1-2. Moota heeni asitiithi entthuneyaaya owaakhulaka anamwane aya yaawo empaka makoho woohima sa soororomela sahu sinvarihana ni Biblya?

 ANTXIPALE yaamwaakhulela weera okhala tiithi muteko wa etempu yootheene. Wakhala weera nyuwo tiithi a mwaana mukhaanini, hiyo ninnoottottopelani mwaha wa wiilipihera wanyu weera mmukhavihere mwaninyu okhalano nroromelo noolipa. (Ola. 6:6, 7) Vaavo mwaninyu onunnuwaawe, owo pooti opatxera opaka makoho woohima sa soororomela sahu sinvarihana ni Biblya, ohela mpuwa malamulo a Muluku.

² Woopatxerani, nyuwo pooti oxupeya ni makoho a mwaninyu. Nyuwo pooti opatxera wuupuwela weera mwaninyu onnapaka makoho awo mwaha wooweera khaanoono nroromelo noolipa ni Muluku ni Biblya. Mweekhaikhai, vaavo anamwane enunnuwaaya, ennatthuneya opaka makoho weera elipihe nroromelo naya. (1 Akor. 13:11) Tivawonto khontthuneya woova. Nyuwo pooti woona makoho ootheene mwaninyu ompakaawe woohima sa soororomela sahu ntoko eparakha weera mmukhavihere waatxeerera osuwela wawe.

3. Itthu heeni ninrowaahu othokorora mwa yoosoma ene yeela?

³ Mwa yoosoma ene yeela, nnoorowa woona moota heeni asitiithi enrowaaya waakhavihera anamwane aya (1) wunnuwihera soororomela saya, (2) ovaha mwiitti malamulo a mBiblyani, ni (3) waakihera soororomela saya. Nave-tho, nnoothokorora mwaha wa heeni oraaya wooreera anamwane opaka makoho ni itthu ikina seiyo imusi sintthuneyaaya opaka seiyo sinrowa waavaha eparakha asitiithi wuuluma ni anamwane aya woohima sa soororomela sahu.

 MMUKHAVIHERE MWANINYU WUNNUWIHERA SOOROROMELA SAWE

4. Makoho heeni anamwane ekhanlaaya oopaka, ni mwaha wa heeni?

⁴ Asitiithi akristu aasuwela weera nroromelo nahu wa Muluku khaiyene etthu mwaana onvalaawe. Nyuwo khamuyarinwe mmuroromelaka Yehova, eyo-tho enneereya ni anamwane anyu. Moovira etempu, mwaana pooti wiipakelaka makoho ntoko ala: ‘Etthu heeni enkiroromeliha weera Muluku ookhala? Miyo kinnatthuneya ororomela etthu Biblya onhimaawe?’ Mweekhaikhai, Biblya onnanooperera weera ‘nivariheleke muupuwelo ahu’ weera “niwehexexe sothesene.” (Arom. 12:1; 1 Ates. 5:21) Nto moota heeni nyuwo munrowaanyu omukhavihera mwaninyu olipiha nroromelo nawe.

5. Etthu heeni asitiithi entthuneyaaya opaka weera yaakhavihere anamwane aya wunnuwihera nroromelo naya wa Biblya? (Aroma 12:2)

⁵ Mmukhavihere mwaninyu woonelela mwaneene awe weera oophwanya ekhaikhai. (Mmusome Aroma 12:2.) Vaavo mwaninyu onoopakelaaweni makoho, muttotteleke mureerelo eparakha eyo weera mmoonihere moota woophwanya waakhuliwa avarihelaka muteko ikaruma sahu soothola-thola, ntoko Índice das Publicacões da Torre de Vigia ni Liivuru onaakhavihera anamoona a Yehova otholathola nyaha, nipuro nneera “Bíblia” owo pooti waasaasa “Inspirada por Deus” weera aphwanye itthu sinoonihera weera Biblya khaiyene paahi liivuru ooreera alempwale ni atthu. Opwaha mwa yeeyo, ti “nsu na Muluku.” (1 Ates. 2:13) Mwa ntakihero, owo pooti othola-thola woohima sa ecidade ya khalayi ya wAsiriya, oNinive. Khalayi atthu akina enanvaanyiha Biblya, yaahima weera ecidade ya oNinive khayintale okhala. Mene eyaakha ya 1850, mathala a ecidade ele yaahooneleliwa, yeeyo enoonihera weera yoohima ya Biblya ti yeekhaikhai. (Sof. 2:13-15) Weera aphwanye soohimmwa sikina sa moota onyaanyiwa wa Ninive waakwanihenraaya eprofesiya ya mBiblyani, owo pooti oweha mwaha oneera “Nyuwo mwaasuwela?” va Nwehereri a Novembro a 2021. Emaara anlikanxeraawe ele anxutteraawe ni irevista sahu, ni ele anxutteraawe ni encyclopedia nave itthu ikina atthu enroromelaaya, mwaninyu anoorowa okhalano mathowa ooreera oowaatxeerera nroromelo nawe wa ele Biblya onhimaawe.

