Miyo kiyarinwe eyaakha ya 1927 ecidade ekhaanini waattamela oChicago, oIllinois, wEstados Unidos da América. Asitiithi aka erinono anamwane 5, Jetha, Don, miyo, Karl, ni Joy. Ootheene hiyo noolakela ompakela Yehova ele ninweraahu. Jetha oorowela exikola ya oGileyadi eyaakha ya 1943. Asinnaka araru aarowa oBetheli ya oBrooklyn, oNova York. Don, eyaakha ya 1944, Karl, eyaakha ya 1947, ni Joy, eyaakha ya 1951. Ntakihero nayasa ni na asitiithi aka, naakilipiha vantxipale.

Asitiithi aka yannamusoma Biblya ni yannamusivela Muluku, ni awo-tho yaanixuttiha omusivela Muluku. Mene apapa etthikakaru vaavo yaaronwaaya wEuropa owana ekhotto yoopatxera ya elapo yootheene, awo yaahiya ororomela ittiini. Menento amma yaaxukurela vantxipale mwaha wooweera apapa yaatthikela owaani ereene akumi, ni awo yaaweerela apapa: “AKarl, nrowe ntthikele okerexa.” Nto apapa yaawaakhula: “Miyo kinoorowa ni nyuwo mpaka iwo, mene nkinrowa ovolowa.” Amma yaahaakoha: “Mwaha wa heeni?” Apapa yaahaakhula: “Mpuwa mwa ekhotto, ahooleli a ettiini emoha yannakhavihera ikhurupu soovirikana ni yannaareeliha anakhotto a elapo aya. Nto neereke Muluku annakhavihera ikhurupu iya soopiili?”

Nihiku nimoha vaavo amma yaaraaya okerexa, Anamoona a Yehova eeli yaaphiya owaani. Awosa yaahaavaha apapa ivolume piili sa liivuru, Luz yoowo uuluma woohima sa Apokalise. Apapa yaahoonihera ntthuno ni yaahaakhulela. Avinyaka, vaavo amma yonnaaya iliivuru iye, yaapatxera osoma. Nihiku tinno, awo yaahiiwa soohimmwa mujornaaleni saawopaka atthu weera yamusomeke Biblya evarihelaka muteko iliivuru, Luz. Nto awo yaalakela orowa. Vaavo yaaphiñyaaya nipuro nne, muthiyana mmoha aawaakhelela vamulako. Avinyaka amma yaamoonihera liivuru mmoha a iliivuru iye ni yaamukoha, “Liivuru ola anxuttihiwa vaava?” Muthiyana ole aahaakhula, “Aani nthamwene, pooti ovolowa.” Esemana yoottharelana, amma yaakikuxa miyo vamoha ni asinnaka, ni muhoolo mwaya, nannarowa iwo isemana sootheene.

Muthukumano mmoha, munna aahoolela yoosoma, aakivekela osoma Nsalmu 144:15, nenno ninhima weera, ale emmukokhorela Yehova toohakalala. Miyo yaakisivela vantxipale yoolepa ele. Nave-tho ennakisivela yoolepa ya 1 Timotheyo 1:11, enhima weera Yehova “Muluku [oohakalala]” ni Aefeso 5:1, yoowo onhima weera hiyo ontthuneya nikhaleke atthu “òmutakiha Muluku.” Miyo kaahoonelela weera kannatthuneya okhala oohakalala mwaha wonvarela Mpattuxa aka, nave kannatthuneya omuxukurela mwaha wa  eparakha ele. Nto miyo kinneerera opaka itthu iya piili mpuwa mwa ekumi aka yootheene.

