MWAHA ONTHOKORORIWA 3
ETXIPO 35 ‘Nisuweleke Othanla Itthu Sootepa Otthuneya’
Mpake soothanla simmusiveliha Yehova
“Erimarima ya miruku ti omòva [Yehova], omusuwela Òttela ti wiwa’mo khuluwi.” — MIR. 9:10.
ELE NINKELA AHU OXUTTERA
Moota ninrowaahu ovarihela muteko osuwela wahu, wiiwexexa wahu, ni miruku sahu weera nipake soothanla sooreera.
1. Etthu heeni ootheene ahu ninvirihaahu?
MAHIKU ootheene, ninnatthuneya opaka soothanla. Soothanla ikina ti sookhweya opaka, ntoko etthu ninrowaahu omatabixari naari ewoora ninrowaahu okona. Soothanla ikina ti sooxupa opaka. Iyo pooti ovoleela ekumi ahu, ohakalala wahu, emusi ahu naari okokhorela wahu. Nintthuna weera soothanla sahu sinikhavihereke hiyo ni emusi ahu. Opwaha mwa sootheene, nintthuna weera soothanla sahu simusiveliheke Yehova. — Arom. 12:1, 2.
2. Itthu heeni sinrowa wookhaviherani opaka soothanla mwa miruku?
2 Moohihovela, nyuwo pooti opaka soothanla mwa miruku wakhala weera (1) moosuwela itthu sootheene woohima sa mwaha owo, (2) moothokorora etthu Yehova onuupuwelaawe woohima sa mwaha owo, ni (3) wuupuwelela moomaaleeleya etthu munrowaanyu othanla. Mwa yoosoma ene yeela, nnoorowa woona itthu iya tthaaru, nave-tho sinoonikhavihera woona moota nirowaahu otxentxeriha muupuwelo ahu. — Mir. 2:11.
MUSUWELE ITTHU SOOTHEENE WOOHIMA SA MWAHA OWO
3. Nvahe ntakihero woohima sa mwaha wa heeni muntthuneyaanyu osuwela itthu sinhela mpuwa muhinaaye opaka yoothanla.
3 Etthu yoopatxera muntthuneyaanyu opaka weera mpake yoothanla yooreera, ori osuwela itthu sinhela mpuwa. Mwaha wa heeni eyo eraaya yootthuneya? Nkuupuwelani weera mutthu onvoreiwa onnanvekela meediku weera amukosoope. Neereke weera meediku aamurowa opaka yoothanla ahinaaye onwehexexa naari ompakela makoho mutthu owo onvoreiwa? Moohihovela hooye. Nyuwo-tho munoopaka soothanla sooreera wakhala weera woopatxerani moothokorora itthu sootheene sinhela mpuwa mwaha owo. Moota heeni nyuwo munrowaanyu opaka eyo?
4. Moovarihana ni Miruku 18:13, moota heeni nyuwo munrowaanyu ororomela weera moosuwela itthu sinhela mpuwa? (Nwehe efootu.)
4 Ikwaha sintxipale nyuwo pooti osuwela itthu sinhela mpuwa mpakaka makoho. Muupuwele weera nyuwo moowompwa ofestani. Neereke nyuwo mwaamurowa? Wakhala weera nyuwo khammukhovelenle ole nrowa ohoolela efesta eyo, ni khamusuwenle itthu sirehereriwe, nyuwo onootthuneya ompakela makoho ala: “Efeesta eyo enrowa opakiwa woowiini ni liini? Neereke onoosariwawo? Taani anrowa oweha-wehaka? Taani anrowa woonela efeesta eyo? Itthu heeni sinrowa opakiwa ofeestani iwo? Neereke sinoorowa okhalawo soowura soohapala?” Waakhula wa makoho ala onoorowa wookhaviherani opaka yoothanla yooreera. — Musome Miruku 18:13.
