MWAHA ONTHOKORORIWA 2
ETXIPO 132 Hiyo na Erutthu Emosaru
Alopwana oothela, mwaattittimiheke amwaarinyu
“Nyuwo tho, alopwana, . . . [nwoonihereke] yawo nttittimiho.” — 1 PED. 3:7.
ELE NINKELA AHU OXUTTERA
Ninrowa woona moota mulopwana oothela onrowaawe waattittimihaka amwaarawe moorweela mwa masu awe ni soopaka sawe.
1. Etthu heeni emweerinhe Yehova opaka ntheli?
YEHOVA ‘Muluku oohakalala’ ni owo ontthuna weera hiyo-tho nihakalaleke. (1 Tim. 1:11) Owo oonivaha itthu sintxipale seiyo sinnikhavihera opuha ekumi. (Yak. 1:17) Yoovaha emoha ya soovaha iyo, ti ntheli. Vaavo mulopwana ni muthiyana enthelanaaya, awo ennalaiherana osivelana, ottittimihana ni okosoopana mukina ni mukhwaawe. Okhala oowiiraana onoorowa waakhavihera ophwanya ohakalala weekhaikhai. — Mir. 5:18.
2. Matheli mantxipale mahiku ala eri moota heeni?
2 Mooriipiha murima, matheli mantxipale mahikwaano, ennamuttiwala natiri yammannaaya nihiku yaathelanaaya. Nto yookhumelela aya, awo khenhakalala. Soohimmwa sa mareherero a elapo yootheene enweha-weha ekumi (Organização Mundial de Saùde), sinnoonihera weera alopwana antxipale oothela, ennaahasula asaaraya weerutthuni, mmasuni naari mmuupuweloni. Mulopwana oothela ompaka eyo, apaale onnaathokorora amwaarawe mwa nttittimiho yakhala ni atthu, mene yakhala owaani annaahasula amwaarawe. Nave-tho matheli mantxipale khenhakalala wakhala weera mulopwana oothela oopatxera woonela iviidiyu sinkonihaniwa moohireerela.
3. Mwaha wa heeni alopwana akina oothela enaahasulaaya asaaraya?
3 Etthu heeni enweeriha alopwana akina okhalano mukhalelo ola wa nihasu? Pooti weera awo ehuuwale ni tiithi yoowo aari oowali, nto ti yeeyo enweeriha wuupuwela weera khaiyene woonanara okhalano mukhalelo owo. Akina aavoleeliwa ni sookhovelela sa elapo aya seiyo sinhima weera “mulopwana eekhaikhai”, ontthuneya ovarihela ikuru sawe weera awoonihere amwaarawe weera muhooleli a emusi. Alopwana akina khexuttihinwe okosoopa miyuupuwelo saya ni onyoonyiwa waya. Alopwana akina ahunnuwihera moonelo woohireera woohima sa asithiyana ni okonihana mwaha woowoonela voohihiyerereya iviidiyu sinkonihaniwa moohireerela. Opwaha mwa yeeyo, soohimmwa sinhima weera, eretta ya COVID-19 yohaatxeerera maxupo ala. Menento mulopwana, ehikhale etthu enrowa omweeriha waathokorora amwaarawe noowali.
4. Alopwana oothela makristu entthuneya osepaka eheeni, ni mwaha wa heeni?
4 Alopwana oothela eri makristu, ennatthuneya wiikosoopa ni mukhalelo woohireera woohima sa moota enwoonelaaya athiyana. a Mwaha wa heeni? Nthowa nimoha, mwaha wooweera, muupuwelo wa mutthu ikwaha sintxipale onnamweeriha mutthu opaka etthu. Murummwa Paulo aawooperera akristu oothanliwa a oRoma weera ‘ehitthareke mikhalelo sa elapo ela.’ (Arom. 12:1, 2) Emaara Paulo aalepelaawe Aroma, muloko weera okhanleene mwa etempu yintxipale. Mwa yeeyo, masu a murummwa Paulo ennoonihera weera yaakhala atthu akina mmulokoni ni nlelo yaavoleeliwa ni sootthuna ni muupuwelo wa elapo. Tivawonto owo aawooperenraawe otxentxa muupuwelo ni mukhalelo aya. Miruku iya sinnavareleya-tho muteko wa alopwana oothela makristu olelo va. Mooriipiha murima, akina a yaawo aavoleeliwa ni muupuwelo wa mulaponi ni ennaahasula asaaraya. b Yehova ontthuna weera mulopwana oothela aakosoopeke hayi amwaarawe? Waakhula waya, nimphwanya va yoolepa ya mwaha ene yoola.
