1-2. Moota heeni mukhalelo ahu onlikanaaya ni wa mmiravo ohimmwale eparagrafu yoopatxera?

 NKAMUUPUWELANI mmiravo mmoha ohuuwale ni emusi yoophwanya. Mene nihiku nimoha ennakhumelela erisa, asipapawe ennampaka acidente ni ennakhwa. Mmiravo ole onnaxupeya vantxipale mwaha wa etthu ele. Mene-tho ennakhumelela etthu ekina yootepa oxupa. Owo onnoonelela weera asipapawe ale yaavarihela muteko musurukhu muntxipale weera ethume itthu sa veemusini, ni mwaha wa yeeyo, awo yaakopha vantxipale. Nto vano, ohiya ohalano muhakhu, owo onhalano sookopha, ni atthu ennamukhanyerera weera alive itthu sootheene moowaakuveya. Menento mmiravo ole khanwera oliva sookopha iyo sootheene.

² Mukhalelo ahu onoolikana ni wa mmiravo ole. Asitiithi ahu oopatxera Adamu ni Heva, yaari oomalela ni yaakhala eparayiisu yooreera. (Eph. 1:27; 2:7-9) Awo yaakhalano ekumi yoohakalaliha ni yoohimala. Mene muhoolo mwaya, itthu saatxentxa. Awo yaayeleela eparayiisu ni yooweherera ya okhalano ekumi yoohimala. Etthu heeni yaahiyenraaya anamwane aya? Biblya oneera: “Vanonto, ntoko mwaha wa mutthu mmosaru [Adamu] yottheka evolonwaya mwelaponi mumu ni mwaha wa yottheka okhwa tho, siso tho okhwa wòhàphiyera atthu othene, wona wi othene aya àttheka.” (Arom. 5:12) Etthu Adamu onihiyenraawe, ti yoottheka yeeyo enkumihera okhwa. Yoottheka nivanlaahu enoolikana ni yookopha etokweene yeeyo nihinweraahu oliva. — Nsal. 49:9 [49:8, Tradução do Novo Mundo].

 3. Mwaha wa heeni soottheka sahu sinlikanxeriwaaya ni “sookopha”?

 ³ Yesu oolikanxera yoottheka ni “sookopha.” (Math. 6:12; Luka 11:4) Emaara nintthekaahu onkhala ntoko nimmukophela Yehova. Nto hiyo onnatthuneya oliva yookopha eyo. Wakhala weera khaninliva yookopha eyo, eyo enhiya okhala paahi vaavo ninkhwaahu. — Arom. 6:7, 23.

 4. (a) Nihikhaviheriwaka, eheeni yaarowa weereya ni atthu ootheene? (Nsalmu 49:8-10 [49:7-9, NM]) (b) Mbiblyani, entaphulela eheeni masu ooweera “yoottheka”? (Nwehe ekwaadru eneera “ Yoottheka.”)

⁴ Neereke onnawereya otthikihera itthu sootheene Adamu ni Heva eyelenlaaya? Onnawereya, mene ohiya ni ikuru sahu. (Musome Nsalmu 49:8-10 [49:7-9, NM].) Nihikhaviheriwaka, hiyo khanaarowa okhalano yooweherera ya ekumi muhoolo naari ovinyererihiwa. Ohima ekhaikhai, hiyo naarowa owehereraka paahi okhwa ni ohivinya-tho, hiihaale ntoko inama. — Koh. 3:19; 2 Ped. 2:12.

 5. Moota heeni Tiithi ahu ansivelo Yehova onnikhaviheraawe oliva yookopha mwaha wa soottheka sahu? (Nwehe efootu ya .)

⁵ Muupuwele veeli ntakihero na mmiravo ole ohimmwale woopatxerani. Eheeni yaakela weereya waakhanle weera mulopwana mmoha a muhakhu ohiivaherera weera alive sookopha sawe? Moohihovela, mmiravo ole aamuxukurela vantxipale ni aamwaakhulela yoovaha eyo. Moolikana ni eyo, Tiithi ahu ansivelo Yehova, oonivaha yoovaha enwera oliva sookopha sootheene nihiyerinwaahu mwaha wa yoottheka ya Adamu. Yesu ohiiwanyeiha yoovaha eyo eeraka: “Aani, Muluku ootthuna vantxipale elapo ya vathi, mpaka ophiyera onvaha Mwanawe mmoha, weera ootheene ale eneera emuroromele ehinyaanyiwe, nto ekhaleno ekumi yoohimala.” (Yoh. 3:16) Opwaha mwa yeeyo, yoovaha eyo ennanivaha eparakha yookhalano onthamwene ni Yehova.

