwa iyaakha sintxipale, ahooleli a ittiini ennavaanyihana yaasaka etthu eri yootepa otthuneya, nroromelo naari miteko. Ahooleli akina enxuttiha weera, weera mutthu avuluwe ontthuneya omuroromelaka Yesu Kristu. Apaale nyuwo mootoko owiiwa atthu awo eriki ha, “Mmuroromeleke Yesu ni nyuwo munoovuluwa.” Atthu antxipale eniihima okhalano ettiini, ennavarihela masu a murummwa Paulo yaawo eneera: “Oreriwa ti mutthu okhalihiwe naxariya ni Muluku, sihikhanle sopanka.” (Arom. 4:6) Nave-tho ahooleli akina, enhima weera “nyuwo pooti ovuluwa” wakhala weera  munnapaka mukwaha muxekuraka mapuro yaawo ittiini sinhimaaya weera mapuro ootteela naari mpakaka miteko sooreera. Onkhala ntoko awo enhima masu eri eliivuru ya Yakobe 2:24 yaawo eneera: “Mutthu onnakhalihiwa naxariya niwoko na miteko ni khaiyene niwoko na wiiwelela paahi.”

⁹ Mwaha wa nyoonelo iya soovirikana, anamasoma akina a Biblya, enuupuwela weera Paulo ni Yakobe, ennavaanyihana vaavo enuulumaaya sa nroromelo ni miteko. Ntoko anamahoolela a ittiini ikina enuupuwelaaya, murummwa Paulo annaakhulela weera naatthunaka omuhakalaliha Muluku nintthuneya okhalano nroromelo, nave Yakobe annaakhulela weera onnatthuneya woonihera miteko naatthunaka omuhakalaliha Muluku. Namasoma mmoha ohimme weera: “Yakobe khiiwexexa nnene mwaha wa heeni Paulo eeraawe mutthu ontthuneya okhalano nroromelo aatthunaka okhala axariya nave Yakobe, khaakhulela ni etthu ele Paulo aahimaawe.” Mene ninsuwelaahu ti yooweera, etthu Paulo ni Yakobe elempaaya yuupuxeriwa ni Yehova. (2 Tim. 3:16) Vanonto onnatthuneya wiiwanyeiha nnene ovirikana nno wa itthu iya Paulo ni Yakobe ehimmaaya. Nto ikaarta iya sa murummwa Paulo ni Yakobe, sinoorowa onikhavihera wiiwexexa nnene woohima sa epontu ela.

10. “Miteko” heeni murummwa Paulo uulumaawe? (Aroma 3:21, 28) (Nwehe efootu.)

¹⁰ “Miteko” heeni Paulo aahimaawe va Aroma 3 ni 4? Owo aahima vantxipalexa “miteko seiyo sa nlamulo,” nlamulo na Mose nenno aavahinwaawe omwaako sinayi. (Mmusome Aroma 3:21, 28.) Vankhala ntoko etempu ya Paulo, makristu akina ayuda khayiiwexexa nnene sene weera nlamulo na Mose ni miteko saya khasaavarela tho muteko. Ti vawonto Paulo aahimmaawe ntakihero na Abrahamu weera oonihere weera ti waxariya wa Yehova weera khasintthuneya “miteko sa nlamulo” menento  nintthuneya nroromelo. Osuwela eyo ti woohakalaliha vantxipale okhala weera ennanixuttiha otthuneya waya okhalano nroromelo ni Muluku ni Yesu weera nikhale anaxariya ohoolo wa Muluku.

11. “Miteko” heeni Yakobe uulumaawe?

¹¹ Mwa eparte ekina, “miteko” Yakobe uulummaawe va ekapiitulu 2 khaiyene “miteko soopereriwa ni nlamulo” seiyo Paulo ohimmaawe. Yakobe uuluma sa miteko seiyo akristu entthuneyaaya ovara kata nihiku. Miteko sene seiyo sinrowa wooniheraka weera mukristu ookhalano nroromelo neekhaikhai ni Muluku naari hooye. Nrowe noone matakihero meeli Yakobe aavarenlaawe muteko.

12. Moota heeni Yakobe iiwanyeihalaawe olikana okhanle eriyari ya nroromelo ni miteko? (Nwehe efootu.)

¹² Ntakihero noopatxera, Yakobe aahuuluma weera akristu ontthuneya weera yaathokororeke atthu ootheene mwa mukhalelo mmoha. Owo aahuuluma niphwanaphwaniho nimoha na mulopwana mmoha yoowo aamuthokorora nnene mutthu amuhakhu nto ahimmuthokorora nnene mutthu oohaawa. Yakobe aahiiwanyeiha weera mutthu owo pooti aahima weera ookhalano nroromelo mene miteko sawe khasoonihera eyo. (Yak. 2:1-5, 9) Ntakihero nanaaveeli, Yakobe aahuuluma woohima sa munna naari murokora ohikhanleno yoowara naari yootxa mene mutthu mukina naari arinono ahinwera omukhavihera. Naari mutthu owo ahimaka weera ookhalano nroromelo, miteko sawe sinnoonihera weera owo khaanoono. Ti yeeyo Yakobe olempaawe ha: “Siso tho wiwelela ohikhanle miteko saya, ori wokhwene.” — Yak. 2:14-17.

