IKWAHA ikina, anamalepa a Biblya yannatthikela masu makina veeli-veeli. Moone itthu iraru saaweerinhe awo opaka eyo:

Emaara aalempwaawe. Israeli akhalayi atthu khiyaarinono ikoopiya sa malamulo. Ikwaha sintxipale, atthu awo weera yiiwe malamulo emaara yaasommwaaya, muloko wannatthuneya weemela ohoolo wa ehema. (Ola. 31:10-12) Onnooneya weera emaara ene yeele, waari wookhweya atthu waakanyeriwa ni etthu ekina vaavo yeemelaaya yiiwaka osommwa malamulo ewoora yintxipale eriyari ya atthu. (Neh. 8:2, 3, 7) Mwaha wa yeeyo, weera muloko ole owereke wuupuwelela etthu yaasommwa, ni ovarihela muteko miruku mweekumini mwaya, waari wootthuneya otthikeliwa masu ootepa otthuneya. Otthikeliwa masu makina waari wootepa otthuneya weera muloko ole owereke wuupuwelela nnene malamulo makina yaawo yaahela mpuwa soohimmwa sintxipale. — Onam. 18:4-22; Ola. 5:1.

Moota aalempwaawe. Soolepa ikina sa Biblya, soolempwa ni itxipo. Mwa ntakihero, eliivuru ya Masalmu, Etxipo ya Itxipo, ni Wikhupanyera. Itxipo ikina sinnaakhuleliwa ni masu ootthikela, ni eyo ennavarihana ni muru wa etxipo eyo. Ni ennaakhavihera atthu eniiwelela etxipo eyo wuupuwelela masu awo. Mwa ntakihero, moone ele elempwale va Nsalmu 115:9-11: “Israeli, mmuroromele Yahvéh: owo ti ekhavihero awe ni wisakiha wawe. Empa ya Aharoni, mmuroromele Yahvéh: owo ti ekhavihero aya ni wisakiha waya. Nyuwo munamòva Yahvéh, mmuroromele Yahvéh: owo ti ekhavihero aya ni wisakiha waya.” Neereke nyuwo moowera woona masu etthikelinwe moota enaakhaviheraaya ale eneepa itxipo ohela mmuru ni vamurimani vaya etxipo eyo?

Mwaha wa heeni aalempwaawe. Anamalepa a Biblya ikwaha ikina yannatthikela masu ootthuneya. Mwa ntakihero, vaavo Yehova aavahaawe miruku ana a Israeli woohima sa ohitxa ephome, Yehova aahimuleela Mose weera atthikele ikwaha sintxipale mwaha wa heeni. Yehova aatthuna ottittimihera weera ephome entaphulela ekumi. (Onam. 17:11, 14) Moovira etempu vakhaani, vaavo arummwa ni asitokweene a oYerusalemu yaalepaaya etthu akristu yaatthuneyaaya opaka weera emuhakalaliheke Yehova ni osepa itthu seera simunyoonyihe Yehova, awo yaahittittimihera veeli otthuneya waya ohitxa ephome. — Mit. 15:20, 29.

Ekhaikhai weera Biblya onnatthikela masu mantxipale, mene eyo khentaphulela weera Yehova ontthuna weera hiyo ntthikeleke masu mantxipale. Mwa ntakihero, Yesu enre: “Vano mwavekelaka, muhinyakuleke.” (Math. 6:7) Nave-tho owo oonivaha itthu ikina nintthuneyaahu ohelaka mpuwa naavekelaka. (Math. 6:9-13) Nto nnaamweera hiyo nihitthuneyaka otthikela masu mamoha-mamoha vaavo ninvekelaahu, hiyo pooti ohela mpuwa itthu iyo naavekelaka. — Math. 7:7-11.

Sookhala itthu sooreera simmweeriha Biblya otthikela masu veeli-veeli. Mwaha wooweera iyo mikhalelo Yehova yoowo ori muhooleli ahu mutokweenexa onnixuttihaawe etthu eri yooreera wa hiyo. — Yes. 48:17, 18.