1. Atthu a Yehova mwaha wookhalano nsivelo ampaka eheeni?

 BIBLYA aahima varaatxiru weera moloko wa Muluku ‘waamurowa wiivaherera’ weera onvareleke muteko Yehova ni otthara miruku sa Yesu. (Nsal. 110:3) Mweekhaikhai yoolohera ela, ennakwanela mahukwaano. Iyaakha sootheene, muloko wa Yehova onnaviriha iwoora sintxipale wiilipihera olaleya mitthenka sooreera. Mene muloko owo onnapaka eyo, mwaha wooweera onnatthuna. Ni imaara ikina awo annavarela muteko mireerelo saya weera ekhavihere muteko owo. Opwaha mwa yeeyo, annakhavihera asinna ni asirokora anroromelo mmakhalelo a weerutthuni, mmuupuweloni ni oomunepani. Asitokweene a mmulokoni ni arumeyi ookhavihera, annaviriha iwoora sintxipale erehereraka impari saya sa omuthukumanoni ni opaka evisita ya pastoreiyu. Muloko wa Yehova onipaka itthu sootheene iya ni nsivelo—nsivelo na Yehova ni atthu.—Math. 22:37-39.

2. Ntakihero heeni Yesu ohiñyawe? (Aroma 15:1-3)

² Yesu oohiya ntakihero nooreera. Owo annapwattha vantxipale atthu wiipwaha mwaneene. Nave hiyo ninniilipihera otthara mavalo awe. (Mmusome Aroma 15:1-3.) Naapakaka eyo, nnimoona ele Yesu aahimmaawe eeraka: “Ovaha ti etthu yorera opwaha wakhela.”—Mit. 20:35.

3. Eheeni ninrowaahu oxuttera mwa yoosomeene yeela?

³ Yoosoma ela nnoorowa oxuttera mikhalelo mikina Yesu aapakaawe weera aakhavihere atthu akina, nave moota hiyo nneeraahu nitthareke ntakihero nawe. Nnoorowa oxuttera tho etthu nikhanlaahu oopaka weera nikhalekeno ntthuno nootthuna waakhavihera atthu akina.

4. Yesu oonihenre hayi weera annahela nipuro noopatxera sootthuna sa atthu akina oohiya sa wawe?

⁴ Yesu annakhavihera atthu nnamweera aakhulumuwa. Yesu aaviriha ohiyu ntero avekelaka omwaako, oweharu waattamela okafarnawu. Mweerere wuupuwela moota oonenlaawe, vaava muloko waatthu waarwiyaaya omwaattamela yoowo. Nnamweera aakhulumunwe, owo aahamorela ikharari ni aapatxera waalamiha aretta. Khaiyene ti yeeyoru yaakhumelenle. Emaareene yeele, owo aapaka mwaha yoowo onsuweliwa okhala mwaha wa vamwaako.—Luka 6:12-20.

5. Muhooleli a vatthokoni onrowa otthara hayi ntakihero na Yesu akhulumuwa vale?

⁵ Ahooleli a vatthokoni anrowa otthara hayi ntakihero na Yesu. Mweerere wuupuwela ha: muhooleli a vatthokoni onnavara muteko nihuku noothenene nto onnakhulumuwa. Apaale onuupuwela weemexera opaka omukokhorela Muluku vatthokoni, mene onnavekela Yehova weera anvahe ikuru ni Yehova onnakhula nivekelo nawe. Ni omukokhorela Muluku vatthokoni onneereya nnenesene. Nto mwaha wa yeeyo, anamwane annaxuttera etthu yootepa ootthuneya. Awo annoonelela weera asipapaya annahela nipuro noopatxera itthu soomunepani.