13. Ntakihero heeni Yakobe ovarihenlaawe muteko weera oonihere weera nintthuneya okhalano nroromelo ni opaka miteko sooreera? (Yakobe 2:25, 26)

¹³ Yakobe aahimuuluma Rahabi ntoko ntakihero nootepa oreera wa mutthu ole orinono nroromelo ni anoonihera eyo ni miteko.  (Mmusome Yakobe 2:25, 26.) Rahabi, aahiiwa woohima sa Yehova ni aahisuwela weera Yehova aahaakhavihera ana a Israeli. (Yeh. 2:9-11) Muhoolo mwaya owo ahoonihera nroromelo ni miteko awiipithihaka anamahottela eeli a wIsraeli, yaawo ekumi aya yaari veerisani. Mwa yeeyo, muthiyana ola oohimalela ni ahaakhanle mwisraeli, aahiitthaniwa okhala naxariya ntoko hiihaale Abrahamu iitthaninwaawe okhala naxariya. Ntakihero nna na Rahabi ninnanixuttiha weera nroromelo nahu nintthuneya wooniheraka ni miteko.

14. Mwaha wa heeni ninhimaahu weera Paulo ni Yakobe, khenvaanyihana?

¹⁴ Paulo ni Yaboke enniiwanyeiha olikana okhanle eriyari ya nroromelo ni miteko mene itthu iya ti soovirikana. Paulo aahaaleela akristu ayuda weera khayaarowa waakhuleliwa ni Yehova wakhala weera yaapaka miteko iye soopereriwa ni Nlamulo na Mose. Mene Yakobe aahima weera akristu ootheene entthuneya woonihera nroromelo naya yaapakelaka itthu sooreera atthu ootheene.

15. Moota heeni nneeraahu noonihere nroromelo mwa miteko sahu? (Nwehe efootu.)

¹⁵ Yehova khanhima weera ontthuneya opaka itthu sootheene Abrahamu aapankaawe weera niitthaniwe anaxariya. Mweekhaikhai sookhala mikhalelo soovirikana soowoonihera nroromelo nahu ni miteko. Hiyo pooti owaakhela ni nsivelo ale eneera opatxera ophiya mmulokoni mwahu, waakhavihera asinna enviriha maxupo ni waapakela itthu sooreera atthu ootheene a veemusini vahu. Neera haawo, Yehova onoorowa onaakhulela ni onoorowa onreeliha. (Arom. 15:7; 1 Tim. 5:4, 8; 1 Yoh. 3:18) Mukhalelo mukina wootepa otthuneya woowoonihera nroromelo nahu, ori olaleera moowiilipihera mitthenka sooreera. (1 Tim. 4:16) Mwaha wa miteko sahu ootheene hiyo pooti woonihera nroromelo  nahu wa soolaihera sa Yehova weera ti seekhaikhai ni weera itthu sootheene Yehova ompakaawe ti sooreera wa hiyo. Napaka itthu iya nroromeleke weera Yehova onoorowa oniitthana anaxariya ni nnoorowa okhala asinthamwene awe.

16. Yooweherera heeni yaamukhavihenre Abrahamu okhalano nroromelo?

¹⁶ Eliivuru ya Aroma ekapiitulu 4 enuuluma etthu ekina ninxutteraahu ni Abrahamu: otthuneya wa yooweherera. Yehova aalaihera weera aamureeliha “maloko mantxipale” moorweela mwa Abrahamu. Nkuupuwelani moota Abrahamu aahakalanlaawe wiiwa eyo! (Eph. 12:3; 15:5; 17:4; Arom. 4:17) Mene moovira etempu Abrahamu aakhalano iyaakha 100 ni Sara iyaakha 90 ni awosa nlelo khayaarinono naari mwaana mmoha. Wa moonelo aya ntoko moonelo wa atthu, waakhala woohiwereya Abrahamu ni Sara okhalano mwaana, ni Abrahamu annoona okhala ntoko etthu yooweerera. ‘Mene mwaha wa nroromelo, owo annaroromela ni murima awe wootheene weera aamukhala tiithi a maloko mantxipale.’ (Arom. 4:18, 19) Muhoolo mwaya, Abrahamu aahikhala tiithi a mwaana yoowo yanwehereraaya, Isakhi. — Arom. 4:20-22.

17. Ninsuwela moota heeni weera Muluku pooti oniitthana okhala anaxariya ni okhala asinthamwene awe?

¹⁷ Ntoko nonnaahu, hiyo pooti waakhuleliwa ni Yehova ni wiitthaniwa okhala anaxariya ntoko hiihaale Abrahamu iitthaninwaawe. Mweekhaikhai murummwa Paulo aahuuluma mwaha owo vaavo enraawe: ‘Masu ene ala ‘wi aakhalihiwa naxariya’ khaalepelinwe [Abrahamu] paahi, hooye, mene noolepeliwa hiyo tho ninrowa okhalihiwa anaxariya, aani, hiyo nimmwiiwelela Muluku yoowo onvinyererinhe Yesu.’ (Arom. 4:23, 24) Hiihaale ntoko Abrahamu, hiyo nintthuneya okhalano nroromelo noolipa ni noonihereke nroromelo nno ni miteko nave-tho yooweherera. Murummwa Paulo onnavirelela wuuluma woohima sa yooweherera va eliivuru ya Aroma ekapiitulu 5, nave tiyeeyo ene ninkelaahu woona mwa yoosoma enttharelana.