6. Moota heeni asitiithi enrowaaya wunnuwihera osuwela wa anamwane aya? Nvahe ntakihero. (Nwehe efootu.)

⁶ Mmukhavihere mwaninyu wuupuwela itthu sinoonihera weera Biblya teekhaikhai. Asitiithi aakhalano iparakha soovirikana weera yuulume ni anamwane aya woohima sa Biblya ni woohima sa nroromelo wa Muluku. Iparakha iyo pooti okhumelela vaavo enxekuraaya omuseu, ojardim, naari vaavo enxekuraaya omuseu ya efiliyaale ya Anamoona a Yehova. Mwa ntakihero, vaavo munxekuraanyu omuseu, naari muxekuraka moorweela mu telefooni naari mu komputadoreni,  nyuwo pooti omoonihera mwaninyu sooweereya sa khalayi ni itthu sa khalayi seiyo sinrowa omweeriha olipiha nroromelo nawe weera Biblya teekhaikhai. Neereke mwaninyu oosuwela weera nsina na Muluku noolempwa vanlukuni nivirinhe iyaakha 3.000 nenno nsuwelinwe ntoko nluku na oMowabi? Nluku neekhaikhai na oMowabi ninnaphwanyeya omuseu ya oLouvre oParis, oFrança. Opwaha mwa yeeyo, ekoopiya ya nluku na oMowabi ninnapwanyeya omuseu ya oSede Mundial ya Anamoona a Yehova oWarwick, oNova York, eparte eneera ‘Biblya ni nsina nootteela na Muluku’ (“The Bible and the Divine Name”). Nluku na oMowabi ninnoonihera weera mwene Mesha oMowabi aamurukunuwela Israeli. Ni eyo ennavarihana ni Biblya. (2 Mam. 3:4, 5) Vaavo mwaninyu onrowaawe woonaka ni maitho awe weera Biblya teekhaikhai, nroromelo nawe nnoovirelela olipa. — Mulikanxere ni 2 Sowereya 9:6.

7-8. (a) Etthu heeni ninxutteraahu ni itthu sooreera nnoonaahu mulaponi? Nvahe ntakihero. (Nwehe efootu.) (b) Makoho heeni enrowa omukhavihera mwaninyu wunnuwihera omuroromela wawe Mpattuxa?

⁷ Mmukhavihere mwaninyu wuupuwelela woohima sa itthu siri mulaponi. Vaavo munvaraanyu vamoha omatta, naari ojardim mmukhavihere mwaninyu oweha itthu sootikhiniha seiyo sinooneya mulaponi. Mwaha wa heeni? Mwaha wooweera itthu iyo sinnoonihera weera ookhala mutthu oowera ni amiruku opanke. Mwa ntakihero, itthu sintxipale siri mulaponi, sipakinwe mwa mukhalelo woorukurera, ni masiyentista enneerera osoma vantxipale woohima sa itthu iyo. Siyentista mmoha oneeriwa Biofisico Nicola Fameli onnahima weera vaavo enkontariwaaya manummero a itthu iyo soorukureera siri mulaponi, ennaphwanyiwa manummero mantxipale, ni iyo sinnahela mpuwa ele eniitthaniwa sequência de Fibonacci. Itthu iyo soorukureera pooti wooniwa mwa itthu sintxipale ntoko moota sipakinwaaya igláxia, ikhoropa, makukhu a miri naari girassol. a