Musuwele itthu sootheene sinhela mpuwa mpakaka makoho (Nwehe eparagrafu 4) a
5. Etthu heeni muntthuneyaanyu opaka mwasuwela vale itthu sinhela mpuwa?
5 Muhoolo mwaya, musuwenleene itthu sootheene sinhela mpuwa, nyuwo munnatthuneya wuupuwelela etthu ekhanle yooweereya. Mwa ntakihero, ankha wakhala weera nyuwo munimoonelela weera atthu ehintthara miruku sa mBiblyani enoorowa ofeestani iwo? Naari sinookhalawo soowura soohapala sihiweha-wehiwaka? Neereke nyuwo munnoona weera efesta eyo enrowa okhala ya mulaponi? (1 Ped. 4:3) Mwa mukhalelo mukina, ankhanto wakhala weera ewoora enrowaaya opakiwa efeesta eyo ennavoleela ewoora ya mithukumano sa mmulokoni naari muteko woolaleera? Wakhala weera nyuwo munoowehexexa itthu sootheene, nyuwo munoorowa opaka yoothanla yooreera. Mene yookhala etthu ekina muntthuneyaanyu opaka. Nyuwo moosuwela moota munoonelaanyu woohima sa mwaha owo, vanonto Yehova onoonela hayi mwaha owo? — Mir. 2:6.
MUTHOKORORE ETTHU YEHOVA ONUUPUWELAAWE
6. Moovarihana ni Yakobe 1:5, mwaha wa heeni nintthuneyaahu onvekela nikhavihero Yehova?
6 Munvekele Yehova weera ookhavihereni wiiwexexa moota onuupuwelaawe. Yehova oonilaihera onivaha osuwela weera niwere wuupuwelela waakhala weera yoothanla ninrowaahu opaka enoomusiveliha. Owo onnaavaha osuwela “othene n’ohakalala ni ahiruwanaka”. — Mmusome Yakobe 1:5.
7. Moota heeni nyuwo munrowaanyu wiiwexexa moota Yehova onuupuwelaawe? Nvahe ntakihero.
7 Mwapaka nivekelo nvekelaka miruku sa Yehova, nwehexexeke waakhula wawe. Weera nlikanxere: Wakhala weera nyuwo moothweelela mpuwa mwa mukwaha, pooti weeraka munonvekela nikhavihero mutthu onkhala waattamela nipuro nno. Mene neereke mwaamurowa ahinaaye owaakhulani? Moohihovela hooye. Nyuwo mwammwiiwelela moomaaleleya vaavo aarowaawe wooleelakani mphiro wootthara. Mwa mukhalelo mmoharu, vaavo munanvekelaanyu miruku Yehova mweerere woonelela waakhula wawe moorweela mwa malamulo ni miruku sa mBiblyani seiyo sinvareleya muteko ni mwaha owo. Mwa ntakihero, vaavo mumpakaanyu soothanla woohima wakhala weera munoorowa ofeestani yeele ehimmwale woopatxerani, nyuwo pooti othokorora itthu Biblya onhimaawe woohima sa ifesta soohiphwanelela, asinthamwene oohireerela ni otthuneya waya ohela sootthuna sa omwene nipuro noopatxera opwaha soohaawela sahu. — Math. 6:33; Arom. 13:13; 1 Akor. 15:33.
8. Etthu heeni muntthuneyaanyu opaka wakhala weera muntthuna nikhavihero weera mphwanye soohimmwa munhaawelaanyu? (Nwehe efootu.)
8 Nnaamweera vareene hiiho, ikwaka ikina nyuwo muneereke ohaawela nikhavihero weera mphwanye soohimmwa munaasaanyu. Nyuwo pooti ophwanya nikhavihero nno wa munna naari murokora oowunnuwa moomunepani. Nave, nyuwo munoorowa ottottela mureerelo muthola-tholaka muneenaanyu. Sookhala soohimmwa sintxipale va ikaruma sahu sa yoosoma, ntoko Liivuru onaakhavihera anamoona a Yehova otholathola nyaha ni Vida Cristã – Textos Bíblicos Úteis. Muhittuwale etthu muntthunaayu: opaka yoothanla enrowa omuhakalaliha Yehova.