 6. Masu heeni Biblya avarihenlaawe muteko ninrowaahu wiiwexexa mwa yoosoma ene yeela, ni mwaha wa heeni?

⁶ Mwa mukhalelo heeni hiyo ninrowaahu ottottela mureerelo yoovaha ela yootepa oreera ya Yehova ni oleveleliwa soottheka naari ‘sookopha’ sahu? Biblya onnaakhula nikoho nna avarihelaka muteko masu ntoko, wiiraanihiwa, otxipiha, ovuluxa, yoowoopola, nivuluxo ni okhalihiwa anaxariya. Mwa yoosoma ene yeela, nnoorowa woona etthu entaphulelaaya masu ti masu a yaala. Vaavo nimphimelelaahu vantxipale woohima sa mwaha ola ni ele Yehova opankaawe weera anlevelele, omuxukurela wahu onnaatxeerereya.

 YEHOVA ONTTHUNA WEERA NIKHALE ASINTHAMWENE AWE

 7. (a) Etthu heeni ekina Adamu ni Heva eyelenlaaya? (b) Mwaha wookhala osuulu wa Adamu ni Heva, etthu heeni hiyo ninhaawelaahu? (Aroma 5:10, 11)

⁷ Ohiya paahi oyeleela okhalano ekumi yoohimala, Adamu ni Heva, aayeleela onthamwene wooreera yaaraayano ni Tiithi aya Yehova. Woopatxerani, Adamu ni Heva yanneerela eparte emusi ya Muluku. (Luka 3:38) Mene emaara awo yahaamwiiwelenlaaya Yehova, yaahoomoliwa veemusini vale ehinaaye waayara anamwane. (Eph. 3:23, 24; 4:1) Mwaha wa yeeyo, hiyo ntoko osuulu aya, onnatthuneya wiiraanihiwa ni Yehova. (Mmusome Aroma 5:10, 11.) Ni masu makina, hiyo onnatthuneya wunnuwihera onthamwene ahu nuuwo. Masu a ekereku etaphulelinwe ntoko ‘wiiraanihiwa’ entaphulela “mwiittani okhala nthamwene.” Etthu yootepa oreera, ti yooweera, Yehova mwaneene opatxerinhe opaka eyo. Moota heeni?

MULUKU OOPAKA MAREHERERO WEERA OWEREYEKE OTXIPIHIWA SOOTTHEKA

 8. (a) Otxipiha yoottheka ti heeni? (b) Ovuluxa ti heeni?

⁸ Yehova oheeriha weera atthu oohimalela ekhale asinthamwene awe, Biblya onniitthana eyo okhala otxipihiwa wa soottheka. Otxipiha ontaphulela otxentxaniha itthu sirinono mwiitti mmoharu. Mwa yeeyo, Yehova oheeriha weera owereye otthikihera etthu Adamu ayelenlaawe avahaka etthu ya mwiitti mmoharu. Masu a ekereku ennavarihela muteko masu erinono yootaphulela yoolikana, ‘otxipiha’ weiwo ori ovuluxa. (Arom. 3:25) Ovuluxa oneeriha okhala ni murettele ni Muluku ni-tho okhalano onthamwene nuuwo.

 9. Etthu heeni Yehova aapankaawe weera soottheka sa ana a Israeli sileveleliweke?

⁹ Yehova aaheeriha weera owereyeke oleveleliwa soottheka sa ana a Israeli ni weera awo ekhalekeno onthamwene wooreera nuuwo. Iyaakha sootheene, ana a Israeli yannatthapela nihiku nootxipihiwa soottheka saya. Nihiku nno, namakeya mutokweene annaaveleela amakeya a inama mwaha wa atthu. Ekhaikhai weera amakeya awo a inama khiyaarowa otxipiha soottheka sa mutthu, mwaha wooweera inama khisaarinono mwiitti waapwaha atthu. Mene emaara yeeyo ana a Israeli yaattharuwaaya ni waaveleela amakeya yaawo Yehova aatthunaawe, awo yaaheereke ororomela weera Yehova aamulevelela soottheka saya. (Aheb. 10:1-4) Opwaha mwa yeeyo, waaveleela moohihiyerereya amakeya a inama, sannaweeriha ana a Israeli wuupuwelela weera yaari oottheka, ni weera sileveleliwe soottheka saya moomalela, awo yannatthuneya etthu ekina etokweene.