⁸ Vaavo mwaninyu onrowaawe oxuttera itthu ikina oxikola, owo onimoonelela weera malamulo teneettiha itthu siri mulaponi. Mwa ntakihero, mwiri onnakumihera itamphi ni itamphi iyo sinnakumihera miri mikhaanini, mukhalelo owo oniitthaniwa fractais. Mikhalelo ntoko iyo sinnaphwanyeya mwa itthu ikina sa mulaponi. Vanonto taani opanke malamulo enkumihera mikhalelo iyo sooreera? Taani opanke itthu iyo soorehereya nnoonaahu mulaponi? Vaavo mwaninyu onrowaawe wuupuwelelaka makoho ala, onooneya weera owo onrowa wunnuwihera nroromelo noolipa weera Muluku topattunxe itthu sootheene. (Aheb. 3:4) Imaara ikina, nyuwo pooti omukoha, “Wakhala weera Muluku tonipattunxe, neereke khaarowa onivaha miruku seiyo saarowa onikhavihera okhala oohakalala?” Muhoolo mwaya nyuwo pooti omuleela weera, miruku sene seiyo sooreera ninnaphwanya mBiblyani.

 WUNNUWIHERA OVAHA MWIITTI MALAMULO A MBIBLYANI

9. Etthu heeni enrowa omweeriha mwaana opaka makoho woohima sa malamulo a Biblya?

⁹ Wakhala weera mwaninyu onnapaka makoho woohima sa malamulo a mBiblyani, mweerereke osuwela etthu emmweeriha opaka makoho awo. Neereke owo anoohiroromela malamulo a mBiblyani, naari emaara anuulumaawe ni atthu akina onoomuxupa waakihera soororomela sawe? Wakhala weera ti hiiho, nyuwo pooti omukhavihera mwaninyu ovaha mwiitti malamulo a mBiblyani musomaka eliivuru Mukhaleno ekumi yoohimala!. b

10. Moota heeni nyuwo munrowaanyu omukhavihera mwaninyu wuupuwelela woohima sa onthamwene awe ni Yehova?

¹⁰ Mmooperereke mwaninyu ovaha mwiitti onthamwene awe ni Yehova. Emaara mummusomaanyu Biblya ni mwaninyu, mweerereke ompakela makoho ni matakihero mu eliivuru Mukhaleno ekumi yoohimala!. (Mir. 20:5) Mwa ntakihero, yoosoma 8 ennamulikanxera Yehova ni nthamwene onnipwattha yoowo onnileela itthu sinrowa onikosoopa ni ninttottelaahu mureerelo. Mwamuthokorora vale 1 Yohani 5:3, nyuwo pooti omukoha ha, “Nsuwelaka weera Yehova nthamwene ooreera murima, nooneleke hayi itthu onnirumaawe opaka?” Nno pooti okhala nikoho nookhweya, mene nnoomukhavihera mwaninyu woona malamulo a Muluku ntoko yoowoonihera ya nsivelo na Yehova. — Yes. 48:17, 18.

11. Moota heeni nyuwo munrowaanyu omukhavihera mwaninyu ovaha mwiitti malamulo a mBiblyani? (Miruku 2:10, 11)

¹¹ Muthokorore moota ninttottelaahu mureerelo naavarihelaka muteko miruku sa mBiblyani. Vaavo mummusomaanyu Biblya ni othokorora yoolepa ya kata nihiku vamoha, mooneke moota miruku sa mBiblyani sinkhaviheraaya emusi anyu. Mwa ntakihero, mwaninyu onnoona otthuneya waya okhala mutthu oowiilipihera ovara muteko ni oororomeleya? (Aheb. 13:18) Nyuwo-tho pooti wuuluma moota ovarihela muteko miruku sa mBiblyani sinnikosoopaaya weerutthuni ni mmuupuweloni. (Mir. 14:29, 30) Othokorora miruku iya, moohihovela, sinoorowa omukhavihera mwaninyu osiveliwa ni miruku sa mBiblyani. — Musome Miruku 2:10, 11.

