NEEREKE mohoonelela weera mootoko oviriha maxupo meekhaanyu? Ninkhala ‘etempu yooxupa’ ni eyo pooti oneeriha wiisoona okhala meekhaahu ni ookhulumuwa. (2 Tim. 3:1) Menento, khanintthuneya oviriha maxupo a mweekumini meekhaahu. Biblya onnoonihera otthuneya waya okhalano asinthamweene eekhaikhai yaawo enrowa onikhavihera ‘emaara ya maxupo.’ — Mir. 17:17.

Murummwa Paulo aattottela mureerelo ni onthamwene ni atthu ale aapakaaweno mikwaha. (Akol. 4:7-11) Emaara Paulo aatthukinwaawe oRoma, asinthamwene awe yaapaka miteko mikina seiyo Paulo aahaaweraawe opaka meekhaawe. Mwa ntakihero, Epafrodito aahinvaherera Paulo itthu ikina soohaaweleya seiyo asinna ni asirokora a oFilipi yaamurumihenlaaya. (Afil. 4:18) Tikhiko aahiroiha ikarta sa Paulo miloko soovirikana. (Akol. 4:7; nwehe enoota ya yoosoma.) Akhaviheriwaka ni asinthamwene awe, Paulo aawera ovara muteko awe woolaleera nnaamweera aari okateya naari aari meekhaawe okateya. Moota heeni nyuwo munrowaanyu okhala nthamwene eekhaikhai olelo?

Matakihero oolelo ennoonihera otthuneya waya okhala nthamwene eekhaikhai. Moone Yooweereya ya murokora mmoha oonihenre okhala nthamwene a Elisabet, piyoneira a nthiti wEspanha. Vaavo ameyawe yaaphwanyinwaayano eretta ya câncer yeeyo yaarowa oweeriha okhwa, murokora ole aamwinviyarela Elisabet imensagem sintxipale soolipiha sa soolepa sa mBiblyani. Elisabet ohimme ha: “Imensagem iye saakikhavihera okhala oolikaneene ohiisoona okhala meekhaaka nenne nri nihiku.” — Mir. 18:24.

Hiyo pooti olipiha onthamwene ni asinna ni asirokora naakhaviheraka ni miteko sa mmulokoni. Mwa ntakihero, neereke nyuwo mwanwera wiivaherera weera mmukuxe munna naari murokora omuthukumanoni naari mmutekoni moolaleera? Wakhala weera nyuwo munoopaka eyo moohihovela nyuwo munoorowa olipihana mukina ni mukhwaawe. (Arom. 1:12) Menento, aakhala asinna akina ehinwera okhuma owannyaya. Moota heeni ninrowaahu okhala asinthamwene a ekhaikhai wa asinna awo?

Asinna akina ennaviriha maxupo a mweekumini naari itthu ikina seiyo sinwootxeeliha woonela mithukumano Empa ya Omwene. Moone ntakihero na David yoowo ophwanyinweno eretta ya Linfoma. Ooviriha miyeeri 6 akosoopiwaka ni eretta awe eyo. Emaara yootheene aakosoopiwaawe, David ni amwaarawe Lidia yannoonela mithukumano envarihelaka videoconferência.

Moota heeni yaaakhaviherinwaaya ni asinthamweene aya a mmulokoni? Vaavo saamalaaya mithukumano asinna akina yaari Empa ya Omwene yanniilipihera omuulumiha David ni amwaarawe  envarihelaka videoconferência. Opwaha mwa yeeyo, vaavo David ni Lidia yaavahaaya ikomentaariyu saya, muhoolo mwaya yannaakhela imensage soolipiha sa asinna. Yookhumelela aya? David ni Lidia khiyaisoona okhala meekhaaya.

Neereke hiyo pooti waahela mpuwa mmutekoni mwahu moolaleera asinna ale ehinwera okhuma owannyaya? Wakhala weera nnoopaka matxentxo vakhaani, hiyo nnimoonihera weera ninnaapwattha asinna ale enviriha maxupo. (Mir. 3:27) Munoonela hayi imaara ikina ompaka programa ni awo weera mulepe ikarta naari ovara muteko woolaleera munvarihelaka telefoni? Asinna ale ehinwera okhuma owannyaya, pooti woonela muthukumano naari muteko woolaleera envarihelaka muteko videoconferência. David ni Lidia yaattottela mureerelo mareherero ala. David ohimme ha, “Okhala vamoha ni ekhurupu ahu ya muteko woolaleera emaara waapakiwaaya muthukumano wa muteko woolaleera ni nivekelo wannanihakalaliha vantxipale.” Opwaha mwa yeeyo, wakhala weera makhalelo anyu ennawaakhulelani naari munnawera opaka eyo, munoonela hayi omukuxa namasoma anyu a Biblya murowaka owannyawe munna weera mwasome vamoha nuuwo?

Vaavo ninvaraahu ni asinna ni asirokora yaale ehinwera okhuma owaani ni nnaweha mikhalelo saya sooreera, hiyo ninnakhala asinthamwene aya. Mwa ntakihero, vaavo munvaraanyu muteko woolaleera ni asinna ni munoona moota envarelaaya muteko masu a Muluku weera evare murima wa mutthu, moohihovela, nyuwo munnasiveliwa naawo. Vaavo munaakhaviheraanayu asinna ni asirokora ovara vamoha muteko woolaleera, nyuwo munnaapaka asinthamwene antxipale. — 2 Akor. 6:13.

Paulo aaphwanya nimaaliho mwaha wookhala vamoha ni nthamwene awe Tito. (2 Akor. 7:5-7) Yooweereya ela ennanuupuxera weera, ohiya paahi nintthuneya waamaaliha atthu enviriha maxupo nuulumaka masu enoonihera weera ninniihela nipuro naya, mene-tho nikhalaka vamoha ni awo ni nipakaka ele ninweraahu weera naakhavihere. — 1 Yoh. 3:18.

Asinna ni asirokora a oRussia annavaha ntakihero nooreera na woonihera okhaviherana mukina ni mukhwaawe. Moone yooweereya ya Sergy ni amwaarawe, Tatyana. Vaavo mapolicia yaatholathonlaaya owanyaaya, awo yaakuxeriwa otribunaale. Tatyana taapatxenre otaphuliwa ni aahitthikela owaani. Sergy ohimme ha: “Vaavo [Tatyana] aaphiñyaawe owaani, murokora mmoha oolipa murima aaphiya owannyihu. Asinthamwene ahu akina yaahoowa ni yaanikhavihera oreherera itthu saamwaramwarinwe ni mapoliisiya.”

Sergey onnaatxeerera eeraka: “Miyo ennakisivela yoolepa ya Miruku 17:17, yeeyo eneera: ‘Nthamwene onatthuna ehuhu yothene, omphwanaphwana ni munna òyariwa ehuhu yovalavela.’ Masu ala yaavareleya muteko wa miyo mpuwa mwa etempu yeeyo naatthara-tthariwahu, vaavo kahaaweraaka oviriha meekhaaka. Yehova ookivaha asinthamwene oolipa murima yaawo eri vakhiviru vaka.” a

Emaara ninvirihaahu itthu sooxupa, ninnaahaawela asinthamwene weera enikhavihere. Nnoorowa waahaawela asinthamwene awo mpuwa mwa maxupo matokweene. Tivawonto, niilipihereke viinaano vaava okhala asinthamwene eekhaikhai! — 1 Ped. 4:7, 8.