MWAHA ONTHOKORORIWA 5
ETXIPO 108 Ophenta wa Muluku Khonimala
Moota ninttottelaahu mureerelo nsivelo na Yehova
“Kristu Yesu orwenle elapo ya vathi, wera àvuluxe anamattheka.” — 1 TIM. 1:15.
ELE NINKELA AHU OXUTTERA
Ninrowa woona moota ninttottelaahu mureerelo yoowoopola ni moota nnooniheraahu omuxukurela wahu Yehova.
1. Etthu heeni nintthuneyaahu opaka weera nimuhakalalihe Yehova?
NKUUPUWELANI weera nyuwo monvaha mutthu yoovaha yoothanleya ni yooreera. Nyuwo mwaamuxupeya waakhanle weera mutthu owo orimwaasa osunka ni khanuupuwela-tho yoovaha eyo! Mene nyuwo mwaamuhakalala moona weera mutthu owo onnavarihela muteko ni onnavaha mwiitti yoovaha eyo. Nintthuna ohima eheeni? Yehova oonivaha Mwanawe. Owo onnahakalala vaavo nnooniheraahu oxukurela yoovaha ela yootepa otthuneya ni mwaha wa nsivelo nawe nenno nimweerinhe ovaha yoowoopola! — Yoh. 3:16; Arom. 5:7, 8.
2. Eheeni ninrowaahu woona mwa yoosoma ene yeela?
2 Moovira etempu, hiyo pooti opatxera oyeleela ovaha wahu mwiitti yoowoopola. Mene wakhala weera nnooyeleela ovaha wahu mwiitti yoowoopola, onrowa okhalaka ntoko yoovaha ya Muluku nihenle nipuro nenno nihinweraahu woona naari nihinuupuwelelaahu. Weera nisepe weereya eyo, nintthuneya wuupuwelelaka veeli-veeli oxukurela wahu mwaha wa ele Muluku ni Kristu enipakenlaaya. Yoosoma ela enoonikhavihera opaka eyo. Nnoorowa othokorora moota ninttottelaahu mureerelo yoowoopola viinaano ni moota ninrowaahu ottottela mureerelo muhoolo. Nnoothokorora-tho moota ninrowaahu woonihera oxukurela wahu nsivelo na Yehova, otepaxa wene, emaara ya wuupuwelela okhwa wa Yesu.
MOOTA NINTTOTTELAAHU MUREERELO VIINAANO
3. Mwa mukhalelo heeni ninrowaahu ottottela mureerelo yoowoopola viinaano va?
3 Hiyo ninnattottela mureerelo mukuttho wa yoowoopola wa Kristu. Mwa ntakihero, mwaha wa yoowoopola, Yehova onnanlevelela soottheka sahu. Owo khonkhanyereriwa onlevelela, mene onootthuna. Nasalmu ooniheraka oxukurela, ohimme ha: “Khweli, Apwiy’aka, mwà òrera murima ni òlevelela.” — Nsal. 86:5; 103:3, 10-13.
4. Mwaha wa heeni Yehova ovanhaawe yoowoopola? (Luka 5:32; 1 Timotheyo 1:15)
4 Atthu akina pooti wiisoonaka weera khemphwanela nlevelelo na Yehova. Ohima ekhaikhai, ootheene hiyo khanimphwanela. Murummwa Paulo uupuwela weera owo ‘khaaphwanela wiitthaneliwa nsina na murummwa.’ Menento aahaatxeerera eeraka: “Nto mwaha wa mahala a Muluku kiri yeyo kiraka.” (1 Akor. 15:9, 10) Emaara ninttharuwaahu soottheka sahu, Yehova onnanlevelela. Mwaha wa heeni? Khaiyene mwaha wooweera ninnaphwanela, mene mwaha wooweera owo onnansivela. Wakhala weera nyuwo munnaxupeya ni miyuupuwelo sooweera khamumphwanelela, muupuweleke weera Yehova ohaavaha yoowoopola, khaiyene atthu oohittheka, mene atthu oottheka ettharunwe. — Mmusome Luka 5:32; 1 Timotheyo 1:15.
5. Neereke akina a hiyo onnatthuneya wuupuwelaka weera aakhalano edireitu yoowaakhela ikharari sa Yehova? Muthalihe.
5 Khaavo mutthu a hiyo ontthuneya wiisoonaka weera ookhalano edireitu yoowaakhela ikharari sa Yehova nnaamweera ninvarelaka mpuwa mwa iyaakha sintxipale. Ekhaikhai weera Yehova onnavaha mwiitti ororomeleya wahu. (Aheb. 6:10) Owo oonivaha Mwanawe ntoko yoovaha ya mahala, khaiyene weera anonliva mwaha wa muteko nnanvarelaahu. Wakhala weera hiyo nnuupuwela weera ninnaphwanela ikharari sa Yehova naari nookhalano edireitu yoothanleya, naarowa okhalaka ntoko ninhima weera Kristu okhwiiye vasiiyoni vene. — Mulikanxere ni Agalata 2:21.
