1. Liini asinna ootheene oothanliwa enrowaaya okhala wiirimu?

 IYAAKHA sivinre, atthu a Yehova yanniikoha, ‘Asinna oothanliwa enrowa liini wiirimu?’ Woopatxerani, nuupuwela weera asinna oothanliwa yaamukhala elapo ya vathi ni okhala oparaisu mwa ehuhu vakhaani avirakaru Harmagedoni. Mene A Sentinela a 15 a Julho a 2013, hiyo nooxuttera weera ahinaaye Harmagedoni, asinna oothanliwa a 144.000, eneereke ereene wiirimu. — Math. 24:31.

2. Makoho heeni enkhumelela, ni eheeni ninrowaahu woona mwa yoosoma ene yeela?

² Mene akina a hiyo, pooti wiikohaka ha: Eheeni enrowa weereya ni “iputtiputthi sikina” sa Kristu seiyo sinrowa onvarelaka Yehova moororomeleya valaponi mpuwa mwa ‘maxupo matokweene’? (Yoh. 10:16; Math. 24:21) Akina a iputtiputthi iyo, pooti okhala ooxupeya mwaha woohisuwela etthu yoopaka naari ohimusuwela taani onrowa waakhaviheraka naari waahoolela vaavo asinna ni asirokora oothanliwa eneeraaya erowe wiirimu. Apaale awo pooti wuupuwelaka haawo mwaha wa soohima piili sa Biblya. Ninrowa woona soohima iyo ni woona mwaha wa heeni nihintthuneyaahu oxupeya.

EHEENI EHINROWA WEEREYA?

3-4. Etthu heeni atthu akina ekhanlaaya oowiikoha, ni mwaha wa heeni?

³ Asinna pooti okhala ooxupeya yuupuwelaka weera iputtiputthi sikina sinoohiya onvarela Yehova vaavo ehinrowaaya okhala asinna oothanliwa a Mukuttula Woolamulela weera oweettiheke. Awo pooti wuupuwela haawo mwaha wa soohima sa mBiblyani. Nrowe noone matakihero meeli. Ntakihero noopatxera, voohima sa namakeya Yehoyada. Owo aari murumeyi oororomeleya a Muluku. Owo ni mwaarawe Yehoxeba, yaamukosoopa mmiravo Yowasi ni yaamukhavihera okhala mwene ooreera murima ni oororomeleya. Yehoyada areene mukumi, Yowasi annanvarela Yehova moororomeleya ni annapaka itthu sooreera. Mene Yehoyada akhwaakaru, Yowasi aapatxera opaka  itthu soonanara. Owo annatthara miruku soonanara sa anamahoolela ni aahiya onvarela Yehova. — 2 Sow. 24:2, 15-19.

⁴ Ntakihero nikina ti na akristu yaakhanle ekhwaakaru arummwa. Murummwa Yohani, tomalihenre okhwa wa arummwa ootheene, emaara Yohani aaraawe mukumi, aahaakhavihera akristu ovirelela okhala oororomeleya wa Yehova. (3 Yoh. 4) Hiihaale ntoko oohusera a Yesu yaapankaaya, Yohani aahipaka ele aaweraawe weera akosoope miloko mwa itthu soowootha seiyo saamwaramwarinwe. (1 Yoh. 2:18; nwehe-tho enoota ya yoosoma va 2 Ates. 2:7.) Mene Yohani akhwaakaru, itthu soowootha saamwaramwareya sinkhala ntoko mooro ompatta mutuphini. Iyaakha saattharelana, atthu ala oowootha yaakumihera soohimmwa seiyo sahaakhanle sa ekhaikhai etthunaka weera itthu iya soowootha siphiye mmulokoni mootheene.

5. Eheeni nihintthuneyaahu wuupuwelelaka weera enimweereya moovarihana ni soohima iya piili sa mBiblyani?

⁵ Soohima iya piili sa mBiblyani, neereke sinoonihera weera sookhala sineera seereye moolikana ni seiyo wa iputtiputthi sikina sa Kristu vaavo asinna oothanliwa eneeraaya erowe wiirimu? Neereke makristu oororomeleya valaponi enrowa opaka itthu soonanara ntoko Yowasi, naari okhala oowootha ntoko akristu yaapankaaya arummwa ekhwaakaru? Waakhula ti wooweera naari vakhaani! Hiyo nroromeleke weera vaavo asinna oothanliwa eneeraaya erowe wiirimu, iputtiputthi sikina sinoovirelela onvarela Yehova, ni owo onoorowa waakosoopa awo. Mwaha wa heeni ninroromelaahu?

