1. Mwaha wa heeni Abrahamu aaroromelaawe weera aamukhalano mwaana?

 YEHOVA aamulaihera nthamwene awe Abrahamu weera aamukhalano mwaana. Nave weera mwaha wa Abrahamu Yehova aamurowa oreeliha maloko ootheene a valaponi. (Eph. 15:5; 22:18) Abrahamu annamuroromela vantxipale Yehova, mwaha wa yeeyo owo annaroromela ni murimaawe wootheene weera etthu ele Muluku aamulaihenraawe aamurowa okwanihera. Menento Abrahamu aarino iyaakha 100 ni Sara 90. Nnaamweera vareene hiiho awosa nlelo khiyaakhanleno mwaana. (Eph. 21:1-7) Nnaamweera vareene hiiho Biblya oneera: “Abrahamu àhiwelela, aroromelaka opwaha ikhomo wera akhale nikholo na amalapo othene, ntoko elempwaya.” (Arom. 4:18) Nave nyuwo moosuwela nnene sene weera etthu Yehova aamulaihenraawe Abrahamu yaakwanela, owo aakhala tiithi a mwaana yoowo anwehereraawe vantxipale, Isakhi. Mene mwaha wa heeni Abrahamu aatthuneyaawe omuroromelaka Yehova?

2. Mwaha wa heeni Abrahamu aaroromelaawe weera soolaihera sa Yehova sinookwanela?

² Abrahamu annamusuwela nnene sene Yehova nto mwaha wa yeeyo annasuwela “vomalela wi yeyo Muluku onamanelaiye natiri, t‵onweraiye tho opanka.” (Arom. 4:21) Yehova aamwaakhulela Abrahamu ni aamweerela naxariya mwaha wa nroromelo nawe. (Yak. 2:23) Ntoko onooniheraawe Aroma 4:18, nroromelo ni yooweherera Abrahamu aaraaweno sannavarihana. Va Aroma 5 ninkela wiiwa ele Paulo onhimaawe woohima sa yooweherera.

3. Eheeni murummwa Paulo ohimmaawe woohima sa yooweherera?

³ Murummwa Paulo ohiiwanyeiha mwaha wa heeni nintthuneyaahu ororomelaka weera ‘ororomela khonootxeeleya.’ (Arom. 5:5) Nave-tho owo oonikhavihera wiiwexexa moota heeni ninkelaahu olipiha yoowehereraahu. Vanonto ninkela othokorora  itthu nimphwanyaahu va Aroma 5:1-5, emaara ninkelaahu osomaka iversu iya nuupuweleleke moota yoowehereraahu enlipaaya vaavo enviraaya etempu. Mwaha wooweera etthu Paulo aalepenlaawe aroma ennanikhavihera hiyo mahikwaano olipiha nroromelo nahu. Mene woopatxerani ninkela woona etthu emoha yeeyo murummwa Paulo ohimmaawe weera khennikhulumula.

4. Eheeni enthokororiwa va Aroma 5:1, 2?

⁴ Mmusome Aroma 5:1, 2. Paulo aalepa masu ala alepelaka muloko wa Oroma, asinna a muloko owo yaakhalano nroromelo ni yaari Akristu. Nto mwaha wa yeeyo ‘aahaakhaliha anaxariya’ ni aahiweettiha ni munepa woottela, awo yannaweherera mareeliho ooreera, eroromelaka weera ele yaawehereraaya yaamweereya.

5. Yooweherera heeni asinna oothanliwa eraayano?

⁵ Murummwa Paulo aahaalepela makristu oothanliwa a w’eFeso woohima sa yooweherera awo yaaraayano. Yooweherera eyo yaahima sa yoohiyeriwa yoottela. (Aef. 1:18) Emaara aalepelaawe Akolosi Paulo aahima woowi yeeraaya ekhalekewo Akristu ale oothanliwa, Paulo enre: ‘Yoowehereraaya yaahiyeriwe wirimu.’ (Akol. 1:4, 5) Yooweherera ya makristu oothanliwa ti yooweera vaavo enkelaaya ovinyererihiwa enoovahiwa ekumi yoohimala wiirimu, weiwo enkelaaya olamulelaka vamoha ni Yesu. — 1 Ates. 4:13-17; Apok. 20:6.

