Neereke nyuwo moomusoma moomaaleleya Nwehereri a eyaakha ene yeela? Vanonto mwaakhule moomaaleleya makoho ala:

Ontaphulela eheeni “orukunuxa murima ahu?” (Arom. 12:2)

Hiyo khontthuneya paahi ophwaneliha ekumi ni miteko sooreera, mene onnatthuneya woonihera omutthu nipakaka matxentxo weera nimuhakalalihe Yehova. — w23.01, epax. 8-9.

Ninrowa woonihera hayi okhala eriyari-neeriyari vaavo nnoonaahu itthu sineereya mulaponi?

Hiyo ninnapwattha itthu sineereya mulaponi mwaha wooweera sintxipale sinkwanihera iprofesiya sa mBiblyani. Menento khontthuneya weerera otthoma itthu seiyo sikhanle soowiihera okawanyeya variyari vahu. Onookhala wa miruku osuwela ni wiiwexexa miruku ninvahiwaahu ni mareherero a Yehova. (1 Akor. 1:10) — w23.02, epax. 16.

Moota heeni opatiso wa Yesu oraaya woovirikana ni wa atthareli awe?

Owo khaatthuneya wiivaherera wa Yehova mwaha wooweera owo aayarinwe nloko noowiivaherera. Nave owo aari oomalela nto mwaha wa yeeyo khaatthuneya ottharuwa soottheka. — w23.03, epax. 5.

Munkela waakhavihera hayi atthu akina ovaha ikomentaariyu mmithukumanoni?

Munimwaakhavihera nvahaka ikomentaariyu sookhuveya, mweera haawo atthu akina enookhalano eparakha yoovaha ikomentaariyu saya. Opwaha mwa yeeyo, khontthuneya okomentari ipontu sootheene sa va paragrafuni, mwaha wooweera mweera haawo khenrowa ohala etthu weera atthu akina ekomentari. — w23.04, epax. 23.

Ontaphulela eheeni ‘Musewe wootteela’ onuulummwa va Yesaya 35:8?

Musewe owo onthoonyera mukwaha ayuda yaarowaaya opaka ekhumaka oBabiloniya erowaka oYerusalemu. Menento ontaphulela eheeni wa hiyo olelo va? Iyaakha sintxipale sivinre ehaakunve eyaakha ya 1919, musewe ola waarehereriwa orehereriwa iwo onhela mpuwa otaphulela wimprimir ni itthu ikina. Atthu a Muluku enneetta musewe ola erowaka eparaisu ya omunepani yeeyo enrowa waaphwanyiha mareeliho a Omwene wa Muluku. — w23.05, epax. 15-19.

Miruku heeni ennivahaaya eliivuru ya Miruku ekapiitulu ya 9 woohima sa asithiyana eeli?

Yoolepa ya Miruku 9 ennamuhima muthiyana oololo, yoowo ompaka nwopelo onroiha omahiye. Ni muthiyana onthoonyera ekhaikhai yoowo ompaka nwopelo onroiha ephiro yooloka. (Mir. 9:1, 6, 13, 18) — w23.06, epax. 22-24.

Moota heeni Yehova aamoonihenraawe Lothi weera aari oopixa murima?

Yehova aamweerela Lothi weera atthawele omwaako. Mene Lothi anvekela weera atthawele oZowari ni Yehova aamwaakhulela. — w23.07, epax. 21.

Etthu heeni muthiyana ootheliwa ontthuneyaawe opaka oonelela weera aiyawe annoonela iviidiyu sa atthu ankonihana woohireerela?

Muthiyana owo khontthuneya wiivaha nthowa. Owo ontthuneya owehexexaka onthamwene awe ni Yehova ni ophimelela matakihero a mBiblyani a asithiyana yaawo yaaxupeñye, mene yaamaalihinwe. Muthiyana owo pooti waakhavihera aiyawe osepa itthu seera saakhulumule moomunepani. — w23.08, epax. 14-17.

Vaavo ninkohiwaahu woohima sa soororomela sahu, moota heeni wiiwexexa mwaha owo onrowaaya onikhavihera waakhula mooreerela murima?

Ohiya woona nikoho nno ntoko mutthu owo ontthuna weera nivaanyihaneke, waamukhala wooreera woona weera nikoho etthu yootthuneya wa mutthu owo. Neera haawo nnoowera omwaakhula mooreera murima. — w23.09, epax. 17.

Ntakihero na Mariya ninnixuttiha eheeni woohima sa waasa nikhavihero?

Mariya asuwelakaru weera taarowa omuyara Mesiya, owo aahaasa nikhavihero wa atthu akina. Nlaika Gabriyeli ni Elizabethi yaahimulipiha ni soolepa, hiyo-tho pooti ophwanya ikuru ninhaawelaahu moorweela mwa nikhavihero na asinna. — w23.10, epax. 15.

Moota heeni Yehova onaakhulaawe mavekelo ahu?

Yehova onroromeliha weera oneereke wiiwa mavekelo ahu nave waakhula mavekelo ahu moovarihana ni yootthuna awe. (Yer. 29:12) Yehova pooti waakhula mavekelo ahu mwa mikhalelo soovirikana, mene nroromeleke weera ikwaha sootheene Yehova onoonikhavihera. — w23.11, epax. 21-22.

Aroma 5:2 onnuuluma sa yooweherera, vanonto moota heeni eversu ya 4 enuulumaaya-tho veeli sa yooweherera?

Vaavo mutthu oniiwaawe mitthenka sooreera, owo onnakhalano yooweherera ya okhala mparaisu mahiku ootheene elapo ela ya vathi. Menento aaviriha maxupo ni owera ovilela, mutthu owo onnaakhuleliwa ni Yehova ni yoowehereraawe ennakhala yootepaxa olipa ni yoororomeleya. — w23.12, epax. 12-13.