6. Nvahe ntakihero na moota Yesu aakhavihenraawe atthu naari aatthuna okhala meekhaawe.

⁶ Yesu annapwattha atthu naari ehuhu aatthunaawe okhala meekhwawe weera aitthuwe. Mwaatoko wuupuwela moota Yesu oonenlawe vaava aasuwenlaawe weera nthamwene awe Yohani mbatiza ohiiviwa? Yesu aaripiwa murima. Biblya oneera: “Iwalaiye siyo [voohima sa wiiviwa wa Yohani mBatiza], Yesu ahuluwa weiwo munikulani ayaka nipuro na ehewehewe yohimakiwa.” (Math. 14:10-13) Ninnawera woona mwaha wa heeni owo aapankaawe eyo. Atthu antxipale annathanla okhala meekhaaya wakhala weera aakhweliwa ni mutthu ole yaamusivelaaya. Mene tiyeeyo Yesu aapankaawe nto khaawenre. Muloko waatthu osuwelakaru nipuro Yesu aarowaiyewo, muloko ole waamutthara. Yesu oonenle hayi? Owo aahuupuwela etthu atthu ale yaavirihaaya “ni ahaamorela ikharari.” Yesu ahoonelela weera atthu ale yaariheya wa mukhalelo wa omunepani nto yaatthuna nikhavihero. Mwa yeeyo, ‘owo aapatxera waaxuttiha itthu sintxipale.’—Mar. 6:31-34; Luka 9:10, 11.

7-8. Nvahe ntakihero na moota asitokweene a mmulokoni ammutakihaaya Yesu munna aatthunaka nikhavihero.

 ⁷ Asitokweene a mmulokoni anrowa otthara hayi ntakihero na Yesu. Ootheene hiyo, ninnahela mwiitti wiilipihera wa asinna asitokweene a mmulokoni! Ikwaha sintxipale muloko khonsuwela itthu sootheene asitokweene a mmulokoni anipakaaya. Mwa ntakihero, yakhumelela etthu yootutuxera ntoko eretta, asitokweene a mmulokoni anvara empari ya ekomisau envarihana ni hospital, annivaha nikhavihero moowaakuveya. Ikwaha sintxipale tho itthu ntoko iyo sootutuxera, sineereya ohiyu! Mene asitokweene a mmulokoni ni imusi saya, annapwattha sootthuna sa asinna ohiya sawaya. Awo annapaka eyo ni nsivelo.

⁸ Asitokweene a mmulokoni annakhavihera muteko wooteka ipa sa omwene ni iprediyu ikina sinvareliwa muteko weera akokhoreliwe Yehova. Awo tho annakhavihera muteko woowaakhavira alipa oothoiwa. Nihuulumaka iwoora sintxipale awo anvirihaaya weera yaaxuttihe ni waalipiha asinna a mmulokoni. Asinna awo ootheene ni imusi saya, ninnapwanela waattottopela. Ninnavekela weera Yehova avirelele waareliha asinna awo! Ekhaikhai weera ootheene hiyo, vamoha ni asitokweene a mmulokoni onnatthuneya okhala eriyariru. Awo khontthuneya oyeha ehuhu yintxipale evaraka paahi miteko sa mmulokoni, mpakana ohiya okosoopa emusi aya.

9. Moovarihana ni Afilipi 2:4, 5, mikhalelo heeni mukristu ontthuneyaawe okhalano?

⁹ Mmusome Afilipi 2:4, 5. Yesu oohiya ntakihero na ohela nipuro noopatxera sootthuna  sa atthu akina opwaha sawihu. Khaiyene asitokweeneru anntthuneya otthara ntakihero nno. Mweekhaikhai ootheene hiyo ninatthuneya opaka eyo. Biblya onnahima weera Yesu “akuxa makhalelo a kaporo.” (Afil. 2:7) Nkuupuwelani etthu nikhanlaahu ooxuttera. Kaporo naari namuteko, onnasaasa moota woowahakalaliha apatarawu awe. Wa mukhalelo ahu, hiyo tho na akaporo a Yehova ni anamuteko asinnihu. Mwaha wa yeeyo, nintthuna otthara ntakihero na Yesu nipakaka sootheene weera nimuhakalalihe Yehova ni waarumeela asinnihu. Nnoorowa woona mikhalelo sinrowa onikhavihera opaka eyo.