12. Moota heeni tiithi mmoha omukhavihenraawe mwanawe ovaha mwiitti itthu sooreera sa malamulo a mBiblyani?

¹² Steve, tiithi mmoha oFrança, onnahima moota owo ni mwaarawe emukhavihenraaya mwanaya mmiravo, Ethan, woona moota malamulo a Yehova enooniheraaya nsivelo na Yehova: “Ninnapaka makoho ntoko, ‘Mwaha wa heeni Yehova ontthunaawe weera nttittimiheke nlamulo nna? Moota heeni eyo enooniheraaya weera onnansivela? Eheeni yaakela weereya waakhanle weera khanivarihenle muteko nlamulo nna?’” Makoho ntoko ala aamukhavihera Ethan osivela malamulo a Yehova. Steve onnaatxeerera eeraka: “Yootthunaahu ori omukhavihera Ethan woona weera mBiblyani sookhalamo miruku sootepa otthuneya opwaha miruku sa atthu.”

13. Moota heeni asitiithi enrowaaya waatxentxeriha anamwane aya weera evariheleke muteko miruku sa mBiblyani? Nvahe ntakihero.

¹³ Mmukhavihere mwaninyu ovarihela muteko miruku sa mBiblyani. Emaara yoopaka eyo tivaavo mwaninyu onvahiwaawe TPC oomusoma liivuru oxikola. Atthu enuulummwa muliivuruni mmo pooti weeraka ennapaka itthu sihimmusivela Yehova, mwa ntakihero, okonihana moohireerela naari okhala oowali. Ni liivuru owo oolempwa mwa mukhalelo onoonihera weera itthu iyo khaiyene ti soonanara yeeyo enrowa omweeriha mutthu ole onsoma otthuna waatakiha. Nyuwo pooti omukhavihera mwaninyu wuupuwelela woohima sa itthu atthu awo empakaaya ni miruku sa mBiblyani.  (Mir. 22:24, 25; 1 Akor. 15:33; Afil. 4:8) Eyo pooti omukhavihera ovaha onamoona wa aprusoore awe ni wa makoleeka awe vaavo anrowaawe osomaka eparte othanlelinwaawe.

MMUTXENTXERIHE MWANINYU WEERA AWEREKE WAAKIHERA SOOROROMELA SAWE

14. Mwaha heeni waarowa omweeriha mmiravo mukristu ohisuwela etthu yoowuuluma, ni mwaha wa heeni?

¹⁴ Amiravo makristu imaara ikina pooti waaxupa waakihera soororomela saya. Awo pooti woova vaavo musaala enkumiheriwaaya yooxuttiha weera hiyo nikhumme waakhole. Mwaha wa heeni? Maprusoore pooti ohima weera yooxuttiha yooweera hiyo nikhummwe waakhole ti yeekhaikhai. Wakhala weera nyuwo tiithi, moota heeni nyuwo munrowaanyu omukhavihera mwaninyu ororomela weera ele onaakhulelaawe ti yeekhaikhai?

15. Etthu heeni enrowa omukhavihera mmiravo mukristu okhalano nroromelo noolipa wa ele onroromelaawe?

¹⁵ Mmukhavihere mwaninyu olipiha nrorormelo nawe wa ele onroromelaawe. Mwaninyu khanrowa wuuliwa muru mwaha wooweera oosuwela ekhaikhai woohima sa soopattuxiwa. (2 Tim. 1:8) Mwaha wa heeni ninhimaahu hiiho? Ekhaikhai ti yooweera masiyentista mantxipale aasuwela weera ekumi khekhumelenle meekhaaya. Masiyentista awo ennoona itthu sinoonihera weera ookhala mutthu amiruku opattunxe itthu sootheene sikhanle ni sirino ekumi. Yookhumelelaaya, awo khenaakhulela yooxuttiha enhima weera hiyo nikhumme waakhole yeeyo enxuttihiwa mwa ixikola sa mulaponi. Mwaninyu pooti olipiha soororomela sawe aphimelelaka itthu siweerinhe asinna akina ni asirokora ororomela weera ekumi eroopattuxiwa. c

16. Moota heeni asitiithi enrowaaya omukhavihera mwanaya waakihera omuroromela wawe Mpattuxa? (1 Pedru 3:15) (Nwehe efootu.)

