MWAHA ONTHOKORORIWA 51
ETXIPO 3 Yehova Onninivaha Ikuru, Nlipelelo, ni Nroromelo
Yehova onnoona winla wanyu
“Maithori aka mòhìtthela mukahini mwanyu: khasilempwe sothesene seiya mbukhuni mwanyu?” — NSAL. 56:9 [56:8, Tradução do Novo Mundo].
ELE NINKELA AHU OXUTTERA
Ninrowa woona moota Yehova onniiwexexaawe naxupeya vale ni moota onnivahaawe nikhavihero ninhaawelaahu.
1-2. Itthu heeni saarowa oneeriha winla?
IMAARA ikina, ootheene hiyo ninninla. Vaavo ninvirihaahu itthu soohakalaliha, hiyo ninninla mwaha woohakalala. Apaale nyuwo mootoko winla mwaha wa etthu yootthuneya naari yoothanleya yeereñye ni nyuwo, apaale vaavo mwaamuyanraanyu mwaninyu, vaavo muupuwenlaanyu etthu yoowoosivelani naari vaavo mwaamonnaanyu nthamwene anyu oosiveleya yoowo saavinre iyaakha sintxipale muhimonne.
2 Mene ikwaha sintxipale, winla wahu onnoonihera moota onnivoreyaaya murima. Mwa ntakihero, hiyo pooti winla vaavo mutthu onninyoonyihaawe vantxipale. Naari hiyo pooti winla mwaha wa eretta ennivoreya, naari hiyo pooti winla vaavo onkhwaawe mutthu naamusivelaahu. Vaavo sineereyaaya itthu iya, hiyo pooti wiisoonaka ntoko profeta Yeremiya vaavo Yerusalemu aanyaanyinwaawe ni maBabiloniyu. Yeremiya enre: “Nitho naka ninnamoroxa myoloko sa maithori . . . Nitho naka ninnamoroxa maithori, khanìtthuwa nari vakhanene.” — Wikh. 3:48, 49.
3. Yehova oniisoonela hayi vaavo onwoonaawe arumeyi awe evirihaka maxupo? (Yesaya 63:9)
3 Yehova onnanoona ikwaha sootheene nninlaahu mwaha wa maxupo. Biblya onnanroromeliha weera owo oosuwela maxupo ootheene arumeyi awe envirihaaya ni owo onnaniiwa vaavo nnanvekelaahu nikhavihero. (Nsal. 34:16 [34:15, NM]) Ohiya paahi onoona ni oniiwa, Yehova onnapaka etthu ekina. Ntoko tiithi a nsivelo, owo onnaxupeya vantxipale vaavo onwoonaawe arumeyi awe yinlaka, ni onnatthuna waakhavihera. — Mmusome Yesaya 63:9.
4. Ninxuttera eheeni ni matakihero vakhaani a mBiblyani woohima sa muupuwelo wa Yehova?
4 Moorweela mwa masu awe, Yehova ohoonihera moota owo iisoonenlaawe vaavo arumeyi awe yinlaaya. Hiyo pooti woona eyo nthokororaka ntakihero na Hana, Davidi ni mwene Ezekiyeli. Eheeni yaaweerinhe arumeyi ala winla? Yehova oonenle hayi nivekelo naya na nikhavihero? Ni moota heeni ntakihero naya ninrowaaya onilipiha vaavo nninlaahu mwaha wooxupeya, woorukunuweliwa naari mwaha woowoova?
WINLA MWAHA WOOXUPEYA
5. Hana iisoonela hayi moovarihana ni maxupo awe?
5 Hana aaviriha maxupo mantxipale yaawo yaamweerinhe winla. Maxupo mamoha a yaawo, waari mwaha wooweera aarimwaatteiwa, ni namwaatteiwaawe eeriwa Penina, annamuhasula. Opwaha mwa yeeyo, Hana khaarinono anamwane, mene Penina aakhalano anamwane antxipale. (1 Sam. 1:1, 2) Ikwaha sootheene, Penina annamutannya Hana mwaha wooweera khaayara. Mwa itthu ntoko iya, mwaakela wiisoonela hayi? Hana aaxupeya vantxipale “mpaka winla ni okhotta yotxa” ni owo ‘aaxupeya vantxipale’ vamurimani vawe. — 1 Sam. 1:6, 7, 10.