10. Makoho heeni nintthuneyaahu wiipakela?

¹⁰ Muupuwele mukhalelo anyu. Mwiikoheke ha: ‘keereke kiniivaherera weera kaakhavihere asinna? Mwa ntakihero, kaarowa woonela hayi wakhala weera movekeliwa orowa omuxekura munna oowuuluvala, naari onvirela murokora oowuuluvala weera murowe omithukumanoni? Keereke kinnaivaherera weera kaakhavihere muteko wooreherera empa ya omwene, naari nipuro na kongresu?’ Emaara nnaivahereraahu—wa Yehova, noomulaihera weera nnoopakaka ele—hiyo ninweraahu. Ni moota woopaka eyo, ori osukera ehuhu ahu, mireerelo sahu weera naakhavihere asinnihu. Yehova onnahakalala vantxipale oonelela weera hiyo ninnapaka eyo. Vano eheeni enrowa onikhavihera noonelela weera ninatthuneya opaka matxentxo wa mikhalelo sene seiyo?

11. Nivekelo ninrowa onikhavihera hayi okhalano ntthuno noowakhavihera atthu akina?

¹¹ Munvekeleke Yehova ni murima wootheene. Apaale nyuwo moohoonelela weera yookhala etthu muntthunaanyu otxentxa weera muheleke sootthuna sa atthu akina nipuru noopatxera ohiya sawinyu. Nto nyuwo pooti woonyoonyakani opaka eyo. Yeereya eyo, munvekeleke Yehova ni murima wootheene. Muhimeke ekhaikhai. Mmuleeleke Yehova moota nyuwo munoonelaanyu ni munvekeleke Yehova weera oovaheeni “okhwela ni tho opanka ntoko ontthunaiye.”—Afil. 2:13.

12. Munna mmiravo oobatiziwa onrowa okhavihera hayi mareherero a Yehova?

¹² Mwaarene mmiravo oobatiziwa munvekeleke Yehova weera nvareleyeke muteko mmulokoni. Ilapo sintxipale aakhala asitokweene a mmulokoni antxipale waapwaha arumeyi ookhavihera ni asinna akina ari arumeyi ookhavihera khaiyene amiravo. Mareherero a Yehova anoovirelela wunnuwa. Mwaha wa yeeyo, annatthuneya asinna amiravo weera yaakhavihereke asitokweene a mmulokoni okosoopa muloko. Nyuwo mwaivaherera ovara muteko owo, munoohakalala. Mwaha wa heeni? Mwaha wooweera munoomuhakalaliha Yehova ni muneereke ororomeliwa ni asinna. Nave tho munoorowa ohakalala onrwela mwaha woowakhavihera atthu akina.

13-14. Eheeni nneeraahu nipake weera naakhavihere asinna? (Nwehe elataratho ya vakaapani.)

¹³ Nwehexexeke itthu asinna anihawelaaya. Murummwa Paulo aahimme há aalelaka akristu oJudeia: “Muhittiwale opanka sorera ni okawana, wona wi amakeya siyala annamusivela Muluku.” (Aheb. 13:16) Iya saari ikano sooreera! Ehivinreru ehuhu yintxipale akristu oYudeia yaakhenleene ekaratta ela, wannatthuneya ‘otthawela omwaako’ ehiyaka itthu sootheene ipasaya, anakoso aya, ni amusi aya yahaakhanle akristu. (Math. 24:16) Mwa ehuhu ene yeeyo, waari wootthuneya asinna okhaviherana mukina ni mukhwaawe. Waari weera awo yaakhovelela okawana itthu mukina ni mukhwaawe, moohihovela waahakhweela okhalano itthu vakhaaneene.