OKOKHORELA WEEKHAIKHAI ONOOROWA OKHALA WA MAHIKU OOTHEENE

6. Ihuhu heeni iraru ninrowaahu woona?

⁶ Mwaha wa heeni nintthuneyaahu ororomelaka weera okokhorela weekhaikhai khonrowa omala nnaamweera nrowaka oviriha maxupo? Mwaha wooweera Biblya onhima weera hiyo ninkhala ehuhu yoovirikana ni ehuhu ya ana a Israeli ni arummwa. Vano ninrowa wiiwexexa etthu yeereñye mwa ihuhu iya iraru: (1) ehuhu ya Israeli akhalayi, (2) ehuhu arummwa ekhwaakaru, ni (3) ehuhu ahu, ‘ehuhu sinrowaaya orehereriwa itthu sootheene. — Mit. 3:21.

7. Mwaha wa heeni ana a israeli oororomeleya yaatthuneyaaya ohakalala mwaha woomukokhorela Yehova?

⁷ Ehuhu ya Israeli akhalayi. Mose ahinaaye okhwa, owo aahaaleela ana a Israeli eeraka: “Khweli kòsuwela wi miyo kikhwiyene, nyuwo muni mùwe winanariha, muhapuwaka ephiro kòhimenrakani otthara.” (Ola. 31:29) Nave-tho Mose aahaaleela ana a Israeli weera, wakhala weera yammurukunuwela Muluku, awo yaamukuxeriwa omuthaamiheriwoni. (Ola. 28:35, 36) Neereke masu ala yaakwanela? Aani. Mwa iyaakha sintxipale, mamwene mantxipale yaathanla ohimwiiwelela Yehova yeerihaka muloko opaka okokhorela weethiru. Mwaha wa yeeyo, Yehova aahaahiya atthu ale yaamurukunuwenle nave khaakhulenle weera mwene a wIsraeli alamuleleke muloko ole. (Ez. 21:25-27) Mene ana a Israeli akina yonne okwanela wa masu a Yehova, awo yaahakalala ni yaavirelela onvarela Yehova moohakalala. — Yes. 55:10, 11.

8. Neereke hiyo naamurowa otikhina vaavo akristu yaahiñyaaya ekhaikhai arummwa ekhwaakaru? Muthalihe.

⁸ Ehuhu arummwa ekhwaakaru. Neereke nnootutuxereya woona weera muloko weekristu wa eseekulu yanaaveeli waahikhala anamootha? Hooye. Mwaha wooweera Yesu aahima weera eyo yaamweereya. (Math. 7:21-23; 13:24-30, 36-43) Arummwa ntoko, Paulo, Pedru ni Yohani, yaahima weera eprofesiya ya Yesu yaahipatxera okwanela ehuhu ene yeele, eseekulu yoopaatxera. (2 Ates. 2:3, 7; 2 Ped. 2:1; 1 Yoh. 2:18) Mwa ehuhu vakhaani akhwaakaru murummwa oomalihera,  akristu oowootha yanneerela eparte Babilonia mutokweene, seiyo siri ittiini soowootha. Ekwaha-tho ela etthu Yesu aahimmaawe yaakwanela.

9. Mwaha wa heeni ehuhu ninkhalaahu eraaya yoovirikana ni ehuhu ya Israeli akhalayi ni ya miloko sa ekristu sa eseekulu yanaaveeli?

