1-2. Eheeni ennikhavihera wiiwexexa moota Yehova iisoonenlaawe vaavo itthu soowootha woohima sa nsina nawe samwaramwarinwaaya?

 MUUPUWELELE yooweereya ela: Mutthu nyuwo mummusivelaanyu onnawuulumani moohireerela. Nyuwo moosuwela weera etthu eyo ti yoowootha, mene atthu akina ennaakhulela. Mooriipiha murima, ennapatxera omwaramwaxa yoowootha eyo ni atthu akina ennaakhulela. Mwaakela woonela hayi? Wakhala weera mutthu owo tootthuneya wa nyuwo, ni nyuwo munnavaha mwiitti mikhalelo sawe sooreera, nyuwo mwaamuxupeya, keera? — Mir. 22:1.

² Etthu ela ennanikhavihera woona moota Yehova iisoonenlaawe vaavo mikhalelo sawe sooreera saananarihinwaaya. Mwanawe mmoha oomunepani, aahihima etthu yoowootha woohima sa yoowo, amuleelaka muthiyana oopatxera, Heva. Nave owo aahaakhulela yoowootha eyo. Mwaha wa yoowootha eyo asitiithi ahu oopatxera aamurukunuwela Yehova, nave yookhumelelaaya ti yooweera, yoottheka ni okhwa wohaaphwanya atthu ootheene. (Eph. 3:1-6; Arom. 5:12) Maxupo mootheene nnoonaahu olelo va, ntoko okhwa, ikhotto, ohaawa, ennakhumelela mwaha wa soowootha Satana aahimmaawe oJardim wEdeni. Yehova oniisoonela moota heeni vaavo anoonaawe maxupo ankhumelela mwaha wa soowootha iya? Moohihovela, Yehova onnaxupeya vantxipale. Nnaamweera vareene hiiho, Yehova khaiyene Muluku oowaakuva onyoonyiwa naari ootthikiha isikula, Yehova onnavirelela okhala ‘Muluku oohakalala.’ — 1 Tim. 1:11.

3. Eparakha heeni hiyo nraahuno?

³ Hiyo nookhalano eparakha yookhavihera weera Satana ohoothera nsina na Yehova niiwelelaka sooruma sawe sookhweya: ‘[Nvuwihe] nsina na Yehova.’ (Nsal. 113:1) Hiyo ninnapaka eyo nimuulumaka nnene mwaneene nsina nno nootteela. Nto  neereke nyuwo muri oolikaneene weera mpake eyo? Ninrowa othokorora itthu tthaaru sinrowa onikhavihera ovuwiha nsina na Yehova ni murima ahu wootheene.

YEHOVA ONNAHAKALALA VAAVO NINVUWIHAAHU NSINA NAWE

4. Mwaha wa heeni Yehova onhakalalaawe vaavo nnanvuwihaahu? Nvahe ntakihero. (Nwehe efootu.)

⁴ Tiithi ahu a wiirimu onnahakalala vantxipale onnahakalala vantxipale vaavo ninvuwihaahu nsina nawe. (Nsal. 119:108) Atthu akina ennapaka itthu moohivareleleya etthunaka weera atthu akina yaattottopeleke, naari ewuulumeke nnene. Neereke Yehova ti hiiho? Hooye. Nkuupuwelani ntakihero nna, mwaana onnaakhupaarela apapawe mwa nsivelo ni onneera, “Nyuwo mwa atiithi aka oosiveleya!” Tiithi owo onnahakalala vantxipale mwaha wa etthu mwaana ole opankaawe. Mwaha wa heeni? Neereke tiithi owo onnapaka itthu moohivareleleya otthunaka ottottopeliwa ni mwanawe? Hooye. Opwaha mwa yeeyo, owo oosuwela weera tiithi ooreera, mene onnahakalala mwaha woomoona mwanawe amooniheraka nsivelo ni omuxukurela. Owo oosuwela weera mikhalelo iya ti sootepa otthuneya weera mwaana ole akhale mutthu oohakalala vaavo oninnuwaawe. Vamoha-moharu, Yehova yoowo ori Tiithi ahu, onnahakalala vaavo nnanvuwihaahu.