6. Etthu heeni Hana aapankaawe weera aphwanye nimaaliho?
6 Moota heeni Hana aaphwanyaawe nimaaliho? Etthu yaamukhavihenre Hana, waari orowa weehemani weiwo waapakiwaayawo okokhorela weekhaikhai. Pooti weeraka owo eemenle waattamela vamulako wa ehema ni “[owo] ànvekela Yahvéh [inlaka].” Owo anvekela Yehova eeraka: “Owehexexe vava, wòne ohawa onèraiye kaporo á. Txonde, okùpuwele yomi.” (1 Sam. 1:10b, 11) Hana aamuleela Yehova moota iisoonelaawe moorweela mwa nivekelo. Yehova ammorela ikharari vaavo aamonnaawe mwanawe oosiveleya inlaka!
7. Nimaaliho heeni Hana aaphwannyaawe vaavo aamuhulenlaawe murima awe Yehova?
7 Moota heeni Hana iisoonenlaawe amuhulelakaru murima awe Yehova moorweela mwa nivekelo ni aakhelakaru nikhavihero na namakeya mutokweene Eli? Biblya oneera: “Hana àhètta ephiro awe, àhotxa ni ekhov’awe khayaphwanaphwanne ni yele ya khalai.” (1 Sam. 1:17, 18) Nnaamweera itthu sooxupa aavirihaawe sahaamanle, Hana aakhala oomaaleleya. Owo aahinvaherera Yehova oxupeya wawe wa mmuupuweloni, ni Yehova, aahoona oxupeya wawe, aahiwa winla wawe ni moovira etempu aamureeliha anvahaka mwaana. — 1 Sam. 1:19, 20; 2:21.
8-9. Moovarihana ni Aheberi 10:24, 25, mwaha wa heeni nintthuneyaahu opaka ele ninweraahu weera nooneleke mithukumano sahu? (Nwehe efootu.)
8 Itthu ninxutteraahu. Neereke nyuwo munviriha itthu sooxupa seiyo sinweerihani winla mwaha wooxupeya? Pooti weeraka nyuwo mooxupeya mwaha wookhweliwa mmusi anyu naari nthamwene anyu. Emaara eyo, pooti weeraka muntthuna okhala meekhaanyu. Mene hiihaale ntoko Hana aaphwannyaawe nimaaliho ni olipihiwa arowakaru weehemani, nnaamweera maxupo anyu ehimanle, nyuwo pooti ophwanya nimaaliho moonelaka mithukumano. (Mmusome Aheberi 10:24, 25.) Emaara mmithukumanoni mwahu nniiwaahu masu enkhuma mBiblyani, Yehova pooti onikhavihera orantteliha miyuupuwelo sahu soonanara ni miyuupuwelo sooreera. Eyo pooti onikhavihera owehexexa miyuupuwelo sahu nnaamweera maxupo ahu ehimanle emaara ene yeeyo.
9 Mmithukumanoni, hiyo ninnakhala ni asinna ni asirokora yaawo ennipwattha, ni nsivelo naya ni onipwattha waya onnanlipiha. (1 Ates. 5:11, 14) Moone yooweereya ya munna mmoha piyoneiru oothanleya yoowo amwaarawe ekhwiiye. Owo ohimme ha: “Miyo kinninla. Imaara ikina miyo kinnakhala meekhaaka kininla. Mene mithukumano sahu sinnakilipiha vantxipale. Nsivelo na asinna ni asirokora, mweekhaikhai ninnakimaaliha. Nnaamweera kikhalaka ooxupeya vaavo kinrowaaka woonela muthukumano, kaphiya vale omuthukumanoni iwo, kinniisoona nnene.” Vaavo nnoonelaahu mithukumano sahu, Yehova pooti waavarihela asinna ni asirokora weera enikhavihere.