⁹ ‘Ehuhu sinrowaaya orehereriwa itthu sootheene.’ Ehuhu ela ninkhalaahu ti yoovirikana ni ehuhu ya Israeli akhalayi ni ehuhu yeeyo akristu oopatxera yaakhanlaaya oowootha. Vanonto ehuhu ahu ela eniitthaniwa hayi? Hiyo ninniitthana ehuhu ela okhala “mahiku òmalihera” a elapo ela yoonanara. (2 Tim. 3:1) Mene Biblya onnoonihera weera vaavo epatxenraaya mahiku oomalihera, yoopatxera-tho ehuhu yootepa otthuneya yeeyo enrowa okhala mwa etempu yintxipale. Ni ehuhu ene yeeyo, enoorowa ovirelela mpaka Omwene mmatatani mwa Kristu oreherere, oweerihe atthu okhala oomalela ni weeriha elapo okhala eparaisu. Ehuhu eyo enniitthaniwa okhala ‘ehuhu sinrowaya orehereriwa sothesene.’ (Mit. 3:21) Ehuhu ela epatxenre eyaakha ya 1914. Eheeni erehererinwe? Aani, Yesu oopatxera olamulela wiirimu. Mwa mukhalelo ene yoola, Yehova tho oomuthanla Mwene mwa osuulu wa Davidi onrowa olamulelaka. Mene khaiyene paahi Yehova areherenre Omweneru. Moovira etempu okokhorela weekhaikhai woopatxera orehereriwa! (Yes. 2:2-4; Ez. 11:17-20) Neereke okokhorela nno weekhaikhai onoonanarihiwa-tho?

10. (a) Eheeni Biblya onhimaawe woohima sa okokhorela weekhaikhai mahiku ahu ala? (Yesaya 54:17) (b) Mwaha wa heeni iprofesiya iya sinnihakalalihaaya?

¹⁰ Mmusome Yesaya 54:17. Nkuupuwelani eprofesiya ela: “Eyuma yothene yohaneliwa weyo, enimòtxeya”! Masu ala ennakwanela olelo. Opwaha mwa yeeyo, masu eri va Yesaya 54:13, 14, ennakwanela-tho olelo ni ennanivaha nimaaliho: “Ni anamwan’á enehusihiwe ni Yahvéh, ni murettele wa anamwan’á onokhale mutokotoko. Onrowa wemexiwa mwa exariya. . . . Niwoko khonrowa wova etthu, niwoko khasinrowa owàttamela weyo.” (Yes. 54:13, 14) Naari Satana yoowo ori ‘muluku a elapo yavathi’ khonwera weemexera muteko ompakiwa weera exuttihiwe atthu voohima sa Yehova. (2 Akor. 4:4) Okokhorela weekhaikhai woorehereriwa, nave khonrowa onanarihiwa veeli ni ittiini soowootha. Okokhorela iwo weekhaikhai onoorowa ovirelela wa mahiku ootheene. Khiyaavo eyuuma enrowa owera waamaliha atthu a Yehova!

EHEENI ENROWA WEEREYA?

11. Eheeni enanroromeliha weera muloko wa atthu khonrowa onyanyaliwa vaavo asinna oothanliwa eneeraaya erowe wiirimu?

¹¹ Eheeni eneera yeereye vaavo asinna oothanliwa  eneeraaya erowe wiirimu? Muupuweleke weera Yesu ti mukukhuli ahu. Owo ti muru wa muloko wa ekristu. Yesu ohiiwanyeiha nnene sene eyo eeraka: “Muholeli anyu ori mmosaru, Kristu.” (Math. 23:10) Mwene ahu onnalamulela ni moohihovela owo onoorowa okwanihera miritti othanlelinwaawe. Okhala weera Mwaana a Yehova onnalamulela, hiyo khontthuneya woova etthu eneereya elapo ela ya vathi. Ekhaikhai weera hiyo khanisuwenle moota Yesu onrowaawe weettiha muloko awe yaphiya vale ehuhu eyo. Tivawonto ninrowaahu woona matakihero a mBiblyani yaawo enrowa onimaaliha.

12. Yehova aakosoopale hayi muloko awe (a) Mose akhwaakaru? (b) vaavo Eliya aakhenlaawe yoothanleliwa ekina? (Nwehe efootu.)