6. Munna mmoha oothanliwa ohimme eheeni woohima sa yooweherera?

⁶ Asinna oothanliwa ennavaha mwiitti yooweherera eyo. Munna mmoha oowoottihiwa oneeriwa Frederick Franz, oohima moota oonelaawe yoowehereraawe eyo eeraka: “Yoowehereraahu ti yoororomeleya ni enimweereya moohihovela wa munna ori poothe oneerela eparte ya 144.000 a nikhola nikhaani, ni wa asinna ale antxipale oohikontareya.” Eyaakha ya 1991 vaavo aavanraawe muteko mwa iyaakha sintxipale moororomeleya munna Franz enre: “Hiyo khaninkhulumuwa  mwaha wa yoowehereraahu. . . . Hiyo ninnavaha mwiitti yoowehereraahu ni ninnaweherera. Yooweherera etthu nintthuneyaahu oweherera nnaamweera siviraka iyaakha sintxipale miyo kinnavaha mwiitti yoowehereraahu.”

7-8. Yooweherera heeni arumeyi antxipale a Yehova eraayano? (Aroma 8:20, 21)

⁷ Arumeyi antxipale a Yehova olelo va, akhalano yooweherera yoovirikana, yooweherera ene ti emoha-moharu aakhalannaawe Abrahamu ya okhalano ekumi yoohimala nilamuleliwaka ni Omwene wa Muluku. (Aheb. 11:8-10, 13) Murummwa Paulo oolepa yooweherera ela yootepa oreera. (Mmusome Aroma 8:20, 21.) Eheeni nyuwo yoovanreni murima vaavo muxuttenraanyu Mbiblyani woohima sa yooweherera ela yootepa oreera? Neereke mwaha wooweera nyuwo mooxuttera weera nihiku ti nno nyuwo munoowera okhala oohittheka ni oomalela naari aapale nyuwo moohakalala vantxipale musuwelakaru weera munoorowa owoona veeli atthu oosiveleya antxipale mwaayelenlaanyu mookhwaani elapo ela ya vathi mparaisu? Moohihovela, yooweherera ela yootepa oreera ninwehereraahu enoowihera itthu sintxipale sootepa oreera.

⁸ Nihipwatthaka waari weera ninkela okhalaka wiirimu naari elapo ela ya vathi mparaisu, ootheene hiyo ninnatthuneya ohakalala. Yoowehereraahu ela ti yootepa oreera ni ti yoororomeleya Paulo oohima moota yoowehereraahu ela enkwanelaaya. Ele olempaawe enoonikhavihera ororomela weera yoowehereraahu enimweereya.

9-10. Ntoko nnooniheraaya ntakihero na murummwa Paulo, mukristu aweherereke eheeni? (Aroma 5:3) (Nwehe efootu.)

⁹ Mmusome Aroma 5:3. Paulo ohimme weera maxupo ninvirihaahu enoorowa onikhavihera olipiha yoowehereraahu. Mene eyo pooti ontikhiniha, nto ekhaikhai ti yooweera, atthareli a Yesu Kristu ennaweherera oviriha maxupo. Moone ntakihero na Paulo. Owo aalenle ha akristu a wAtesalonika: “Ni vetthwitthuni  vavale narahu variyari vanyu, nàttantta wolelani wi nnaphwanela ohawa, ntoko tho ephattunwaya ni musuwenlaanyu.” (1 Ates. 3:4) Ni asinna a Okorinto murummwa Paulo aalepenle ha: “Vekhaikhai nkintthuna wi muhisuwele, asinna, sohawa sinikhumelenle . . . Wowi siso wòniphwela wothe okhala n‵okumi.” — 2 Akor. 1:8; 11:23-27.

¹⁰ Mahikwaano, ootheene hiyo, pooti oviriha maxupo a moota moota. (2 Tim. 3:12) Ankha woohima sa nyuwo neereke mootoko oviriha maxupo a ottharatthariwa mwaha wa omuroromela wanyu Yesu? Naari neereke asinthamwene anyu, amusi anyu, annooveehani? Pooti weera awo khanookosoopani nnene, nave-tho pooti weera nyuwo munnaviriha maxupo omutekoni mwaha wa ororomeleya wanyu. (Aheb. 13:18) Nave-tho pooti weera nyuwo munnaviriha maxupo a ottharatthariwa ni anamalamulela a elapo mwaha wa muteko nyuwo munvaraanyu woolaleera mene muhipwatthaka maxupo nyuwo munnkumanaanyuno, Paulo ohimme weera onoowereya ohakalala. Moota heeni?

