1. Atthu antxipale mahikwaano enwehexexa eheeni?

 NEEREKE nyuwo mohoonelela weera atthu antxipale olelo va toowiitthuna? Mwa ntakihero, atthu akina ennanvarihela muteko redes sociais weera yoonihere itthu eraayano ni itthu enweraaya opaka. Mwa yeeyo, eri atthu vakhaaneene paahi enanvuwiha Yehova Muluku. Mwa yoosoma ene yeela, nnoorowa woona etthu entaphulelaaya onvaha ovuwa Yehova ni etthu oneerihaka opaka eyo. Nave-tho nnoorowa woona moota ninrowaahu onvahaka Yehova ovuwa ntoko owo onphwanelaawe, ni moota owo onrowaawe otteeliha nsina nawe muhoolo.

ONTAPHULELA EHEENI ONVAHA OVUWA YEHOVA?

 2. Moota heeni Yehova oonihenraawe ovuwa wawe va mwaako Sinayi? (Nwehe vakaapani.)

² Ovuwa ti heeni? Mbiblyani masu ooweera “ovuwa” pooti otaphulela etthu eri poothe emmweeriha mutthu okhala ootikiniha. Yehova aahoonihera ovuwa wawe evirakaru etempu vakhaani vaavo muloko wa ana a israeli waavuluxiwaaya wookaporoni wExipitu. Nkuupuwelani etthu ela: Ana a israeli antxipale yaathukumana ohoolo wa omwaako Sinayi weera yaakumane ni Muluku aya. Nihutte nooriipa ninnakhuneela mwaako ole. Mootutuxera mwaako waapatxera ottikinyeya okhumaka mwiixi ni yaakhumelela etari ni okukutteya ni wanniiwanyeya onyakula vantxipale wa ebuzina. (Ott. 19:16-18; 24:17; Nsal. 68:9 [68:8, Tradução do Novo Mundo]) Nkuupuwelani moota ana a israeli yaatikinihenyaaya vaavo Yehova oonihenraawe ovuwa wawe.

 3. Ontaphulela eheeni onvaha ovuwa Yehova?

 ³ Ankhanto woohima sa atthu? Neereke hiyo pooti onvaha ovuwa Yehova? Aani, hiyo pooti onvaha ovuwa. Mukhalelo mmoha wonvaha ovuwa Yehova ori waaleela atthu akina woohima sa owera wawe wootikiniha ni mikhalelo sawe sooreera. Nave-tho nnonvaha ovuwa Muluku, vaavo nnanvahaahu ovuwa mwaha wa itthu ninweraahu opaka nikhaviheriwaka ni owo. (Yes. 26:12) Mwene Davidi ntakihero nooreera na mutthu onvanhe ovuwa Yehova. Nivekelo aapankaawe ohoolo wa muloko wa ana a israeli, Davidi aamweerenle ha Muluku: “[Yehova], wawá ti owerya, otokotoko, ovuwa, warya ni nttittimiho, wona wi sothesene wirimu ni vathi ti sawá, [Yehova].” Amalihakaru nivekelo nna “muthukumano wothene wàmuttottopela [Yehova].” — 1 Sow. 29:11, 20.