Muloko waattamenle owaani, waakhala oChicago, owo waarakamela ikilometru soophiyeraka 32. Nnaamweera vareene hiiho, hiyo nannarowa woonela mithukumano, ni omusuwela waka Biblya waahaatxeerereya. Kinnuupuwela ekwaha emoha vaavo munna aahoolela yoosoma aamuthanliyaawe Jetha weera akomentari. Vaavo owo aakomentaraawe, kaahuupuwela ha: ‘Miyo kaasuwela waakhula waya. Miyo kannatthuneya ovenxa moono weera kikomentari-tho.’ Ovinyera vaavo miyo kaapatxera wiireherera weera kivaheke ikomentaariyu saka. Mene etthu yootepa otthuneya, waari weera miyo ni munnaka nannalipiha onthamwene ahu ni Yehova. Miyo kipatisinwe eyaakha ya 1941.

Miyo kinnamuupuwela nnene sene konkreesu a 1942 oCleveland, Ohio. Atthu yaathukumanne mapuro oophiyeraka 50 wEstados Unidos, yaahoonela eprograma ele envarihelaka muteko telefooni. Emusi ahu yaari ni asinna akina waattamela “ecidade ya trailers” nenno asinna yaareherenraaya. Emaara ele yaakhumelela ekhotto yanaaveeli ya elapo yootheene, ni otthara-tthariwa wa Anamoona a Yehova wannaatxeerereya. Ohiyu, asinna yaaheemexa ikaaro aluuxu yaawehihaka okhwipi nnipuro hiyo naaraahuwo. Awo yaavaanela weera yeele eri ekaaro, akhalekemo mutthu mmoha weera aweha-weheke ohiyu wootheene. Wakhala weera yaamukhumelela etthu yoowoopiha, asinna yaamurowa orumiha ibozina ni waapattiha aluuxu weera yaatutheke ale yaatthuna onituphela. Avinyaka, atthu akina yaamurowa onikhavihera. Emaara konnaaka eyo, kaahuupuwela, ‘Moohihovela, atthu a Yehova eri oorehereya ene mwa itthu sootheene!’ Nto miyo kaakona moomaaleleya ni khiyaakhumelenle etthu.

Sivirakaru iyaakha, vaavo miyo keemenlaaka weera kimuupuwelele konkreesu ole, kaahoonelela weera amma khayoonihenre oxupeya naari woova. Awo yaannamuroromela moomalela Yehova ni mareherero awe. Nave miyo nkinrowa ottiwala ntakihero naya.

Konkreesu ahalelaka ophiya, amma yaakhala piyoneira a nthiti. Nto awo yanniiwelela moomaaleleya nyaha seiyo suuluma woohima sa muteko wa etempu yootheene. Vaavo naatthikelaahu owaani, awo yaahimme ha, “Miyo waamukisivela ovirelela okhala piyoneira, mene miyo nkinrowa owera okhala piyoneira ni okosoopa empa ahu meekhaaka.” Avinyaka awo yaanikoha wakhala weera nanwera waakhavihera. Hiyo naahaakhulela. Nto awo yaamuthanlela kata mutthu a hiyo eparte ya empa aarowaawe olimpariki ahinaaye omatabixari. Avinyaka, vaavo naakhumaahu nrowaka oxikola, awo yannawehexexa empa yootheene weera yoone yaareene yoorehereya, avinyaka yannarowa omutekoni woolaleera. Awo yaari oowaatteliwa, mene ikwaha sootheene yannanikosoopa nnene. Vaavo naatthikaahu oxikola weera natxe yootxa ya othana, ikwaha sootheene awo yannaniweherera. Ni mahiku makina, nakhuma oxikola nannarowa naawo muteko woolaleera, ni eyo yaanikhavihera wiiwexexa moota enkhalaaya ekumi ya piyoneiru.

Miyo kaakhala piyoneiru kireeneno iyaakha 16. Nnaamweera apapa yahaakhanle Namoona a Yehova, awo yannatthuna osuwela moota kaakhumelaaka mmutekoni moolaleera. Ohiyu omoha, kaahaaleela  apapa weera nnaamweera kiilipihenre mmutekoni moolaleera, nlelo nkaawenre okhalano yoosoma ya Biblya. Avinyaka miyo kaaheemela ni kaahaakoha, “Nyuwo waamoosivelani omusoma Biblya ni miyo?” Awo yaahuupuwela vakhaani ni yaaheera, “Miyo nkaanoono mathowa enrowa okikhoottihera omusoma Biblya.” Nto miyo kaakhalano eparakha yoowaasomiha Biblya apapaka yaawo yaari namasoma aka a Biblya oopatxera!