11. Mwaha wa heeni nintthuneyaahu ovirelela ovilela nihipwatthaka maxupo ninvirihaahu?

¹¹ Hiyo ninnatthuneya ohakalala vaavo ninvirihaahu maxupo mwaha wooweera napaka eyo nnimunnuwihera mukhalelo wootepa otthuneya. Eliivuru ya Aroma 5:3 eneera, “ohawa onnaruha ovilela.” Akristu ootheene ennaviriha maxupo, mene nto ootheene hiyo nintthuneya ovilela. Mene nintthuneya ovirelela okhala oolikaneene weera nivilele nihipwatthaka maxupo ninkelaahu oviriha, napaka eyo nnoorowa woona okwanela wa yoolaiheraahu. Hiyo khanintthuna okhala ntoko atthu ale Yesu aalikanxenraawe ni mmiso waamorenle vamalukuni yahaakhanlevo etthaya yintxipale. Atthu awo woopatxerani ennaakhulela ekhaikhai ni ohakalala, mene vaavo enaakhumelelaaya ‘maxupo a ottharatthariwa’ awo ennakhulumuwa ni ohiya ororomeleya. (Math. 13:5, 6, 20, 21) Ekhaikhai weera hiyo khonnisivela naavirihaka maxupo naari naattharatthariwaka, mene ovirelela ovilela onnakumihera mareeliho mantxipale. Mwa mukhalelo heeni?

12. Mareeliho heeni nimphwanyaahu vaavo ninvirihaahu maxupo?

¹² Yakobe ohimme weera, ovilela naari nikumanakano maxupo pooti oruuhela mireerelo, owo olempe ha: “Vano ovilela okumihe muteko womalela, wera mukhale omalela ni akumi, muhithoiwaka etthu.” (Yak. 1:2-4) Yakobe ohimme weera ovilela wahu wookhalano yoolakela, yoolakela heeni? Ovilela wahu pooti onikhavihera okhala oopixa murima, anroromelo ni otepaxa omuroromela Yehova, nave-tho ovilela wahu pooti oruuhela mireerelo sootepa otthuneya.

13-14. Eheeni enkhumelela vaavo ninvirelelaahu ovilela, ni eyo envoleela moota heeni yoowehereraahu? (Aroma 5:4)

¹³ Mmusome Aroma 5:4. Paulo ohimme weera ovilela onnaruuha ‘waakhuleliwa.’ Eyo khentthuna ohima weera Yehova onnamusivela emaara yeeyo nyuwo munvirihaanyu maxupo a ottharatthariwa, hooye. Opwaha mwa yeeyo Yehova onnahakalala ni nyuwo, ovilela wanyu onnaruuha waakhuleliwa ni waakhuleliwa iwo mareeliho ohakalaliha! — Nsal. 5:12.

¹⁴ Muupuweleke weera Abrahamu aavilela nnaamweera aaviriha maxupo mantxipale, menento Yehova aahakalala vantxipale nuuwo mpaka ophiyera omwiitthana nthamwene awe ni annamoona okhala mutthu a xariya. (Eph. 15:6; Arom. 4:13, 22) Emoha-moharu enneereya olelo va ni hiyo, Yehova khannaakhulela mwaha wa itthu ninweraahu opaka mmutekoni moolaleera naari mwaha wa miritti nraahuno. Mene Yehova onnanaakhulela emaara yeeyo ninvilelaahu ni nroromelo, nave nihipwatthaka wunnuwa wahu naari itthu ninvirihaahu, ootheene hiyo ninnatthuneya ovirelela ovilela. Wakhala weera nyuwo viinaano va munnaviriha maxupo,  muroromeleke weera Yehova onnahakalala, vaavo ninsuwelaahu weera ninnaakhuleliwa ni Yehova, ninnakhalano nroromelo noolipa weera itthu Yehova onilaihenraawe sinookwanela.

15. Eheeni murummwa Paulo ohimmaawe va Aroma 5:4, 5, ni nikoho heeni ninkhumelela?

¹⁵ Ntoko murummwa Paulo aahimmaawe, hiyo ninnakhuleliwa ni Yehova, hiyo ninnaakhuleliwa ni Yehova nivirelelaka okhala ororomeleya naavirihaka maxupo. Moone ele murummwa Paulo aavirelenlaawe wuuluma va ekarta aalepenlaawe Aroma: “Ovilela onnaruha wakhuleliwa, wereriwa onnaruha ororomela, vano ororomela khonòtxeleya.” (Arom. 5:4, 5) Eyo pooti ohiiwexexeya nnene, mwaha wa heeni? Mwaha wooweera va Aroma 5:2 Paulo aahimme weera akristu a Oroma yaakhalano yooweherera, “yooweherera ya ovuwa wa Muluku.” Atthu akina yaamwiikohaka ha: ‘Akristu aakhalano yooweherera, vano mwaha wa heeni tho Paulo atthikelaka wuuluma woohima sa yooweherera?’

