MOOHIHOVELA, ootheene hiyo ninnahakalala ni itthu sootheene Yehova onnivahaawe. Ohela mpuwa othanla moota woovarela muteko soovaha iyo. Moovarihana ni Biblya eviinyu yoovaha ya Yehova, Biblya onhima ha: “Emesa ennatterekheliwa wera ettelihe murima; Evinyu ennahakalaliha ekumi.” (Koh. 10:19; Nsal. 104:15) Apaale nyuwo mohoonelela weera atthu akina aakhalano maxupo mwaha woowura eviinyu. Opwaha mwa yeeyo, nihipwatthaka elapo ninkhalaahu naari sookhovelela sa elapo ahu, atthu antxipale aakhalano moonelo woovirikana woohima sa mwaha ola woowura eviinyu. Vanonto eheeni enrowa omukhavihera mukristu opaka yoothanla yooreera woohima sa mwaha ola woowura eviinyu?

Nihipwatthaka elapo ninkhalaahu nari nipuro nihuuwalaahu, hiyo onnatthuneya ottharaka miruku sa Muluku, neera haawo ekumi ahu enoorowa okhala yoohakalala.

Ntoko nsuwenlaahu atthu antxipale mulaponi, ennawura vantxipale naari moohihiyerereya. Atthu akina ennawura iviinyu soohapala mwaha wooweera sinnaasivela iviinyu iyo, nave atthu akina ennawurya iviinyu iyo weera ehuupuweleleke maxupo envirihaaya. Mapuro mantxipale mutthu yoole onwura eviinyu yintxipale, onnooniwa okhala oolipa ni ootthuneya.

Moohakalaliha, akristu pooti ovarihelaka muteko miruku envahiwaaya mwa nsivelo ni Mpattuxa. Mwa ntakihero, Yehova onnanleela sookhumelela sooriipiha murima wakhala weera mutthu onnawura vantxipale. Yoolepa ya Miruku 23:29-35 hiyo ninnaphwanya yooweereya ya mutthu onwura vantxipale ni sookhumelela sooriipiha murima. a Daniel, yoowo ori munna ni mutokweene a muloko wEuropa, onnuupuwelela moota ekumi awe yaaraaya ahinaakuve oxuttera woohima sa Yehova ni ovarela muteko miruku sawe. Owo ohimme ha: “Miyo kannawura vantxipale ni mwaha wa yeeyo kannapaka soothanla soonanara, ni sookhumelela sa soothanla iyo saari sooriipiha murima. Mpakana olelo va, miyo kuupuwela sookhumelela iye, kinnariipiwa murima.”

Moota heeni akristu enrowaaya opaka soothanla sooreera woohima sa owura eviinyu weera nsepe maxupo? Hiyo nintthuneya neemerereke weera miruku sa Yehova sineettiheke mwa soothanla sahu.

Ninrowa woona ele Biblya onhimaawe woohima sa eviinyu ni mwaha wa heeni atthu akina enthanlaaya owura.

Biblya khankhoottiha owura eviinyu moowiiphima, opwaha mwa yeeyo owo onhima weera owura eviinyu onnahakalaliha. Koholeti. 9:7 onhima ha: “orowe, otxe mukatthe à ni murettele, ni owurye evinyu à n’otteliwa murima.” Yesu annawura eviinyu emaara ekina, ni arumeyi oororomeleya a Yehova akhalayi yannapaka eyo. — Math. 26:27-29; Luka 7:34; 1 Tim. 5:23.

Biblya onnoonihera ovirikana okhanle wa owura vakhaani ni ohapaliwa. Biblya oneera ha: ‘Muhihapaliwe ni eviinyu.’ (Aef. 5:18) Nave-tho Biblya onnavirelela ariki, ‘alipa oohapaliwa khanrowa ohiyeriwa omwene wa Muluku.’ (1 Akor. 6:10) Onnooneya weera Yehova khansiveliwa ni atthu ale enwura mpaka ohapaliwa. nto khontthuneya waatakiha atthu ale enwura, onnatthuneya opaka yoothanla enrowa omuhakalaliha Yehova.

Atthu antxipale enuupuwela weera pooti owura vantxipale ni ohihapaliwa, mene eyo etthu yoowopiha. Biblya onniiwanyeiha weera okhala kaporo a eviinyu pooti omweeriha mutthu opaka soottheka sitokweene ni ohiya omuhakalaliha Yehova. (Tito 2:3; Mir. 20:1) Yesu aahima weera osiveliwa ni ohapaliwa pooti omootxeeliha mutthu ovolowa elapo  enyowani ya Muluku. (Luka 21:34-36) Vano eheeni enrowa omukhavihera mukristu osepa maxupo awo ekhanle ookhumelela mwaha wa owura eviinyu?