¹⁶ Mmukhavihere mwaninyu waakihera omuroromela wawe Mpattuxa. (Mmusome 1 Pedru 3:15.) Nyuwo pooti woona okhala wooreera osoma vamoha nyaha siri va jw.org eparte eneera “Os Jovens Perguntam — Criação ou evolução?” Ni muhoolo mwaya mwaninyu pooti othanla moota woothokorora mwaha owo weiwo onrowa omukhavihera waakhavihera atthu akina osuwela weera ookhala Mpattuxa. Mmuupuxereke weera owo khantthuneya onyakulihana ni makoleka awe ooxikola. Mmooperereke ovarihela miruku sookhweeya vaavo atthu akina enuulumaaya mwaha wooreera. Mwa ntakihero, kolekaawe ooxikola pooti ohima weera: “Miyo kinroromela itthu kinoonaaka, ni nkintale  omoona Muluku.” Mmiravo mukristu pooti omwaakhula ha: “Nkuupuwelani nyuwo mweettaka mutuphini ottayi ni atthu ni munnaphwanya epoosu yooreera, mwaarowa woonela hayi? Wakhala weera epoosu eyo ennoonihera weera ookhala mutthu amiruku opanke, munoonela hayi okhala wa elapo!”

17. Moota heeni asitiithi enrowaaya waakhavihera anamwane aya waasaasera iparakha soowaaleela ikhaikhai sa mBiblyani atthu akina? Nvahe ntakihero.

¹⁷ Mmooperere mwaninyu waasaasa iparakha soowaaleela atthu akina woohima sa ikhaikhai sa mBiblyani. (Arom. 10:10) Nyuwo pooti olikanxera wiilipihera wa mwaninyu weera aaleele atthu akina nroromelo nawe ni wiilipihera ontthuneya weera mutthu axuttere orumiha ikaruma sa itxipo. Woopatxerani, naxikola onnarumiha ikaruma sookhweya, mene noovira etempu onnakhala wookhweya owo orumiha ikaruma iyo sa itxipo. Vamoha-moharu, mmiravo mukristu woopatxerani pooti opatxeriha otthekula ni nyaha sookhweya weera aaleele atthu akina soororomela sawe. Mwa ntakihero, owo pooti omukoha koleekaawe ooxikola: “Nyuwo moosuwela weera ma engenheiro vaavo empakaaya itthu entakiha itthu sa mulaponi? Kintthuna owooniherani eviidiyu emoha yootepa oreera.” Noomala owo omoonihera eviidiyu eneera Será Que Houve Um Projeto? Owo pooti omukoha koleekaawe eeraka: “Wakhala weera masiyentista ennavuwihiwa mwaha woopaka itthu etakihaka itthu siri mulaponi, taani omphwanela ovuwihiwa mwaha wa itthu nnoonaahu mulaponi?” Otthekula iwo wookhweya pooti omweeriha koleekaawe owo otthuna oxuttera itthu ikina.

NVIRELELE OMUKHAVIHERA MWANINYU OLIPIHA NROROMELO NAWE

18. Moota heeni asitiithi enrowaaya ovirelela olipiha nroromelo na anamwane aya wa Muluku?

¹⁸ Ninkhala elapo yeeyo atthu antxipale ehimmuroromelaaya Yehova. (2 Ped. 3:3) Nto asitiithi, mwaamusomaka Biblya vamoha ni mwaninyu, mmooperereke osoma nyaha seiyo sinrowa omukhavihera waatxeerera ottittimiha wawe masu a Muluku ni malamulo awe. Mmukhavihere mwaninyu wuupuwelela woohima sa soopattuxiwa sootikhiniha sa Yehova. Mmukhavihere ohela mwiitti iprofesiya sa mBiblyani seiyo sikwanenle. Ni opwaha mwa sootheene, nvekeleke vamoha ni mwaninyu ni mmuheleke mpuwa mmavekeloni mwanyu. Wakhala weera munnapaka eyo, nyuwo muroromeleke weera Yehova onoorowa otthuvela wiilipihera wanyu weera mmukhavihere mwaninyu olipiha nroromelo nawe. — 2 Sow. 15:7.