Hiyo pooti ophwanya nimaaliho ni asinna ni asirokora (Nwehe eparagrafu 8-9)
10. Moota heeni ninrowaahu otthara ntakihero na Hana vaavo ninvirihaahu maxupo a mmuupuweloni?
10 Nave-tho Hana aaphwanya nimaaliho mwaha woomuleela Yehova maxupo awe moorweela mwa nivekelo. Nyuwo-tho pooti ‘oveleela wa [Yehova] maxupo anyu ootheene’ muroromelaka weera owo onoorowa owiiwani. (1 Ped. 5:7) Murokora mmoha yoowo aiyawe yiivinwe ni anamwiiya yaarinono akapwitthi, onnuupuwela eeraka: “Waakhala ntoko murima aka waaroovulalihiwa ni khawaarowa olama. Etthu yaakimaaliha, waari onvekela Tiithi aka a nsivelo, Yehova. Emaara ekina, miyo nkinwera ophwanya masu ooreerela, mene owo onnakiiwexexa. Vaavo miyo kinxupeyaaka mmuupuweloni, kinnavekela weera kikhaleno murettele. Miyo kinnakhala oomaaleleya mmurimani mwaka, mmuupuweloni, ni eyo ennakikhavihera ovirelela ovilela.” Wakhala weera nyuwo munnamuleela Yehova maxupo anyu, owo onnaxupeya ni winla wanyu ni oxupeya wanyu, iiwexexaka ovoreya wa murima anyu. Nnaamweera etthu enkumihera oxupeya wanyu ehimalaka, Yehova pooti omaaliha murima anyu wooxupeya ookhaviherakani okhalano murettele. (Nsal. 94:19; Afil. 4:6, 7) Ni onoorowa oreeliha ovilela wanyu moororomeleya. — Aheb. 11:6.
WINLA MWAHA WOORUKUNUWELIWA
11. Davidi iisoonela hayi moovarihana ni itthu sooxupa aavirihaawe?
11 Mpuwa mwa ekumi awe, Davidi aaviriha maxupo mantxipale yaawo yaamweerinhe winla. Owo annakhaleliwa nrima ni aarukunuweliwa ni atthu aaroromelaawe. (1 Sam. 19:10, 11; 2 Sam. 15:10-14, 30) Owo olempe ha: “Kòkhulumuwa niwoko nowìpulela waka: ohiyu wothene kinnìnla vamwinlini vaka, ni maithori kinnananiha vanìsatalelaka’vo.” Mwaha wa heeni Davidi iisoonelaawe hiiha? Owo ohimme ha: “Niwoko na amwittan’aka othene.” (Nsal. 6:7, 8 [6:6, 7, NM]) Itthu sooxupa atthu akina yaakumiheraaya, saamukumihera maxupo Davidi mpaka maithori awe waasa oyeeheya.
12. Ntoko ehimmwalaaya va Nsalmu 56:9 [56:8, NM], Davidi aaroromela eheeni?
12 Nnaamweera Davidi aavirinhe maxupo mantxipale, owo annaroromela weera Yehova annamusivela. Owo olempe ha: “Yahvéh òhìwa nsu nowinla waka.” (Nsal. 6:9 [6:8, NM]) Emaara ekina, Davidi aahima masu nimphwanyaahu va Nsalmu 56:9 [56:8, NM]. (Musome.) Masu ala ennoonihera moota Yehova ommoriwaawe ikharari vaavo ommukosoopaawe mutthu. Davidi aahoona weera waakhala ntoko Yehova aattottela maithori awe ahelaka mukarafani naari alepaka muliivuruni. Davidi annasuwela weera Yehova annoona ni wuupuwelela moota oonaawe ovoreya. Davidi annasuwela weera Tiithi awe a wiirimu annasuwela, ohiya paahi maxupo aavirihaawe, mene-tho moota yanvoleelaaya.