5. Vaavo nnanvuwihaahu Yehova ninkhavihera woonelela eheeni?

⁵ Vaavo nnanvuwihaahu Yehova, hiyo ninnoonihera weera Satana aamweera onoothera. Mwaha wa heeni? Owo aahimme weera hiyo khanaakela owera okhala oororomeleya wa Yehova ni waakihera nsina nawe. Satana aahimme weera hiyo, wakhala weera naamweereriwa, khinaawera ovirelela okhala oororomeleya. Nave Satana aahima weera, ootheene hiyo nammuhiya Yehova wakhala weera mutthu oonivaha etthu yootepa oreera. (Yobi 1:9-11; 2:4) Mene mulopwana mmoha oororomeleya Yobi, ohoonihera weera Satana aamootha. Nankha nto woohima sa hiyo? Mutthu ori poothe a hiyo ookhalano eparakha yoowoonihera weera onnaakiha nsina na Yehova nave annamukokhorela owo moororomeleya. (Mir. 27:11) Ela eparakha etokweene.

6. Ninrowa omutakiha hayi mwene Davidi ni Alevi? (Nehemiya 9:5)

⁶ Nsivelo nraahuno ni Yehova, ninnaweeriha atthu oororomeleya otthuna ovuwiha nsina nawe. Mwene Davidi olempe ha: “Munepa’ka, mmurelihe Yahvéh, sothesene siri mmirimani mwaka sirelihe nsina nawe nottela.” (Nsal. 103:1) Davidi annasuwela weera, ovuwiha nsina na Yehova waari onvuwiha mwaneene. Nsina na Yehova ninhela mpuwa omutthu awe, nave-tho eyo ennaneeriha wuupuwelela mikhalelo sawe sooreera ni soopaka sawe  sootikhiniha. Davidi aatthuna ovuwiha nsina na Tiithi awe mwaha wooweera owo tootteela. Owo aatthuna opaka eyo ni ‘soothesene siri mmirimani mwawe’ naari neere, ni murimaawe wootheene. Moolikana ni eyo, Alevi yannalamula envuwihaka Yehova. Awo yannaakhulela moowiiyeviha weera khiyaarowa owera ovuwiha nsina nootteela na Yehova moota nimphwanelelaaya. (Mmusome Nehemiya 9:5.) Moohihovela, wiiyeviha iwe, waahakalaliha vantxipale murima wa Yehova.

7. Ninrowa onvuwiha hayi Yehova mmutekoni moolaleera naari nihiku ti nihiku?

⁷ Hiyo tho ninnanvuwiha Yehova nuulumaka sa owo mwa nsivelo, moomuxukurela ni mwa nttittimiho. Vaavo ninrowaahu mmutekoni moolaleera, nuupuweleke weera yootthunaahu ori waakhavihera atthu omoona Yehova ntoko Tiithi ansivelo. (Yak. 4:8) Wa hiyo ti eparakha owoonihera atthu weera Yehova ti Muluku ansivelo, axariya, amiruku, a ikuru, ni weera owo ookhalano mikhalelo sikina sootikhiniha. Mukhalelo mukina wonvuwiha Yehova ni omuhakalaliha ti vaavo nimpakaahu ele ninweraahu weera nimutakiheke. (Aef. 5:1) Naapakaka eyo, atthu akina ennoonelela weera hiyo toovirikana ni atthu akina. (Math. 5:14-16) Vaavo nintthekulaahu ni atthu awo, pooti weeraka ninnakhalano eparakha yoowaaleela mwaha wa heeni nraahu oovirikana ni atthu akina. Yookhumelelaaya tiyooweera, atthu akina ooreera murima pooti otthuna oxuttera sintxipale woohima sa Muluku ahu. Vaavo nnanvuwihaahu Yehova mwa mikhalelo iya, owo onnahakalala vantxipale. — 1 Tim. 2:3, 4.