 4. Moota heeni Yesu anvanhaawe ovuwa Yehova?

⁴ Emaara Yesu aaraawe elapo ya vathi, anvuwiha Tiithi awe vaavo aaleelaawe atthu weera Yehova ti anvaha owera woopaka miiriira iye. (Mar. 5:18-20) Yesu-tho anvaha ovuwa Yehova moorweela mwa moota uulumaawe woohima sa Tiithi awe ni moota aathokororaawe atthu akina. Ekwaha emoha Yesu aaxuttiha musinagogani. Eriyari ya atthu ale yaamwiiwa aakhalamo muthiyana mmoha aarino munepa woonanara mpuwa mwa iyaakha 18. Munepa ole woonanara waamurakaliha muthiyana ole ahinwera weetta ookonweene. Yaari etthu yooriipiha murima! Ammorelaka ikharari, Yesu aamwaattamela muthiyana ole mooreerela, ni aamweerela: “Muthiyana, moolamihiwa eretta anyu.” Yesu aamwiiyaathera matata awe ni moowaakuveya muthiyana ole aahookowa ni “aapatxera onvuwiha Muluku” vaavo aathikenlaawe okhalano ekumi yooreera! (Luka 13:10-13) Muthiyana ole aakhalano mathowa ooreera a onvaha ovuwa Yehova. Hiyo-tho nookhalano.

ETTHU HEENI ENNEERIHA ONVAHA OVUWA YEHOVA?

 5. Mathowa heeni nraahuno enneeriha omuttittimiha Yehova?

⁵ Ninnanvaha ovuwa Yehova mwaha wooweera ninnamuttittimiha vantxipale. Nookhalano mathowa mantxipale enneeriha omuttittimiha Yehova. Owo nanwera sootheene, nave ookhalano owera ohimmala. (Nsal. 96:4-7) Osuwela wawe onnooneya mwaha wa itthu opankaawe. Owo tonivanhe ekumi nave onnanikhavihera. (Apok. 4:11) Owo toororomeleya. (Apok. 15:4) Itthu sootheene owo onpakaawe sinnakhumela nnene, ni ikwaha sootheene onnakwanihera soolaihera sawe. (Yeh. 23:14) Khanintikhina vaavo Profeta Yeremiya uulummaawe woohima sa Yehova eeraka: “Variyari va asuweli a miloko ni ilapo saya sothene khavo omphwanaphwana ni weyo”! (Yer. 10:6, 7) Mweekhaikhai, nookhalano mathowa ooreera enneeriha omuttittimiha Tiithi ahu a wiirimu. Mene Yehova onnatthuna etthu ekina ohiya paahi omuttittimiha wahu, owo onnatthuna nsivelo nahu.

 6. Mwaha wa heeni nimmusivelaahu Yehova?

⁶ Ninnanvuwiha Yehova mwaha wooweera ninamusivela vantxipale. Nkawehani mikhalelo sooreera sintxipale sa Yehova sinneeriha omusivela. Owo toomoriwa ikharari ni oopixa murima. (Nsal. 103:13; Yes. 49:15) Owo onniihela nipuro nahu, ni vaavo hiyo ninxupeyaahu owo-tho onnaxupeya. (Zak. 2:12 [2:8, NM]) Owo onnakhweihera weera niwere omwaattamela ntoko nthamwene awe. (Nsal. 25:14; Mit. 17:27) Owo toowiiyeviha; owo “onùramela vathi, wera awehexexe sa wirimu ni sa elapo ya vathi, onnanvinxa muntthupini mulipa òthoiwa.” (Nsal. 113:6, 7) Moota heeni mutthu ahaarowaawe otthuna onvuwiha Muluku ahu mutokweene? — Nsal. 86:12.

 7. Eparakha heeni yoothanleya nraahuno?

 ⁷ Ninnanvuwiha Yehova mwaha wooweera nintthuna weera atthu akina emusuwele. Atthu antxipale khesuwenle ekhaikhai woohima sa Yehova. Mwaha wa heeni? Mwaha wooweera Satana oowala miyuupuwelo saya amwaramwaraka soowootha woohima sa Yehova. (2 Akor. 4:4) Satana onnaaroromeliha atthu weera Yehova toowali, khannipwattha, ni weera ti yoowo onkumihera maxupo mantxipale a mulaponi. Mene hiyo noosuwela ekhaikhai woohima sa Muluku ahu! Nookhalano eparakha yoomwaakiha ni onvuwiha. (Yes. 43:10) Nsalmu 96 onnahima woohima sa onvaha ovuwa Yehova. Vaavo ninthokororaahu masu makina oowuupuxeriwa a nsalmu nna, muupuweleke mwa mikhalelo heeni munrowaanyu onvaha ovuwa Yehova ntoko owo omphwanelaawe.