13. Emaara atthu akina enninyoonyihaaya, etthu heeni enrowa onimaaliha? (Nwehe efootu.)
13 Itthu ninxutteraahu. Neereke nyuwo munnaxupeya mmuupuweloni mwaha woonyoonyihiwa naari orukunuweliwa ni mutthu yoole mwaamuroromelaanyu? Pooti weeraka nyuwo onnoovoreyani murima mwaha wooweera onamorari wanyu naari ntheli nanyu noomala mootutuxera, naari apaale, mutthu nyuwo mwaamusivelaanyu oohiya onvarela Yehova. Munna mmoha yoowo mwaarawe aamuraruwenle ni amuhiya, ohimme ha: “Etthu ele yaakitutuxa ni nkaaroromela. Kiisoona okhala oohivareleya muteko ni oonyoonyiwa.” Wakhala weera nyuwo moorukunuweliwa naari moonyoonyihiwa, mphwanye nimaaliho musuwelaka weera Yehova khanrowa woonyanyalani. Munna ole ohimme ha: “Kaahoonelela weera onthamwene wa atthu pooti omala, mene Yehova ti Mwala ahu. Nihipwatthaka etthu enrowa weereya, ikwaha sootheene owo ori ni hiyo. Owo khanrowa waahiya atthu awe oororomeleya.” (Nsal. 37:28) Muupuweleke-tho weera, nsivelo na Yehova ntokweene opwaha nsivelo na atthu. Nnaamweera ovoreyaka orukunuweliwa ni mutthu mukina, eyo khenvarihana ni moota Yehova onoothokororaaweni nyuwo. (Arom. 8:38, 39) Ekhaikhai ti yooweera: Muhipwatthaka moota mutthu ookosompaaweni, Tiithi anyu a wiirimu onnoosivelani.
Eliivuru ya Masalmu ennaroromeliha weera Yehova ori vakhiviru ni atthu ale exupeñye mmurimani (Nwehe eparagrafu 13)
14. Nsalmu 34:19 [34:18, NM], onanroromeliha eheeni?
14 Vaavo ninrukunuweliwaahu, hiyo-tho pooti ophwanya nimaaliho ni masu oomaaliha a Davidi nimphwanyaahu va Nsalmu 34:19 [34:18, NM]. (Musome.) Ereferensiya emoha, ehimme weera ale a “munepa wopwexiwa” enhimmwa “ale enuupuwela weera khiyaanoono etthu yooreera yooweherera.” Yehova onwoonela hayi ale eniisoonela hiiho mwaha wa maxupo? Ntoko tiithi a nsivelo ni ommulipiha mwanawe emaara ya maxupo, Yehova ‘ori vakhiviru’ ni hiyo, ikwaha sootheene onnanipixera murima ni ori oolikaneene weera anikhavihere wakhala weera ninnaxupeya mwaha woorukunuweliwa naari okhweliwa. Owo onnatthuna vantxipale onilipiha ni omaaliha murima ahu vaavo ninxupeyaahu. Nave owo onnanivaha itthu sintxipale sinnikhavihera ovilela sooweerera viinaano va. — Yes. 65:17.
WINLA MWAHA WOOWOOVA
15. Maxupo heeni Ezekiya aavirihaawe yaawo yaamweerinhe winla?
15 Emaara aaraaweno iyaakha 39, mwene Ezekiya a oYuda, aahoonelela weera aakhalano eretta yeeyo yaarowa omweeriha okhwa. Profeta Yesaya aamuleela Ezekiya masu a Yehova weera eretta ele yammweeriha okhwa. (2 Mam. 20:1) Waakhala ntoko Ezekiya khaarinono yooweherera. Axupeñyeene ni ele aaleelinwaawe, Ezekiya aahinla vantxipale. Owo aahinvekela Yehova ni murima awe wootheene. — 2 Mam. 20:2, 3.
16. Moota heeni Yehova aakhunlaawe nivekelo Ezekiya aapankaawe inlaka?
16 Yehova aahimmorela ikharari Ezekiya mwaha wa nivekelo aapankaawe inlaka, ni mooreera murima, aamweerela: “Kòhìwa wikhupanyera wá ni kòhòna maithori á. Òná, kini kòpenuxe.” Anvarihelaka Yesaya, Yehova aahimmorela ikharari Ezekiya amulaiheraka weera aamwaatxeerera ekumi awe ni onvuluxa Yerusalemu mmatatani mwa Asiria. — 2 Mam. 20:4-6.