HIYO NINNAMUHAKALALIHA YESU VAAVO NINVUWIHAAHU NSINA NA YEHOVA

8. Moota heeni Yesu aapatxerinhaawe ovuwiha nsina na Yehova?

⁸ Mwa soopattuxiwa sootheene soosuwela sa wiirimu ni sa elapo ya vathi, khaavo onaasuwela Atiithi ompwaha Mwaana. (Math. 11:27) Yesu onnaasivela Atiithi awe, ni onnapatxeriha ovuwiha nsina naya. (Yoh. 17:26) Aavekelaka Atiithi awe ohiyu ahinaaye okhwa, owo aahuuluma masu vakhaaneene woohima sa muteko opankaawe elapo ela ya vathi eeraka: “Tthiri kòhàsuweliha nsina ná.” (Yoh. 17:26) Owo aatthuna ohima heeni?

9. Ntakihero heeni Yesu ohimmaawe ninnikhavihera wiiwexexa nnene moota Yehova oraawe?

⁹ Yesu aapakavo etthu ohiya paahi waaleela atthu weera nsina na Muluku ti Yehova. Ayuda yaawo Yesu aavaanelaaweno, yaasuwela nsina na Muluku. Mene Yesu aapatxeriha ‘waasuweliha.’ (Yoh. 1:17, 18) Mwa ntakihero, soolepa sa eHeberi sinhima weera Yehova toopixa murima ni oosapwanyeya. (Ott. 34:5-7) Yesu ohiiwanyeiha eyo avahaka ntakihero na mwaana oomwareya. Vaavo hiyo ninsomaahu woohima sa tiithi onwehaka mwanawe ‘oreene otaiwene,’ atthimakaka weera akumaneno, amuupaaraka, amulevelelaka moomalela, hiyo ninnoona opixa murima ni ikharari sa Yehova. (Luka 15:11-32) Yesu oonoonihera moota Atiithi awe eraaya.

10. (a) Ninsuwela moota heeni weera Yesu annavarihela muteko nsina na Atiithi awe ni weera antthuna weera atthu akina epakeke emoha-moharu? (Marko 5:19) (Nwehe efootu.) (b) Eheeni Yesu ontthunaawe weera hiyo nipakeke?

¹⁰ Neereke Yesu annatthuna weera atthu akina evariheleke muteko nsina na Atiithi awe? Moohihovela. Ahooleli akina a ittiini yaaxuttiha weera atthu yaawuulumaka nsina na Muluku, waari ohimuttittimiha, mene Yesu khaahiñye weera yooxuttiha ela ehinkhuma mBiblyani ekhoottihe weera nsina na Yehova nttittimihiwe. Ekwaha emoha, Yesu aamulamiha mulopwana mmoha yoowo aarinono minepa soonanara mulopwana owo aakhala muttetthe wa oJerasa. Atthu a muttetthe ole yaapatxera omoova Yesu, ni yanvekela weera  akhume muttetthe ole. (Mar. 5:16, 17) Nnaamweera vareene hiiho, Yesu aatthuna weera atthu a muttetthe ole esuwele nsina na Muluku. Nto Yesu aamuleela mulopwana ole aamulaminhaawe weera aaleeleke atthu etthu Yehova ompakenlaawe, ohiya etthu Yesu ampakenlaawe. (Mmusome Marko 5:19.) a Nlelo Yesu ontthuna weera nsina na Atiithi awe nsuweliwe elapo yootheene! (Math. 24:14; 28:19, 20) Vaavo nimpakaahu eparte ahu weera naasuwelihe atthu nsina na Yehova, ninnamuhakalaliha Mwene ahu, Yesu.

