Neereke nyuwo moomusoma moomaaleleya Nwehereri a eyaakha ene yeela? Vanonto mwaakhule moomaaleleya makoho ala:

Ntakihero heeni Yehova onnivahaawe woohima sa moota woowaathokorora asirokora?

Owo khanaathokorora mwa nthalu naari khanwoona alopwana okhala a vasuluxa waapwaha asirokora. Muluku onnawiiwa asirokora, annapwattha miyoonelo saya ni maxupo aya. Ni onnaaroromela awo weera epake muteko awe. — w24.01 epaax. 15-16.

Moota heeni ninrowaahu ovarihela muteko masu eri va Aefeso 5:7 yaawo eneera: “Muhikawane etthu ni yawo”?

Murummwa Paulo anleela weera nihikhaleno onthamwene ni atthu ale yaarowa oneeriha ohitthara malamulo a Muluku. Onthamwene owo woohireera, onnaahela mpuwa atthu ninvirihaahu etempu ntthekulakano naari ale nintthekulaahuno mu redes sociais. — w24.03 epaax. 22-23.

Soohimmwa heeni soowootha nintthuneyaahu wiikosoopa?

Nintthuneya wiikosoopa ni soohimmwa sa asinthamwene ahu yaawo enkhala ntoko entthuna onikhavihera, e-mails sinkhuma wa atthu nihaasuwenlaahu yaawo enkhala ntoko enoonihera ntthuno noosuwela ekhaikhai mene ereene anamavaanyiha. — w24.04 epaax. 12.

Eheeni nsuwenlaahu ni eheeni nihisuwenlaahu woohima sa moota Yehova onrowaawe omuthoriha mwene Salomoni, ale ekhwiiye oSodoma ni oGomora ni ale ekhwiiye ni epula ya mirupi?

Khansuwenle wakhala weera Yehova ohaanyaanya khuluwi ehikhalakano yooweherera ya ovinyererihiwa. Menento, noosuwela weera Yehova oosuwela itthu sootheene woohima sa awo ni owo ta ikharari. — w24.05 epaax. 3-4.

Okhala weera Muluku ti ‘Mwala’ onniroromeliha eheeni? (Ola. 32:4)

Nimpakeke Yehova okhala ntthawelo nahu. Owo toororomeleya ni ikwaha sootheene onnakwanihera soolaihera sawe. Ni owo khantxentxa, avirelelaka okhala oororomeleya wa mikhalelo sawe ni sootthuna sawe. — w24.06 epaax. 26-28.

Etthu heeni enrowa wookhaviherani wiikhoveleliha muloko munyowani?

Muroromeleke weera Yehova onimookhaviherani ntoko aakhavihenraawe arumeyi awe khalayi. Musepeke olikanxera muloko muraanyu ni muloko mwaaraanyu khalayi. Mwiikhoveleliheke ni muloko owo munyowani ni mwiilipihereke weera mwaapake asinthamwene anyowani. — w24.07 epaax. 26-28.

Itthu heeni nixuttenraahu ni matakihero mararu emphwanyeya va Matheyo ekapiitulu 25?

Ntakihero na iputtiputthi ni ipuri ninnoonihera otthuneya waya okhala oororomeleya ni oowiiwelela. Ntakihero na asimwali a miruku ni oohikhala miruku, ninnoonihera otthuneya waya okhala oowiirehera ene ni ooweha-weha. Ntakihero na italentu ninnoonihera otthuneya waya okhala oovara muteko ni a miruku. — w24.09 epaax. 20-24.

Nipithela na etemplu ya Salomoni naarakamme moota heeni?

Va 2 Sowereya 3:4, soolepa ikina sa khalayi sinhima ‘icôvado 120’ sooniheraka weera nipithela nno orakama waya waari wa imeetru 53. Mene soolepa ikina soororomeleya sinhima ‘icôvado 20’ sooniheraka weera orakama waya waari wa imeetru 9. Onooneya weera soohimmwa iya soomalihera sinnavarihana ni wunnuwa wa ixiri sa nipithela. — w24.10 epaax. 31.

Ontaphulela eheeni murumeyi ookhavihera okhala ‘mulopwana a muthiyana mmoha’? (1 Tim. 3:12)

Ontaphulela weera owo amutheleke muthiyana mmoha ni ahimuraruweleke. Nave-tho ahaaweheke athiyana akina moohireerela. — w24.11 epaax. 19.

Mwaha wa heeni ninhimaahu weera Yohani 6:53 khaiyene anhima etthu eneera epakiweke vaavo empakiwaaya yootxa ya ohiyu ya Apwiya?

Yohani 6:53 onnuuluma otthuneya waya okhuura erutthu ya Yesu ni owura ephome awe. Yesu aahuuluma masu ala oGalileya eyaakha ya 32 Kristu awiiyeene aaleelaka ayuda yaawo waatthuneya omuroromelaka owo. Menento eyootxa ya ohiyu ya Apwiya, yaapakinwe evinreene eyaakha emoha oYerusalemu. Emaara ele Yesu uuluma ni ale yaarowa olamulelaka nuuwo wiirimu. — w24.12 epaax. 10-11