6. Mwaha wa heeni Paulo aavanraawe moowiilipihera mmutekoni mwa Yehova?
6 Paulo aasuwela weera khaaphwanela waakhela mahala a Muluku. Vanonto, mwaha wa heeni iilipihenraawe mmutekoni mwa Yehova? Khiilipihenre weera oonihere weera annaphwanelela, hooye, mene weera oonihere oxukurela wawe oreera murima wa Yehova. (Aef. 3:7) Hiihaale ntoko Paulo, hiyo ninnavirelela onvarela Yehova mwa nthiti ohiya weera nintthuna ophwanelela ikharari sa Yehova, hooye, mene weera noonihere omuxukurela wahu.
7. Mwa mukhalelo heeni mukina ninrowaahu ottottela mureerelo yoowoopola viinaano va? (Aroma 5:1; Yakobe 2:23)
7 Mukhalelo mukina ninttottelaahu mureerelo yoowoopola viinaano, ori okhalano onthamwene woolipa ni Yehova. a Ntoko ehimmwalaaya mwa yoosoma evinre, vaavo naayariwaahu, khinaakhanleno onthamwene ni Muluku. Mene mwaha wa yoowoopola, hiyo pooti okhalano “murettele ni Muluku” ni omwaattamela owo. — Mmusome Aroma 5:1; Yakobe 2:23.
8. Mwaha wa heeni nintthuneyaahu omuxukurela Yehova mwaha wa eparakha yoovekela?
8 Eparakha ya ovekela wa Yehova, etthu yootepa othanleya nraahuno mwaha wa onthamwene ahu woolipa nuuwo. Yehova khaiyene oniiwa paahi mavekelo aatthu awe ntoko ekhurupu vaavo enthukumanaaya, mene onniiwa-tho mavekelo a mutthu ori poothe a hiyo. Nivekelo ninnamaaliha murima ahu nave ninnanivaha murettele wa mmuupuweloni. Mene awo khaiyene mareeliho mamoha paahi enkhumelela mwaha wa nivekelo. Nivekelo-tho pooti olipiha onthamwene ahu ni Muluku. (Nsal. 65:3 [65:2, Tradução do Novo Mundo]; Yak. 4:8; 1 Yoh. 5:14) Emaara aaraawe elapo ya vathi, Yesu annavekela imaara sintxipale mwaha wooweera aasuwela weera Yehova annamwiiwa ni weera nivekelo, nannalipiha onthamwene ni Tiithi awe. (Luka 5:16) Ninnaxukurela mwaha wa mukuttho wa Yesu, mwaha wooweera, ninnawera okhala asinthamwene a Yehova ni wuuluma nuuwo moorweela mwa nivekelo!
MOOTA NINROWAAHU OTTOTTELA MUREERELO MUHOOLO
9. Moota heeni arumeyi oororomeleya enrowaaya ottottela mureerelo yoowoopola muhoolo?
9 Moota heeni arumeyi oororomeleya a Yehova enrowaaya ottottela mureerelo yoowoopola muhoolo? Awo enimwaakhela ekumi yoohimala. Atthu antxipale ennuupuwela weera eyo khenwereya mwaha wooweera atthu ennakhwa mpuwa mwa iyaakha sintxipale. Mene yoolakela ya Yehova okhuma woopatxerani, waari weera atthu ekhalekeno ekumi yoohimala. Waakhanle weera Adamu khatthenke, khaavo aarowa wuupuwelaka weera ekumi yoohimala etthu yootepaxa oreera ehimphwanelaaya okhala yeekhaikhai. Nnaamweera viinaano va oreene wooxupa wuupuwelela nreeneno ekumi yoohimala, ninnatthuneya wuupuwelela weera enoowereya, mwaha wooweera, Yehova ooliva ni muttenko mutokweene wa ekumi ya Mwanawe weera eyo ewereye. — Arom. 8:32.