5. Moovarihana ni 1 Pedru 3:7, mulopwana oothela aathokororeke hayi amwaarawe?
5 Mmusome 1 Pedru 3:7. Yehova onnaavekela alopwana oothela weera yaattittimiheke asaaraya. Ottittimiha, ontaphulela mukhalelo wa moota nimmuthokororaahu mutthu nimmuttittimihaahu. Mulopwana oothela ommuttittimiha mwaarawe, onnamuthokorora mwa mukhalelo wooreera murima ni wa nsivelo. Mwa yoosoma ene yeela, ninrowa woona moota mulopwana oothela onrowaawe omuttittimiha mwaarawe. Mene nihaakunve, ninrowa woona mukhalelo onoonihera alopwana oothela ohaattittimiha asaaraya.
MUSEPEKE MUKHALELO OHINAATTITTIMIHA AMWAARINYU
6. Moota heeni Yehova oniisoonelaawe vaavo alopwana oothela enaahasulaaya asaaraya? (Akolosi 3:19)
6 Nihasu na weerutthuni. Yehova khonsiveliwa ni mutthu oowali. (Nsal. 11:5) Owo khonsiveliwa ni alopwana enaahasula asaaraya. (Mal. 2:16; mmusome Akolosi 3:19.) Moovarihana ni yoolepa ya mwaha ninthokororaahu, 1 Pedru 3:7, wakhala weera mulopwana khonaathokorora nnene amwaarawe, onthamwene awe ni Muluku onnavoleeliwa. Yehova khaniiwa mavekelo awe.
7. Moovarihana ni Aefeso 4:31, 32, masu heeni alopwana oothela entthuneyaaya osepa? (Nwehe “Masu oowiiwanyeihiwa.”)
7 Nihasu moorweela mwa masu. Alopwana akina ennaahasula asaaraya moorweela mwa masu enuulumaaya noowali ni ooveeha. Mene Yehova khonsiveliwa ni ‘isara, owali, waakhulana naari masu ooveeha.’ c (Mmusome Aefeso 4:31, 32.) Yehova onniiwa itthu sootheene. Moota mulopwana onuulumaawe ni amwaarawe nnaamweera areene owannyawe, ti wootthuneya wa Yehova. Mulopwana onuuluma ni amwaarawe anyemaka, ohiya paahi onnanariha ntheli nawe, mene-tho onnananariha onthamwene awe ni Muluku. — Yak. 1:26.
8. Yehova onoonela hayi iviidiyu sinkonihaniwa moohireerela, ni mwaha wa heeni?
8 Woonela iviidiyu sa atthu enkonihana moohireerela. Yehova onoonela hayi iviidiyu iyo? Owo khonsiveliwa ni iviidiyu iyo. Mwa yeeyo, mulopwana onweha ifootu sa atthu oohiwara, onnananariha onthamwene awe ni Yehova ni khonaasiveliha amwaarawe. d Yehova onweherera weera mulopwana avireleleke okhala oororomeleya wa amwaarawe, ohiya paahi moorweela mwa itthu ompakaawe, mene-tho moorweela mwa miyuupuwelo sawe. Yesu ohimme weera mulopwana onanweha muthiyana mukina moohireerela, ooraruwano “vamurimani.” e — Math. 5:28, 29.