MOOTA HEENI NINROWAAHU ONVAHA OVUWA YEHOVA NTOKO OWO OMPHWANELAAWE?

 8. Mukhalelo heeni mmoha ninrowaahu onvuwiha Yehova? (Nsalmu 96:1-3)

⁸ Musome Nsalmu 96:1-3. Hiyo pooti onvuwiha Yehova moorweela mwa itthu nnuulumaahu woohima sa owo. Iversu iya, atthu a Yehova ennawompwa ‘omwiipela Yehova,’ ‘ovuwiha nsina nawe,’ ‘olaleya ovuluxa wawe,’ ni ‘olaleya ovuwa wawe variyari va maloko aatthu.’ Mwa mikhalelo sootheene iya, ninnoonihera weera ninnanvuwiha Tiithi ahu a wiirimu. Ayuda oororomeleya ni makristu a eseekulu yoopatxera, khayoovelela wuuluma ni atthu akina woohima sa itthu sooreera Yehova aapakenlaawe ni waakihera mikhalelo sawe. (Dan. 3:16-18; Mit. 4:29) Moota heeni ninrowaahu opaka etthu emoha-moharu?

9-10. Etthu heeni muxuttenraanyu ni yooweereya ya Angelena? (Nwehe efootu.)

⁹ Moone yooweereya emoha ya Angelena, a murokora mmoha onkhala wEstados Unidos. Owo ohaakihera moolipa murima mikhalelo sa Yehova omutekoni weiyo onvaraawewo. Okhala weera aari namuteko munyowani, Angelena aawompwa muthukumano yoowo atthu yaawo yaari anyowani omutekoni iwe, yaaraayano eparakha yoowaaleela makoleeka aya woohima sa moota yaahuuwalaaya. Angelena aareherera ifootu seiyo soonihera moota aaraawe oohakalala mwaha wookhala Namoona a Yehova. Mene, ehaakunveene ophiya emaara awe yoowuuluma, koleeka awe oomutekoni aahiisoonihera ntoko mutthu aahuuwale  ntoko Namoona a Yehova. Owo aapatxera wuuluma moohireerela soororomela sahu. Angelena ohimme ha: “Murima aka wannakimana vantxipale mene kaahuupuwela ha: ‘Keereke kinoomuhiya mutthu omootheraka Yehova? Naari kinoomwaakiha?’”

¹⁰ Vaavo koleega awe aamalinhaawe wuuluma, Angelena aahipaka nivekelo moowaakuveya ni moomaaleleya. Angelena aamwaattamela koleega awe mooreerela ni aamweerela: “Miyo-tho kihuuwale ntoko nyeenyu, kihuuwale ntoko Namoona a Yehova ni mpaka va ka Namoona a Yehova.” Nnaamweera etthu ele yaari yoonyoonyiha, Angelena aavirelela okhala oomaaleleya ni aawoonihera makoleega awe a omutekoni ifootu sawe ni sa asinthamwene awe anvarelaka moohaakalala Yehova, ni mwa nttittimiho aahiwanyeiha soororomela sawe. (1 Ped. 3:15) Yookhumelela aya? Vaavo Angelena aamalinhaawe wuuluma, moonelo wa mulopwana ole waatxentxa. Mpaka owo aahuupuwelela itthu sooreera emaara yeeyo aahuuwalaawe ntoko Namoona a Yehova. Angelena ohimme ha: “Yehova onnaphwanela waakihiwa. Eparakha waakiha nsina nawe.” Hiyo nookhalano eparakha yoovuwiha nsina na Yehova, nnaamweera atthu akina ehimuttittimihaka.