Waarowa okhala woowoopiha ovoleeliwa ni mikhalelo sa nipuro ninnunwaahu woohima sa eviinyu. Ntoko akristu, hiyo nintthuna omuhakalaliha Yehova naari vootxaani naari voowurani. Napaka eyo nnimoonihera osuwela. Biblya onnanuupuxera ariki: “Nari mutxaka nari nwuryaka nari nvaraka etthu ekina, mwère sothesene munvuwihaka Muluku.” (1 Akor. 10:31) Vano muupuwelele makoho ala enttharelana ni miruku sa mBiblyani:

Neereke miyo kinwura weera atthu akina esiveliweke ni miyo? Ottimula 23:2 onhima ha: ‘Ohittharaka mikhalelo sa atthu antxipale.’ Va, Muluku aahaalopola ana a Israeli weera hawaatthuneya waatakiha atthu yahaamusiveliha yoowo. Miruku iya sinnavareleya muteko mahikwaano, naahiya atthu akina evolowelaka nyupuwelo sahu ni soothanla sahu, hiyo pooti omurakamela Yehova ni ohiya weettela malamulo awe. — Arom. 12:2.

Neereke miyo kinwura eviinyu weera atthu ekooneke weera kamutthu oolipa? Mwa sookhovelela ikina, atthu onnaasivela owura eviinyu ni aakhovelela. (1 Ped. 4:3) Nkoonani miruku sooreera nimphwanyaahu va 1 Akorinto 16:13 seiyo sineera: ‘mwiithokorore, mulipihereke wiiwelela, mukhale mutthu mutthu, mwiilipiheke’. Neereke owura eviinyu onoorowa omukhavihera mutthu okhala oolipa? Hooye. Moovirikana niiyo, eviinyu ennamweerihaka mutthu ohuupuwelaka nnene naari ohipaka itthu sooreera, nave-tho owura eviinyu yintxipale, ohiya mutthu okhala oolipa owo onimweera okhulumuwa. Yesaya 28:7 onnahima weera atthu ale onaasivela owura eviinyu enoorowa wiikumihera maxupo.

Ikuru seekhaikhai sinrweela wa Yehova, enhela mpuwa okhala oowehaweha ni okhanano nroromelo noolipa. (Nsal. 18:32) Hiyo pooti opaka eyo emaara yootheene nintthunaahu opaka soothanla seiyo sinrowa okosoopa onthamwene nraahuno ni Yehova. Yesu aahoonihera ikuru seekhaikhai vaavo aaraawe elapo ela ya vathi, ni atthu antxipale yannamuttittimiha mwaha wooweera owo aari olipa murima ni oowiithanlela opaka etthu yooreera.

Neereke miyo kinwura weera kittiwale maxupo aka? Nasalimu mmoha aahuupuxeriwa olepa masu ala: “Vavale sovalaveliha saka sàntxerereyaya mpuwa mwaka, vava sohakalaliha sanyu sòtthapiha  munep’aka.” (Nsal. 94:19) Wakhala weera nyuwo munnakhulumuwa mwaha wa maxupo munvirihaanyu, mmuroromeleke Yehova ohiya ororomela eviinyu. Mukhalelo mmoha wooreera opaka eyo, ori ovirelela onvekela Yehova. Asinna antxipale ahaasaasera nikhavihero na munna mmoha oolipa moomunepani ni awo aakhumela nnene. Owura eviinyu weera muttiwale maxupo anyu, eyo pooti wookhulumulani ni oweerihani opaka itthu soonanara. (Hos. 4:11) Daniel ohimmwale woopatxerani ohimme ha: “Miyo kannahaawa mwaha wa soovalaveliha saka ni nyuupuwelo soowiivaha nthowa, nto miyo kannawura vantxipale weera kittiwale maxupo awo. Mene maxupo aka yaamweera waatxeerereya ni kaahaayeleela asinthamwene aka ni kaayeleela ohakalala.” Eheeni yaamukhavihenre Daniel? Owo onnavirelela oriki: “Miyo kaahoonelela weera wannatthuneya Yehova okhala vakhiviru vaka ohiya eviinyu. Muhoolo mwaya miyo kaawera owina maxupo ale ni kaaphwanya ohakalala,” ekhaikhai ti yooweera Yehova ori oolikaneene weera anikhavihere nnaamweera maxupo ahu ekhalaka ntoko khemmala. — Afil. 4:6, 7; 1 Ped. 5:7.