9. Mwaha wa heeni Yehova ommunanaraaya vaavo mulopwana ommukonihaawe mwaarawe moowuuliha muru?
9 Waakoniha amwaarawe moowuuliha muru. Alopwana akina ennaakhanyerera asaaraya weera yaakoniheke mwa mukhalelo woowuuliha muru, yoowo oneeriha oxupeya yoowuupuxera aya ya murima naari onweeriha ohiisoona okhala oosiveleya. Yehova onnamunanara mukhalelo ola woonanara. Owo onweherera weera mulopwana oothela, aasiveleke ni aakosoopeke amwaarawe, nave attittimiheke miyuupuwelo saya. (Aef. 5:28, 29) Nankhanto wakhala weera mulopwana oothela ari mukristu onnaakoniha amwaarawe mwa mukhalelo woowuuliha muru, onnakhala oowali ni amwaarawe naari onnoonela iviidiyu sinkonihaniwa moohireerela? Neereke owo pooti otxentxa muupuwelo awe ni soopaka sawe?
MOOTA WOOWINA MIKHALELO SOOWUULIHA MURU
10. Moota heeni alopwana oothela enrowaaya ottottela mureerelo ntakihero na Yesu?
10 Etthu heeni enrowa omukhavihera mulopwana oothela owina mukhalelo woonanara ni woowuuliha muru? Owo pooti wiilipihera omutakiha Yesu. Nnaamweera Yesu ahaathenle, moota aathokoronraawe arummwa awe, ntakihero nooreera na moota alopwana entthuneyaaya waathokororaka asaaraya. (Aef. 5:25) Mwa ntakihero, nrowe nthokorore etthu alopwana oothela enxutteraaya ni moota Yesu aathokoronraawe arummwa awe ni moota uulumaawe naawo.
11. Moota heeni Yesu aathokororaawe arummwa awe?
11 Yesu annaathokorora arummwa awe mwa mukhalelo wooreerela ni annaattittimiha. Owo khaiyene aari oowuuma murima naari khiisoona okhala a vasuluxa. Nnaamweera Yesu aari Pwiya aya ni Muxuttiha aya, owo khaapaka itthu saarowa oweerihaka arummwa awe omoona okhala ooweraxa. Ohiya opaka eyo, owo annaavarela moowiiyeviha. (Yoh. 13:12-17) Owo aaweerenle ha atthareli awe: “Muxuttere ni miyo, woona weera miyo toomaala ni oowiiyeviha, mwapaka eyo, munoophwanya wiitthuuwa mweekumini mwanyu.” (Math. 11:28-30) Moone weera Yesu aari oomaala. Mutthu oomala khaiyene toolosowa. Opwaha mwa yeeyo, mutthu owo onnawera wiiweha-weha. Vaavo ontannyiwaawe onnavirelela okhala oomaaleleya ni onnawera oweha-weha miyuupuwelo sawe.
12. Moota heeni Yesu uulumaawe ni atthu akina?
12 Yesu aavarihela masu awe weera aalipihe ni waamaaliha atthu akina. Owo khaanyemela atthareli awe. (Luka 8:47, 48) Naari vaavo amwiittani awe yanveehaaya ni omutannya, ‘owo khaatthikihera.’ (1 Ped. 2:21-23) Mpaka imaara ikina Yesu annathanla omaala ohiya owaakhula moonyoonyiwa. (Math. 27:12-14) Nna ntakihero nooreera wa alopwana makristu oothela!
13. Ntoko ehimmwalaaya va Matheyo 19:4-6, moota heeni mulopwana oothela onrowaawe ‘wiiphitaanyera ni amwaarawe’? (Nwehe efootu.)
13 Yesu ohaaxuttiha alopwana oothela ovirelela okhala oororomeleya wa asaaraya. Owo ohuuluma masu a Atiithi awe yaawo enhima weera mulopwana oothela ontthuneya ‘aphitaane ni mwaarawe.’ (Mmusome Matheyo 19:4-6.) Masu a ekereku evarihelinwe wa masu ala ooweera ‘ophitaana’, entaphulela “okolari.” Mwa yeeyo, wiiraana wa mulopwana ni muthiyana, ontthuneya okhaleke woolipa ntoko awo erookolariwa. Wakhala weera mmoha a yaawo ampaka etthu yoonanara, ooweeli ennaviriha maxupo. Mulopwana oothela oniiraana vantxipale ni mwaarawe, anoorowa osepa mikhalelo sootheene soowoonela iviidiyu sinkonihaniwa moohireerela. Owo aneereke osepa moowaakuveya ‘oweha itthu soohireerela.’ (Nsal. 119:37) Weera apake eyo, owo ontthuneya okosoopa maitho awe weera ahinweheke moohireerela muthiyana mukina ahikhanle mwaarawe. — Yobi 31:1.