16. Moota heeni yooweherera nraahuno enkelaaya wunnuwa? (Nwehe efootu.)

¹⁶ Hiyo pooti wiiwexexa nnene masu a murummwa Paulo wakhala weera ninnasuwela weera yooweherera etthu entthuneya waatxeerera naari wunnuwa. Mwa ntakihero, neereke nyuwo munnuupuwelela ekwaha yoopatxera mwiiwalaanyu sa Omwene wa Muluku mwa yoosoma anyu ya Biblya? Pooti weeraka woopatxerani nyuwo mwannuupuwela weera okhala mahiku ootheene mparaisu elapo ela ya vathi, etthu yootepa oreera ehimphwanelaaya okhala ekhaikhai. Mene nyuwo muxutterakaru vantxipale woohima sa Yehova ni soolaihera sawe siri mBiblyani, nroromelo nanyu noolipa nooweera itthu Yehova olaihenraawe onookwanihera.

17. Mwa mukhalelo heeni yooweherera anyu envirelelaaya wunnuwa nnaamweera mwiivaherenreene ni opatisiwa?

¹⁷ Nnaamweera nyuwo mwiivaherenreene ni opatisiwa, onnatthuneya ovirelela omusuwela Yehova, ni ovirelela wunnuwa moomunepani. (Aheb. 5:13–6:1) Nave nyuwo munoorowa waakhulela masu eri va Aroma 5:2-4 apaale nyuwo  mooviriha maxupo mantxipale weera mwaakhuleliwe ni Yehova musuwelakaru weera Yehova onnoosivelani. Nyuwo munnaakhulela ni murima anyu wootheene ni weera soolaihera sa Yehova sinookwanela. Vaavo nyuwo musuwenlaanyu ekhaikhai yoowehereraanyu, yoolipa vantxipale. Nave nyuwo munnoona yooweherera eyo okhala ekhaikhai ni yootepa othanleya, yooweherera eyo ennavoleela mikhalelo sahu sa mweekumini, etxentxaka moota munaathokororaanyu amusi anyu ni moota mumpaka anyu soothanla sanyu ni moota munvarihelaanyu muteko etempu anyu.

18. Yehova onanroromeliha eheeni?

¹⁸ Paulo aahima etthu ekina yootthuneya woohima sa nroromelo hiyo nraahuno naakhuleliwa vale ni Yehova. Owo onroromeliha weera yoowehereraahu enoorowa okwanela moohihovela. Mwaha wa heeni hiyo nintthuneyaahu ororomelaka eyo? Paulo ohaatxeerera alepaka masu ala anaaroromeliha akristu eeraka: “Vano ororomela khonòtxeleya, niwoko otthuna wa Muluku wòheliwa mmirimani mwahu nthowa na munepa wottela nivahiwahu.” (Arom. 5:5) Hiyo nookhalano mathowa a mulaponi anneeriha ororomela weera Yehova oonivaha yooweherera.

19. Eheeni nyuwo muntthuneyaanyu wuupuwelelaka woohima sa yooweherera?

¹⁹ Mwiihiyereke etempu weera muupuwelele soolaihera Yehova ampakenlaawe Abrahamu ni moota Yehova aamwaakhulenlaawe mpakana omwiitthana nthamwene awe. Ikwaha sootheene Abrahamu aawehereraawe owo khaaweherera mahala, Biblya oneera: “Siso Abrahamu, mwa ovilela wawe otokotoko, àmphwanya natiri Muluku ammanenlaiye.” (Aheb. 6:15; 11:9, 18; Arom. 4:20-22) Abrahamu khaakhanle ooxupeya, nave-tho mwamuroromela vale Yehova khamunkela oxupeya, yoowehereraanyu enkela oreelihiwa ni eyo ti yeekhaikhai. Nave eyo entthuneya weera yoohakalalihekeni nyuwo ohiya wookhulumulani! (Arom. 12:12) Paulo olempe ha: “Vano, Muluku òroromeleya òsariheni ohakalala wothene ni murettele mowiwelelani, wera muruwerye mororomeleya ni ikuru sa munepa wottela.” — Arom. 15:13.