11. Moota heeni makristu eekhaikhai enttharaaya miruku siri va Nsalmu 96:8 ovinyera khalayi?

¹¹ Musome Nsalmu 96:8. Hiyo pooti onvuwiha Yehova ni itthu sahu. Ale emmukokhorela Yehova ikwaha sootheene ennanvuwiha mwa mukhalelo ene yoola. (Mir. 3:9) Mwa ntakihero, ana a israeli yaaveleela soovaha weera epakiwe ni orehereriwa etemplu. (2 Mam. 12:4, 5; 1 Sow. 29:3-9) Atthareli a Yesu yaamukhavihera owo vamoha ni arummwa awe “evarelaka muteko itthu saya.” (Luka 8:1-3) Nave-tho akristu a eseekulu yoopatxera, yaavaha sooveleela saya weera ekhaviheriwe asinna ni asirokora oomunepani. (Mit. 11:27-29) Olelo, hiyo pooti onvuwiha Yehova moorweela mwa sooveleela sahu soohikhanyereriwa.

12. Moota heeni sooveleela sahu sinanvuwihaaya Yehova? (Nwehe efootu.)

¹² Moone yooweereya emoha enoonihera moota sooveleela sahu sinanvuwihaaya Yehova. Soohimmwa sa 2020 sinnuuluma woohima sa ohirupa epula weereñye oZimbabwe. Atthu imiliyawu sintxipale yannaviriha etala, omuhela mpuwa murokora mmoha oniitthaniwa Prisca. Nnaamweera aaviriha etala, Prisca aavirelela olaleera Namararu ni Namathanu isemana sootheene, nnamweera yaaphinye etempu yoolima. Anamwaattamanani awe  yannamuuluma moohireerela mwaha woorowa muteko woolaleera ohiya orowa omatta, emweerelaka, “Nyuwo munookhwa etala.” Prisca annawaakhula ahihovelaka eeraka, “Yehova khanaahiya arumeyi awe.” Ehivinreene etempu yintxipale, Prisca aakhaviheriwa ni soovaha sa mareherero ahu. Soovaha iyo saawereya mwaha wa sooveleela sahu. Anamwaattamanani awe Prisca yaatikiniheya ni yaamweerela, “Muluku khoohiñyeni nyuwo, nto nintthuna oxuttera woohima sa owo.” Anamwaattamanani awe 7 yaapatxera woonela mithukumano sa mmulokoni.

13. Moota heeni mukhalelo ahu onanvuwihaaya Yehova? (Nsalmu 96:9)

¹³ Musome Nsalmu 96:9. Hiyo pooti onvuwiha Yehova moorweela mwa mukhalelo ahu. Anamakeya yaavara mutemplu mwa Yehova yannatthuneya okhala ootteela weerutthuni. (Ott. 40:30-32) Menento, etthu yootepa otthuneya opwaha otteela weerutthuni waari mukhalelo wooreera. (Nsal. 24:3, 4; 1 Ped. 1:15, 16) Hiyo onnatthuneya wiilipihera vantxipale weera nihiye “omutthu wa khalai”, mikhalelo saya soohireera ni miteko saya soonanara ni owara ‘omutthu munyowani’ ori wuupuwela ni opaka itthu sinoonihera onvuwiha Yehova. (Akol. 3:9, 10) Ekhaviheriwaka ni Yehova, mpaka atthu ale empaka itthu soowuliha muru ni soonanara ennatxentxa ni aawara omutthu munyowani.