Hiyo naamusoma liivuru, “A Verdade Vos Tornará Livres.” Noovira etempu, miyo kaahoonelela weera apapa yannakikhavihera oreherera mukhalelo aka wooxuttiha nave ovirelela omusoma Biblya. Mwa ntakihero, ekwaha emoha vaavo naasomaahu, nisomakaru eparagrafu emoha, awo yaaheera: “Miyo kohiiwexexa etthu liivuru ola ohimmaawe. Mene nyuwo munsuwela hayi weera liivuru ola onhima ekhaikhai?” Miyo nkaakhanle oolikaneene weera kaakhule nikoho nne, nto kaawaakhula, “Miyo nkiwera owaakhulani viinaano, mene mwa yoosoma enttharelana kinoowaakhulani.” Ni mweekhaikhai miyo kaawera owaakhula. Kaaphwanya iversu siiwanyeiha epontu ele naasomaahu. Okhuma vaavo, miyo kaaxuttera othola-thola ni wiireherera nnene weera nipake yoosoma. Eyo yaakikhavihera wunnuwihera mukhalelo aka woomunepani ni wa apapa-tho. Awo yaapatxera ovarihela muteko ele yaaxutteraaya ni yaapatisiwa eyaakha ya 1952.

Vaavo kaaraakano iyaakha 17, kaakhuma owaani. Jetha a avara ntoko misiyonaariya, ni Don avara oBetheli. Ooweeli ala yannasiveliwa vantxipale ni soothanleliwa saya, ni eyo ennakilipiha vantxipale. Nto miyo kaapriyenxeri epetisau ya oBetheli ni ya oGileyadi ni kaamuhiya Yehova weera athanle nipuro kaarowaaka ovareleya muteko. Avinyaka miyo kaawompwa orowa oBetheli eyaakha ya 1946.

Mpuwa mwa iyaakha 75 kivaraka oBetheli, miyo kaakhalano soothanleliwa soovirikana ni kooxuttera itthu sintxipale. Mwa ntakihero, opaka iliivuru, contabilidade, waakhelela ni winviyari itthu sa oBetheli (importação e exportação). Mene etthu yootepa otthuneya wa miyo, ori moota eBetheli ekikhavihenraaya wunnuwa moomunepani. Mwa ntakihero, moorweela mwa othokorora yoolepa ya kata nihiku ya emusi ya oBetheli ni nyaha-tho sa emusi ya oBetheli.

Nave-tho miyo kooxuttera vantxipale ni munnaka ookitthara, Karl, yoowo aawiiye oBetheli eyaakha ya 1947. Owo aari namasoma ni muxuttiha ookhumela nnene a Biblya. Ekwaha emoha, miyo kanvekela nikhavihero wa mwaha kaarowaaka opaka. Miyo kaamuleela weera koothola-thola vantxipale, mene nkinoona moota woovarihela muteko ele kiphwannyaaka. Avinyaka, owo aakikhavihera akikohaka  ha, “Joel, muru wa mwaha anyu toovi?” Emaara ene yeele miyo kaahoonelela etthu aatthunaawe ohima, miyo kaatthuneya ovarihela muteko itthu saarowa okikhavihera wiiwanyeiha muru wa mwaha aka. Miyo nkinrowa ottuwala etthu kixuttenraaka.