Wakhala weera munnawura, nyuwo pooti woona waatthuneyaka opaka matxentxo a moota munwuraanyu. Nyuwo pooti wiikoha: ‘Neereke ookhala mutthu a veemusini vaka naari nthamwene aka okilenle weera onnaxupeya ni moota miyo kinwuraaka?’ Wakhala weera munaakhula weera aani, eyo ethoonyero weera munninnuwihera mukhalelo woonanara yoowo nyuwo muhintalaanyu woonelela. ‘Neereke miyo kinnawurya vantxipale opwaha khalayi?’ Mutthu orinono mukhalelo owo pooti weera khanaakuve wunnuwihhera ntoko eviisiyu, mene muhoolo mwaya pooti okhala eviisiyu. ‘Neereke miyo kinnawera omala mahiku mantxipale kihiwunre?’ Moonaka okhala wooxupa okhala mahiku mantxipale muhiwunre, nto eviinyu eviisiyu anyu. Wakhala weera mohoonelela eyo onnatthuneya waasaasa nikhavihero weera nwere ohiya mukhalelo owo.

Mwaha wa maxupo enkhumelela mwaha wa eviinyu, atthu akina aathanla ohiwura eviinyu mwaha wooweera khenaasivela masivelo a eviinyu eyo. Nnoorowa woonihera nsivelo, nttittimihaka soothanla sa mutthu ori poothe nihimukhanyereraka opaka etthu.

 Apaale nyuwo mohiithanlela wiihelela elimite wa moota nyuwo munrowaanyu owura naari munnatthuna owehexexaka moota nyuwo muntthipanyeraanyu owura, apaale tho nyuwo muntthuna weera nwureke ekwaha emoha vasemanani naari mwamaliha otxa owura vakhaaneene, akina ahiihelela ilimite moota enrowaaya owuraka. Mwa ntakihero, akina aathanla owura eviinyu naari cerveja moowiiphima, ohiya owura iviinyu soowaawaxa. Nyuwo mwiithanlela wiihelela ilimite, onimookweelani owehexexa moota munwuraanyu. Mukristu oolipa moomunepani oniihelela ilimite iya, owo khontthuneya woona wuuliha muru eriyari ya atthu akina woohima sa ele owo othanlalaawe.

Ti wootthuneya tho othokorora nnene nyuupuwelo sa atthu akina. Eliivuru ya Aroma 14:21 enhima ha: “Ti ya phama ohikhura enama nari ohiwurya evinyu nari ohipanka etthu ekina munn’á onèraiye akwattuliweno”. Moota heeni nyuwo munrowaanyu ovarihela muteko miruku iya? Munrowa ovarihela muteko mooniheraka nsivelo, wakhala weera nyuwo munnoonelela weera munna onoorowa oveeheya vaavo munrowaanyu owura eviinyu, waamukhala wooreera ohiwurya eviinyu eyo muttittimihaka nyuupuwelo sa munna owo, nave tho nyuwo munnatthuneya woonihera weera munnampwattha munna owo nave munnattittimiha nyuupuwelo sa atthu akina muhaasaasaka mireerelo sanyu paahi mene mireerelo sa atthu akina. — 1 Akor. 10:24.

Opwaha mwa yeeyo, guvernu ookhalano malamulo woohima sa owura eviinyu. Ekhaikhai weera mukristu ontthuneya wiiwelela malamulo awo. Mwa ntakihero, malomulo yaawo enhela mpuwa mannuwelo a atthu antthuneya owura eviinyu, naari ohiwura eviinyu mwaarowaka weettiha ekaaro. — Arom. 13:1-5.

Yehova oonivaha soovaha sootikhiniha, eyo enhela mpuwa otaphuwa wa othanla moota woovarela muteko soovaha iyo. Soovaha iyo, sinhela mpuwa itthu ninrowaahu otxa naari moota ninrowaahu owura. Moohihovela, hiyo ninneera asantte mwaha wa otaphuwa iwo nivahiwaahu wa othanla. Hiyo nintthuna woonihera weera ninneera asantte nipakaka soothanla simmusivela Yehova.