¹⁴ Khaiyene imaara soothene, asinna ni arokora eneereke ohima etthu antthunaya  okhaviheriwa. Mwa ntakihero, apaale munna ahookhwa amwaarawe nto onnaxupeya. Neereke munna owo aahereke otthuna nikhavihero ni miteko savaate ntoko, opakeliwa yootxa naari ovahiwa puleya? Apaale munna owo pooti ohivekela nikhavihero oonaka weera aneereke waaxupa asinna. Mene aamuhakalala, waakhanle weera hiyo noomukhavihera munna owo ahinakuve oveka nikhavihero. Hiyo khontthuneya wuupuwela weera, asinna akina anoomukhavihera mutthu owo naari munna ole aatthunaka nikhavihero, onoovekela. Mwiikoheke há: ‘kaari simiyo eheeni keeraaka kitthuneke weera asinna ekipakele?’

15. Etthu heeni nintthuneyaahu opaka naatthunaka waakhavihera atthu akina?

¹⁵ Mukhaleke owisaakuviha. Mweekhaikhai aakhala asinna ni asirokora mmulokoni yaawo ari oolikaneene otthuna waakhavihera atthu akina ehoonaka weera enooxumpwa. Noosuwela weera asinna awo ari oolikaneene weera enikhavihere. Moohihovela asinna awo ntakihero nooreera hiyo nintthuneyaahu otthara! Alan munna mutokweene a mmulokoni orinono iyaakha 40, owo ontthuna okhala owiisakuviha. Uupuwelaka ntakihero na Yesu Alan ohimme ha. “Yesu aari mutthu oowatteliwa miteko. Mene atthu a mannuwelo ootheene yannakhala ootaphuwa waasaasa nikhavihero na Yesu. Awo yannoona weera Yesu aanapwattha atthu. Mene miyo kintthuna otthara ntakihero na Yesu weera kisuweliwe okhala mutthu owiiraaneya, owiisakuviha ni ootthuna waakhavihera atthu akina.”

16. Nsalmu 119:59, 60, onnrowa onikhavihera hayi otthara ntakihero na Yesu?

¹⁶ Khanintthuneya okhulumuwa naahiweraka otthara ntakihero na Yesu moomalela. (Yak. 3:2) Mmupuwele mulipa onxuttihiwa opaka etthu, nto owo onneerera opaka ntoko oxuttihiwaawe. Mene emaara ekina, owo khanwera  opaka ntoko mulipa ommuxuttiha, mwaha wa yeeyo, owo onniilipihera weera apakeke ntoko oxuttihiwaawe. Moovirani ehuhu, owo onnapaka nnene ntoko mulipa ommuxuttiha. Vamoharu, ovarela muteko itthu ninxutteraahu mBiblyani ni wiilipihera opaka matxentxo mwekumini mwahu, nnoowera omutakiha Yesu.—Mmusome Nsalmu 119:59, 60.

17-18. Mareeliho heeni nimphwanyaahu mwaha woohela nipuro noopatxera sootthuna sa atthu akina ohiya sawihu?

¹⁷ Naivahereraka weera naakhavihere atthu akina, akina tho annatthuna opaka etthu emoharu. Munna mmoha mutokweene oneeriwa Tim enre ha: “Asinna akina amiravo yaathanliwa weera ekhale arumeyi ookhavihera mmulokoni. Nthowa nooweera awo yaawoona asinna akina ekhaviheraka ni tho awo yaatthuna opaka etthu emoharu. Amiravo awo annakhavihera vantxipele muloko, vamoha ni asitokweene a mmulokoni.”

¹⁸ Hiyo ninkhala elapo yoosareya atthu oowiitthuna, mene muloko wa Yehova ti woovirikana ni atthu awo. Ntakihero na Yesu noohela nipuro noopatxera sootthuna sa atthu akina, opwaha sawawe, ninnanitikiniha nave hiyo nintthuna opaka etthu emoharu. Ekhaikhai weera khaninwera otthara ntakihero nawe moomalela, mene nnoowera “otthara mavalo awe moororomeleya.” (1 Ped. 2:21) Nailipiheraka otthara ntakihero na Yesu, noorowa ohakalala ni osuwela weera Yehova onnanaakhulela.