¹² Ana a Israeli ehinaaye ovolowa elapo yoolaiheriwa, Mose aahikhwa. Nto eheeni yaakhumelenle? Neereke ehikhaviheriwaka ni Mose khayaarowa osuwela etthu yoopaka? Hooye. Vaavo awo yeeraaya evireleleke okhala oororomeleya wa Yehova, owo aamurowa waakhaviheraka. Mose ahinaakuve okhwa, Yehova aahimuleela weera amuthanle Yehoxuwa weera ahooleleke muloko. Mwa iyaakha sintxipale Mose aahimuxuttiha Yehoxuwa. (Ott. 33:11; Ola. 34:9) Opwaha mwa yeeyo, asilopwana antxipale, yaari oolikaneene weera ehoolele muloko, ahooleli a 1000, ahooleli a 100, ahooleli a 50 ni ahooleli a 10. (Ola. 1:15) Atthu a Muluku yannakosoopiwa nnene. Ntakihero nikina nraahuno, ti na Eliya. Mpuwa mwa iyaakha sintxipale owo aahaakhavihera ana a Israeli opaka okokhorela weekhaikhai. Mene ekwaha emoha Yehova aahinvaha yoothanleliwa enyowani, weera arowe osuuli wa oYuda. (2 Mam. 2:1; 2 Sow. 21:12) Neereke ana a Israeli oororomeleya a mahimu 10 yaahiisoona okhala oonyanyaliwa? Hooye. Eliya aahimuxuttiha Eliseyo mwa iyaakha sintxipale. Ni nlelo yaahikhala “ana a maprofeti” yaawo yaari oorehereya ene mwa igrupu ni yaakhenle etreinamentu. (2 Mam. 2:7) Naari neere, yaahikhala alopwana antxipale oororomeleya ni oolikaneene weera ehooleleke muloko wa Muluku. Yehova aavirelela okwanihera yootthuna awe, nave annaakosoopa nnene arumeyi awe.

13. Moovarihana ni Aheberi 13:5b, Yehova onanroromeliha eheeni? (Nwehe efootu.)

¹³ Vaavo nonnaahu matakihero ala, etthu heeni eneeera yeereye vaavo asinna oothanliwa eneeraaya erowe wiirimu? Khontthuneya wuupuwela vantxipale. MBiblyani ninnaphwanya ikhaikhai sookhweya, nave seiyo sinnimaaliha: Yehova khanrowa waanyanyala atthu awe a elapo ela ya vathi. (Mmusome Aheberi 13:5b.) Hiihaale ntoko Mose ni Eliya, olelo yookhala egrupu yaamukhaani ya akristu oothanliwa yaawo enhoolela muloko wa Muluku,  Mukuttula Woolamulela. Mpuwa mwa iyaakha sintxipale, asinna a Mukuttula Woolamulela ennaaxuttiha asinna a iputtiputthi sikina weera ehooleleke muloko wa Muluku. Mwa ntakihero, Mukuttula Woolamulela wooreherera ixikola sintxipale weera saatreinariheke asitokweene a mmulokoni, asitokweene a esirkwiitu, asitokweene a ekomisau ya eFiliyaale, asitokweene a oBetheli ni asinna akina. Mukuttula Woolamulela onnaaxuttiha asinna ookhavihera a ekomisau ya Mukuttula Woolamulela. Asinna awo ookhavihera aakhalano miritti sintxipale okhuma viinaano, nave eri oolikaneene weera evirelele okosoopa iputtiputthi sa Kristu.

14. Mwa yoosoma ene yeela, eheeni yiiwanyeihinwe?

¹⁴ Mpaka va, mwa yoosoma ene yeela, nohoona etthu yoowiiwanyeya: Vaavo asinna oothanliwa eneeraaya erowe wiirimu yaawaattamelaka maxupo matokweene, arumeyi a Yehova enoovirelela omukokhorela moororomeleya. Nikhaviheriwaka ni Yesu Kristu, hiyo nnoorowa ovirelela omukokhorela Yehova. Ekhaikhai weera, ehuhu ene yeeyo, hiyo nnoorowa otupheliwa ni Agogi ni Amagogi, yoowo ori wiiraana wa maloko. (Ez. 38:18-20) Mene otupheliwa nno onrowa okhala wa vakhaani ni khonrowa okhumela nnene, khonrowa okhala otuphela onrowa waahiiha atthu omukokhorela Yehova. Moohihovela, Yehova onoorowa onivuluxa! Murummwa Yohani mwa yoowooniheriwa awe, owo aahoona “muloko wa atthu” wa iputtiputthi sikina sa Kristu. Mene Yohani annasuwela weera “muloko wa atthu” yaari ‘yaawo evulunwe mwa maxupo matokweene.’ (Apok. 7:9, 14) Moohihovela Yehova onoorowa onivuluxa!