10. Etthu heeni asinna oothanliwa ni iputtiputthi sikina enwehereraaya?
10 Nnaamweera ekumi yoohimala ereene etthu yootepa oreera ninwehereraahu muhoolo, Yehova ontthuna weera naasaaseke viinaano vaava. Asinna oothanliwa, ennaweherera okhalano ekumi erino yoolakela wiirimu vaavo enrowaaya olamulelaka elapo ela ya vathi vamoha ni Yesu. (Apok. 20:6) Iputtiputthi sikina sinnaweherera okhala mparayiisu elapo ela ya vathi ehoonaka ovoreya naari othanana. (Apok. 21:3, 4) Neereke nyuwo mmoha a iputtiputthi sikina munweherera okhalano ekumi yoohimala elapo ya vathi? Yoovaha ela, khaiyene paahi ti yoomaaliha, mene ela etthu yeeyo atthu epakelinwaaya! Ekumi yoohimala elapo ya vathi, enoorowa oneeriha hiyo okhala oohakalala vantxipale.
11-12. Mareeliho heeni makina ninwehereraahu mparayiisu? (Nwehe efootu.)
11 Nkuupuwelani moota ekumi anyu enrowaaya okhala mparayiisu elapo ela ya vathi. Nyuwo khamunrowa oxupeyaka mwaha wa iretta naari anookhwa. (Yes. 25:8; 33:24) Yehova onoorowa okwanihera soohaawela sanyu sooreera munrowaanyu okhalakano. Itthu heeni nyuwo muneeraanyu mutthuneke oxuttera? Fisica? Química? Etxipo? naari Arte? Moohihovela, eneereke otthuneya atthu weera ehimeke moota sinrowaaya opakiwa impa, anamateka ni anamalima. Nave-tho eneereke ohaaweleya atthu weera elimeke, ereherereke eyootxa, epakeke ikaruma soopakela impa, olima iwoortha ni okosoopa iyo. (Yes. 35:1; 65:21) Mwaha wa ekumi yoohimala munrowaanyu okhalano, nyuwo munoorowa okhalano etempu weera muxuttere etthu eri poothe muntthunaanyu.
12 Onrowa okhala woohakalaliha owaakhela atthu yaakhwiiye enrowa ovinyererihiwaka. (Mit. 24:15) Nkuupuwelani-tho moota nyuwo onrowaaya woosivelani oxuttera itthu sintxipale woohima sa Yehova nwehexexaka miteko sawe sintxipale opankaawe. (Nsal. 104:24; Yes. 11:9) Opwaha mwa sootheene, onrowa okhala woohakalaliha omukokhorela Yehova nihiivahaka nthowa naari vakhaaniini! Nyuwo mwaamurowa otxentxiha mareeliho ala a muhoolo ni “opuha ehuhu vakhani mwa yottheka”? (Aheb. 11:25) Moohihovela, hooye! Mareeliho ala tootepa otthuneyaxa opwaha itthu sootheene nimpakaahu viinaano va. Muupuweleke weera, eparayiisu elapo ela ya vathi, khaiyene enrowa okhala paahi yooweherera ya muhoolo, moohipisa, eyo enoorowa okhala yeekhaikhai. Itthu iya khasaarowa weereya waakhanle weera Yehova khanoonihenre nsivelo mookwanela anivahaka Mwanawe ntoko yoowoopola!
Mareeliho heeni nyuwo munwehereraanyu mparayiisu? (Nwehe eparagrafu 11-12)
MWAAKHULELEKE NSIVELO NA YEHOVA
13. Moota heeni ninrowaahu woonihera oxukurela wahu nsivelo na Yehova? (2 Akorinto 6:1)
13 Moota heeni hiyo nnooniheraahu omuxukurela wahu Yehova mwaha woonivaha yoowoopola? Ninnapaka eyo nihelaka nipuro noopatxera mweekumini mwahu muteko awe. (Math. 6:33) Aani, Yesu ohookhwa “wera yale ari n’okumi, ehìkhalele n’okumi mekhaya, mene emukhalele yole okhwiye ni ovinyerenre.” (2 Akor. 5:15) Moohihovela, hiyo khanintthuna oyeleela yoolakela ya oreera murima wa Yehova. — Mmusome 2 Akorinto 6:1.
14. Moota heeni ninrowaahu ororomelaka mareherero a Yehova?
14 Nave-tho hiyo pooti waakhulela nsivelo na Yehova nroromelaka mareherero awe. Moota heeni? Emaara hiyo nimpakaahu soothanla ntoko osoma wuniversidade naari muteko ninrowaahu ovara, nintthuneya othokororaka etthu Yehova ontthunaawe weera nipakeke. (1 Akor. 10:31; 2 Akor. 5:7) Emaara ninvarihelaahu muteko nroromelo nahu, enneereya etthu yoohakalaliha, nroromelo nahu ni onthamwene ahu ni Yehova onnalipa vantxipale. Nave-tho yooweherera ahu ennalipa. — Arom. 5:3-5; Yak. 2:21, 22.