Moone moota Yehova onuupuwelaawe (Nwehe eparagrafu 8) b
9. Moota heeni ninrowaahu ororomelaka weera yoothanla ahu enoorowa omuhakalaliha Yehova? (Aefeso 5:17)
9 Moota heeni ninrowaahu ororomelaka weera yoothanla ninrowaahu opaka enoomuhakalaliha Yehova? Nihaakunveene opaka yoothanla, nintthuneya osuwela nnene sene. Biblya oneera, “omusuwela Òttela ti wiwa’mo khuluwi.” (Mir. 9:10) Aani, osuwela weekhaikhai onrweela mwaha woosuwela mikhalelo sa Yehova, yootthunaawe, ni etthu emmusivela naari emmunanara. Mwiikoheke ha, ‘Kisuwelaka etthu kimpakaaka woohima sa Yehova, yoothanla heeni kintthuneyaaka opaka enrowa omuhakalaliha?’ — Mmusome Aefeso 5:17.
10. Mwaha wa heeni miruku sa mBiblyani siraaya sootepa otthuneya opwaha sookhovelela sa emusi ahu naari sa muttetthe ahu?
10 Imaara ikina, weera nimuhakalalihe Yehova, onootthuneya ohaasiveliha atthu nraahuno. Mwa ntakihero, asitiithi akina etthunaka mureerelo wa mwanaya, pooti onvekela mwanaya owo mutokweene weera atheliwe ni mulopwana orino musurukhu muntxipale ni onrowa waakhaviheraka nnaamweera ahikhanleene oolipa moomunepani. Ekhaikhai weera entthuna weera mwanaya akosoopiweke nnene mwa mukhalelo wa weerutthuni, mene taani enrowa omukhaviheraka okhala oolipa moomunepani? Yehova onoonela hayi mwaha owo? Ninnaphwanya waakhuliwa va Matheyo 6:33. Eversu ela, ennawooperera makristu ovirelela “ohela Omwene wa Muluku nipuro noopatxeera.” Nnaamweera naattittimihaka asitiithi ahu ni atthu a muttetthe ahu, yoolakela ahu etokweene omuhakalaliha Yehova.
WUUPUWELA MOOMAALELEYA ETTHU MUNROWAANYU OTHANLA WOOHIMA SA MWAHA OWO
11. Mukhalelo heeni onhimmwa va Afilipi 1:9, 10 onrowa wookhaviherani woonelela etthu munrowaanyu othanla?
11 Noomala othokorora miruku sinhela mpuwa woohima sa yoothanla anyu, nyuwo munnatthuneya wuupuwelela moomaaleleya etthu munrowaanyu othanla. (Mmusome Afilipi 1:9, 10; nwehe enoota ya yoosoma “mmirukuni mothene.”) Mukhalelo wa wuupuwelela onoorowa wookhaviherani woonelela etthu enrowa okhumelela wa yoothanla eri poothe munrowaanyu opaka. Ikwaha ikina pooti okhala wookhweya opaka soothanla. Mene khaiyene soothanla sootheene sinkhala sooluluwanya. Wuupuwelela onimookhaviherani opaka soothanla mwa miruku naari sireene nyaha sooxupa.
12-13. Moota heeni miruku sinrowaaya wookhaviherani opaka soothanla sooreera woohima sa muteko?
12 Muupuwele yooweereya ela. Nyuwo munaasa muteko weera nwereke otxiha emusi anyu. Munnaphwanya miteko miili. Nyuwo munnaweha itthu sootheene sinhela mpuwa nwehexexaka makhalelo a muteko owo, ewoora ya muteko, etempu munrowaanyu ovirihaka, ni itthu ikina. Opwaha mwa yeeyo, miteko iya soomiili khasinkhoottihiwa mBiblyani. Apaale nyuwo munoorowa othanla muteko mmoha mwaha wooweera onnoosivelani naari mwaha wooweera munoorowa waakhelaka musurukhu muntxipale. Menento, sookhala itthu ikina muntthuneyaanyu othokorora muhinaaye opaka yoothanla.
13 Mwa ntakihero, neereke muteko owo waamurowa ovoleela ewoora ya mithukumano sa mmulokoni? Neereke muteko owo onoorowa owiiyerakani etempu mwaarowaanyu okosoopaka soohaawela sa mmuupuweloni naari sa omunepani sa erutthu anyu? Opaka makoho ala enoorowa wookhaviherani ‘ohela itthu sootepa otthuneya’ ori okokhorela ni soohaawela sa emusi anyu nipuro noopatxera ohiya itthu sa weerutthuni. Mwapaka eyo, nyuwo munoorowa opaka yoothanla yeeyo Yehova onrowaawe oreeliha.
