Paulo aamulepela nthamwene awe Timotheyo yoowo-tho aari mutokweene a mmulokoni amweerelaka: “Oholo wa Muluku ni wa Kristu Yesu ni wa [malaika] òthanliwa kinnawòperera wera osunke seiya, ohithorihaka vowakuveya ni ohèraka nthalu.” — 1 Tim. 5:21.

Woopatxerani, ninrowa woona etthu malaika ala ehikhanlaaya. Awo khaiyene tiyaale a 144.000. Emaara Paulo aamulepenlaawe Timotheyo, ovinyerera wa alipa oothanliwa enrowa okhalaka wiirimu, weera ohinaaye opatxera. Arummwa ni atthu akina oothanliwa, yeera ehinaaye okhala soopattuxiwa soomunepani, mwa yeeyo, awo khayaarowa okhala “[malaika] òthanliwa.” — 1 Akor. 15:50-54; 1 Ates. 4:13-17; 1 Yoh. 3:2.

Nave-tho “[malaika] òthannliwa” khaiyene malaika yaamurukunuwenle Muluku emaara ya Nowa. Malaika awo emurukunuwenle Muluku, eri eparte ya Satana ni aathatuwa mademooniyu ni amwiittani a Yesu. (Eph. 6:2; Luka 8:30, 31; 2 Ped. 2:4) Muhoolo enoorowa otthukiwa mpuwa mwa iyaakha 1.000 ni muhoolo mwaya enoonyaanyiwa vamoha ni Satana. — Yuda 6; Apok. 20:1-3, 10.

Mwa yeeyo, “[malaika] òthanliwa” ehimmwale ni Paulo, malaika envara vamoha ni “Muluku ni Kristu Yesu” wiirimu, yaawo-tho enhimmwa va eversu ene yeela.

Sookhala imiliyawu sintxipale sa malaika oororomeleya. (Aheb. 12:22, 23) Mene onnooneya weera Yehova khanaavaha yoothanleliwa emoharu malaika ootheene. (Apok. 14:17, 18) Mwa ntakihero, ekwaha emoha, Yehova aathanla nlaika nimoha weera niwiive anakhotto 185.000 a wAsiria. (2 Mam. 19:35) Ni pooti weeraka malaika makina aathanleliwa weera ‘emalihe Moomweneni mwa [Yesu] itthu sootheene sinkumihera maxupo vamoha ni atthu ale empaka itthu soonanara.’ (Math. 13:39-41) Malaika makina, pooti weera aakhalano yoothanleliwa ‘yoowaathukumanya oothanliwa’ enrowa okhalano ekumi wiirimu. (Math. 24:31) Ni malaika makina aathanleliwa weera enikosoopeke mwa ‘iphiro sahu sootheene.’ — Nsal. 91:11; Math. 18:10; mulikanxere ni Matheyo 4:11; Luka 22:43.

Onooneya weera “[malaika] òthanliwa” enhimmwa va 1 Timotheyo 5:21, yaathanlelinwe okosoopaka muloko. Eversu ela ennoonihera weera Paulo aavaha miruku asitokweene a mmulokoni woohima sa moota yarowaaya okosoopaka muloko ni moota muloko waarowaaya waattittimihaka. Asitokweene-tho a mmulokoni entthuneya okosoopaka miritti saya ‘ehithorihaka moowaakuveya naari ehikhalakano nthalu’ ni ehipakeke soothanla ehuupuwenle nnene. Nthowa nooreera ninweeriha asitokweene a mmulokoni otthara miruku soowuupuxeriwa sa Paulo mwaha wooweera awo empaka itthu “oholo wa Muluku, wa Kristu Yesu ni wa [malaika] òthanliwa.” Mwa yeeyo, onooneya weera malaika makina aakhalano yoothanleliwa yookosoopa miloko. Miteko mikina eraayano, awo ennaakosoopa arumeyi a Muluku, ennahoolela muteko woolaleera ni ennamuleela Yehova itthu enoonaaya. — Math. 18:10; Apok. 14:6.