15. Moota heeni isemana sa wuupuwelela ninrowaahu woonihera oxukurela wahu?
15 Mene wookhala mukhalelo mukina woowoonihera oxukurela wahu nsivelo na Yehova. Ori vaavo ninvarihelaahu muteko emaara yoowuupuwelela okhwa wa Yesu weera nimoonihere Yehova moota nimmuxukurelaahu mwaha wa yoowoopola. Ohiya paahi ompaka palanu oowoonela muthukumano wa wuupuwelela, hiyo onnatthuneya waawopa atthu akina weera yoonele-tho. (1 Tim. 2:4) Mwaaleeleke ale munaawopaanyu etthu enrowa weereya omuthukumanoni iwo. Nyuwo pooti ovarihela muteko iviidiyu sa va jw.org seiyo sineera, Yesu akhwenle heeni? ni Mupuwelele okhwa wa Yesu. Asitokweene a mmulokoni onnatthuneya waawopa ale yeemexenre onvarela Yehova. Muupuwele ohakalala onkhumelela wiirimu ni elapo ya vathi vaavo eputtiputthi emoha ya Yehova yaariheñye entthikelaaya mmulokoni! (Luka 15:4-7) Omuthukumanoni woowuupuwelela, nipakeke ele ninweraahu weera niwuulumiheke ohiya paahi asinna naakhovelenlaahu, menento otepaxa wene, ale eneera opatxera woonela muthukumano owo naari ale epatxenre woonela khalayi. Nintthuna weera atthu awo yooneke weera ennaakheliwa! — Arom. 12:13.
16. Mwaha wa heeni nintthuneyaahu waatxeerera muteko ahu woolaleera isemana sa wuupuwelela?
16 Nyuwo pooti waatxeerera miteko soomunepani isemana sa wuupuwelela okhwa wa Yesu. Opaka eyo, etthu yooreera weera moonihere oxukurela wanyu mwaha wa itthu sootheene Muluku ni Kristu yoopakenlaayani. Vaavo munrowaanyu waatxeereraka muteko munanvarelaanyu Yehova, munoorowa woona moota anookhaviheraaweni, ni yookhumelela aya, nroromelo nanyu wa yoowo nnoovirelela olipa. (1 Akor. 3:9) Opwaha mwa yeeyo, mutthareke osommwa wa Biblya isemana sa wuupuwelela ntoko enhimmwalaaya va Musomeke Soolempwa kata nihiku naari ekwaadru emphwanyeya va Ekadernu Ya Vamweerini ya mithukumano sa eriyari ya esemana. Nyuwo-tho pooti ovarihela Soolepa iyo sa mBiblyani weera sikhale ntoko yoosoma anyu ya Biblya.
17. Eheeni emmuhakalaliha Yehova? (Nwehe ekwaadru “ Moota ninrowaahu woonihera oxukurela wahu nsivelo na Yehova.”)
17 Ekhaikhai weera, mwaha wa makhalelo anyu, nyuwo pooti ohiwera opaka itthu sootheene sihimmwale mwa yoosoma ene yeela. Menento muupuweleke weera Yehova khonweha itthu nyuwo mumpakaanyu alikanxeraka ni itthu atthu akina empakaaya. Owo onweha etthu eri vamurimani vanyu. Yehova onnahakalala vaavo onwehaawe oxukurela wanyu ni murima anyu wootheene yoovaha ela yootepa oreera, yoowoopola. — 1 Sam. 16:7; Mar. 12:41-44.
18. Mwaha wa heeni nimmuxukurelaahu Yehova ni Yesu Kristu?
18 Hiyo nookhalano eparakha yooleveleliwa soottheka sahu, okhalano onthamwene woolipa ni Yehova ni okhalano yooweherera ya ekumi yoohimala mwaha wa yoowoopola. Ikwaha sootheene, noonihereke oxukurela wahu nsivelo na Yehova nenno nimweerinhe onivaha mareeliho ala. (1 Yoh. 4:19) Noonihereke-tho omuxukurela wahu Yesu, yoowo onisivenle vantxipale mpaka ovaha ekumi awe mwaha wa hiyo! — Yoh. 15:13.
ETXIPO 154 Ophenta Khonimala
a Yehova aahaalevelela arumeyi awe akhalayi Kristu ahaakunveene ovaha yoowoopola. Yehova anwera opaka eyo mwaha wooweera annaroromela weera Mwanawe aamurowa okhala oororomeleya mpaka okhwa. Mwa yeeyo, vamaithoni va Muluku, yoowoopola yaari yeekhaikhai onkhala ntoko yaaliviwa. — Arom. 3:25.