17. Moota heeni Yehova onnikhaviheraawe emaara ninvirihaahu maxupo a eretta? (Nsalmu 41:4 [41:3, NM]) (Nwehe efootu.)
17 Itthu ninxutteraahu. Neereke nyuwo munviriha eretta yeeyo enweerihani woova? Munvekeleke Yehova nnaamweera mwinlaka. Biblya onnanroromeliha weera, “Atithi a ikharari ni Muluku a ohakalalihiwa wothene” anoorowa onimaaliha mwa sooweereriwa sahu sootheene. (2 Akor. 1:3, 4) Olelo va, khaninweherera weera Yehova amalihe maxupo ahu ootheene, mene hiyo pooti omuroromela owo weera anoonikhavihera. (Musome Nsalmu 41:4 [41:3, NM].) Moorweela mwa munepa awe wootteela, Yehova onnanivaha ikuru, miruku ni murettele wa mmuupuweloni weera niwere ovilela. (Mir. 18:14; Afil. 4:13) Owo-tho onnanikhavihera moorweela mwa yooweherera ahu enrweela mBiblyani yoowoona iretta sootheene simanleene. — Yes. 33:24.
Yehova onimwaakhula mavekelo ahu anivahaka ikuru, miruku ni murettele wa mmuupuweloni (Nwehe eparagrafu 17)
18. Yoolepa heeni nyuwo munoonaanyu okhala yoomaaliha emaara munvirihaanyu itthu sootepa oxupa? (Nwehe ekwaadru “ Masu ennimaaliha emaara yeeyo nninlaahu.”)
18 Masu a Yehova yammaaliha Ezekiya. Moolikana niiyo, hiyo-tho pooti ophwanya nimaaliho ni masu a Muluku. Yehova oolepa masu oomaaliha yaawo enrowa onihakalaliha emaara yeeyo ninvirihaahu maxupo. (Arom. 15:4) Vaavo murokora mmoha a wÁfrica Ocidental aaphwanyinwaaweno eretta ya câncer, owo ikwaha sintxipale anninla. Owo ohimme ha: “Yoolepa miyo kinoonaaka okhala yoomaaliha, ti Yesaya 26:3. Nnaamweera ohikhweyaka owehexexa moomalela woohima sa maxupo ninvirihaahu, eversu ela ennanroromeliha weera Yehova onoorowa onivaha murettele ninhaawelaahu yoowo onrowa onikhavihera owehexexa moota nnoonelaahu sooweerera.” Neereke yookhala yoolepa nyuwo munoonaanyu okhala yoomaaliha vaavo munvirihaanyu itthu sootepa oxupa apaale soowoopiha?
19. Etthu heeni ninwehereraahu ya muhoolo?
19 Ninkhala mahiku oomalihera, nave pooti weeraka sineereke ovira siriki waatxeerereya itthu sinrowa oneerihaka winla. Mene, ntoko nonnaahu ntakihero na Hana, Davidi ni mwene Ezekiyeli, Yehova onnoona winla wahu nave onnaxupeya ni winla iwo. Owo khanrowa ottuwala winla wahu. Nto vaavo ninvirihaahu itthu sootepa oxupa, nimuhuleleke murima ahu Yehova moorweela mwa nivekelo. Nihirakamelaneke ni asinna ni asirokora a mmulokoni. Nivireleleke ophwanya nimaaliho ni masu oomaaliha elempwale mBiblyani. Nroromeleke weera, navirelela ovilela moororomeleya, Yehova onoorowa onitthuvela. Eyo enhela mpuwa yooweherera yootepa oreera, yooweera, noovira etempu, owo onoorowa omaliha vamaithoni vahu winla wootheene, orukunuweliwa ni woova. (Apok. 21:4) Nto nnoorowa winlaka paahi mwaha woohakalala.
ETXIPO 4 Yehova “ti Makampusi Aka”