10. Etthu heeni Yehova opankaawe weera soottheka sa atthu sileveleliwe moomalela?

¹⁰ Etthu heeni Yehova opankaawe weera soottheka sa atthu sileveleliweke moomalela? Owo oheeriha weera Mwanawe oosiveleyaxa, Yesu, ‘aveleeliwe khuluwi weera ateexe soottheka sa atthu antxipale.’ (Aheb. 9:28) Yesu ooveleela “ekumi awe ntoko nlivo weera aavuluxe atthu antxipale.” (Math. 20:28) Vanonto, yoowoopola ti heeni?

MUKUTTHO WA YESU WOOLIVELA SOOTTHEKA SAHU

11. (a) Moovarihana ni Biblya, yoowoopola ti heeni? (b) Mutthu heeni mmoha paahi aarowa owera oliva yoowoopola?

¹¹ Biblya onhima weera Yehova aahoona weera waatthuneya olivela yoowoopola weera soottheka sahu sitxipihiwe ni nikhale asinthamwene awe. a Mene yoolivela heeni ya yoowoopola yaatthuneya olivela ele Adamu oyelenlaawe? Muupuwele weera Adamu ni Heva aayeleela  ekumi yoomalela ni eparakha yookhalano ekumi yoohimala. Mwa yeeyo, yoolivela ya yoowoopola, yaatthuneya olikanaka ni yeele eyelelinwe. (1 Tim. 2:6) Yoolivela eyo, yaarowa owera oliviwa paahi ni mutthu mutokweene yoowo (1) eera akhale oomalela; (2) eera akhaleno ekumi yoohimala elapo ya vathi; ni (3) eera akhale oolikaneene ovaherera ekumi awe ntoko mukuttho mwaha wa hiyo. Paahi ni mikhalelo iya, mutthu owo anwera oliva ele eyeleelinwe.

12. Mwaha wa heeni Yesu aatthuneyaawe oliva yoowoopola?

¹² Mwaha wa heeni Yesu avanhaawe yoowoopola? Moone mathowa mararu. (1) Owo aari oomalela, “owo khapankiye sottheka.” (1 Ped. 2:22) (2) Mwaha wooweera owo anwera okhala elapo ela ya vathi mahiku ootheene. (3) Owo aari oolikaneene oveleela ekumi awe mwaha wa hiyo. (Aheb. 10:9, 10) Yesu aari oomalela hiihaale ntoko Adamu aaraawe oomalela ahinaaye ottheka. (1 Akor. 15:45) Mwaha wa yeeyo, vaavo Yesu akhwiiyaawe mwaha wa hiyo, ooliva nnene sene ele Adamu ayelenlaawe. (Arom. 5:19) Mwa mukhalelo ene yoola, Yesu ookhala “Adamu òmalihera.” Khontthuneya-tho mutthu mukina oomalela owa weera alive ele Adamu ayelenlaawe. Mwaha wooweera Yesu ohookhwa “khuluwi.” — Aheb. 7:27; 10:12.

13. Ovirikana heeni okhanle eriyari ya otxipiha soottheka ni yoowoopola?

¹³ Ovirikana heeni okhanle eriyari ya otxipihiwa soottheka ni yoowoopola? Otxipihiwa soottheka, etthu Muluku ompakaawe weera hiyo niwere okhala asinthamwene awe. Yoowoopola, yoolivela elivinwe weera owereye otxipihiwa soottheka sa atthu. Yooliva ya yoowoopola, enthoonyereya ni ephome ya mwiitti ya Yesu yeeyo eyeehinwe mwaha wa hiyo. — Aef. 1:7; Aheb. 9:14.

YEHOVA OONOOPOLA MWA YOOTTHEKA, MWA OKHWA NI ONNANIITTHANA ANAXARIYA

14. Etthu heeni ninrowaahu woona viinaano va, ni mwaha wa heeni?

¹⁴ Moota heeni ninrowaahu ottottela mureerelo ele Yehova onipakenlaawe? Weera naakhule nikoho nna, ninrowa woona etthu entaphulelaaya masu meeli Biblya onvarihelaawe muteko, yaawo ennikhavihera woona moota ninttottelaahu mureerelo nlevelelo na Yehova.

15-16. (a) Mbiblyani, masu ooweera ‘nivuluxo’ entaphulela eheeni? (b) Moota heeni eyo ennivoleelaaya?

¹⁵ Mbiblyani, masu ooweera nivuluxo, entaphulela otaphuwa nraahuno mwaha wa yoowoopola. Murummwa Pedru ohuuluma woohima sa otaphuwa iwo eeraka: “Mòsuwela wi khahiyene ni itthu sinùntta ntoko epratha nari etxikuku nvuluxiwanyu wa mikhalelo sa ethiru muhiyeriwanyu ni makholo anyu, hoye, mene ni ephome yorikarikaxa ya Kristu ntoko mwaputtiputthi òhirakala ni òhikhalano malepa.” — 1 Ped. 1:18, 19; enoota.