Mulopwana oothela oororomeleya, onnasepa etthu eri poothe envarihana ni okonihana moohireerela (Nwehe eparagrafu 13) g
14. Itthu heeni mulopwana a nihasu ontthuneyaawe opaka weera areherere onthamwene awe ni Yehova ni amwaarawe?
14 Mulopwana onaahasula amwaarawe weerutthuni ni moorweela mwa masu onuulumaawe, onnatthuneya opaka itthu weera areherere onthamwene awe ni Yehova ni amwaarawe. Itthu heeni ontthuneyaawe opaka? Yoopatxera, owo ontthuneya waakhulela weera ookhalano maxupo matokweene. Khiyaavo etthu eri yoovitheya ohoolo wa Yehova. (Nsal. 44:22 [44:21, Tradução do Novo Mundo]; Koh. 12:14; Aheb. 4:13) Yanaaveeli, owo ontthuneya ohiya waahasula amwaarawe ni ootxentxa mukhalelo awe. (Mir. 28:13) Yanaararu, owo ontthuneya ovekela nlevelelo wa amwaarawe ni wa Yehova. (Mit. 3:19) Owo ontthuneya onvekela Yehova weera anvahe ntthuno nootxentxa ni nikhavihero weera awereke owehexexa miyuupuwelo sawe, moota onuulumaawe ni soopaka sawe. (Nsal. 51:12-14 [51:10-12, NM]; 2 Akor. 10:5; Afil. 2:13) Yanaaxexe, owo ontthuneya opakaka itthu moovarihana ni mavekelo awe ni oxuttera osepa mikhalelo sootheene sa owali ni wuuluma moohireerela. (Nsal. 97:10) Yanaathanu, owo onnaasa nikhavihero na asitokweene ansivelo a mmulokoni. (Yak. 5:14-16) Yanaathanu namosa, owo onnampaka palanu onrowa omukhavihera osepa mukhalelo owo muhoolo. Mulopwana oothela onoonela iviidiyu sinkonihaniwa moohireerela, onnatthuneya otthara miruku sene seiya. Yehova onooreeliha wiilipihera wawe weera atxentxe mukhalelo awe. (Nsal. 37:5) Mene khontthuneya paahi mulopwana oothela osepa mukhalelo woowuuliha muru, owo-tho onnatthuneya oxuttera waattittimiha amwaarawe. Moota heeni onrowaawe opaka eyo?
MOOTA MUNROWAANYU WAATTITTIMIHA AMWAARINYU
15. Moota heeni mulopwana oothela onrowaawe woonihera nsivelo wa amwaarawe?
15 Nwoonihereke nsivelo. Asinna oothela, ennahakalala mwaha wooweera mahiku ootheene ennapaka itthu sinoonihera weera ennaasivela amwaaraya. (1 Yoh. 3:18) Mulopwana oothela, pooti woonihera weera onnaasivela amwaarawe mwa itthu ikhaanini ntoko, ovarela ntata naya naari waakhupaarela mwa nsivelo. Naari owo pooti waalepela emensagem aweerelaka, “Mookinkhela” naari waakoha ha, “Nihiku nanyu nneetta hayi?” Nave ikwaha ikina, owo pooti woonihera nsivelo nawe aalepelaka masu ooreerela vakartawuni. Vaavo mulopwana oothela ompakaawe itthu iya, onnaattittimiha amwaarawe nave onnalipiha ntheli nawe.
16. Mwaha wa heeni mulopwana oothela ontthuneyaawe waattottopelaka amwaarawe?
16 Mwaaxukureleke. Mulopwana onaattittimiha amwaarawe, onnaamaaliha ni waalipiha. Mukhalelo mmoha woopaka eyo, ori waaxukurela mwaha wa itthu sootheene empakaaya weera emukhavihere. (Akol. 3:15) Vaavo mulopwana oothela onaattottopelaawe amwaarawe ni murima awe wootheene, eyo ennaavara murima. Awo enniisoona okhala oovareleleya, oosiveleya ni oottittimiheya. — Mir. 31:28.