Weera nihakalaleke oBetheli, nintthuneya opaka ele ninweraahu mmutekoni moolaleera, ni eyo pooti onikhavihera okhalano sookumanano soolipiha. Miyo kinnuupuwela ekwaha emoha nreene oBronx, ecidade ya oNova York. Miyo ni munna mmoha, naakhuma oxekuwa nnarowa omuxekura muthiyana mmoha aamwaakhelenle A Sentinela ni Despertai! Hiyo naapatxeriha otthekula nuulumaka ha, “Oxekuwa ola, hiyo nnaakhavihera atthu oxuttera itthu sootthuneya sa mBiblyani.” Muthiyana ole aahaakhula, “Wakhala weera munuuluma woohima sa Biblya, pooti ovolowa.” Hiyo naatthekula ni naasoma soolepa soovirikana seiyo suuluma woohima sa elapo enyowani. Muthiyana ole aatikhiniheya vantxipale ni esemana yaattharelana, aahaawopa asinthamwene awe antxipale weera ekhale vamoha. Muhoolo mwaya, muthiyana ole vamoha ni aiyawe yaakhala arumeyi oororomeleya a Yehova.

Miyo keera kimwaasaka mutthu oothelanano mpuwa mwa iyaakha 10 kihinaaye oomusuwela mwaaraka. Moosuwela etthu ekikhavihenre omphwanya mutthu oophwanelela? Miyo kaahinvekela Yehova ni kaahiikoha ha, ‘Etthu heeni kinrowaaka opaka kathela vale?’

Amalakaru konkreesu a 1953 wEstadio Yankee, kaamusuwela murokora mmoha iitthaniwa Mary Aniol. Owo aarowela exikola ya oGileyadi vamoha ni Jetha, ni awosa yaavara ntoko mamisiyonaariya vamoha. Mary aakileela moohakalala woohima sa soothanleliwa sawe ntoko misiyonaariya oCaribe ni woohima sa soosoma sa Biblya seiyo aapakinhaawe mpuwa mwa iyaakha sintxipale. Etempu yannavira ni osivelana wahu mukina ni mukhwaawe, wannunnuwa. Nthelanne Abril a 1955. Imaara sintxipale miyo kannamoona Mary weera aari yoovaha ya Yehova, ni aakixuttiha itthu sootthuneya. Owo annahakalala mwa yoothanleliwa eri poothe, aari oowiilipihera, annaapwattha atthu akina ni annahela Omwene nipuro noopatxera. (Math. 6:33) Noovara ntoko maviyajante mpuwa mwa iyaakha 3, ni eyaakha ya 1958 naawompwa orowa oBetheli.

Miyo kooxuttera vantxipale ni Mary. Mwa ntakihero, emaara naathelannaahu, naalakela omusoma Biblya vamoha, ikwaha ikina hiyo naasoma iversu 15. Nasoma vale iversu iyo, nannatthekula woohima sa etthu nsommaahu ni moota naarowaahu ovarihela muteko mweekumini mwahu. Mary imaara sintxipale annuuluma itthu aaxuttenraawe oGileyadi ni woohima sa muteko awe ntoko misiyonaariya. Etthu kixuttenraaka ni Mary, yookikhavihera oreherera moota kimpakaaka nyaha ni osuwela moota woowaalipiha asirokora. — Mir. 25:11.

Mwaaraka oosiveleya, Mary, okhwiiye eyaakha ya 2013. Miyo kinnatthuna vantxipale omoona veeli mu elapo enyowani! Mene kiwehereraka eyo, kiri oolikaneene ovirelela oxuttera ni Yehova ni omuroromela owo ni murima aka wootheene. (Mir. 3:5, 6) Wuupuwelela etthu atthu a Yehova enrowaaya opaka mu elapo enyowani, onnakimaaliha ni onnakihakalaliha. Moohihovela, iwo nnoorowa oxuttera itthu sintxipale inyowani ni Muxuttiha ahu mutokweene! Nkaanoono masu weera koonihere omuxukurela waka Yehova mwaha wa itthu sootheene owo okixuttinhaawe mpaka viinaano va, ni mwaha wa oreera wawe murima okoonihenraawe.