¹⁶ Mwaha wa mukuttho wa yoowoopola, hiyo nootaphuliwa wa yoottheka ni okhwa, ni ohaawa onkumiheriwa ni itthu iya. (Arom. 5:21) Khaninhovela weera hiyo nookhalano yookopha etokweene nimukophenlaahu Yehova ni Yesu mwaha woonoopola ni ephome ya mwiitti, naari neere, ni ekumi ya Yesu. — 1 Akor. 15:22.

17-18. (a) Entaphulela eheeni okhalihiwa anaxariya? (b) Eyo entaphulela eheeni wa mutthu ti mutthu a hiyo?

¹⁷ Biblya onhima weera arumeyi a Yehova aakhalihiwa anaxariya. Eyo entaphulela weera Yehova khannikhanyerera oliva mwaha wa soottheka saya. Menento eyo khentaphulela weera Yehova khampwattha malamulo awe a xariya. Owo khanniitthana anaxariya mwaha wooweera ninnaphwanelela; naari khanwehexexa soottheka nimpakaahu. Mene Yehova ori oolikaneene otxipiha sookopha sahu mwaha  wooweera ninnoonihera nroromelo mwa yoowoopola ya Yesu. — Arom. 3:24; Agal. 2:16.

¹⁸ Eyo entaphulela eheeni wa mutthu ti mutthu a hiyo? Ale ethanlinwe weera yalamuleleke ni Yesu wiirimu, ahiitthaniwa okhala anaxariya ntoko anamwane a Muluku. (Tito 3:7; 1 Yoh. 3:1) Soottheka saya sooleveleliwa. Onkhala ntoko awo khayintale opaka soottheka, nto ahaakhuleliwa weera yakhale Moomweneni. (Arom. 8:1, 2, 30) Ale erino yooweherera ya okhala elapo ya vathi mahiku ootheene, ahiitthaniwa okhala anaxariya ntoko asinthamwene a Muluku, ni soottheka saya sooleveleliwa. (Yak. 2:21-23) Muloko mutokotoko onrowa ovuluwa mpuwa mwa ekhotto ya Harmagedoni, khonrowa owehereraka otthikela okhwa. (Yoh. 11:26) Nave-tho “alipa òloka” ni “alipa òhiloka” ekhwiiye, aakhalano yooweherera ya ovinyererihiwa. (Mit. 24:15; Yoh. 5:28, 29) Noovira etempu, arumeyi ootheene a Yehova enrowa okhala elapo ya vathi ni okhala oowiiwelela, enoorowa okhalano “[otaphuwa] wa ovuwa wa anamwane a Muluku.” (Arom. 8:21) Hiyo ninnahakalala vantxipale vaavo nnuupuwelaahu etempu yeeyo ootheene hiyo ninrowaahu okhala anamwane oomalela a Tiithi ahu, Yehova!

19. Moota heeni mukhalelo ahu orehererinwaaya? (Nwehe ekwaadru “ Etthu entaphulelaaya wa hiyo.”)

¹⁹ Ekhaikhai ti yooweera, mukhalelo ahu onoolikana ni wa mmiravo ole ohimmwale woopatxerani wa mwaha ola, owo aayeleela itthu sootheene ni aahiyeriwa sookopha itokweene seiyo ahaarowaawe owera oliva. Mene mwaha wa ikharari sa Yehova, hiyo nookhaviheriwa. Mukhalelo ahu wootxentxa mwaha wootxipihiwa soottheka moorweela mwa yoowoopola. Nroromelo nahu wa Yesu Kristu, ninnaneeriha otaphuliwa mwa yoottheka ni okhwa. Nave-tho soottheka sahu pooti oleveleliwa, ni emaara Yehova ompakaawe eyo, onkhala ntoko khanintale opaka soottheka iyo. Mene etthu yootepa otthuneya, mwaha wooweera vano ninnawera okhalano onthamwene ni Tiithi ahu a nsivelo, Yehova.

20. Etthu heeni ninrowaahu woona mwa yoosoma enttharelana?

²⁰ Hiyo ninnamuxukurela vantxipale Yehova ni Yesu vaavo nimphimelelaahu itthu sootheene awo enipakenlaaya. (2 Akor. 5:15) Nahaakhaviheriwa ni atthu ala, hiyo khanaarowa okhalano naari mano yooweherera emoha! Vanonto, entaphulela eheeni wa mutthu ti mutthu meekhaawe nlevelelo na Yehova? Ti yeeyo ninrowaahu woona mwa yoosoma enttharelana.