15-16. Moovarihana ni Apokalise 17:14, eheeni asinna oothanliwa enrowaaya opaka mpuwa mwa ekhotto ya Harmagedoni, ni mwaha wa heeni eyo ennilipihaaya?

¹⁵ Nnaamweera vareene hiiho, akina pooti wuupuwela ha: ‘Eheeni enrowa weereya ni asinna oothanliwa? Eheeni awo enrowaaya opaka yaphiya wiirimu?’ Biblya onnaakhula makoho ala moowiiwanyeya. Owo onniiwanyeiha eeraka anamalamulela a elapo ela “enewane ekhotto ni Mwaputtiputthi.” Mene awo khenrowa owina. Biblya onhima ha: “Nto Mwaputtiputthi anàwerye.” Menento taani enrowa omukhavihera Yesu? Biblya tho onnaakhula. Owo oneera,  “yale yìtthaniwe,” “ethanliwe,” ni “yìwelenle.” (Mmusome Apokalise 17:14.) Atthu ala taani? Ti asinna oothanliwa evenxinwe mookhwaani! Vaavo asinna ala oothanliwa eneeraaya ehiye elapo ela ya vathi erowaka wiirimu yaattamelaka maxupo matokweene, yoothanleliwa aya yoopatxera enrowaaya waakhela, onrowa okhala owana ekhotto. Ela enrowa okhala yoothanleliwa aya etokweene! Asinna akina ethanlinwe, ehaakunveene okhala Anamoona a Yehova, wannaasivela owana ikhotto ni atthu akina. Mpakana akina yannahoolela ikhotto. Mene vaavo ekhanlaaya akristu, awo aasuwela ephiro ya murettele. (Agal. 5:22; 2 Ates. 3:16) Awo aahiya okhavihera ikhotto. Mene vaavo enrowaaya ophiya wiirimu, awo enoorowa okhala vamoha ni Yesu ni malaikha makina, nave enoorowa owana ekhotto yoomalihera ni amwiittani a Muluku.

¹⁶ Nkuupuwelani ela! Olelo va, elapo yeela ya vathi, oothanliwa akina toowunnuwelavo ni khiyaanoono ikuru sintxipale. Menento vaavo enrowaaya ovinyererihiwa weera yakhaleke wiirimu, awo enrowa okhala soopattuxiwa soomunepani, soohikhwa ni soowera vantxipale, nave enoorowa owana vamoha ni Nakhotto Mwene, Yesu Kristu. Nto yamala vale ekhotto ya Harmagedoni, awo enrowa ovaraka muteko vamoha ni Yesu weera yaakhavihere atthu okhala oomalela. Moohihovela, vaavo enrowaaya okhala wiirimu, awo enoowera waapakela itthu sintxipale asinna ni asirokora oosiveleya elapo yeela ya vathi seiyo yahaawenraaya opaka ereene valaponi vaava ntoko atthu oohimalela!

17. Ninsuwela hayi weera arumeyi ootheene oororomeleya a Yehova enoorowa okhala oovareleleya mpuwa mwa ekhotto ya Harmagedoni?

¹⁷ Neereke nyuwo muneerela eparte iputtiputthi sikina? Vanonto, eheeni nyuwo muntthuneyaanyu opaka vaavo Harmagedoni ekhotto etokweene ehaakhumelenle atthu enrowaaya opatxera? Ti wookhweya: Mmuroromeleke Yehova ni mutthareke miruku sawe. Eheeni enheleya mpuwa? Biblya onniiwanyeiha eeraka: “Okele mpani mwá, owale masele ottuli wá. Wìpithihe ehuhu ehivinre mpaka orirya esara awe.” (Yes. 26:20) Naari neere, arumeyi a Yehova a wiirimu ni elapo ya vathi, enoorowa okhala oovareleleya mpuwa mwa Harmagedoni. Hiihaale ntoko murummwa Paulo olempaawe, hiyo ninnaroromela weera ‘nnakhala anamalamulela, naari itthu sa naanaano naari sa muhoolo . . . khasinawerya onimwalanyiha onitthuna wawe Muluku.’ (Arom. 8:38, 39) Ikwaha sootheene, muroromeleke weera Yehova annoosivelani vantxipale, nave khanrowa woohiyani nyuwo!