14. Etthu heeni nyuwo muxuttenraanyu ni yooweereya ya Jack? (Nwehe efootu.)

¹⁴ Moone yooweereya ya Jack, mulopwana yoowo aari oowali, ni oowoopiha yoowo aavahinwe nsina na Demoniyu. Mwaha wa ikrime aapankaawe, Jack aalamuliwa wiiviwa. Nto, emaara yeeyo aawehereraawe nihiku noowiiviwa, Jack aahaakhulela yoosoma ya Biblya ni munna mmoha yoowo aaxekura ekateya weiwo aaraawewo Jack. Ahipwatthaka moota aahuuwalaawe, Jack aahihiya omutthu awe wa khalayi ni noovira etempu aahikhala oolikaneene weera apatisiwe. Jack aatxentxa vantxipale, mpaka nihiku iiviwaawe makwaarta makina yaahinla vaavo yaalaxeranaaya ni Jack. Poliisiya mmoha yoowo aavara ekateya yeeyo aawaleliwaawe Jack, ohimme ha: “Jack aari mutthu ootepa woopiha aatthukinwe nipuro nna. Mene vano owo mutthu ooreera murima.” Evinreene esemana emoha nuumala wiiviwa Jack, asinna yaatthikenle okateya iwe weera yahoolele muthukumano, yaahimphwanya peresu mmoha yoowo aapatxera woonela  muthukumano. Eheeni yaamweerinhe presu owo woonela muthukumano? Owo aahitikiniheya ni matxentxo Jack aapankaawe ni aatthuna osuwela eheeni aatthuneyaawe opaka weera amukokhoreleke Yehova. Ononeya weera, mukhalelo ahu pooti onvaha ovuwa Tiithi ahu a wiirimu! — 1 Ped. 2:12.

MOOTA HEENI YEHOVA ONROWAAWE OVUWIHA NSINA NAWE MUHOOLO?

15. Moota heeni Yehova onrowaawe ovuwiha nsina nawe moomalela muhoolo? (Nsalmu 96:10-13)

¹⁵ Musome Nsalmu 96:10-13. Iversu soomalihera sa nsalmu 96 sinnamoonihera Yehova ntoko Mphuki ni Mwene a xariya. Moota heeni Yehova onrowaawe ovuwiha nsina nawe muhoolo? Moorweela mwa othoriha wawe. Moohipisa va, onoomunyaanya Babilonia mutokweene mwaha wa soowootha omwara-mwanraawe woohima sa nsina nawe nootteela. (Apok. 17:5, 16; 19:1, 2) Atthu akina enrowa woona onyaanyiwa wa Babilonia mutokweene pooti weeraka enoopwexererana vamoha ni hiyo wa okokhorela weekhaikhai. Okhwipi waya, mpuwa mwa ekhotto ya Harmagedoni, Yehova onoonyaanya mikhalelo sootheene sa elapo ela ya Satana, aanyaanyaka atthu ootheene ehintthuna omukokhorela ni ennanariha nsina nawe, mene onimwaavuluxa atthu ootheene emmusivela, emmwiiwelela, ni eniiteexa mwaha wonvaha ovuwa. (Mar. 8:38; 2 Ates. 1:6-10) Wavira weereriwa woomalihera weiwo onrowa ottharana ni olamulela wa Kristu wa iyaakha 1.000, Yehova onootteeliha nsina nawe moomalela. (Apok. 20:7-10) Etempu eyo, ‘elapo enoosareya osuwela ovuwa wa Yehova, ntoko maahi enakhuneelaaya emaka moowiixani mwaya.’ — Hab. 2:14.

16. Etthu heeni nyuwo mulakenlaayu opaka? (Nwehe efootu.)

¹⁶ Onrowa okhala woohakalaliha vaavo soopattuxiwa sootheene sinrowaaya onvaha ovuwa Yehova ntoko nsina nawe nimphwanelaaya. Mene niwehereraka ophiya nihiku nno, onnatthuneya opaka eparte ahu ninvuwihaka Muluku ahu imaara sootheene ninkhalaahuno eparakha. Weera ettittimihere mwaha ola wootepa otthuneya, Mukuttula woolamulela woothanla Nsalmu 96:8 ntoko yoolepa ya eyaakha ya 2025: ‘Munvahe ovuwa Yehova ntoko nsina nawe nimphwanelaaya.’