14. Moota heeni ovarihela muteko miruku ni woonihera nsivelo onrowaaya onikhavihera osepa waakwattuliha atthu akina?
14 Miruku-tho sinoonikhavihera owehexexa moota yoothanla ahu enrowaaya waavoleela atthu akina, weera nsepe ‘waakwattuliha.’ (Afil. 1:10) Eyo ti yootthuneya vaavo nimpakaahu soothanla sa omeekha mwa mikhalelo ntoko mawarelo ni wiireherera. Mwa ntakihero, hiyo pooti otthuna othanla mawarelo ni moota woowiireherera. Mene neereke atthu a mmulokoni naari a vaate va muloko anookwattuliheya ni mawarelo awo? Miruku sinoonikhavihera ottittimiha muupuwelo aya. Nsivelo nnooneeriha waasa sootthuna sa ‘asikhwiihu’ ni okhala oowiiyeviha. (1 Akor. 10:23, 24, 32; 1 Tim. 2:9, 10) Mwa yeeyo, hiyo nnoorowa opaka yoothanla enoonihera nsivelo ni waattittimiha wahu atthu akina.
15. Itthu heeni muntthuneyaanyu opaka muhinaaye opaka yoothanla yootepa ootthuneya?
15 Wakhala weera nyuwo mumpaka yoothanla yootepa otthuneya, muupuwelele itthu sinhaaweleya weera mukwanihere yoothanlaanyu. Yesu oonixuttiha “opakela ikontha.” (Luka 14:28) Mwa yeeyo, nwehexexe etempu enhaaweleya, itthu ni wiilipihera muntthuneyaanyu opaka weera mukwanihere yoothanlaanyu. Imaara ikina, nyuwo pooti ovekela nikhavihero na emusi anyu weera moone etthu mutthu ori poothe onrowaawe opaka weera akhavihere yoothanlaanyu. Mwaha wa heeni opaka eyo oraaya wootthuneya? Mwaha wooweera, yoothanlaanyu pooti weeraka ennatthuneya opakiwa matxentxo makina, naari yookhala yoothanla ekina eri yoovirikana mene eri yootepaxa oreera. Ni emaara yeeyo munaahelaanyu mpuwa amusi anyu ni muniiwaanyu miyoonelo saya, awo anoorowa okhala oolikaneene ovara vamoha ni nyuwo weera yoothanlaanyu ekhumele nnene. — Mir. 15:22.
MPAKE YOOTHANLA ENROWA OKHUMELA NNENE
16. Miruku heeni sinrowa wookhaviherani opaka yoothanla enrowa okhumela nnene? (Nwehe ekwaadru “ Moota woopaka soothanla mwa miruku.”)
16 Wakhala weera nyuwo mootthara miruku sihimmwale osulu, nyuwo muri oolikaneene weera mpake yoothanla ya miruku. Nyuwo moosuwela itthu sootheene sinhela mpuwa ni moothokorora miruku seiyo sinrowa wookhaviherani opaka yoothanla enrowa omuhakalaliha Yehova. Vano nyuwo pooti onvekela Yehova weera ookhavihereni opaka yoothanla enrowa okhumela nnene.
17. Etthu heeni yootepa otthuneya weera mpake soothanla sooreera?
17 Nnaamweera nyuwo mpankeene soothanla seiyo saakhumenle nnene khalayi, muupuwele weera etthu yootthuneya weera mpake soothanla sooreera, khaiyene osuwela wanyu naari sookumanano sanyu, mene ti miruku sa Yehova. Yoowo paahi tonrowa woovahani osuwela weekhaikhai, wiiwexexa, ni miruku seiyo siri mathipelo a iseru. (Mir. 2:1-5) Yehova pooti wookhaviherani opaka soothanla simmuhakalaliha. — Nsal. 23:2, 3.
ETXIPO 28 Ti Pani Ophwanenle Okhala Mpatthani a Yehova?