17. Moota heeni mulopwana oothela onrowaawe woonihera nttittimiho wa amwaarawe?
17 Mukhaleke ooreera murima ni a nttittimiho. Mulopwana oothela onaasivela amwaarawe, onnaavaha mwiitti nave onnaasivela. Owo onnawoona amwaarawe ntoko yoovaha yootepa oreera ya Yehova. (Mir. 18:22; 31:10) Yookhumelela aya, owo onnaathokorora mooreerela ni mwa nttittimiho, mpaka emaara yeeyo enkonihanaaya. Emaara yeeyo enkonihanaaya, owo khanrowa waakhanyereraka amwaarawe opaka itthu sinrowa oweerihaka ohiisoona nnene, soowuuliha muru naari sinrowa weeriha yoowuupuxera aya ya murima oxupeya. f Owo-tho onniilipihera okhalano yoowuupuxera ya murima yooreera ohoolo wa Yehova. — Mit. 24:16.
18. Alopwana oothela entthuneya olakela opaka eheeni? (Nwehe ekwaadru “ Itthu ixexe sinrowa oweerihani okhala mulopwana oothela anttittimiho.”)
18 Nyuwo alopwana oothela, muroromeleke weera Yehova onnoona ni onnavaha mwiitti wiilipihera wanyu weera mwaattittimihe amwaarinyu mwa mikhalelo sootheene sa ekumi anyu. Mulakele waattittimiha asaarinyu musepaka mikhalelo soowuuliha muru ni mukhalaka ooreera murima, anttittimiho ni ansivelo. Mwapaka eyo, nyuwo munoorowa owoonihera weera munnaasivela ni munnaavaha mwiitti. Mwaattittimiheke amwaarinyu, mwapaka eyo, munookosoopa onthamwene wootepa otthuneya, onthamwene anyu ni Yehova. — Nsal. 25:14.
ETXIPO 131 Ele “Muluku Ephitanyalyawe, Mutthu Ahimwalanyihé-tho”
a Alopwana oothela pooti ottottela mureerelo esomaka mwaha oneera, “Yehova onnasiveliwa ni moota nyuwo munaathokororaanyu asirokora” va Nwehereri a Janeiro a 2024.
b Asithiyana enhasuliwa pooti ottottela mureerelo esomaka mwaha oneera, “Ajuda para vítimas de violência doméstica” va Séries de artigos “Mais tópicos” va jw.org ni va JW Library®.
c MASU OOWIIWANYEIHIWA: “Masu a nihasu” enhela mpuwa masu ooveeha, oowali naari ookhulumula. Masu eri poothe oohireerela, oowuulihiha muru naari ooveeha, nno nihasu.
d Moone va jw.org ni va JW Library mwaha oneera “A pornografia pode destruir o seu casamento.”
e Muthiyana ootheliwa aiyawe enoonela iviidiyu sinkonihaniwa moohireerela, pooti ottottela mureerelo mwaha oneera “Etthu heeni mwaakelaanyu opaka wakhala weera moowoonelela aiyinyu yoonelaka iviidiyu sa atthu ankonihana moohireerela?” va Nwehereri a Agosto a 2023.
f Biblya khanhima etthu ntheli nintthuneyaaya opaka naari osepa vaavo enkonihanaaya, ntheli nri poothe neekristu ninnatthuneya opaka soothanla sinvarihana ni omuttittimiha waya Yehova, osivelihana mukina ni mukhwaawe ni okhalano yoowuupuxera ya murima yooreera. Mwa yeeyo, ale ethelanne khentthuneya waaleela atthu akina moota enkonihanaaya.
g OTAPHULELA WA EFOOTU YA : Makoleeka a omutekoni a munna mmoha ehikhanle Anamoona a Yehova, enneerera omweeriha munna owo oweha irevista saya sa atthu enkonihana moohireerela.