11. Yesu aaxuttinhe atthareli awe ovekela eheeni ni mwaha wa heeni eyo eraaya yootthuneya? (Ezekiyeli 36:23)

¹¹ Yesu aasuwela weera etthu yootepa otthuneya waari otteeliha nsina na Yehova, nave ovaanyiha soowootha sootheene ootherinwaawe. Tivawonto aaxuttinhaawe atthareli awe ovekela: “Tithi, ori wirimu, nsina ná nttelihiwe.” (Math. 6:9) Yesu annasuwela weera ela yaari etthu yoopattuxiwa eri yootheene entthuneyaaya opaka. (Mmusome Ezekiyeli 36:23.) Khiyaavo yoopattuxiwa ekina mulaponi epanke etthu weera nteelihiwe nsina na Yehova ompwaha Yesu. Mene emaara Yesu aatthukinwaawe, yoottheka heeni amwiittani awe yaamoothenraaya? Onveeha Muluku! Moohihovela Yesu aasuwela weera ovarihela muteko moohireerela naari woothera nsina na Atiithi awe, yaari yoottheka yootepa onanara mutthu eeraawe apake. Wootheriwa ni othorihiwa mwaha wa itthu ahaapankaawe yaari etthu yaamuxumpe vantxipale. Apaale yaari etthu ene yeeyo yaamweerinhe Yesu ‘osareya othanana’ ahaakunveene otthukiwa. — Luka 22:41-44.

12. Moota heeni Yesu otteelinhaawe nsina na Atiithi awe mwa mukhalelo wooreera?

¹² Weera atteelihe nsina na Atiithi awe, Yesu aaviriha maxupo ooveehiwa ni oowootheriwa. Owo asuwela weera aahiwiiwelela Atiithi awe mwa itthu soothesene iye; khaakhanleno etthu yaamuulihinhe muru. (Aheb. 12:2) Nave-tho owo asuwela weera Satana annamuhaaxa mwa etempu ele yooxupa. (Luka 22:2-4; 23:33, 34) Satana aatthuna opaka etthu eri poothe weera Yesu akhale oohiroromeleya, mene Satana khaawenre opaka eyo. Yesu aahoonihera weera Satana ti namootha mutokweene ni weera Yehova ookhalano arumeyi awe oororomeleya envirelela ororomeleya nnaamweera evirihaka maxupo ootthara-tthariwa.

13. Moota heeni munrowaanyu omuhakalaliha Mwene anyu Yesu?

 ¹³ Nyuwo pooti omuhakalaliha Mwene anyu, Yesu Kristu. Nvireleleke ovuwiha nsina na Yehova mwaakhaviheraka atthu akina oxuttera mikhalelo sootikhiniha sa Muluku ahu. Vaavo nyuwo mumpakaanyu eyo, munnatthara mavalo a Yesu. (1 Ped. 2:21) Hiihaale ntoko Yesu, nyuwo munnamuhakalaliha Yehova, nave munnoonihera weera mwiittani a Muluku yoowo ori Satana ti namootha mutokweene!

HIYO NINNAKHAVIHERA WEERA IKUMI SIVULUXIWE VAAVO NINVUWIHAAHU NSINA NA YEHOVA

14-15. Itthu heeni sootikhiniha sinrowa okhumelela vaavo nnaaxuttihaahu atthu woohima sa Yehova?

¹⁴ Vaavo hiyo ninvuwihaahu nsina na Yehova ninnakhavihera weera ikumi sa atthu sivuluxiwe. Nimpaka moota heeni eyo? Satana ‘oottiya muupuwelo wa atthu.’ (2 Akor. 4:4) Atthu awo ennaakhulela soowootha sa Satana ntoko iya: Muluku khokhanle, Muluku ori ottai wa hiyo, nave weera owo khonaapwattha atthu, nave-tho weera Muluku toowuuma murima ni onnaahisa atthu omooroni woohitxipha. Satana onnahima soowootha iya atthunaka weera: ananarihe nsina na Yehova nave weera aakhoottihere atthu omwaattamela owo. Mene muteko ahu woolaleera onnavaanyiha yootthuna ya Satana. Hiyo ninnaaxuttiha atthu ekhaikhai woohima sa Tiithi ahu nivuwihaka nsina nootteela na Muluku ahu. Teevi eri yookhumelelaaya?

¹⁵ Ikhaikhai sa masu a Muluku sookhalano owera otokotoko. Vaavo hiyo nnaaxuttihaahu atthu woohima sa Yehova ni moota owo oraawe, hiyo ninnoona etthu yootikhiniha. Itthu soowootha Satana onhelaawe mmuupuweloni mwa atthu sinnamala, ni awo ennuupuwelela mikhalelo sootikhiniha sa Atiithi ahu. Awo ennakhala ootikhiniheya ni owera wa Yehova ohimmala. (Yes. 40:26) Nave ennaxuttera omuroromela owo mwaha wa exariya awe yoomalela. (Ola. 32:4) Nave-tho ennaxuttera vantxipale woohima sa osuwela wawe otokotoko. (Yes. 55:9; Arom. 11:33) Nave-tho awo ennakhala oomaaleleya vaavo enxutteraaya weera Yehova ti nsivelo. (1 Yoh. 4:8) Vaavo awo emmwaattamelaaya Yehova, yoowehereraaya yookhala mahiku ootheene ennakhala ekhaikhai. Tthiri eparakha hiyo nraahuno yoowaakhavihera atthu weera ewaattamele Atiithi  ahu. Nto naapakaka eyo, Yehova onnaniitthana ‘anamuteko akhwaawe.’ — 1 Akor. 3:5, 9.

16. Moota heeni atthu enrowaaya wiisoonelaka vaavo enxutteraaya nsina na Muluku? Nvahe matakihero.

¹⁶ Apaale etthu yoopatxera nnaaxuttihaahu atthu ti yooweera nsina na Muluku ti Yehova. Eyo pooti omuhakalaliha vantxipale mutthu ori ni murima wootthuna oxuttera. Mwa ntakihero, mwali mmoha oniitthaniwa Aaliyah b ahuuwale ni emusi yeeyo yahaari yeekristu. Mene owo khaahakalala ni ettiini awe ni khaisoona okhala vakhiviru ni Muluku. Eyo yaatxentxa vaavo aapatxenraawe omusoma Biblya ni Anamoona a Yehova, owo aapatxera omoona Muluku ntoko nthamwene awe, ni owo aatikhina vantxipale vaavo aaxuttenraawe weera nsina na Muluku noovinxiwa mBiblya sintxipale munipuroni mwawe aheliwakamo masina anttittimiho ntoko Apwiya. Oxuttera woohima sa nsina na Yehova wootxentxa ekumi awe. Owo ohimme ha: “Nthamwene aka a vamurimani ookhalano nsina!” Teevi eri yookhumelelaaya? Owo ohimme ha: “Vano miyo kookhalano murettele woowaatta mmurimani mwaka, ni kinniisoona okhala oottittimiheya.” Mulopwana mmoha oniitthaniwa Steve aari namweepa ni aahuuwale mwa mikhalelo sooxupa ni ettiini ya eyuda. Owo khaatthuna tho veeli opakela eparte mareherero a ittiini, mwaha wooweera owo aahoona itthu sintxipale soowootha. Mene noovira etempu ameyawe ekhwaakaru, owo aahaakhulela yoosoma ya Biblya ni Anamoona a Yehova. Vaavo owo aaxuttenraawe woohima sa nsina na Muluku eyo yaamuttuttha murima vantxipale. Owo ohimme ha: “Miyo nkitonko oxuttera woohima sa nsina na Muluku, ela ekwaha yoopatxera kinoonaaka weera Muluku ookhala, vano miyo kinnamoona ntoko mutthu. Mwa etempu ene yeele miyo kaahoona weera kamphwanya nthamwene aka eekhaikhai.”

17. Mwaha wa heeni nyuwo munrowaanyu ovirelela ovuwiha nsina na Yehova? (Nwehe efootu.)

¹⁷ Mmutekoni moolaleera, neereke nyuwo munnaaxuttiha atthu akina nsina nootteela na Yehova? Neereke nyuwo munnaakhavihera atthu osuwela mikhalelo sooreera sa Muluku ahu? Wakhala weera munnapaka eyo nyuwo munnavuwiha nsina na Muluku. Nvirelele ovuwiha nsina nootteela na Yehova mwaakhaviheraka atthu omusuwela nnene mutthu ola moorweela mwa nsina nna. Mwa mukhalelo ene yoola, nyuwo munoorowa ovuluxa ikumi saatthu, nyuwo munoowera otthara mavalo a Mwene ahu, Yesu Kristu ni opwaha sootheene, nyuwo munoorowa omuhakalaliha vantxipale Tiithi ahu a wiirimu, Yehova. Nto nvirelele ‘ovuwiha nsina na Yehova mwa mahiku ootheene’! — Nsal. 145:2.